சிறிலங்கா பொதுஜன முன்னணியின் ஜனாதிபதி வேட்பாளரான கோத்தபயா ராஜபக்ஸவை ஈழ மக்கள் ஜனநாயகக் கட்சியின் செயலாளர் டக்ளஸ் தேவானந்தா 19.08 அன்று சந்தித்தார்.

முக்கியமான பிரச்சினைகள் மற்றும் உடனடியாகத் தீர்வு காணப்பட வேண்டிய விடயங்கள் என கருதப்படும் விடயங்களை பட்டியலிட்டு மகஜர் ஒன்றும் கோத்தபயாவிடம் கையளிக்கப்பட்டது.

இச்சந்திப்பில் திருப்தி ஏற்பட்டதாகவும் தமிழ் மக்களின் அடிப்படை பிரச்சினைகளை தீர்ப்பதற்கு கோத்தபயா ஆர்வம் காட்டி விருப்பம் தெரிவித்ததாகவும் இதை தான் வரவேற்பதாகவும் அறிக்கையொன்று வெளியிடப்பட்டுள்ளது.

இதில் மேலும் தெரிவிக்கப்பட்டிருப்பதாவது, எந்தவொரு ஆட்சி வந்தாலும் அவர்களுடன் பேரம் பேசி தமிழ் மக்களின் அபிலாசைகளை தீர்த்து வைப்பதே எமது ஆழமான இலட்சியமாகும்.

எனவே எவரும் விரும்பியோ விரும்பாமலோ ஆட்சி அதிகாரத்தில் உட்காரப் போகின்ற கோத்தபயா ராஜபக்ஸவை எதுவித அரசியல் பலமுமின்றி அந்த அரசியல் பலத்தை மக்கள் இனிவரும் காலத்தில் வழங்குவர் என்ற நம்பிக்கையோடு எமது நல்லிணக்க உறவுகளோடு மட்டும் கோத்தபயா ராஜபக்ஸவுடன் பரஸ்பரம் உரையாடியிருந்தோம்.

இலங்கைத் தீவின் சகல இன மக்களும் ஏற்றுக் கொண்ட 13ஆவது திருத்தச் சட்டத்தை முழுமையாக நடைமுறைப்படுத்துவதில் இருந்து தொடங்கி, அதை மேலும் பலப்படுத்தி செல்வதால், எமது தேசத்தின் அபிவிருத்தி மேலும் சிறந்து விளங்கும் எனவும் தெரிவிக்கப்பட்டுள்ளது.

முன்னாள் பாதுகாப்புச் செயலாளர் கோத்தபயா ராஜபக்ஸ மீதான போர்க் குற்றச்சாட்டுக்களை தமிழ் மக்கள் மன்னித்து மறக்க வேண்டும் என இணைந்த வடக்கு கிழக்கு மாகாண முன்னாள் முதலமைச்சர் வரதராஜப் பெருமாள் தெரிவித்துள்ளார்.

யாழ்ப்பாணத்திலுள்ள அவரது கட்சி அலுவலகத்தில் இன்று (19.08) அவர் நடத்திய பத்திரிகையாளர் சந்திப்பின் போதே மேற்கண்டவாறு தெரிவித்தார்.

இதனிடையே, முன்னாள் பாதுகாப்புச் செயலாளர் கோத்தபயா ராஜபக்ஸ மீதான போர்க் குற்றச்சாட்டுக்கள் தொடர்பாக தமிழ் மக்கள் இனி அக்கறை செலுத்த வேண்டியதில்லை. ஏனெனில் போர்க் குற்றத்தில் கோத்தபயா மட்டும் ஈடுபடவில்லை. போர் நடைபெற்ற போது தமிழீழ விடுதலைப் புலிகளும் போர்க் குற்றத்தில் ஈடுபட்டனர் என சர்வதேசம் கூறி வருகின்றது.

ஆனால் ஏதோ கோத்தபயா மட்டும் தான் போர்க் குற்றத்தில் ஈடபட்டதாக மாயை உருவாக்கப்பட்டுள்ளது. இது முழுக்க முழுக்க அரசியல் ரீதியான குற்றச்சாட்டேயாகும்.

எனவே தமிழ் மக்கள் இவற்றை மறந்து மன்னித்து அபிவிருத்தி நோக்கி பயணிக்க வேண்டும் எனவும் தெரிவித்தார்.

இதேவேளை அண்மையில் சுகததாச உள்ளக அரங்கில் இடம்பெற்ற பொதுஜன பெரமுனவின் தேசிய மாநாட்டில் வரதராஜப்பெருமாளும் கலந்து கொண்டிருந்தார் என்பது குறிப்பிடத்தக்கது.

யாழ்ப்பாணம் சென்ஜோன்ஸ் கல்லூரியின் பழைய மாணவரான பேராசிரியர் நிஷான் கனகராஜா எதிர்வரும் நவம்பர் 04 ஆம் திகதி தொடக்கம் செயற்படும்படியாக பிரித்தானியாவின் லெஸ்ரர் பல்கலைக்கழகத்தின் துணைவேந்தராக நியமனம் பெறுகின்றார்.

உலகப் பல்கலைக்கழகங்களின் தரவரிசையில் 2018 ஆம் ஆண்டுத் தரவுகளின் படி லெஸ்டர் பல்கலைக்கழகம் 167 ஆம் இடத்தில் உள்ளது. பிரித்தானியாவில் 25 ஆம் இடத்தில் உள்ளது.

பேராசிரியர் கனகராஜா 1985 ஆம் ஆண்டு கணிதத்துறையில் உயர்தரப் பரீட்சைக்குத் தோற்றி நான்கு பாடங்களிலும் அதிவிசேட சித்தி பெற்று கேம்பிறிஜ் பல்கலைக்கழத்திற்குத் தெரிவாகிக் கல்வியைப் பெற்றவர் ஆவர்.

1966 இல் சுண்டிக்குளியில் பிறந்த பேராசிரியர் நிஷான் கனகராஜாவின் தந்தை கனகராஜா யாழ். சென். ஜோன்ஸ் கல்லூரியின் ஆசிரியராகவும் தாய் சுண்டுக்குளி மகளிர் கல்லூரியின் ஆசிரியையாகவும் இருந்தவர்கள் ஆவர்.

லெஸ்ரர் பல்கலைக்கழக இணையத்தளத்தைப் பார்வையிட…
https://le.ac.uk/n…/2019/august/20-new-vice-chancellor-named

இதேவேளை சென் ஜோன்ஸ் கல்லூரியில் 1985 ஆம் ஆண்டின் உயர்தரப் பிரிவில் கற்ற பேராசிரியர் றமா திருநாமச்சந்திரன் பிரித்தானியாவின் Canterbury Christ Church University இல் துணைவேந்தராக உள்ளார் என்பதுவும் குறி்ப்பிடத்தக்கது.

சிறீலங்கா அரசு லெப். ஜெனரல் சவேந்திர சில்வாவை இராணுவத்தளபதியாக நியமித்தது இனங்களுக்கு இடையிலான நல்லிணக்கத்தை பாதிக்கும் என கனடா தெரிவித்துள்ளது.

இது தொடர்பில் கனேடியத் தூதரகம் இன்று (20) வெளியிட்டுள்ள செய்திக்குறிப்பில் மேலும் தெரிவித்துள்ளதாவது:

சில்வாவின் நியமனம் இனங்களுக்கு இடையிலான நல்லிணக்கத்தை பாதிப்பதுடன் சிறீலங்காவில் மேற்கொள்ளப்படவேண்டிய நீதி விசாரணைகளையும் பாதிக்கும். எனவே கனடா அரசு ஆழ்ந்த கவலையடைந்துள்ளது.

சில்வா மீது மனித உரிமை மீறல்கள் குறித்த கடுமையான குற்றச்சாட்டுக்கள் உள்ளன. போரின் போது அவர் பெருமளவான மனித உரிமை மீறல்களில் ஈடுபட்டிருந்தார் என அதில் மேலும் தெரிவிக்கப்பட்டுள்ளது.

மேஜர் ஜெனரல் சவேந்திர சில்வாவை சிறீலங்கா இராணுவத்தளபதியாக நியமனம் செய்தது தமக்கு மிகப்பெரும் கவலைகளைத் தோற்றுவித்துள்ளதாக ஐரோப்பிய ஒன்றியம் இன்று (20) வெளியிட்டுள்ள அறிக்கையில் தெரிவித்துள்ளது.

இந்த நியமனமானது ஐக்கிய நாடுகள் சiயின் மனித உரிமைகள் ஆணைக்குழுவிற்கு சிறீலங்கா வழங்கிய உறுதிமொழி குறித்து கேள்வியை எழுப்பியுள்ளது. போர்க்குற்ற நீதி விசாரணைகளை மேற்கொள்வேண்டும் என்று நிறைவேற்றப்பட்ட ஐ.நா தீர்மானத்திற்கு சிறீலங்கா உடன்பட்டிருந்தது.

ஐ.நா மனித உரிமைகள் ஆணைக்குழுவின் ஆணையாளர் மிசேல் பசெலட் தெரிவித்த கருத்தையே ஐரோப்பிய ஒன்றியமும் தெரிவித்துள்ளது. அதாவது சில்வா மீது மனித உரிமை மீறல்கள் மற்றும் மனிதாபிமானத்திற்கு எதிரான குற்றங்கள் உள்ளதாக பசெலட் தெரிவித்திருந்தார்.

இந்த நியமனமானது இனங்களுக்கு இடையிலான நல்லிணக்கத்தை பாதிப்பதுடன், போரில் பாதிக்கப்பட்டவர்களுக்கும் தவறான செய்திகளை வழங்கும் என ஐரோப்பிய ஒன்றியம் தனது அறிக்கையில் மேலும் தெரிவித்துள்ளது.

வவுனியாவில் தனது 26வயதுடைய மகனைத் தேடி தொடர் போராட்டம் மேற்கொண்ட தந்தை ஒருவர் நேற்று இரவு சுகயீனமாக வைத்தியசாலையில் அனுமதிக்கப்பட்டிருந்த வேளை இன்று‌ அதிகாலை உயிரிழந்துள்ளதாக காணாமல் ஆக்கப்பட்ட உறவுகள் தெரிவித்துள்ளனர்.

வவுனியாவில் தமது மகனைத் தேடி சுழற்சி முறையிலான தொடர்போராட்டம் இன்றுடன் 913 ஆவது நாளை எட்டியுள்ளது இந்நிலையில் தனது மகன் அச்சுதன் வயது 26 கடந்த 2009ஆம் ஆண்டு ஓமந்தை இராணுவச் சோதனைச்சாவடியில் வைத்து இராணுவத்தினரிடம் கையை உயர்த்தி ஒப்படைக்கப்பட்ட தனது மகனை மீட்கும் போராட்டத்தில் இணைந்திருந்த வேலாயுதம் செல்வராசா 56வயது மகிழங்குளம் ஓமந்தை இடத்தைச் சேர்ந்தவரே இவ்வாறு நேற்று இரவு 10மணியளவில் வைத்தியசாலையில் உயர் குருதி அழுத்தம் காரணமாக‌ அனுமதிக்கப்பட்டிருந்தவர் இன்று உயிரிழந்துள்ளார். இவருடைய மனைவி தொடர்ந்து போராட்டத்தில் ஈடுபட்டு வருகின்றார்.

இதேவேளை வவுனியா போராட்டத்தில் ஈடுபட்ட காணாமல் ஆக்கப்பட்ட உறவுகள் இவருடன் நான்கு பேர் உயிரிழந்துள்ளனர். வடகிழக்கு மாவட்டத்தில் போராட்டம் மேற்கொண்டு வரும் உறவுகள் இன்றுவரையிலும் 39பேர் தமது பிள்ளைகளைத் தேடிய போராட்டத்தில் உயிரிழந்துள்ளமை குறிப்பிடத்தக்கது.

தனது அமெரிக்க குடியுரிமையை துறந்துள்ளதாக சிறீலங்கா சுதந்திரக் கட்சியின் அரச தலைவர் வேட்பாளர் கோத்தபாய ராஜபக்சா தெரிவித்தபோதும் அமெரிக்காவின் குடிவரவு மற்றும் குடியகல்வு திணைக்களத்தின் பதிவில் அது குறிப்பிடப்படவில்லை என்ற கேள்விகள் எழுந்துள்ள நிலையில் தமது பதிவேடுகள் ஒரு சில மாதங்களுக்கு முன்னைய தகவல்களையே கொண்டிருக்கும் என சிறீலங்காவுக்கான அமெரிக்கத் தூதுவர் அலைனா தெப்லிஸ் தெரிவித்துள்ளார்.

நேற்று (19) கொழும்பில் ஊடகவியலாளர்களிடம் பேசும்போதே அவர் இவ்வாறு தெரிவித்துள்ளார். அங்கு அவர் மேலும் தெரிவித்துள்ளதாவது:
எமது ஆவணங்கள் ஒரு சில மாதங்களின் முன் உள்ள தகவல்களைக் கொண்டதாகவே வெளியிடப்படும், எனவே புதிய தகவல்கள் எதிர்வரும் ஆவணங்களில் காணப்படும்.

குடியுரிமையை துறப்பதற்கு சில வழிமுறைகள் பின்பற்றப்பட வேண்டும், அதனை கைவிடுவது சாத்தியமானதே. ஆனால் ஒரு குறிப்பிட்ட நபரின் தகவல் தொடர்பில் என்னால் பதிலளிக்க முடியாது. அது எமது நாட்டின் சட்டங்களுக்கு முரனானது.

மேஜர் ஜெனரல் சவேந்திர சில்வா சிறீலங்கா இராணுவத்தளபதியாக நியமனம் பெற்றது கவலைதரும் விடயம், இது எமது நாட்டின் நிலைப்பாடு. ஆனால் ஒரு நாட்டிற்கு ஆணையிடுவதற்கும், கவலை தெரிவிப்பதற்கும் வேறுபாடுகள் உண்டு. அமெரிக்காவின் அரசியல் மற்றும் முடிவுகளை பகிர்ந்துகொள்வதே எனது கடமை என அவர் மேலும் தெரிவித்துள்ளார்.

யப்பானின் மூத்த இராஜதந்திரியும், ஐக்கிய நாடுகள் நிர்வாகசபையின் உறுப்பினருமான யாசூசி அகாசி அவர்கள் எதிர்க்கட்சித் தலைவரும், முன்னாள் சிறீலங்கா அரச தலைவருமான மகிந்தா ராஜபக்சாவை சந்தித்து கலந்துரையாடியுள்ளார்.

நேற்று (19) இடம்பெற்ற இந்த சந்திப்பை முன்னாள் சிறீலங்கா வெளிவிவகார அமைச்சர் பேராசிரியர் ஜி.எல்.பீரீஸ் ஒழுங்குபடுத்தியிருந்தார். இந்த சந்திப்பில் கேகலிய றம்புக்வெல மற்றும் எதிர்க்கட்சித் தலைவரின் செயலாளர் கர்சா விஜயவர்த்தனா ஆகியோரும் பங்குபற்றியிருந்தனர்.

மகிந்தாவின் சகோதரர் கோத்தபாய அரச தலைவர் தேர்தலில் போட்டியிடுவது தொடர்பான தகவல்கள் வெளியாகியதைத் தொடர்ந்து மேற்குலகின் இராஜதந்திரிகள் மகிந்தாவை தொடர்ச்சியாக சந்தித்துவருவது குறிப்பிடத்தக்கது.

விடுதலைப்புலிகளுக்கும் சிறீலங்கா அரசுக்கும் இடையில் இடம்பெற்ற சமாதான உடன்படிக்கை மற்றும் அதனைத் தொடர்ந்து தமிழ் மக்களுக்கு உலகநாடுகளால் இழைக்கப்பட்ட அநீதிகளில் அகாசி முக்கிய பங்கு வகித்தது இங்கு குறிப்பிடத்தக்கது.