வவுணதீவில் சிறீலங்கா காவல்துறையினர் மீது மேற்கொள்ளப்பட்ட தாக்குதல் தொடர்பில் எந்தவித ஆதாரமும் இன்றி கைது செய்யப்பட்டு தடுத்துவைக்கப்பட்டிருந்த முன்னாள் போராளி அஜந்தன் இன்று (11) விடுதலை செய்யப்பட்டுள்ளார்.

சிறீலங்கா நாடாளுமன்ற உறுப்பினர் மனோ கணேசன் அவர்கள் மேற்கொண்ட முயற்சியினால் அவர் விடுதலைசெய்யப்பட்டுள்ளார்.

கடந்த வருடம் ஒக்டோபர் மாதம் சிறீலங்காவின் தென்னிலங்கையில் ஏற்பட்ட அரசியல் குழப்பநிலையின் தொடர்ச்சியாக நவம்பர் மாதம் வவுணதீவு தாக்குதல் மேற்கொள்ளப்பட்டிருந்தது. ஆனால் வழமைபோல எந்தவிதமான ஆதாரங்களையும் சேகரிக்காத சிறீலங்கா அரசும் அதன் காவல்துறையும் முன்னாள் போராளிகளை நோக்கி கையை காண்பித்திருந்தது.

தமிழ் மக்கள் மீது சிறீலங்கா அரசு எவ்வாறு பொய்யான குற்றச்சாட்டுக்களை சுமத்துகின்றது மற்றும் எவ்வாறு தமிழ் மக்களை பொய்யாக தண்டிக்கின்றது என்பதற்கான அண்மையா சாட்சியமாக முன்னாள் போராளி அஜந்தன் உள்ளார்.

முன்னாள் போராளி அஜந்தன் கைது செய்யப்பட்டு ஆதாரங்கள் உறுதிப்படுத்தப்படாத நிலையில் தடுத்துவைக்கபட்டிருந்தார். சிறீலங்காவில் தடுப்புக்காகவில் உள்ள அரசியல் கைதிகளைப் போலவே அவரும் விசாரணைகள் இன்றி மற்றும் குற்றங்கள் உறுதிப்படுத்தாத போதும் தடுத்துவைக்கபட்டிருந்தார்.

விசாரணைகள் இன்றி தடுத்து வைப்பதற்கு சிறீலங்கா அரசிடம் உள்ள ஓரே ஆதாரம் தமிழர் என்ற சிறுபான்மை இனம் மற்றும் முன்னாள் போராளி என்ற பெயர். ஆனால் தற்போது வவுணதீவு தாக்குதலை மேற்கொண்டது சிறீலங்கா அரசில் அங்கம் வகிக்கும் முஸ்லீம் அரசியல்வாதிகளின் துணையுடன் இயங்கி வரும் தேசிய தௌஹீத் ஜமாஅத் என்ற அமைப்பு என்பது உறுதியாகியுள்ளது.

சிறீலங்கா படையினரால் பயிற்சிகள் வழங்கப்பட்ட இந்த அமைப்பே கடந்த மாதம் கொழும்பில் இடம்பெற்ற தற்கொலைத் தாக்குதல்களை நிகழ்த்தியிருந்ததுடன், அந்த தாக்குதல்களில் 250 இற்கு மேற்பட்ட அப்பாவி மக்கள் கொல்லப்பட்டிருந்தனர். தமிழ் கிறிஸ்த்தவ மக்களை நோக்கி இலக்குவைப்பட்ட இந்த தாக்குதல்களில் கொல்லப்பட்டவர்களில் பெரும்பாலானவர்கள் தமிழ் மக்கள்.

கைது செய்யப்பட்டவர்களே தற்போது வவுணதீவுத் தாக்குதலை உறுதிப்படுத்தியுள்ள நிலையில் தமிழ் மக்கள் மீதான சிறீலங்கா அரசின் பொய் வழக்குகள் மற்றும் பொய்யான குற்றச்சாட்டுக்கள் அம்பலமாகி உள்ளது. அதாவது தமிழ் மக்களை நீதிக்குப்புறம்பாக சிறீலங்கா அரசு தண்டித்து வருவது இதன் மூலம் உறுதிப்படுத்தப்பட்டுள்ளது.

நீதிக்குப்புறம்பான கைதுகள், கடத்தல்கள், படுகொலைகள் மற்றும் காணாமல் போகச் செய்தல் என்பவற்றை சிறீலங்கா அரசு அப்பாவித் தமிழ் மக்கள் மீது எவ்வாறு நிகழ்த்துகின்றது என்பதை அனைத்துலக சமூகமும், மனித உரிமை அமைப்புக்களும் இதன்மூலம் அறிந்துகொள்ள வேண்டும்.
அது மட்டுமல்லாது இந்த சம்பவத்தை தமிழ் அமைப்புக்கள் அனைத்துலக சமூகத்தின் கவனத்திற்கு கொண்டுசெல்வதுடன், சிறீலங்காவில் உள்ள சட்டங்களை சிறீலங்கா அரச படையினர் எவ்வாறு தமிழ் மக்கள் மீது தவறாகப் பயன்படுத்துகின்றனர் என்பதையும் நாம் வெளிஉலகின் முன் கொண்டுவரவேண்டும் என அரசியல் அவதானி ஒருவர் கருத்துத் தெரிவித்துள்ளார்.

விசாரணைகள் எதுவுமின்றி சிறீலங்கா அரசின் சிறைகளில் வாடும் தமிழ் அரசியல் கைதிகளும், இவ்வாறான பழிவாங்கல் மற்றும் நீதிக்குப் புறம்பாக சாட்சியங்கள் எதுவுமின்றி கைது செய்யப்பட்டவர்களே. எனவே அவர்களையும் சிறீலங்கா அரசு உடனடியாக விடுதலை செய்யவேண்டும்.
ஒரு சிறுபான்மை இனமக்களை சாட்சியங்கள் எதுவுமின்றி எழுந்தமானமாக கைது செய்வதும் விசாரணைகள் இன்றி குற்றங்களை உறுதிப்படுத்தாது தடுத்து வைப்பதும் இன ஒடுக்குமுறையின் வடிவங்களே.

அவசரகாலச்சட்டத்தை பயன்படுத்தி கைது செய்யப்பட்டவர்கள் மற்றும் துன்புறுத்தப்பட்டவர்கள் தொடர்பில் சிறீலங்கா அரசு மீது சுயாதீன விசாரணைகளுக்கான கோரிக்கையை நாம் முன்வைப்பதுடன், அதற்கான ஆதரவுகளையும் அனைத்துலக மட்டத்தில் திரட்டவேண்டும் என அவர் மேலும் தெரிவித்துள்ளார்.

கடந்த ஏப்பிரல் மாதம் சிறீலங்காவில் இடம்பெற்ற தற்கொலைத் தாக்குதல்கள் சிறீலங்கா படைத்தரப்பையும், அரச தரப்பையும் கடுமையான அச்சத்திற்குள் தள்ளியுள்ளதாக தெரிவிக்கப்படுகின்றது.

அதிக அச்சத்துடன் சோதனை நடவடிக்கையில் ஈடுபட்டுவரும் சிறீலங்கா படையினர் பல இடங்களில் துப்பாக்கிப் பிரயோகங்களை மேற்கொண்டுள்ளதாக கொழும்புத் தகவல்கள் தெரிவித்துள்ளன.

இன்று (11) காலை தென்னிலங்கையில் உள்ள வத்தளை குனுபிட்டியா பகுதியில் சிறீலங்கா படையினரின் சோதனை நிலையத்தில் நிற்காமல் சென்ற வாகனம் ஒன்றின் மீது சிறீலங்கா கடற்படைனர் மேற்கொண்ட துப்பாக்கித் தாக்குதலில் ஒருவர் கொல்லப்பட்டுள்ளார்.

இதனிடையே, பிறிதொரு இடத்தில் சோதனை நிலையத்தில் நிறுத்தாமல் சென்ற வாகனத்தின் மீது கடற்படையினர் மேற்கொண்ட துப்பாக்கிப் பிரயோகத்தில் மேலும் ஒரு சாரதி படுகாயமடைந்துள்ளதாக சிறீலங்கா கடற்படைப் பேச்சாளர் லெப். கொமாண்டர் இசுறு சூரியபண்டாரா.

முள்ளிவாய்க்காலில் சிறீலங்கா அரசு மேற்கொண்ட இனப்படுகொலையின் 10 ஆவது ஆண்டு நினைவுதினம் தொடர்பான கருத்தரங்கு ஒன்று பிரித்தானியாவில் உள்ள லண்டன் பல்கலைக்கழகத்தில் நேற்று (10) இடம்பெற்றிருந்தது.

இந்த கருத்தரங்கின் போது சிறீலங்கா அரசு மேற்கொண்ட மனித உரிமை மீறல்கள் தொடர்பான புகைப்படக் கண்காட்சி ஒன்று உண்மைக்கும் நீதிக்குமான அனைத்துலக அமைப்பின் பணிப்பாளர்களில் ஒருவரும், பி.பி.சி ஊடகத்தின் முன்னாள் ஊடகவியலாளருமான பிரான்ஸிஸ் ஹரிசனினால் ஒழுங்கு செய்யப்பட்டிருந்தது.

பலர் கலந்து கொண்ட இந்த நிகழ்விற்கு லண்டன் பல்கலைக்கழகத்தின் அனைத்துலக உறவுகள் கற்கைநெறிக்கான விரிவுரையாளர் மார்ச் லெஃபி தலைமை தாங்கியிருந்தார். மார்க் அரசியல் மற்றும் அனைத்துலக கற்கை நெறிக்கான திணைக்களத்தின் தலைவருமாவார்.

மேலும் உண்மைக்கும் நீதிக்குமான அனைத்துலக அமைப்பின் தலைவரும், சிறீலங்காவில் இடம்பெற்ற படுகொலைகள் மற்றும் மனித உரிமை மீறல்கள் தொடர்பாக ஐக்கிய நாடுகள் சபையின் செயலாளர் நாயகத்தினால் அமைக்கப்பட்ட நிபுணர் குழுவின் முன்னாள் உறுப்பினருமான ஜஸ்மின் சூகா அவர்களும் இந்த கருத்தரங்கில் கலந்து கொண்டு கருத்துரைகளை வழங்கியிருந்தார்.

அனைத்துலக மனித உரிமைகள் மற்றும் குற்றவியல் சட்ட நிபுணர் றுபேட் ஸ்கில்பெக்கும் இந்த கருத்தரங்கில் கலந்து கொண்டது குறிப்பிடத்தக்கது.
லண்டன் பல்கலைக்கழகத்தின் மேதல்களும், நீதியும் மற்றும் உரிமைகளுக்குமான மையம் இந்த நிகழ்வை ஒழுங்கு செய்திருந்தது.

கட்டுநாயக்கா விமாநிலையத்தின் பாதுகாப்பை மேலும் பலப்படுத்தியுள்ளதாக சிறீலங்கா அரசு நேற்று (10) அறிவித்துள்ளது. அதற்குரிய அறிவுறுத்தல்களையும் சிறீலங்கா அரசின் விமான போக்குவரத்து திணைக்களம் வெளியிட்டுள்ளது.

இந்த நடவடிக்கைகள் விமானச் சேவையை பாதிக்காது எனவும்இ ஏப்பிரல் மாதம் இடம்பெற்ற தாக்குதல்களைத் தொடர்ந்தே இந்த நடவடிக்கைகள் மேற்கொள்ளப்படுவதாகவும் சிறீலங்காவின் விமானப் போக்குவரத்து துறை தலைவர் தம்மிக்க ரணதுங்கா தெரிவித்துள்ளார்.

இந்த வடிவடிக்கைகள் பயணிகளுக்கு மிகுந்த சிரமத்தை கொடுக்கும் அதனை அவர்கள் பொறுத்துக்கொள்ள வேண்டும். சிறீலங்காப் படையினரும் அதிகளவில் விமான நிலையத்தில் நிறுத்தப்படுவார்கள் என அவர் மேலும் தெரிவித்துள்ளார்.

சிறீலங்கா அரசின் புதிய நடைமுறைகளின் பிரகாரம் பயணிகள் நான்கு மணிநேரத்திற்கு முன்னர் விமான நிலையத்திற்கு செல்ல வேண்டும். பயணிகளை தவிர்ந்த ஏனையோர் விமான நிலையத்திற்குள் செல்வது முற்றாக தடை செய்யப்பட்டுள்ளதுடன்இ வாகனங்களுக்கும் அதிகளவான கட்டுப்பாடுகள் விதிக்கப்பட்டுள்ளது.

சிறீலங்கா அரசு மேற்கொண்டுவரும் இந்த நடவடிக்கைகள் பயணிகள் மத்தியில் கடும் அச்சத்தை ஏற்படுதுவதுடன்இ சிறீலங்காவின் சுற்றுலாத்துறையையும் அது கடுமையாக பாதிக்கும் என தெரிவிக்கப்படுகின்றது.

முல்லைத்தீவு புதுக்குடியிருப்பு பொலீஸ் பிரிவிற்கு உட்பட்ட மூங்கிலாறு வடக்கு பகுதியில் தனிநபர் ஒருவரின் காணிக்குள் இன்று நீதிமன்ற உத்தரவிற்கு அமைவாக தோண்டும் நடவடிக்கை ஒன்று முன்னெடுக்கப்பட்டுள்ளது.

விடுதலைப்புலிகளின் முக்கிய ஆவணங்கள் இருப்பதாக தெரிவித்து நீதிமன்றின் அனுமதி பெறப்பட்டு இந்த அகழ்வு நடவடிக்கை இன்று காலை இடம்பெற்றது

இதன்போது நீதிமன்ற பதிவாளர் மற்றும் பொலீசார்,  படையினர், தொல்பொருள் திணைக்கள அதிகாரிகள்,பிரதேச செயலக அதிகாரிகள்,கிராம அலுவலகர் ஆகியோர் முன்னிலையில் குறித்த காணிப்பகுதியில் தோண்டப்பட்ட போதும் எதுவித பொருட்களும் அங்கிருந்து மீட்கப்படவில்லை.

 முள்ளிவாய்கால் பகுதியில் சிறீலங்கா அரசு மேற்கொண்ட இனஅழிப்பின் பத்தாவது வருடத்தை நினைவுகூரும் முயற்சிகளை தமிழ் மக்கள் மேற்கொண்டுவருகையில் அதனை சீர்குலைக்கும் வகையில் சிறீலங்கா அரசும் அதன் படைகளும் வடக்கில் கைதுகள் மற்றும் தேடுதல்கள் என்ற போர்வையில் வன்முறைகளை மேற்கொண்டுவருவது இங்கு குறிப்பிடத்தக்கது.

சிறீலங்காவின் தலைநகர் கொழும்பில் உள்ள சங்கரி-லா ஆடம்பரவிடுதியில் இடம்பெற்ற குண்டுத் தாக்குதலில் காயமடைந்த அமெரிக்க தூதரகத்தின் வர்த்தகப் பிரிவு அதிகாரி செல்சியா டெகமின்டா சிங்கப்பூரில் சிகிச்சை பெற்றுவந்ததுள்ள நிலையில் அது பலனளிக்காது மரணமடைந்துள்ளதாக ஏ.எப்ஃபி செய்தி நிறுவனம் இன்று (9) தெரிவித்துள்ளது.

இது தொடர்பில் அது மேலும் தெரிவித்துள்ளதாவது:

கடந்த மாதம் 21 ஆம் நாள் சிறீலங்காவின் தலைநகரிலும், கிழக்கு மாகாணத்திலும் உள்ள மூன்று ஆடம்பர விடுதிகளிலும் மூன்று தேவாலயங்களிலும் இஸ்லாமிய தீவிரவாதிகள் தற்கொலைத்தாக்குதல்களை மேற்கொண்டிருந்தனர்.

இந்த தாக்குதல்களில் 258 பேர் கொல்லப்பட்டதுடன் 500 இற்கு மேற்பட்டோர் காயமடைந்திருந்தனர். கொல்லப்பட்டவர்களில் 45 பேர் வெளிநாட்டவர்கள். டியூக் பல்கலைக்கழகத்தில் பட்டப்படிப்பை நிறைவுசெய்த செல்சியா அமெரிக்காவின் வர்த்தகத் திணைக்களத்தில் பணிபுரிந்திருந்தார். அதன் பின்னர் சிறீலங்காவில் பணியாற்றும் நோக்கத்துடன் அவர் அண்மையில் சிறீலங்கா வந்திருந்த நிலையில் இந்த அனர்த்தம் ஏற்பட்டுள்ளது.

சங்கரி-லா விடுதியில் இரண்டு தற்கொலைதாரிகள் இணைந்து மேற்கொண்ட தாக்குதலில் காயமடைந்த செல்சியாவை அமெரிக்க அதிகாரிகள் விமனம் மூலம் சிங்கப்பூருக்கு சிகிச்சைக்காக கொண்டு சென்றிருந்தனர். ஆனால் அவர் சிகிச்சைகள் பலனளிக்காததால் அங்கு கடந்த வார இறுதியில் மரணமடைந்துள்ளார்.

அவருக்கு சிறீலங்காவில் உள்ள அமெரிக்கத் தூதுவர் அலைனா ரெபிலிஸ் தனது அஞ்சலிகளை செலுத்தியதுடன், சிறீலங்காவில் இடம்பெற்ற தாக்குதலில் கொல்லப்பட்டவர்கள் அனைவருக்கும் தான் அஞ்சலிகளை செலுத்துவதாக தெரிவித்துள்ளார்.

நாம் இழப்புக்களுக்கு அஞ்சலிகளைச் செலுத்தும் அதேசமயம், தீவிரவாத்தை எதிர்த்து உலகம் முழுவதும் போராடவேண்டும் என அமெரிக்காவின் வர்த்தகத்துறை செயலாளர் வில்பர் ரோஸ் தனது அறிக்கையில் தெரிவித்துள்ளார்.

இதனிடையே தாக்குதலுக்கு காரணமானவர்கள் அனைவரும் கொல்லப்பட்டுவிட்டனர் அல்லது கைதுசெய்யப்பட்டுள்ளனர் என தெரிவித்துள்ள சிறீலங்கா பிரதமர் ரணில் விக்கிரமசிங்கா, ஆனால் நாடு தற்போதும் அச்சுறுத்தல்களை எதிர்கொண்டுள்ளதாக தெரிவித்துள்ளார்.
சிறீலங்காவில் இடம்பெற்ற தாக்குதலில் மேலும் 10 வெளிநாட்டவர்கள் காணாமல்போயுள்ளதும் இங்கு குறிப்பிடத்தக்கது.

சிறீலங்கா பிரதமர் ரணில் வெளியிட்டுள்ள இந்த முரன்பட்ட கருத்தும், விரைவில் தாக்குதல்கள் இடம்பெறலாம் என சிறீலங்கா அரசியல்வாதிகள் தொடர்ந்து தெரிவித்துவரும் கருத்துக்களும் அனைத்துலக மட்டத்தில் சிறீலங்கா தொடர்பில் விசனங்களை தோற்றுவித்துள்ளதுடன், சிறீலங்காவிற்கு செல்லும் மக்களின் பாதுகாப்பு தொடர்பிலும் அச்சத்தை ஏற்படுத்தியுள்ளது.

சிறீலங்கா ஜனாதிபதி தனது செயலகத்தில் ஐ.நா.பிரதிநிதிகள், அமைப்பு க்கள் மற்றும் பிற சர்வதேச நிறுவனங்களின் தலைவர்கள் அனைத்து தூதுவர்கள் மற்றும் உயர் ஆணையாளர்களையும் சந்தித்தார்.

நாட்டில் 1,600 அயல்நாட்டு அகதிகள் இருப்பதாகவும், தற்போதைய சூழல்களில் அவர்களைக் கவனித்துக் கொள்வதில் கஷ்டங்கள் இருப்பதாகவும் சிறீலங்கா ஜனாதிபதி விளக்கினார்.

ஒரு ஏற்கத்தக்க தீர்வைக்காண ஐ.நா. பிரதிநிதிகள் முடிந்த வரை விரைவில் முயற்சிப்பர் என்று உறுதியளித்தார். இஸ்லாமிய பயங்கரவாத நடவடிக்கைகளை குறைப்பதற்காக மேற்கொள்ளப் பட்ட பாதுகாப்பு நடவடிக்கைகளின் முன்னேற்றத்தை பற்றியும், நாட்டில் இயல்பு நிலை திரும்புவதற்கு அரசாங்கத்தால் எடுக்கப் பட்ட நடவடிக்கைகள் பற்றியும் சிறீலங்கா ஜனாதிபதி விளக்கினார். இந்த நேரத்தில் இலங்கைக்கு வழங்கப்பட்ட ஒத்துழைப்பிற்காக சர்வதேச சமூகத்திற்கு அவர் நன்றி தெரிவித்தார்.

தற்போதைய வெற்றிகரமான செயற்பாடு மற்றும் உளவுத் துறையின் வெளிநாட்டு நிபுணத்துவத்தின் உதவியுடன், பயங்கர வாதத்தின் அச்சுறுத்தலானது விரைவில் சீர்குலைக்கப்படலாம் என தான் நம்புவதாக சிறீலங்கா ஜனாதிபதி சிறிசேன தெரிவித்தார்.

நீர்கொழும்பில் இரண்டு குழுக்களுக்கிடையிலான மோதல்கள் குறித்து அவர் குறிப்பிடும் போது, சில இனவாத கட்சிகள் அமைதி யின்மையை தூண்டி விடுவதாகவும் அவர் கூறினார்.

தமிழ் மக்களை மீது இனஅழிப்பை மேற்கொண்ட சிறீலங்கா அரசுகள் அவர்களை அகதிகளாக்கி உலகம் எங்கும் அலையவிட்டிருந்தன. இந்த நிலையில் வெளிநாட்டு அகதிகள் மீது அக்கறை காண்பிப்பதுபோல நடிப்பது அனைத்துலகத்தை ஏமாற்றி உதவிகளை பெறும் நோக்கம் கொண்டது என அவதானிகள் கருத்து தெரிவித்துள்ளனர்.