சிறீலங்கா மற்றும் இந்தியா கடற்படையினர் கூட்டாக பயிற்சிகளை மேற்கொள்ளவுள்ளதால் சிறீலங்கா கடற்படையினர் இரண்டு போர்க் கப்பல்கள் இந்தியாவுக்கு நேற்று முன்தினம் (05) புறப்பட்டுச் சென்றுள்ளதாக சிறீலங்கா கடற்படை வட்டாரங்கள் தெரிவித்துள்ளன.

இன்று (07) ஆரம்பமாகும் சிலிநெக்ஸ்-2019 என்ற இந்த கடற்படை ஒத்திகையானது எதிர்வரும் 12 ஆம் நாள்வரையிலும் இடம்பெறவுள்ளது.

இந்த நடவடிக்கையில் 323 சிறீலங்கா கடற்படையினரும் பெருமளவான இந்திய கடற்படையினரும் பங்குகொள்வதுடன், உலங்குவானூர்திகளும் பயிற்சியில் ஈடுபடவுள்ளதாக அவை மேலும் தெரிவித்துள்ளன.

இராவணன் கட்டிய கோட்டை மன்னாரின் அடையாளச் சின்னம் என பல சாதனைகளை உள்ளடக்கியது தான் அல்லிராணி கோட்டை

கம்பீரத்தின் அடையாளம் போல நிலைத்து நிற்க வேண்டும் என்பதற்காகவும், அல்லிப்பூக்களின் வாசனைக்கு மத்தியில் குறித்த கோட்டை அமைந்திருப்பதனால் அல்லிராணி கோட்டை எனப் பெயர் வந்ததாக வரலாறு உள்ளது.

மன்னார் முசலிப் பிரிவிற்குட்பட்ட அரிப்புக் கிராமத்தின் கடலோரப் பகுதியில் இந்தக் கோட்டை அமைந்துள்ளது. ஆனால் தற்போதைய நிலையில் பெரும்பாலான பாகங்கள் அழிவடைந்து எஞ்சியுள்ள மிகுதி பகுதிகளைக் கொண்டு நிலைத்து நிற்கிறது.

இப்பகுதி மக்களால் இராவணன் காலத்தில் கட்டப்பட்ட கோட்டை என்றே அல்லிராணிக் கோட்டை அடையாளப்படுத்தப்படுகின்றது. ஆனால் வரலாறு கூறும் உண்மைகளையும் ஆராய வேண்டும்.

இலங்கைத் தீவின் முதல் பிரித்தானிய ஆளுநர் பிரட்ரிக் நோர்த்தால் உருவாக்கப்பட்ட வாஸ்தலமே இக்கோட்டை எனவும் கூறப்படுகின்றது.

ஆவரால் உருவாக்கப்பட்ட வீடு எனவும் 4 அறைகளைக் கொண்டிருந்ததாகவும் இரண்டு தட்டுக்களைக் கொண்டதாகவும் உருவாக்கப்பட்டுள்ளது.

மன்னார் தீவின் அழகிய கட்டடமாகவும், நிர்மாணக் கலைக்கு அமைவாக கட்டப்பட்ட ஒரேயொரு கட்டடம் எனவும் அடையாளப்படுத்தப்படுகின்றது.

ஆனால் உண்மையில் இக்கோட்டை இராவணனால் உருவாக்கப்பட்டதா? அல்லது பிரட்ரிக் நோர்தினால் உருவாக்கப்பட்டதா? என்பது தொடர்பில் சந்தேகங்கள் நிலவியவண்ணம் உள்ளது.

உண்மையில் இக்கோட்டை இராவணனால் கட்டப்பட்டதாக இருந்தால் பல யுகங்களைத் தாண்டி பரிணமிக்கும் உலகின் ஒரேயொரு கோட்டை என்ற சிறப்பை பெறும்.

தனித்த கடற்பகுதி, அலைகளின் சத்தம், அமைதியான காற்று என அல்லிராணி கோட்டையின் சிறப்பம்சம் வேறெங்கும் கிடைக்குமா என்பதும் கேள்விக்குறியே.

கடல் அலையின் தாக்கத்தால் கோட்டையின் பகுதிகள் சில கடலில் மூழ்கிப் போய்விட மிகுதி பாதியும் சுனாமியின் தாக்கத்தால் சிதிலமடைந்த நிலையில் காணப்படுகின்றது.

யுத்தகாலத்தில் பார்ப்பதற்கு அனுமதி மறுக்கப்பட்டு வந்த நிலையில் யுத்தத்தின் பின் பெரும்பாலானோர் படையெடுக்கும் ஓரிடமாகவும் அல்லிராணி கோட்டை மாறி வருகின்றது.

முறையான புனரமைப்பு பணிகள் இல்லாமல் கைவிடப்பட்ட நிலையில் காணப்படும் இக்கோட்டை, எதிர்காலத்தில் புனரமைக்கப்படுமா? என்பதே பலரின் எதிர்பார்ப்பாகவும் மாறியுள்ளது.

பெயருக்கேற்ற பிரமிப்பும் அழகும் அடியோடு அழிந்து போய்விட இன்று செங்கல் சுவர் மட்டுமே இக்கோட்டையின் அடையாளச் சின்னமாகத் காணப்படுகின்றது.

தனிமையின் அடையாளமாக திகழ்ந்த அல்லிராணிக் கோட்டை இனியும் தனிமையில் அழியவிடாமல் காப்பது எம்மவரின் தலையாய கடமையும் அதேவேளை உணர்ச்சிபூர்வமான செயற்பாடும் ஆகும்.

எதிர்காலத்தில் எமக்கு தமிழில் பெயர் சொல்லும் அளவிற்கு இன்னுமொரு கோட்டை அமையப் போவதில்லை. மீண்டும் உயிர் கொடுத்து அழிந்த சுவடுகளை எடுப்போமானால் கம்பீரமாக தலைநிமிர்ந்து சொல்லலாம். நிர்மாணக் கலைக்கு அமைவாக இலங்கையில் கட்டப்பட்ட ஒரேயொரு கோட்டை அல்லிராணிக் கோட்டை என்று பெருமையாகக் கூறலாம்.

போர்க்குற்ற விசாரணையை நடாத்து,அரசியல் கைதிகள் அனைவரையும் விடுதலை செய்,வலிந்து காணாமல் ஆக்கப்பட்டவர்கள் தொடர்பில் உடனடியாக விசாரணை செய்,வடக்கு கிழக்கில் இராணுவ மயமாக்கலை நிறுத்து,இடம்பெயர்ந்த அனைவரையும் அவர்களது பாரம்பரிய இடங்களில் குடியமர்த்து  போன்ற கோரிக்கைகளை முன்னிறுத்தி எதிர்வரும் 16.09.2019ம் திகதி (திங்கட்கிழமை) யாழ்ப்பாணம் முற்றவெளியில்
நடைபெற இருக்கும் எழுக தமிழ் பேரணிக்கு வலு சேர்க்கும் முகமாக நாளைய 07.09.2019 தினம் காலை-9.00 மணியளவில் வவுனியா வாடிவீட்டில் பொது அமைப்புக்களின் உடனான சந்திப்பை தமிழ் மக்கள் பேரவையும் தமிழ் மக்கள் பேரவையின் அங்கத்துவ கட்சிகளும் ஏற்பாடு செய்துள்ளன.

இவ் அழைப்பை தனிப்பட்ட அழைப்பாக ஏற்று அனைத்து பொது அமைப்புக்கள் மற்றும் பொதுமக்கள் அனைவரையும் கலந்து கொள்ளுமாறு கேட்டுக்கொள்கின்றோம் என தமிழ் மக்கள் பேரவையும் தமிழ் மக்கள் பேரவையின் அங்கத்துவ கட்சிகளும் அழைப்புவிடுத்துள்ளது.

நீர்க்காகம் கூட்டுப்படைப் பயிற்சியில் முதல் கட்டமான மீட்பு நடவடிக்கைகள் திருகோணமலையிலுள்ள அஸ்ரப் துறைமுகத்தில் இடம்பெற்றது.

7 பெண்கள், 15 ஆண்கள் பணயக் கைதிகளை மீட்கும் பணிகள் இராணுவம், கடற்படையினரது கூட்டுப் பயிற்சி நடவடிக்கைகளின் மூலம் மேற்கொள்ளப்பட்டது.

212 விமானப்படையின் உலங்கு வானூர்திகளை பயன்படுத்தி இராணுவ கொமாண்டோ, விசேட படையணி, இராணுவப் புலனாய்வுப் படையணி மற்றும் கடற்படை விசேட கடற்படைப் பிரிவினர்கள் இணைந்து இந்த மீட்பு நடவடிக்கைகளை மேற்கொண்டனர்.

இந்தக் கூட்டுப்படைப் பயிற்சிகள் மத்திய பாதுகாப்புப் படைத் தளபதியும் கூட்டுப்படைப் பணிப்பாளருமான மேஜர் ஜெனரல் லக்சிறி வடுகே தலைமையில் இராணுவ சிரேஸ்ட அதிகாரிகளின் பங்களிப்புடன் மேற்கொள்ளப்பட்டன.

பாராளுமன்ற உறுப்பினர் அ.அரவிந்த குமாருக்கும், அமெரிக்க தேசிய ஜனநாயக நிறுவன உயர்மட்ட அதிகாரிகளுக்கும் இடையில் முக்கிய சந்திப்பு ஒன்று இடம்பெற்றுள்ளதாக தெரிவிக்கப்பட்டுள்ளது.

குறித்த சந்திப்பானது கொழும்பில் உள்ள நட்சத்திர உணவகம் ஒன்றில் நேற்று இடம்பெற்றதாகக் கூறப்பட்டுள்ளது.

இந்தச் சந்திப்பில் மலையக அபிவிருத்தி தொடர்பான பல்வேறு விடயங்கள் கலந்துரையாடப்பட்டுள்ளதாகத் தெரிவிக்கப்பட்டுள்ளது.

மலையகத்தின் முன்பள்ளி கல்வி, சுகாதாரம் உட்பட பல்வேறு துறைகளை மேம்படுத்துவதற்காக நிதி வழங்கவும் அமெரிக்க தேசிய ஜனநாயக நிறுவனம் இணங்கியுள்ளதாக தெரிவிக்கப்படுகின்றது.

இந்த நிறுவனத்தின் அழைப்பின் பேரிலேயே  நாடாளுமன்ற உறுப்பினர் அரவிந்த குமார் அண்மையில் அமெரிக்காவிற்கு விஜயம் மேற்கொண்டிருந்ததாகக் கூறப்பட்டுள்ளது.

அந்த விஜயத்தின் போது எடுத்துரைக்கப்பட்ட விடயங்கள் தொடர்பிலேயே நேற்றைய சந்திப்பில் அமெரிக்க தேசிய ஜனநாயக நிறுவன உயர்மட்ட அதிகாரிகள் கவனம் செலுத்தியிருந்தமை குறிப்பிடத்தக்கது.

ஒக்டோபர் 10ஆம் திகதியளவில் பலாலி விமான நிலையத்தின் முதல் கட்ட அபிவிருத்தி பணிகள் நிறைவடையும். ஒக்டோபர் 16ஆம் திகதி இங்கிருந்து விமான போக்குவரத்தை ஆரம்பிக்க எதிர்பார்த்துள்ளோம் என, சிவில் விமான சேவைகள் அமைச்சர் அர்ஜூன ரணதுங்க தெரிவித்துள்ளார்.

பலாலியில் இருந்து இந்தியாவுக்கு ஆரம்பிக்கப்படும் விமான பயண சேவைகளை வழங்கும் போது தேசிய நிறுவனங்களுக்கு முக்கியத்துவம் அளிக்கப்படும்.
கட்டுநாயக்க விமான நிலையத்தை தவிர்த்து, மத்தள, இரத்மலானை, மட்டக்களப்பு ஆகிய விமான நிலையங்கள் சர்வதேச விமான நிலையங்களாக தரமுயர்த்தப்படும்.

இந்த விமான நிலையங்களை ஒன்றுடன் ஒன்று இணைத்து, பிராந்திய மற்றும் சர்வதேச விமான பயணங்கள் ஆரம்பிக்கப்படும். ஒக்டோபர் 10ஆம் திகதியளவில் பலாலி விமான நிலையத்தின் முதல் கட்ட அபிவிருத்தி பணிகள் நிறைவடையும். 16ஆம் திகதி விமான போக்குவரத்தை ஆரம்பிக்க எதிர்பார்த்துள்ளோம்.

பலாலி விமான நிலையத்தை சார்ந்த தொழில் வாய்ப்புகளை வழங்கும் போது, வட பகுதி மக்களுக்கு அதிகமான முன்னுரிமை வழங்கப்படும். என தெரிவித்தார்.யாழ்ப்பாண அரசாங்க அதிபரின் அலுவலகத்தில் பலாலி விமான நிலையத்தின் அபிவிருத்தி தொடர்பாக இன்று பிற்பகல் முன்னேற்ற மீளாய்வு கூட்டமும் நடைபெற்றமை குறிப்பிடத்தக்கது.

மட்டக்களப்பு சிறைச்சாலையில் விளக்கமறியலில் வைக்கப்பட்டிருந்த இளைஞன் ஒருவர் இன்று (06) அதிகாலை உயிரிழந்துள்ளதாக மட்டக்களப்பு பொலிஸார் தெரிவித்தனர்.

மட்டக்களப்பு சிறைச்சாலையில் விளக்கமறியலில் வைக்கப்பட்டிருந்த 27வயதுடைய வாழைச்சேனை,சுங்காங்கேணியை சேர்ந்த ரி.கமல்ராஜ் என்பவரே உயிரிழந்துள்ளார்.

நேற்று முன்தினம் புதன்கிழமை வாழைச்சேனையில் கைகலப்பு ஒன்றிற்காக வாழைச்சேனை பொலிஸாரினால் கைதுசெய்யப்பட்டு நீதிமன்றம் ஊடாக குறித்த இளைஞர் விளக்கமறியலில் வைக்கப்பட்டிருந்ததாக தெரிவிக்கப்படுகின்றது.

குறித்த இளைஞனின் சடலம் மட்டக்களப்பு போதனா வைத்தியசாலையின் பிரேத அறையில் வைக்கப்பட்டுள்ளதுடன் இது தொடர்பான விசாரணைகளை மட்டக்களப்பு பொலிஸார் மேற்கொண்டுவருகின்றனர்.