ஒற்றுமை குறைந்தால் பலத்தை இழப்போம். என்று எச்சரித்திருக்கின்றார் தமிழ்த் தேசியக் கூட்டமைப்பின் யாழ் மாவட்ட நாடாளுமன்ற உறுப்பினரும் கூட்டமைப்பின் பேச்சாளருமான எம்.ஏ.சுமந்திரன்

“தமிழ்த் தேசியக்கூட்டமைப்பில் இருந்து நாங்கள் யாரையும் விலகிப் போகுமாறு கூறவில்லை, விலகிப் போகின்றவர்களை நாங்கள் பிடித்து எம்முடன் கட்டி வைக்கவும் முடியாது” – எனவும் அவர் தெரிவித்திருக்கின்றார்.

ஒருவகையில் பார்த்தால் அவர் கூறுவது சரியாக இருந்தாலும், அப்படிப் பலரும் விலகிப் போவதற்குக் காரணம் யாது என்பதுதான் நோக்கப்பட வேண்டும். யாரையும் விலகிப் போக வேண்டும் என்று வற்புறுத்தி விலக்குகின்ற வேலை நடக்காமல் இருக்கலாம். ஆனால் ஆள்கள் தாமாக விலகிப் போகக் கூடிய களச் சூழலை ஏற்படுத்தி,அதன்மூலம் அவர்களை வெளியேற்றவைக்கலாம். இதுதான் கூட்டமைப்பில் நடக்கின்றது என்பதைப் கூட்டமைப்பின் தலைமை – குறிப்பாக சம்பந்தன், சுமந்திரன், மாவை சேனாதிராசா போன்றோர் உணரவேண்டும் ஒப்புக்கொள்ள வேண்டும்  ஏற்றுத் திருந்த முற்பட வேண்டும்.

ஒருவகையில் பார்த்தால் கூட்டமைப்பின் நிலைமை ஒட்டகத்துக்கு இடம் கொடுத்த கதை போன்றதாகிவிட்டது. யுத்த நெருக்கடி, போரில் சம்பந்தப்பட்ட தரப்புகளின் அச்சுறுத்தல் ஆகியவற்றுக்கு மத்தியில், மிலேனியத்தின் ஆரம்பத்தில் துணிந்து கூட்டமைப்பை உருவாக்க நடவடிக்கை எடுத்தவர்கள் பலரும் இன்று கூட்டமைப்பில் இல்லை. இடையில் ஒண்டவந்தவர்களின் கூடாரமாகி விட்டது கூட்டமைப்பு என்பதுதான் யதார்த்தம்.

இப்படி மாறுவதற்கு இடமளித்துப் பல்லிளித்துப் பார்த்திருந்த மாவை சேனாதிராசா போன்ற பொறுப்பற்ற தலைவர்களே இந்த ஒற்றுமைச் சிதைவுக்குக் காரணம் எனலாம். யாரையும் கூட்டமைப்பிலிருந்து வெளியேறுமாறு யாரும் கூறவில்லை என்பது உண்மைதான். ஆனாலும் பலரும் தாமாகவெளியேறுவதை தவிர வேறு வழியில்லை என்ற இக்கட்டுக்குள் தள்ளப்படும் சூழ்நிலை சில தரப்புகளால் – குறிப்பாக
கூட்டமைப்பின் தலைமைக்கு நெருக்கமான தரப்புகளால் முன்னெடுக்கப்பட்டு வந்தன . முன்னெடுக்கப்பட்டு வருகின்றன என்பது வெள்ளிடை மலை.

சுரேஷ் பிரேமச்சந்திரன், பேராசிரியர் சிற்றம்பலம், நீதியரசர் சி.வி.
விக்னேஸ்வரன், அனந்தி சசிதரன், சிவகரன், அருந்தவபாலன்,சிவசக்தி ஆனந்தன் என்று இந்தப் பட்டியல் நீண்டது. இன்னும் பலரும் இந்தப் பட்டியலில் புதிதாகச் சேரக்கூடிய வாய்ப்பே அதிகம் உண்டு. இதிலே, சுரேஷ் பிறேமச்சந்திரன் ,சிவசக்தி ஆனந்தன் போன்ற ஒரிருவரைத் தவிர, பிற எல்லோரும் இலங்கைத் தமிழரசுக்கட்சியைச் சேர்ந்தவர்கள்தாம்.

உள்கட்சி ஜனநாயகம், தகுதியானவர்களுக்கே முன்னுரிமை மற்றும் செம்பு
தூக்கிகள்,காவடிக்காரர், பந்தம் பிடிப்போர் போன்றோரை புறமொதுக்கி திறமையும், தகுதியுமுள்ளோருக்கே கட்சியில் முக்கிய இடம் போன்ற ஜனநாயகத்தின் அடிப்படைகளை தமிழ்க்கூட்டமைப்பு- குறிப்பாக இலங்கைத் தமிழரசுக்கட்சி – கடைப்பிடிக்குமானால் இப்படி கூட்டமைப்பை விட்டு வெளியேறுவோர் குறித்து சுமந்திரன் கவலைப்பட வேண்டியிருக்காது என நாம் நம்புகிறோம். தமிழ்க் கூட்டமைப்பு என்பது பல கட்சிகளின் இணைவு என்றால் அதை வழிநடத்துவதற்கு சில அடிப்படைகள் கட்டாயம்
பின்பற்றப்பட்டேயாக வேண்டும். முக்கிய தீர்மானங்களை கூட்டமைப்பு எடுக்க முன்னர் கூட்டமைப்பின் வழிகாட்டல் குழு அடிக்கடி விவாதிக்க வேண்டும். கருத்தொருமைப்பாட்டைப் பேண வேண்டும்.

பலகட்சிகளையும் சேர்ந்தோர் கூட்டமைப்பின் பெயரால் கூட்மைப்பின் பட்டியலால் – நாடாளுமன்றத்துக்குத்தெரிவு செய்யப்படக்கூடும். ஆனால் அந்த எம்.பிக்களின் மொத்தக் கூட்டுத்தான் கூட்டமைப்பு என்ற கருத்தியலில் இருந்து சம்பந்தன், சுமந்திரன், மாவை போன்றோர் வெளியே வரவேண்டும். அந்த எம்.பிக்களை கைகளில் வைத்துக் கொண்டு கூட்டமைப்பின் பெயரில் எதையும் நாங்கள் தீர்மானித்து முன்னெடுக்கலாம் என்ற திமிர்த்தனத்திலிருந்து கூட்டமைப்பின் தலமை முதலில் வெளியே வரவேண்டும்.

கூட்டமைப்பு என்பது பல கட்சிகளின் கூட்டு அந்தக் கட்சிகளின் ஒத்திசைவில் கூட்டமைப்பு இயங்கவேண்டுமே ஒழிய, அந்தக் கட்சிகளின் எம்.பிக்களின் ஒத்திசைவோடு மட்டும் கூட்டமைப்பை இயக்கிவிடலாம், நினைத்ததை செய்யலாம் என்ற மிதப்போடு கூட்டமைப்பின் தலைவர்கள் என்றுகூறிக் கொள்வோர் இயங்கக் கூடாது. கூட்டமைப்பை இன்னும் பலப்படுத்த வேண்டும், புதிய தரப்புகளையும் உள்ளீர்த்து அதனை வலுவான சக்தியாக்க வேண்டுமானால், வெளியில் நிற்கும் தகுதி,
திறமையுடையவர்களை அரவணைக்க கூட்டமைப்பு தலைமை தயாராக வேண்டும்.

மாவை சேனாதிராசா போன்ற தலைவர்களுக்கு அந்தபண்பியல்பில்தான் அதிகம் குறைபாடுகளுண்டு. அவர்களால் கூட்டமைப்பை பலப்படுத்துவது என்பது கேள்விக்குறியே.

வலிகாமம் வடக்கு உயர் பாதுகாப்பு வலயத்திற்குட்பட்ட ஒருபகுதி காணியை விடுவிப்பதற்கு 1200 மில்லியன் ரூபா தேவை எனவும் அரசாங்கம் அதனை வழங்கவில்லை எனவும் இராணுவத்தினர் சிறிலங்கா பிரதமர் ரணில் விக்கிரமசிங்கவிடம் கூறியுள்ளனர்.

யாழ். மாவட்ட அபிவிருத்திக் குழுக் கூட்டம் 16.08 அன்று பிரதமர் ரணில் விக்கிரமசிங்க தலைமையில் யாழ். மாவட்ட செயலகத்தில் நடைபெற்றது. இதன்போதே இராணுவத்தினர் இத்தகவலை தெரிவித்தனர்.

கூட்டத்தில் கருத்துத் தெரிவித்த பாராளுமன்ற உறுப்பினர் எம்.ஏ.சுமந்திரன், பலாலி வீதியின் கிழக்குப் புறமாக உள்ள மிக வளமான விவசாய நிலங்கள் இராணுவத்தினரின் கட்டுப்பாட்டில் உள்ளதை சுட்டிக்காட்டியதுடன், குறித்த காணிகள் விடுவிக்கப்பட வேண்டும் என்றும் கேட்டுக் கொண்டார்.

தொடர்ந்து பேசிய பாராளுமன்ற உறுப்பினர் மாவை சேனாதிராஜாவும் அதனை வலியுறுத்தியுள்ளதுடன், வல்லை அராலி வீதி மற்றும் மயிலிட்டியில் 3 கிராம சேவகர்கள் பிரிவுகள் தொடர்ந்தும் இராணுவத்தினரின் கட்டுப்பாட்டில் உள்ளதாக சுட்டிக்காட்டியதுடன் இராணுவத்தின் இந்த நடவடிக்கை பொருளாதார மேம்பாட்டிற்கு தடையாக உள்ளதாகவும் குறிப்பிட்டார்.

இதற்குப் பதிலளித்த யாழ். மாவட்ட இராணுவத் தளபதி மேற்படி காணிகளை விடுவிப்பதற்கு 1200 மில்லியன் ரூபாய் நிதியை அரசாங்கத்திடம் கோரியிருந்தோம் ஆனால் அந்த நிதியை அரசாங்கம் தரவில்லை என்றார்.

இலங்கைக்கு வந்துள்ள மத அல்லது நம்பிக்கைச் சுதந்திரம் தொடர்பான ஐ.நாவின் சிறப்பு அறிக்கையாளர் அகமட் கீட் அவர்கள் நேற்று (17) வவுனியா பூந்தோட்டம் புனர்வாழ்வு நிலையத்தில் தங்கவைக்கப்பட்டுள்ள வெளிநாட்டு அகதிகளை பார்வையிட்டார். உயிர்த்த ஞாயிறுதினத்தில் இடம்பெற்ற தீ விரவாத தா க்குதலையடுத்து நீர்கொழும்பில் தங்கியிருந்த ஆப்கானிஸ்தான், பாகிஸ்தான் உள்ளிட்ட பல்வேறு நாடுகளைச் சேர்ந்த வெளிநாட்டு அகதிகள் அங்கிருந்து வெளியேற்றப்பட்டிருந்தனர்.

அவர்களில் ஒரு தொகுதியினர் மூன்று கட்டங்களாக வவுனியா, பூந்தோட்டம் பகுதியில் உள்ள புனர்வாழ்வு நிலையத்திற்கு அழைத்து வரப்பட்டு தங்க வைக்கப்பட்டனர். அவர்களில் குறிப்பிட்ட ஒரு தொகுதியினர் மீண்டும் சுய விருப்பின் பேரில் நீர்கொழும்பு திரும்பிச் சென்றுள்ள நிலையில் ஒரு பகுதியினர் புனர்வாழ்வு நிலையத்தில் தங்க வைக்கப்பட்டுள்ளனர். இவ்வாறு தங்க வைக்கப்பட்டவர்களை பார்வையிட்ட ஐ.நா சிறப்பு அறிக்கையாளர் அவர்களது தற்போதையநிலை, தீ விரவாத தா க்குதலின் பின்னரான நிலமைகள் மற்றும் அவர்களது பிரச்சனைகள் தொடர்பில் கலந்துரையாடினார்.

குறித்த சந்திப்பானது சுமார் ஒரு மணிநேரம் இடம்பெற்றது. முன்னதாக வவுனியா, குருமன்காடு கிராம அபிவிருத்திச்சங்க கட்டிடத்தில் வவுனியா மாவட்ட மதநல்லிணக்க குழுவினரை சந்தித்து தீ விரவாத தா க்குதலின் பின்னர் மத நல்லிணக்கம் குறித்தும், தற்போது மத நிலைகள் தொடர்பாகவும் கலந்துரையாடிருந்தார். குறித்த இரு நிகழ்வுகளுக்கும் ஊடகங்களுக்கு அனுமதி மறுக்கப்பட்டிருந்ததுடன் ஐ.நா சிறப்பு அறிக்கையாளரும் அவரது குழுவினரும் கருத்து கூற மறுத்திருந்தனர்.

சிறிலங்கா இராணுவத் தளபதி லெப்.ஜெனரல் மகேஸ் சேனநாயக்க நாளையுடன் ஓய்வுபெறவுள்ள நிலையில், புதிய இராணுவத் தளபதியாக மேஜர் ஜெனரல் சவேந்திர சில்வா நியமிக்கப்படவுள்ளார்.தற்போதைய இராணுவத் தளபதியின் பதவிக்காலம் நாளையுடன் முடிவடையவுள்ள நிலையில், அவரது பதவிக்காலத்தை இன்னும் சில மாதங்களுக்கு நீடிப்பதா- அல்லது புதிய இராணுவத் தளபதியை நியமிப்பதாக என்ற குழப்பத்தில் சிறிலங்கா அதிபர் மைத்திரிபால சிறிசேன இருந்திருந்தார்.

எனினும் கோத்தபாயவுடனான சந்திப்பின் பின்னராக புதிய இராணுவத் தளபதியாக மேஜர் ஜெனரல் சவேந்திர சில்வா நியமிக்கப்படவுள்ளார்.லெப். ஜெனரல் மகேஸ் சேனநாயக்கவின் பதவிக்காலம் நாளையுடன் நிறைவடைகிறது. 2017ஆம் ஆண்டு ஓகஸ்ட் மாதமே, அவர் ஓய்வுபெறும் வயதை எட்டியிருந்த போதும், சேவை நீடிப்புகள் வழங்கப்பட்டிருந்தன.

தற்போது இராணுவத் தலைமை அதிகாரியாக- இரண்டாவது இடத்தில் உள்ள மேஜர் ஜெனரல் சவேந்திர சில்வா மற்றும் தொண்டர்படைகளின் தளபதி மேஜர் ஜெனரல் சத்யப்பிரிய லியனகே ஆகியோரே அவர்களாவர்.கோத்தாபய ராஜபக்சவுக்கு மிகவும் நெருக்கமானவரான மேஜர்  ஜெனரல் சவேந்திர சில்வாவை,  இராணுவத் தளபதியாக நியமிக்க கோத்தபாய சிபார்சு செய்துள்ளதனையடுத்து சர்ச்சை முடிவுக்கு வந்துள்ளது.

13 வது அரசியலமைப்பு திருத்தத்தை அமுலாக்க இடமளிக்க போவதில்லை என வணக்கத்துக்குரிய எல்லே குணவங்ச தேரர் தெரிவித்துள்ளார். கொழும்பில் இடம்பெற்ற கருத்தரங்கிலேயே அவர் இதனை தெரிவித்தார்.

“தமிழ் மக்கள் வடக்கு கிழக்கு எங்களது என்று கூறுகிறார்கள். இலங்கை எங்களது என்று கூறுங்கள். அதற்கு நாங்கள் எதிர்ப்பு இல்லை.

நாம் ஐக்கிய தேசிய கட்சியை தோற்கடிக்க வேண்டும். இந்த அரசாங்கத்தை தோற்கடிக்க வேண்டும். இந்த அரசாங்கம் மிகப்பெரிய தலையிடியாக அமைந்தது. இனவாத,மதவாத சட்டங்களை கொண்டு வந்தனர். பெரஹெரவில் யானை பிரச்சினைகளை ஏற்படுத்தினர். சோஃபா ஒப்பந்தத்தை நிறுத்தியுள்ளனர். அரசியலமைப்பொன்றை வைத்துள்ளனர்.

தற்போது எங்களை பாதுகாக்க பார்க்கின்றனர். எங்களை எப்போதோ பௌத்தர்கள் பாதுகாத்து விட்டனர். எனினும் நாங்கள் இவ்வாறுதான் என அடுத்ததாக வர முயற்சி செய்யும் நபர்கள் எமது முன்னிலையில் உறுதிமொழி ஒன்றை வழங்க வேண்டும்.

கோத்தாபய எமது நண்பர். அவர் நாட்டை பாதுகாப்பதாக தெளிவாக கூற வேண்டும். ஜனாதிபதி தேர்தலில் போட்டியிடும் அனைத்து வேட்பாளர்களும் நாட்டின் இறையாண்மையை பாதுகாப்பதாக மகா சங்கத்தினரிடம் உறுதியளிக்க வேண்டும். அவர்கள் அனைவரும் தமது தேர்தல் விஞ்ஞாபனத்தை உடனடியாக வௌியிட வேண்டும் என அவர் குறிப்பிட்டுள்ளார்.

யாழ்.வல்வெட்டித்துறை  ஊாக்காடு பகுதியில் இராணுவத்தினா் மீது இளைஞா் குழு ஒன்று வாள்வெட்டு தாக்குதல் நடாத்தியிருக்கின்றது. நேற்றய தினம் இரவு 9 மணியளவில் ஊாரிக்காடு பகுதியில் உள்ள இராணுவத்தின் கடை ஒன்றில் இந்த தாக்குதல் இடம்பெற்றிருக்கின்றது.

தாக்குதலின் பின்னா் இராணுவம் சுற்றிவளைப்பை நடாத்தி 3 இளைஞா்களை கைது செய்து வல்வெட்டித்துறை பொலிசாரிடம் ஒப்படைத்துள்ளதுடன், இரண்டு வாள்களையும் மீட்டுள்ளனா்.

இதனிடையே சிறீலங்கா அரசினதும் அதன் படைகளினதும் ஆதரவுடன் வடபகுதியில் மட்டும் இயங்கிவரும் ஆவா குழு என்ற ஆயுதக்குழு வடபகுதி மக்களின் இயல்பு வாழ்க்கையை குழப்புவதற்கும் சிறீலங்கா படையினரின் பிரசன்னத்தை தொடர்ந்து தக்கவைப்பதற்குமாக இயங்கி வருகின்றது. எனவே சிறீலங்கா படையினர் மீதான இந்த சம்பவம் ஒரு திட்டமிட்ட நடவடிக்கை என தெரிவிக்கப்படுகின்றது.

யாழ்ப்பாணத்தில் முஸ்லிம்களுக்கு அடுக்குமாடி குடியிருப்பு அமைக்க அனுமதிக்க வேண்டுமென அமைச்சர் ரிசாத் பதியுதீன் வேண்டுகோள் விடுத்தார்.

எனினும், அது குறித்து இறுதி முடிவு எடுக்கப்படவில்லை.

யாழ் மாவட்ட அபிவிருத்தி திட்டங்கள் குறித்த மீளாய்வுக்குழு கூட்டம் நேற்று மாவட்ட செயலகத்தில் இடம்பெற்றது.

இதில் கருத்து தெரிவித்த ரிசாத் பதியுதீன், யாழ்ப்பாணத்தில் 1,500 குடும்பங்கள் மீள்குடியேறியுள்ள போதும், அவர்களில் 200 குடும்பங்களிற்கு மட்டுமே வீட்டுத் திட்டம் வழங்கப்பட்டுள்ளதாகவும், காணி உள்ளவர்களிற்கு காணிகளில் வீடமைப்பதுடன், காணியற்றவர்களிற்கு அடுக்கு மாடி வீட்டுத்திட்டத்தை அமைக்க வேண்டுமென குறிப்பிட்டார்.

இதன்போது மாவட்ட செயலக அதிகாரிகள் கருத்து தெரிவித்தபோது, 1,500 பேர் மீளக்குடியமர பதிவு மேற்கொண்டிருந்தபோதும், அவர்களில் 507 பேர் மட்டுமே மீளக்குடியமர்ந்ததாக தெரிவித்தனர்.

அவர்களில் 207 பேருக்கு வீடுகள் வழங்கப்பட்டதாகவும், எஞ்சியவர்களிற்கு காணியில்லாததால் வீடு வழங்கவில்லையென்றும் தெரிவித்தனர்.

இதற்கு பதிலளித்த ரிசாத், யாழ்ப்பாணம் பொம்மைவெளியில் ஏழரை ஏக்கர் நிலத்தை முஸ்லிம் வர்த்தகர் ஒருவர் கொள்வனவு செய்து, முஸ்லிம் மக்களின் மீள்குடியேற்றத்திற்காக வழங்கியுள்ளதாகவும், அதில் அடுக்குமாடி குடியிருப்பை அமைக்கலாம் என்றார். அதற்கு தனக்கு, நீண்டகாலமாக இடம்பெயர்ந்தவர்களின் மீள்குடியேற்ற அமைச்சே பணம் ஒதுக்கும் என்றும் தெரிவித்தார்.

எனினும், யாழ் முதல்வர் அதை சூசகமாக ஆட்சேபித்தார். அதற்கு நகர அபிவிருத்தி அதிகாரசபைதான அனுமதி வழங்க வேண்டும் என்று குறிப்பிட்டதுடன், யாழ் நகர மையத்தில் சுற்றுலா தேவைகளிற்காக நிலம் தேவையென்றார்.

இதேவேளை, நேற்று இரவு அமைச்சர் ரிசாத் பதியுதீன் தனது முகப்புத்தகத்தில், அடுக்கு மாடி குடியிருப்பிற்கு அபிவிருத்தி கூட்டத்தில் அனுமதிக்கப்பட்டதாக தெரிவித்தார்.

கடந்த வருடம் பிரதமர் ரணில் யாழ் வந்த சமயத்தில், இந்த வீட்டு திட்டம் குறித்து ஆலோசிக்கப்பட்டது.

அப்போது, ரிசாத் பதியுதீனுடன் முஸ்லிம் மக்களை சந்தித்த யாழ் முதல்வர் ஆர்னல்ட், அதில் அடுக்குமாடி குடியிருப்பு அமைக்கப்படும் என உறுதியளித்தார்.

பொம்மைவெளியில் கொள்வனவு செய்யப்பட்ட காணி, ரிசாத் பதியுதீனின் பின்னணியில் கொள்வனவு செய்யப்பட்டதாக விமர்சனம் எழுந்தது. அந்த காணி, உறுதியில் சிக்கலுள்ளதாகவும் தெரிவிக்கப்படுகிறது.

வண்ணார் பண்ணை சிவன் கோவிலுக்கும் அந்த காணி உரியது, வேறு சிலருக்கும் காணியில் பங்குண்டு என தெரிவித்து அண்மையில் அந்த காணிக்குள் அத்துமீறி நுழைந்தனர்.

இந்த நடவடிக்கைக்கு கூட்டமைப்பின் நாடாளுமன்ற உறுப்பினர் மாவை சேனாதிராஜா எந்த ஒரு எதிர்ப்பும் தெரிவிக்கவில்லை என்பது குறிப்பிடத் தக்கது.

பலாலி விமான நிலைய விஸ்தரிப்பில் மக்களின் காணிகள் சுவீகரிக்கப்பட மாட்டாது என கல்வி இராஜாங்க அமைச்சர் விஜயகலா மகேஸ்வரன் தெரிவித்துள்ளார்.

பலாலி விமான நிலையப் புனரமைப்பு மற்றும் விமான சேவைகளை ஆரம்பிப்பது தொடர்பான உயர் மட்டக் கலந்துரையாடலொன்று ரணில் விக்கிரமசிங்க தலைமையில் பலாலி விமானப் படைத் தளத்தில் நேற்று மாலை நடைபெற்றது.

இதனைத் தொடர்ந்து விமான நிலையப் புனரமைப்பு பணிகளையும் பிரதமர் தலைமையிலான உயர்மட்டக் குழுவினர் நேரடியாகச் சென்று பார்வையிட்டனர்.

பிரதமர் ரணில் விக்கிரமசிங்க, சிவில் விமான போக்குவரத்து அமைச்சர் அர்ஜுன ரணதுங்க, கூட்டமைப்பின் பாராளுமன்ற உறுப்பினர் எம்.ஏ.சுமந்திரன் உள்ளிட்ட பலரும் இந்நிகழ்வில் கலந்து கொண்டிருந்தனர்.

இந் நிலையில் பலாலி விமான நிலைய புனரமைப்பு மற்றும் ​சேவைகள் ஆரம்பிப்பது தொடர்பில் நடைபெற்ற உயர் மட்டக் கலந்துரையாடல் தொடர்பில் அமைச்சர் விஜயகலா மகேஸ்வரன் ஊடகங்களுக்கு கருத்து தெரிவிக்கையில், அரசாங்கம் பல்வேறு அபிவிருத்தி நடவடிக்கைகளை மேற்கொண்டு வருகின்றது. அதற்கமைய பலாலி விமான நிலையத்தையும் புனரமைத்து வருகின்றது. இதற்கான பணிகள் கடந்த மாதம் ஆரம்பிக்கப்பட்டு விரைவில் விமான சேவைகளும் ஆரம்பிக்கப்படவுள்ளன.

இதற்கமைய விமான நிலையப் புனரமைப்பு பணிகளை எதிர்வரும் செப்டெம்பர் மாதத்திற்குள் முடிப்பதற்கு தீர்மானிக்கப்பட்டுள்ளது. அவ்வாறு பணிகள் நிறைவடைந்ததைத் தொடர்ந்து அதற்கான அலுவலகங்களையும் அமைப்பதற்கு நடவடிக்கை எடுக்கப்பட்டுள்ளது.

இதற்கமைய எதிர்வரும் ஒக்டோபர் மாதம் 15 ஆம் திகதியளவில் விமான வேவைகளையும் ஆரம்பித்து வைக்க நடவடிக்கை எடுக்கப்பட்டுள்ளது. மேலும் இந்த விமான நிலைய புனரமைப்பில் பொது மக்களின் எந்தவிதமான காணிகளும் சுவீகரிக்கப்பட மாட்டாது.

ஆனாலும் பாதை ஒன்று மூடப்பட்டுள்ளது. அந்த பாதையையும் பாவனைக்கு எப்படிக் கொடுக்கலாம் என்பது குறித்தும் ஆராயப்பட்டது. அதே நேரத்தில் இதற்கான மாற்று வழிகள் தொடர்பிலும் ஆராய்ப்பட்டுள்ளதாக விஜயகலா மகேஸ்வரன் மேலும் தெரிவித்தார்.​