எல்-நினோ காலநிலை நிலைமை குறித்து அரசாங்கம் அவதானம் செலுத்தியுள்ளதுடன், அதற்கு முகம்கொடுப்பதற்கான திட்டங்களை வகுத்து வருவதாக அமைச்சரவை ஊடகப் பேச்சாளர் அமைச்சர் நலிந்த ஜயதிஸ்ஸ தெரிவித்துள்ளார்.

இன்று (16) நடைபெற்ற அமைச்சரவை முடிவுகளை அறிவிக்கும் ஊடகவியலாளர் சந்திப்பில் கலந்துகொண்டு கருத்துத் தெரிவித்த அமைச்சர், அரசாங்கம் என்ற ரீதியில், ஜனாதிபதியின் தலைமையில் இது தொடர்பாக பல சுற்று விவாதங்கள் நடத்தப்பட்டுள்ளன.

அமைச்சர்கள் தத்தமது அமைச்சுகளின் மட்டத்தில் எடுக்கக்கூடிய நடவடிக்கைகள் குறித்தும் ஏற்கனவே கலந்துரையாடியுள்ளனர். வளிமண்டலவியல் திணைக்களம் எல்-நினோ நிலைமை குறித்து சில எதிர்வுகூறல்களை வெளியிட்டுள்ளதாகவும், அது குறித்து அவதானம் செலுத்தி, அடுத்த வருடத்தில் ஏற்படக்கூடிய சூழ்நிலைகளைக் கருத்திற்கொண்டு எதிர்காலத் திட்டங்கள் வகுக்கப்பட்டு வருவதாகவும் அமைச்சர் சுட்டிக்காட்டினார்.

மேலும்  “அரசாங்கம் என்ற ரீதியில், இதனால் ஏற்படக்கூடிய பாதிப்புகள் குறித்து, குறிப்பாக விவசாயம் உள்ளிட்ட உணவு உற்பத்தி மற்றும் நமது நீர் வளங்கள் போன்ற பல துறைகள் குறித்து ஏற்கனவே அவதானம் செலுத்தியுள்ளோம்.

ஜனாதிபதியின் தலைமையில் பல சுற்று பேச்சுவார்த்தைகள் நடந்துள்ளன. அத்துடன், எதிர்வரும் ஜூலை – ஓகஸ்ட் காலப்பகுதியிலும், மறுபுறம் அடுத்த வருடத்திலும் ஏற்படக்கூடிய இத்தகைய சூழ்நிலைகள் குறித்து அமைச்சர்கள் தத்தமது அமைச்சுகளின் ஊடாக முழுமையாக எடுக்கக்கூடிய நடவடிக்கைகள் குறித்து தற்போது கலந்துரையாடி திட்டங்களை தயாரித்து வருகின்றனர்.

குறிப்பாக, அடுத்த போக விவசாயச் செய்கையின் போது இந்த நிலைமைக்கு எவ்வாறு முகம்கொடுப்பது என்பது குறித்தே ஆராயப்படுகிறது. ஏனெனில், வளிமண்டலவியல் திணைக்களம் உள்ளிட்ட இது சார்ந்த குழுக்கள் இந்த சாத்தியமான நிலைமை குறித்து சில எதிர்வுகூறல்களை வெளியிட்டுள்ளன. இவற்றையும் கருத்திற்கொண்டே எதிர்காலத் திட்டங்கள் வகுக்கப்படுகின்றன. இதன் பாதிப்பைக் குறைத்து, தேவையான முன்னாயத்த நடவடிக்கைகளை உரிய நேரத்தில் மேற்கொள்வதற்கே நாம் நடவடிக்கை எடுத்து வருகிறோம்.”

உயிர்த்த ஞாயிறு குண்டுத்தாக்குதலின் சூத்திரதாரிகளைக் கண்டறிந்து நீதி கோரி,  கொழும்பு புறக்கோட்டை புகையிரத நிலையத்துக்கு முன்னால் இன்று (16) பிற்பகல் 2 மணியளவில் அமைதிவழி ஆர்ப்பாட்டம் நடத்தப்பட்டது.

சமூக நீதிக் கட்சி மற்றும் ஏனைய அமைப்புகள், சமூக செயற்பாட்டாளர்களின் ஏற்பாட்டில் இந்த ஆர்ப்பாட்டம் நடத்தப்பட்டது.

பாரபட்சமற்ற நீதி விசாரணைக்கு பாதிக்கப்பட்ட முஸ்லிம் சமூகமும் இந்த ஆர்ப்பாட்டத்துக்கு முழு ஆதரவு வழங்கியுள்ளனர்.

மட்டக்களப்பு மாவட்ட விவசாயிகளின் தற்போதைய அறுவடைக்கால சவால்கள், நெல் கொள்வனவுப் பிரச்சினைகள் மற்றும் நீண்டகாலத் தேவைகள் குறித்து மட்டக்களப்பு மாவட்ட சிவில் சமூக செயற்பாட்டாளரும் முழுநேர விவசாயியுமான சந்துருலிங்கம் கிருஷ்ணசந்திரன் அவர்கள் இன்று (16) செவ்வாய்க்கிழமை விசேட கருத்துக்களைப் பகிர்ந்துள்ளார்.

அரசாங்கத்தின் சாதகமான நடவடிக்கைகள் சிலவற்றை வரவேற்ற அதேவேளை, உள்ளூர் விவசாயிகள் எதிர்கொள்ளும் பிரத்தியேக சவால்களுக்கு அரசாங்கம் உடனடியாகக் கவனம் செலுத்த வேண்டும் என்றும் அவர் வலியுறுத்தினார்.

கடந்த கால அரசாங்கங்களுடன் ஒப்பிடுகையில், தற்போதைய அரசு விவசாயிகளுக்குப் பெரும் சலுகைகளையும் மானியங்களையும் வழங்கியுள்ளது.

முன்னர் ஹெக்டேயருக்கு வழங்கப்பட்ட 15,000 ரூபாய் உர மானியத்தை, இந்த அரசாங்கம் இரண்டு மடங்காக அதிகரித்து ஹெக்டயருக்கு 30,000 ரூபாயாக வழங்கியுள்ளது.

மத்திய கிழக்கு நாடுகளின் யுத்த சூழல் காரணமாக உலகளாவிய ரீதியில் உரத் தட்டுப்பாடு ஏற்பட்டு, தனியார் நிறுவனங்கள் உர விலையை உயர்த்த முயன்றபோதும், அதனை அரசு கட்டுப்பாட்டுக்குள் கொண்டு வந்து 10,100 ரூபாய் என்ற நியாயமான விலையில் விவசாயிகளுக்கு வழங்கியதை சிவில் சமூக செயற்பாட்டாளர் பாராட்டினார்.

தற்போது மட்டக்களப்பு மாவட்டத்தில் சிறுநீர்ப்பாசனக் குளங்களின் கீழ் பரவலாக நெல் அறுவடை ஆரம்பமாகியுள்ளது.

ஒரு கிலோ அரிசியை உற்பத்தி செய்வதற்கு 125 முதல் 135 ரூபாய் வரை செலவாகிறது.

தற்போது சந்தையில் ஈரநெல் மூடை ஒன்று 4,500 முதல் 4,700 ரூபாய் வரையிலும், காய்ந்த நெல் 6,000 ரூபாய் வரையிலும் கொள்வனவு செய்யப்படுகிறது.

அரசாங்கம் அறிவித்துள்ள நெல்லுக்கான நிர்ணய விலையை இடைத்தரகர்களின் சுரண்டல்களுக்கு இடமளிக்காது முறையாக நடைமுறைப்படுத்த வேண்டும் என்பதுடன், இந்த ஜூன் மாத இறுதிக்குள் உத்தியோகபூர்வ விலை நிர்ணயத்தை அரசு உறுதிப்படுத்த வேண்டும்.

பொதுவாக மட்டக்களப்பு மாவட்டத்தின் நெல் அறுவடை முழுமையாக நிறைவடைந்த பின்னரே அரசாங்கம் நெல் நிர்ணய விலையை அறிவிக்கிறது. இதனால் மட்டக்களப்பு விவசாயிகளுக்குப் பலன் கிடைப்பதில்லை. மாறாக, அதன் பின்னரே அறுவடையைத் தொடங்கும் பொலன்னறுவை, அனுராதபுரம் போன்ற மாவட்ட விவசாயிகளுக்கே இதன் நன்மைகள் அதிகம் கிடைக்கின்றன. இந்த நிலை மாற்றப்பட வேண்டும்.

மட்டக்களப்பு மாவட்ட விவசாயிகளின் பெரும் சொத்தாகக் கருதப்படும் ‘தேவாபுரம் அரிசி ஆலை’ 1990 ஆம் ஆண்டு யுத்த காலத்தில் செயலிழந்தது. இன்றுவரை எந்தவொரு அரசாங்கமும் இதனைப் புனரமைக்க நடவடிக்கை எடுக்கவில்லை. தற்போதைய அரசு தனது ஆட்சிக்காலத்திற்குள் இந்த ஆலையை மீள இயங்கச் செய்வதன் மூலம், மாவட்டத்தின் நெல் உற்பத்தி மற்றும் பொருளாதாரத்தில் பெரும் மறுமலர்ச்சியை ஏற்படுத்த முடியும்.

நெல் கொள்வனவுச் சபை கடந்த காலங்களில் ஒரு நெற்காணி ஆவணப் படிவத்திற்கு (PLR) 5,000 கிலோ நெல்லைக் கொள்வனவு செய்தது. ஆனால், கடந்த பெரும் போகத்தின் போது அது 2,500 கிலோவாக (37 மூடைகள்) பாதியாகக் குறைக்கப்பட்டுள்ளது. இதனால் பெருமளவு நெல்லை விற்க முடியாமல் விவசாயிகள் வீடுகளில் முடக்கி வைக்கும் நிலைக்குத் தள்ளப்பட்டுள்ளனர்.

விவசாயிகளின் தற்போதைய இக்கட்டான நிலையைப் பயன்படுத்தி, எதிர்க்கட்சிகள் அல்லது ஏனைய அமைப்புகள் (ஏற்கட்சிகள்) சுயலாப அரசியலுக்காக கவடா நாடகங்களை அரங்கேற்ற முயன்று வருகின்றன. அரசாங்கம் இதற்கு எக்காரணம் கொண்டும் இடமளிக்கக் கூடாது.

விவசாயிகளின் நெல்லுக்கு முறையான நியாயமான விலையையும், உரிய மானியங்களையும் தங்குதடையின்றி வழங்கி, மட்டக்களப்பு மாவட்ட விவசாயிகளின் வாழ்வாதாரத்தை இந்த அரசு பாதுகாக்க வேண்டும் என சிவில் சமூக செயற்பாட்டாளர் சந்துருலிங்கம் கிருஷ்ணசந்திரன் கோரிக்கை விடுத்துள்ளார்.

உயிர்த்த ஞாயிறு பயங்கரவாதத் தாக்குதல் தொடர்பில் மேற்கொள்ளப்பட்டு வரும் விசாரணைகளுக்கு அமைவாக, பயங்கரவாதத் தடுப்புச் சட்டத்தின் கீழ் தன்னைக் கைது செய்வதைத் தடுக்கும் உத்தரவொன்றைப் பிறப்பிக்குமாறு கோரி முன்னாள் ஜனாதிபதி கோட்டாபய ராஜபக்ஷ மேன்முறையீட்டு நீதிமன்றத்தில் மனுவொன்றைத் தாக்கல் செய்துள்ளார்.

நாங்கள் பாகிஸ்தானை நம்புவதில்லை என்று இந்தியாவுக்கான இஸ்ரேல் தூதர் ருவன் அசார் தெரிவித்துள்ளார்.

அமெரிக்கா, ஈரான் இடையே கடந்த பிப்ரவரி 28-ல் போர் தொடங்கியது. கடந்த ஏப்ரல் 8-ம் திகதி இடைக்கால போர் நிறுத்த உடன்படிக்கை ஏற்பட்டது. இரு தரப்புக்கும் இடையே அமைதிப் பேச்சுவார்த்தை நடைபெற்றது.

இதில் சற்று இழுபறி நிலவிய சூழலில் தற்போது இரண்டு தரப்பும் அமைதி ஒப்பந்தத்தை இறுதி செய்துள்ளன. வரும் வெள்ளிக்கிழமை அன்று ஜெனீவா நகரில் இந்த ஒப்பந்தம் முறைப்படி கையெழுத்தாக உள்ளது. இதற்கு முன்னதாக இருதரப்பு இணையவழியில் விர்ச்சுவலாக இந்த ஒப்பந்தத்தில் கையெழுத்திட்டுள்ளன.

இந்நிலையில், பாகிஸ்தானை நம்புவதில்லை என இந்தியாவுக்கான இஸ்ரேல் தூதர் ருவன் அசார் கூறியுள்ளார். இது தொடர்பாக செய்தி நிறுவனம் ஒன்றுக்கு அவர் அளித்த பேட்டியில், “நான் ஏற்கெனவே எனது பல்வேறு நேர்காணலில் இதை சொல்லி உள்ளேன். எங்களுக்கு பாகிஸ்தான் மீதும், பாகிஸ்தானியர்கள் மீது நம்பிக்கை என்பது இல்லை.

பாகிஸ்தானின் அணுகுமுறை, யூதர்களுக்கு எதிராக பாகிஸ்தான் பாதுகாப்புத் துறை அமைச்சர் தெரிவித்த கருத்துகள் என அவர்களின் செயல்பாடுகள் கண்டிக்கத்தக்கவை என்று கருதுகிறேன்” என்று அவர் தெரிவித்துள்ளார்.

கடந்த ஏப்ரல் மாதம் பாகிஸ்தான் வெளியுறவு அமைச்சர் கவாஜா ஆசிப், இஸ்ரேல் குறித்து சமூக வலைதளத்தில் தெரிவித்த கருத்து சர்ச்சையை கிளப்பியது. இஸ்ரேல் மனிதகுலத்தின் சாபம் என்று அவர் தெரிவித்திருந்தார். அதற்கு இஸ்ரேல் அப்போது எதிர்வினையாற்றி இருந்தார். இந்நிலையில், ருவன் அசார் இந்த கருத்தை இப்போது சொல்லியுள்ளார்.

நெல்லுக்கான நிர்ணய விலையை அரசாங்கம் வழங்க வலியுறுத்தி கிளிநொச்சி விவசாயிகள் இன்றைய தினம் (16) கவனயீர்ப்பு பேரணி ஒன்றினை முன்னெடுத்திருந்தனர்.

கிளிநொச்சி நகர் சித்திவிநாயகர் ஆலய முன்றலிருந்து மாவட்ட செயலகம் வரை முன்னெடுக்கப்பட்டு தமது கோரிக்கை அடங்கிய மகஜரை மாவட்ட அரசாங்கதிபர் சுப்பிரமணியம் முரளிதரனிடம் ஜனாதிபதி, மாவட்ட ஒருங்கிணைப்பு குழு தலைவர், விவசாய அமைச்சர் உள்ளிட்டோருக்கு கையளித்திருந்தனர்.

தற்போது அரசாங்கமானது ஒரு கிலோ நெல்லை 120ரூபாகொள்வனவு செய்கின்றது. இது உற்பத்தி செலவுக்கு போதுமானதாக இல்லை எனவும் 135 ரூபாவுக்கு அரசாங்கம் நெல்லை கொள்வனவு செய்ய வேண்டும் எனவும் விவசாயிகள் தெரிவித்தனர்.

புங்குடுதீவு மாணவி படுகொலை வழக்கில் உயர் நீதிமன்றத்தினால் உறுதி செய்யப்பட்ட தீர்ப்பினை, யாழ்ப்பாணம் மேல் நீதிமன்றம் குற்றவாளிகளுக்கு வாசித்துக் காட்டி நேற்று (15) மீண்டும் உறுதிப்படுத்தியது.

அதேவேளை, உயர் நீதிமன்றத்தினால் இவ்வழக்கிலிருந்து விடுவிக்கப்பட்ட இருவரையும் யாழ்ப்பாணம் மேல் நீதிமன்றம் விடுதலை செய்தது.

கடந்த 2015ஆம் ஆண்டு மே மாதம் 13ஆம் திகதி, பாடசாலைக்குச் சென்றுகொண்டிருந்த வேளையில் புங்குடுதீவு மாணவி கடத்தப்பட்டு, கூட்டு பாலியல் வன்புணர்வுக்கு உட்படுத்தப்பட்டுப் படுகொலை செய்யப்பட்டார்.

இது தொடர்பான வழக்கு விசாரணைகளின் போது 07 பேரைக் குற்றவாளிகளாகக் கண்ட ‘ட்ரயல் அட் பார்’ (Trial-at-Bar) தீர்ப்பாயம், அவர்களுக்கு மரண தண்டனை விதித்துத் தீர்ப்பளித்தது.

இத்தீர்ப்பினை எதிர்த்து 07 பேரும் உயர் நீதிமன்றத்தில் மேன்முறையீடு செய்தனர். அதனைத் தொடர்ந்து நடைபெற்ற மேல்முறையீட்டு விசாரணை முடிவில், இருவரை உயர் நீதிமன்றம் விடுவித்ததுடன், ஏனைய ஐவரின் மரண தண்டனையையும் உறுதி செய்தது.

எனினும், வழக்கு விசாரணைக் காலத்திலேயே மரண தண்டனைக் கைதி ஒருவர் சிறையில் நோய்வாய்ப்பட்டு உயிரிழந்தார்.

ஏனைய நால்வரின் தண்டனையை யாழ்ப்பாணம் மேல் நீதிமன்றத்தில் மீண்டும் உறுதிப்படுத்துவதற்காக அவர்கள் யாழ்ப்பாணத்திற்கு அழைத்து வரப்பட்டிருந்தனர். இந்த நிலையில், கடந்த மாதம் 25ஆம் திகதி அந்நால்வரில் ஒருவர் சிறைக்குள் தனது உயிரை மாய்த்துக்கொண்டார்.

இதனால், தீர்ப்பினை உறுதி செய்வதற்காக அன்றைய தினம் எடுத்துக்கொள்ளப்படவிருந்த வழக்கு ஒத்திவைக்கப்பட்டது.

இவ்வழக்கு நேற்று மீண்டும் விசாரணைக்கு எடுத்துக்கொள்ளப்பட்ட போது, மரண தண்டனை விதிக்கப்பட்ட ஐந்து குற்றவாளிகளில் இருவர் தற்போது உயிருடன் இல்லாததால், சிறையில் உள்ள ஏனைய மூவருக்கும் உயர் நீதிமன்றத் தீர்ப்பை மேல் நீதிமன்றம் வாசித்துக் காட்டி உறுதிப்படுத்தியது.

அதேநேரம், உயர் நீதிமன்றத்தினால் குற்றச்சாட்டுகளிலிருந்து விடுவிக்கப்பட்ட ஏனைய இருவரையும் மேல் நீதிமன்றம் விடுதலை செய்து உத்தரவிட்டது.

தமது வருகை,  சித்திரவதைத் தடுப்புப் பொறிமுறையின் செயற்திறனை மதிப்பிடுவதையும், கடந்த காலங்களில் எமது பரிந்துரைகள் எவ்வாறு நடைமுறைப்படுத்தப்பட்டுள்ளன என்பது பற்றி ஆராய்வதையும் பிரதான நோக்கங்களாகக் கொண்டிருக்கிறது’ என ஐ.நா உபகுழுவின் தலைவர் ஆயிஷா ஷுஜுனே முகம்மது தெரிவித்துள்ளார்.

இலங்கையில்  கண்காணிப்பு நடவடிக்கைகளை முன்னெடுப்பதற்காகவும், சித்திரவதைகள் இடம்பெறாதிருப்பதை உறுதிப்படுத்துவதற்காகவும் திங்கட்கிழமை (15) சித்திரவதைகளைத் தடுப்பதற்கான ஐக்கிய நாடுகள் உபகுழுவின் பிரதிநிதிகள் இலங்கைக்கு வருகை தந்துள்ளனர்.

‘நாம் இலங்கைக்கு 2019 ஆம் ஆண்டு மேற்கொண்ட விஜயத்தின் பின்னர் அரசாங்கம் சித்திரவதைகள் இடம்பெறுவதைத் தடுப்பதற்காக தேசிய தடுப்புப் பொறிமுறையை நடைமுறைப்படுத்தியுள்ளது. இது சித்திரவதைகளைத் தடுப்பதை இலக்காகக்கொண்ட பயணத்தில் முக்கிய நகர்வாகும்’ எனச் சுட்டிக்காட்டியுள்ள சித்திரவதைகளைத் தடுப்பதற்கான ஐ.நா உபகுழுவின் தலைவர் ஆயிஷா ஷுஜுனே முகம்மது, ‘எமது தற்போதைய விஜயமானது சித்திரவதைத் தடுப்புப் பொறிமுறையின் செயற்திறனை மதிப்பிடுவதையும், கடந்த காலங்களில் எமது பரிந்துரைகள் எவ்வாறு நடைமுறைப்படுத்தப்பட்டுள்ள என்பது பற்றி ஆராய்வதையும் பிரதான நோக்கங்களாகக் கொண்டிருக்கிறது’ என்று தெரிவித்துள்ளார்.

இலங்கைக்கான சீன மக்கள் குடியரசின் தூதரகத்தின் புதிதாக நியமிக்கப்பட்ட பாதுகாப்பு ஆலோசகர் சிரேஷ்ட கேர்ணல் Fu Xiao, பாதுகாப்பு பிரதியமைச்சர் மேஜர் ஜெனரல் அருண ஜயசேகரவை (ஓய்வு) நேற்று (15) கொழும்பிலுள்ள அவரது அலுவலகத்தில் மரியாதை நிமித்தம் சந்தித்தார்.

இதன்போது, பாதுகாப்பு பிரதியமைச்சரும் சீன பாதுகாப்பு ஆலோசகரும் இருதரப்பு பாதுகாப்பு ஒத்துழைப்பு மற்றும் பரஸ்பர முக்கியத்துவம் வாய்ந்த விடயங்கள் தொடர்பில் சுமூக கலந்துரையாடலில் ஈடுபட்டனர்.

இலங்கை ஆயுதப்படைகளின் இராணுவப் பயிற்சி மற்றும் தொழில்முறை திறன் மேம்பாட்டிற்கு சீனா நீண்டகாலமாக வழங்கி வரும் ஒத்துழைப்பை பாதுகாப்பு பிரதியமைச்சர் பாராட்டினார்.

மேலும், நில அடிப்படையிலான படை நிலைப்பாட்டிலிருந்து கடல்சார் கள விழிப்புணர்வை (Maritime Domain Awareness) வலுப்படுத்தும் நோக்கில் இலங்கை முன்னெடுத்து வரும் தற்போதைய மூலோபாய மாற்றத்தை விளக்கியதுடன், நடுநிலையான அணிசேரா வெளிநாட்டுக் கொள்கைக்கான நாட்டின் அர்ப்பணிப்பையும் மீள உறுதிப்படுத்தினார்.

எதிர்கால ஒத்துழைப்பிற்கான முக்கிய துறைகளாக போதைப்பொருள் கடத்தல், ஆயுதக் கடத்தல் மற்றும் மனிதக் கடத்தலை எதிர்கொள்ளும் கடல்சார் பாதுகாப்பு, தொழில்நுட்ப ஒருங்கிணைப்பு, பயிற்சி மற்றும் ஒப்புருவாக்க (Simulation) நிகழ்ச்சிகள், அத்துடன் அனர்த்த முகாமைத்துவம் ஆகியவை இரு தரப்பினராலும் அடையாளம் காணப்பட்டன. இந்த சந்திப்பில் சீனத் தூதரகத்தின் பிரதிப் பாதுகாப்பு ஆலோசகர் மற்றும் கடற்படை ஆலோசகர் ஆகியோரும் கலந்துக் கொண்டனர்.