பொதுஜன பெரமுனவின் ஜனாதிபதி வேட்பாளராக அறிவிக்கப்பட்டுள்ள முன்னாள் பாதுகாப்பு செயலர் கோத்தாபய ராஜபக்ஷ, 2005 ஆம் ஆண்டு அமெரிக்க பிரஜையாக இருந்தபோது  ஹம்பாந்தோட்டை – மெதமுலன வாக்காளர் இடாப்பில் பெயர் உள்வாங்கப்பட்ட விதம் மற்றும்  தற்போது அவர் இலங்கை கடவுச் சீட்டொன்றினை பெற்றுக்கொண்ட விதம் தொடர்பில் விஷேட விசாரணைகள் ஆரம்பிக்கப்பட்டுள்ளன.

குற்றப் புலனயவுப் பிரிவின் சிறப்புக் குழுவொன்று இது தொடர்பில் விசாரணைகளை நடத்திவருவதாக பொலிஸ் தலைமையக தகவல்கள் தெரிவித்தன.

பொலிஸ் தலைமையகத்துக்கு கிடைக்கப்பெற்றுள்ள இருவேறு முறைப்பாடுகளுக்கு அமைய இந்த விசாரணைகள் முன்னெடுக்கப்பட்டுள்ளன.

எவ்வாறாயினும் இரட்டை பிரஜா உரிமையை அகற்றிக்கொண்டதாக, இந்த இலங்கை கடவுச் சீட்டைப் பெற்றுக்கொள்வதற்காக கோத்தாபய ராஜபக்ஷவினால் ஆவணங்கள் சில சமர்ப்பிக்கப்பட்டுள்ளதாகவும், அதன் நம்பகத்தன்மையை உறுதி செய்துகொள்ளவும், மேலதிக தகவல்களை வெளிப்படுத்தவும் உள் நாட்டலுவல்கள் அமைச்சர் வஜிர அபேவர்தனவிடமும் விசாரணை செய்து விஷேட வாக்கு மூலம் ஒன்றினை பதிவு செய்ய  சி.ஐ.டி. திட்டமிட்டுள்ளதாக அறியமுடிகின்றது.

எதிர்வரும் அரச தலைவர் தேர்தலில் சிறீலங்காவின் தற்போதைய பிரதமர் ரணில் விக்கிரமசிங்காவை சிறீலங்காவின் அரச தலைவர் வேட்பாளராக நிறுத்துவதுடன் அவருக்கு தமிழ் மக்களின் வாக்குகளை பெற்றுக்கொடுப்பதிலும் தமிழ்த் தேசிய கூட்டமைப்பின் நாடாளுமன்ற உறுப்பினர் சுமந்திரனும், சிறீலங்கா அரசின் வடமாகாண ஆளுநர் சுரேன் ராகவனும் தீவிரமாக செயற்பட்டுவருகின்றனர்.

அண்மையில் யாழ்ப்பாணத்திற்கு பயணம் மேற்கொண்டிருந்த ரணில் அங்கு மேற்கொண்ட அபிவிருத்தி திட்டங்களில் பங்குபற்றிய இவர்கள் ரணிலை வெற்றிபெறவைப்பதற்கான பிரச்சாரங்களை மேற்கொண்டிருந்தனர்.

2005 ஆம் ஆண்டு தமிழ் மக்கள் அரச தலைவர் தேர்தலைப் புறக்கணித்ததால் தான் ரணில் தோல்வியடைந்ததாக தெரிவித்துள்ள சுமந்திரன் தமிழ் மக்களுக்கு சமஸ்டி முறையில் அதிகாரங்களை பகிரும் தீர்வு ஒன்றை 2005 ஆம் ஆண்டு ரணில் முன்வைத்திருந்ததாகவும் தெரிவித்துள்ளார்.

எனவே அதனை நிறைவேற்ற ரணிலுக்கு ஒரு சந்தர்ப்பம் வழங்கவேண்டும் எனவும், தற்போது வடக்கில் பொருளாதார அபிவிருத்தியை மேற்கொண்டுவரும் ரணில் விரைவில் அரசியல் அதிகாரங்களை வழங்கவேண்டும் எனவும் அவர் மேலும் தெரிவித்துள்ளார்.

இதனிடையே, வடக்கில் ஜனநாயத்தை நிலைநாட்ட ரணில் அரச தலைவராக வரவேண்டும் என சிறீலங்கா அரசின் வடமாகாண ஆளுநர் சுரேன் ராகவன் தெரிவித்துள்ளார்.

மூத்த வழக்கறிஞரும், பாஜக மூத்த தலைவருமான ராம்ஜெத்மலானி, உடல்நலக் குறைவால் இன்று (08.09) காலமானார்.

இந்தியாவில் மிகவும் பிரபலமான வழக்கறிஞராக திகழ்ந்த இவர், பெரிய இடத்தில் ஊழல் நடைபெற்றாலும், ஜனநாயகத்திற்கு அச்சுறுத்தல் வரும் போதும்  அதனை எதிர்த்து வாதாடும் திறமை கொண்டவர்.

கடந்த 2017 செப்டெம்பரில் தனது வழக்கறிஞர் தொழிலில் இருந்து ஓய்வு பெற்றார்.

வீரப்பன் வழக்கில் தூக்குத் தண்டனை விதிக்கப்பட்ட ஐவரின் வழக்கிற்காக, கொளத்தூர் மணி, ஹென்றி உட்பட ஐவருக்கும் தூக்குத் தண்டனையை ரத்துச் செய்ய கட்டணம் எதுவுமின்றி வாதாடி வென்றார்.

ஈழப் படுகொலை குறித்து வை.கோபாலசாமி எழுதிய “Genocide of Eelam Tamils Hearts bleed” நூலை இந்திய தலைநகர் டெல்லியில் வெளியிட்டு உரையாற்றும் போது, தான் உயிரோடு இருக்கும் வரை வைகோவிற்காக, ஈழத் தமிழர்களைக் காக்க அனைத்தையும் செய்வேன் என்று சபதம் பூண்டார்.  இதே நூலை, மராட்டியில் மொழிபெயர்த்து, மும்பை செம்பூர் தமிழ்ச் சங்க அரங்கில் வெளியிட்ட போது, ஈழத் தமிழர்களுக்காக உச்சநீதிமன்றத்திலும் வாதாடுவேன் என்றார்.

வார்த்தைகளால் மட்டுமல்ல இதை செயலிலும் காட்டினார். ராஜீவ் காந்தி கொலை வழக்கில் தூக்குத் தண்டனை விதிக்கப்பட்ட மூவரது (பேரறிவாளன், முருகன், சாந்தன்) தூக்குத் தண்டனையை இரத்துச் செய்வதற்காக வாதாடினார்.  அந்த வழக்கின்போது அங்கு திரண்டிருந்த பல்லாயிரக்கணக்கான தமிழர்கள் முன்னிலையில்    உரையாற்றினா். 2014ஆம் ஆண்டு இந்த வழக்குத் தொடர்பாக வாதாடும் போது ராஜீவ் காந்தி கொலை நாட்டிற்கு எதிரான குற்றமல்ல. மேலும், இவர்களுக்கு இந்தக் கொலையில் நேரடியான தொடர்பு இல்லை. 23 ஆண்டுகளுக்கு மேலாக சிறைத் தண்டனை அனுபவித்து விட்டார்கள். இந்த வழக்கை கருணை அடிப்படையில் அணுக வேண்டும் என்று கூறினார்.

ஏறத்தாழ இரண்டரை வருட காலமாக உச்சநீதிமன்றத்தில் மூவர் தூக்கு வழக்கில், அனைத்து அமர்வுகளிலும் பங்கேற்றார். அவரது வாதத் திறமை தான் தூக்குக் கயிற்றை பலமிழக்கச் செய்தது. அதன் பின்னர்  ராஜீவ் காந்தி கொலை வழக்கில் ஆயுள் தண்டனை விதிக்கப்பட்ட 7 பேரின் விடுதலைக்காக சென்னை உயர் நீதிமன்றத்திலும், உச்ச நீதிமன்றத்திலும் பல்வேறு வழக்குகளில் வாதிட்டவர்.

கடந்த ஒரு வருடமாக உடல்நலக் குறைவாக இருந்த இவர், இன்று இயற்கை எய்தினார்.

இலங்கையில் வாழும் தமிழர்களின் கோரிக்கைகளை நிறைவேற்றுவது பிரதமர் மோடி கையில் தான் உள்ளது என மட்டக்களப்பு மாவட்ட பாராளுமன்ற உறுப்பினர் சீனிவாசன் யோகேஸ்வரன் தெரிவித்தார்.

கொடைக்கானலில் ஊடகவியலாளர்களிடம் பேசிய இவர், இலங்கையில் இருந்து வந்த தமிழர்கள் தமிழ்நாட்டில்  கொடைக்கானல், ஊட்டி போன்ற இடங்களில் வசித்து வருகின்றனர். அகதி முகாம்களில் வாழ்ந்து வரும் இலங்கைத் தமிழர்கள் படித்து வருகின்றனர்.

ஆனால் அவர்களுக்கு வேலைவாய்ப்புகள் அளிக்கப்படவில்லை. தமிழக அரசும், இந்திய அரசும், அவர்களுக்கு வேண்டிய வசதிகள் செய்து கொடுக்க வேண்டும். இல்லையெனில் அவர்கள் விருப்பப்படி இலங்கைக்கு அனுப்ப வேண்டும்.

இலங்கையில் நடைபெற்ற போருக்கு பின் இலங்கை அகதிகள் 15 இலட்சம் பேர் பல்வேறு நாடுகளுக்கு இடம்பெயர்ந்துள்ளனர். இலங்கை தமிழ் மக்களுக்கும், இந்திய தமிழ் மக்களுக்கும் உறவு நீடிக்க வேண்டும் எனில் இந்தியா – இலங்கை இடையே கப்பல் போக்குவரத்தை மேற்கொள்ள வேண்டும் என மத்திய அரசிடம் கேட்டிருந்தோம்.

அண்மையில் பிரதமர் நரேந்திர மோடி இலங்கைக்கு வந்திருந்த போது நாங்கள் கப்பல் போக்குவரத்து தொடங்குமாறு கேட்டோம். அவர் தமிழகத்தில் இருந்து இலங்கைக்கு பாலம் அமைத்துக் கொடுப்பதாக பாராளுமன்றத்தில் தெரிவித்தார்.

இலங்கையில் உள்ள தமிழ் மக்களின் நியாயமான கோரிக்கைகள் நிறைவேற்றுவது பிரதமர் நரேந்திரமோடி கையில் தான் உள்ளது. அவர் நினைத்தால் இலங்கை மக்களுக்கு நல்ல தீர்வை பெற்றுக் கொடுக்கலாம்.

இலங்கையில் 2009ஆம் ஆண்டிற்கு பின்னர் ஓரளவிற்கு அமைதி நிலவியது. கடந்த ஏப்ரல் 21 இலங்கையில் உள்ள தேவாலயங்கள், சுற்றுலா விடுதிகளில் ஐ.எஸ். தீவிரவாதிகளால் தாக்குதல் நடத்திக் கொல்லப்பட்டவர்களில் அதிகம் பேர் தமிழர்கள்தான் என்றார்.

சம்மாந்துறை பொலிஸ் பிரிவிற்குட்பட்ட  ஒடங்கா-2 பகுதியில்  தனியான் காட்டு யானை ஒன்று   பொதுமக்கள்  வசிக்கும் பகுதிகளில் அதிகாலை  திடிரென தாக்குதல் நடாத்தியுள்ளது.

அதிகாலை இவ்வாறு   உள்நுழைந்த பெரிய தனியான் யானை   அங்குள்ள  வீடுகளின் சுவர்களை உடைத்து சேதமாக்கியுள்ளதுடன் நெற்களஞ்சியத்திற்கும் கடும் சேதங்களை ஏற்படுத்தி தப்பி சென்றுள்ளது.

மேலும்   கடந்த 3 தினங்களுக்கு முன்னர் கல்லிரைச்சல் பகுதியில் யானை
தாக்குதலுக்கு உள்ளாகிய நிலையில் படுகாயமடைந்து கல்முனை அஸ்ரப் ஞாபகார்த்த வைத்தியசாலையில் சிகிச்சை பெற்று வந்த  ஏ.அமீர் என்ற நபரும் இன்று உயிரிழந்தள்ளார்.

மேலும்  இவ்வாறு யானையின்  தாக்குதலுக்கு உள்ளான  வீட்டு   மதில்கள்
சேதமடைந்த நெற்களஞ்சிய  பகுதிகளை பொலிஸாரும் சம்பந்தப்பட்ட அதிகாரிகளும் சென்று பார்வையிட்டுள்ளனர்.

இது தவிர   தாக்குதல் மேற்கொள்ளப்பட்ட இடங்களை சுற்றி 50க்கும் அதிகமான யானை கூட்டங்கள் இருப்பதை அவதானிக்க முடிகின்றது.

இது தொடர்பாக பொதுமக்கள்   கருத்துக்களை தெரிவிக்கையில்

குறிப்பாக இவ் யானை அடிக்கடி எங்கள் பிரதேங்களுக்கு வருகின்றன.இதனால் எங்களுக்கு அச்ச நிலை காணப்படுகிறது  சொத்துக்களுக்கு சேதங்கள் இடம்பெறுகின்றது   .இது விடயத்தில் உரிய அதிகாரிகள் இது தொடர்பாக நடவடிக்கை மேற்கொண்டு எங்கள் பாதுகாப்பை உறுதிப்படுத்த   வேண்டும் என்றனர்.

இது தவிர கடந்த சில தினங்களுக்கு முன்னரும் நிந்தவூர் பகுதிகளிலும் யானைகள் தாக்குதல் மேற்கொண்டிருந்தமை குறிப்பிடத்தக்கது.

மட்டக்களப்பு மாவட்டத்தின் கோறளைப்பற்று வாழைச்சேனைப் பிரதேச செயலகப் பிரிவிலுள்ள முறாவோடைத் தமிழ் மகா வித்தியாலய மைதானச் சுற்றுமதில் 06.09.2019 வெள்ளிக்கிழமை இரவு விசமிகள் சிலரால் உடைக்கப்பட்டது தொடர்பில் விசேட கலந்துரையாடல் ஒன்று இன்று பாடசாலையில் நடைபெற்றுள்ளது.

மட்டக்களப்பு மாவட்ட தமிழ் தேசிய கூட்டமைப்பு பாராளுமன்ற உறுப்பினர் ஞா.சிறிநேசன் இன்று அப்பகுதிக்கு சென்று பாடசாலையின் சேதமாக்கப்பட்ட சுற்றுமதிலை பார்வையிட்டதுடன் குறித்த சம்பவம் தொடர்பிலும் பிரதேச மக்களுடன் கேட்டறிந்தார்.

அதனைத்தொடர்ந்து அது தொடர்பில் வாழைச்சேனை பொலிஸ் நிலைய பொறுப்பதிகாரியுடனும் இது தொடர்பில் தொடர்புகொண்டு பேசியதுடன் பாடசாலை மண்டபத்தில் நடைபெற்ற விசேட கலந்துரையாடலிலும் கலந்துகொண்டார்.

தொடர்ச்சியாக இவ்வாறான சம்பவங்கள் நடைபெற்றுவருவதன் காரணமாக குறித்த பகுதியின் பாதுகாப்பினை உறுதிப்படுத்துமாறு பொலிஸாரிடம் பாராளுமன்ற உறுப்பினர் கேட்டுக்கொண்டார்.

இதேபோன்று இப்பிரச்சனை தொடர்பாகப் பிரதேசச் செயலாளர், மேலதிக அரசாங்க அதிபர், போன்றவர்களின் கவனத்திற்கு கொண்டு செல்லப்பட்டு உரிய நடவடிக்கை எடுக்குமாறு பணிப்புரைகளை பாரளுமன்ற உறுப்பினர் விடுத்துள்ளார்.