காத்தான்குடியில் சரீஆ சட்டத்தின் கீழ் 20 பேர் கொலை செய்யப்பட்டதாக கூறப்படும் தகவல் குறித்து உடன் விசாரணைகளை ஆரம்பிக்குமாறு  குற்றப் புலனாய்வுத் திணைக்களத்துக்கு பதில் பொலிஸ் மா அதிபர் ஆலோசனை வழங்கியுள்ளதாக பொலிஸ் ஊடகப் பேச்சாளரும் பொலிஸ் அத்தியட்சகருமான ருவன் குணசேகர தெரிவித்தார்.

கடந்த ஜூலை 4 ஆம் திகதி நுகேகொடயில் நடைபெற்ற கூட்டமொன்றின் போது பேராசிரியர் மெதகொட அபேதிஸ்ஸ தேரர் இந்த தகவலை வெளியிட்டிருந்தார். காத்தான்குடி பிரதேசத்தைச் சேர்ந்த முஸ்லிம் ஒருவரினால் மனித உரிமைகள் ஆணைகுழுவில் இந்த 20 பேரின் கொலை தொடர்பில் முறைப்பாடு செய்யப்பட்டுள்ளதாகவும் அது தொடர்பான அத்தனை ஆவணங்களும் தன்னிடம் உள்ளதாகவும் தேரர் கூறியிருந்தார்.

எந்தவொரு நேரத்திலும் பொலிஸில் அதனைச் சமர்ப்பிக்க தயாராக இருப்பதாகவும் தேரர் குறிப்பிட்டிருந்தார். இதனையடுத்தே இந்த வேண்டுகோளை பதில் பொலிஸ் மா அதிபர் விடுத்துள்ளதாகவும் பொலிஸ் ஊடகப் பேச்சாளர் மேலும் குறிப்பிட்டார்.   (மு)

தமிழ் மக்கள் ஒருபோதும் தனி இராஜ்ஜியத்தை கோரவில்லை. சமாதானம், ஒருமித்த நாட்டையே கேட்கின்றனர் என தமிழ்த் தேசியக் கூட்டமைப்பின் தலைவர் இரா. சம்பந்தன் தெரிவித்தார்.

நிதி அமைச்சர் மங்கள சமரவீரவின் 30 வருட அரசியல் வாழ்க்கை நிறைவை முன்னிட்டு மாத்தறையில் ஏற்பாடு செய்யப்பட்டிருந்த நிகழ்வில் கலந்து கொண்டு உரையாற்றும்போதே அவர் மேற்கண்டவாறு குறிப்பிட்டார்.

தமிழ் மக்களின் கோரிக்கை பாரபட்சமற்ற முறையில் நிறைவேற்றிக் கொடுக்கப்பட வேண்டும். பிரிவினையற்ற, ஒற்றுமையான நாடாக எமது நாடு மாற வேண்டும் என்பதே எனது நிலைப்பாடாகும். சர்வதேசத்திடம் வழங்கிய வாக்குறுதிகளை நிறைவேற்றாவிட்டால் எமது ஆட்சி நிலைமைகள் மாறிவிடும்.

தற்போதும் தமிழ் மக்கள் நீதியையும் சமாதானத்தையம் தங்களுக்கு தருமாறு கோரி நிற்கின்றனர். ஆனால் அந்த கோரிக்கைகளிலும் வரையறை காணப் படுகிறது என்று குறிப்பிட்டார்.

ஈழத்தில் மிகுதியாக இருக்கக்கூடிய மக்களாவது பாதுகாக்கப்படா விட்டால், இன்னும் 10 ஆண்டுகளில் அங்கு தமிழனே இருக்க மாட்டான் என உலகத் தமிழர் பேரவைத் தலைவர் பழ.நெடுமாறன் தெரிவித்தார்.

தஞ்சாவூர் விளார் சாலையில் உள்ள முள்ளிவாய்க்கால் நினைவு முற்றத்தில் நேற்று மாலை நடைபெற்ற முள்ளிவாய்க்கால் படுகொலை பொது அரங்கத்தில் உரையாற்றும் போது இவ்வாறு குறிப்பிட்டார். அவர் தொடர்ந்து பேசுகையில்,

அந்த மக்கள் அழிவின் விளிம்பில் இருந்து கதறிக் கொண்டிருக்கின்றனர். அந்த மக்களை காப்பாற்ற வேண்டிய கடமை நமது தமிழ்நாட்டைச் சேர்ந்த ஏழரைக்கோடி மக்களுக்கும் உண்டு. அனைத்து தமிழர்களும் ஒன்றுபட்டு அவர்களைக் காக்க வேண்டும். நாம் ஒன்றுபட்டு நின்றால் உலககை ஈடுத்தமிழர்களின் பக்கம் திருப்ப நம்மால் முடியும்.

இலங்கை சுதந்திரமடைந்த 1948இலிருந்து தொடர்ந்து திட்டமிட்ட இனஅழிப்பு நடைபெற்று வருகின்றது. படுகொலை மட்டுமல்லாது, பண்பாட்டு, அடையாளங்களும் அழிக்கப்படுகின்றன. இதை சிங்களப் பேரினவாதிகள்  மேற்கொண்டு வருகின்றனர்.

ஈழத்தில் தமிழினம் அழிக்கப்படும் போது, உலகமே வேடிக்கை பார்த்தது. ஐ.நா. மனித உரிமை ஆணையகம் அறிக்கை வெளியிட்டது  ஆனால் எதுவும் நடக்கவில்லை. ஐ.நா அறிக்கை மட்டும் வெளியிட்டது. உலகம் எம்மை ஒரு பொருட்டாக மதிக்கவில்லை. இந்தியாவில் பல போராட்டங்கள் நடைபெற்ற போதும் எதுவும் நடக்கவில்லை. உலகம் எதற்கும் செவிசாய்க்கவில்லை.

ஈழத்தில் மிகுதியாக இருக்கும் மக்களாவது இனிமேல் பாதுகாக்கப்பட வேண்டும். அவர்களுக்காக நாம் குரல் கொடுப்போம். என்று கூறினார்.

நிகழ்ச்சியில் மதிமுக பொதுச் செயலாளர் வை கோ, எஸ்.டி.பி.ஐ தலைவர் தெகலான் பாகவி, தமிழ்த் தேசியப் பேரியக்கத் தலைவர் பெ.மணியரசன், மார்க்சிஸ்ட் கம்êனிஸ்ட் கட்சி மாவட்டச் செயலர் கோ.நீலமேகம், இந்திய கம்êனிஸ்ட் கட்சி மாநிலக் குழு உறுப்பினர் இரா.திருஞானம், மாவட்டச் செயலர் மு.அ.பாரதி, விடுதலைப் புலிகள் கட்சித் தலைவர் குடந்தை அரசன், சமவெளி விவசாயிகள் சங்கத் தலைவர் சு.பழனிராசன், வழக்குரைஞர் அ.நல்லதுரை, தமிழர் தேசிய முன்னணி பொதுச் செயலாளர் அய்யனாபுரம் சி.முருகேசன் ஆகியோர் கலந்து கொண்டனர்.

சிறிலங்கா கடற்படைக்கு சீன அரசாங்கம் வழங்கிய பெரிய கப்பல் இன்று (08.07) காலை கொழும்பு துறைமுகத்தை வந்தடைந்தது. P 625 என்னும் பெயர் கொண்ட இந்தக் கப்பலை உத்தியோகபூர்வமாக சிறிலங்கா அரசாங்கத்திடம் கையளிக்கும் நிகழ்வு கடந்த 5ஆம் திகதி சீனாவின் சங்ஹாயில் உள்ள கடற்படைப் பிரிவில் இடம்பெற்றது.

சிறிலங்கா கடற்படை அதிகாரிகளின் தலைமை அதிகாரி றியர் அட்மிரல் நிசாந்த உலுகே தென்னக்கோனின் தலைமையிலான குழுவினர் இதில் கலந்து கொண்டனர்.

1994இல் தயாரிக்கப்பட்ட இந்தக் கப்பலின் நீளம் 112 மீற்றர் என்பதுடன், அகலம் 12.4 மீற்றர் என கடற்படைத் தரப்பினர் கூறினர். 2300 தொன்கள் எடை கொண்ட இந்தக் கப்பலில்  18 அதிகாரிகள் உட்பட 110 பேரைக் கொண்ட பணியாளர்கள் கடமையில் ஈடுபட முடியும்.

மேலும், சிறிலங்கா கடற்படைக் கப்பல் குழுவில் இணைந்து கொண்ட பின்னர் சிறிலங்காவிற்கு உட்பட்ட ஆழ்கடல் வலயத்திற்குள் தேடுதல், மீட்டெடுத்தல் போன்ற பணிகள், கடல் வளங்களை பாதுகாத்தல், கடல் நடவடிக்கைகளில் ஈடுபடும் கப்பல் மற்றும் வளங்களுக்கு உதவிகளை வழங்குவது ஆகியவற்றிற்காக இந்தக் கப்பல் பயன்படுத்தப்படும் என்றும் எதிர்பார்க்கப்படுகின்றது.

இராஜதந்திர ரீதியிலான விஜயம் ஒன்றை மேற்கொண்டு, சிறிலங்கா வருமாறு கனேடிய அரச தலைவரை சிறிலங்கா ஜனாதிபதி மைத்திரிபால சிறிசேன கோரியிருந்தார். இதனை கனேடிய அரசாங்கம் நிராகரித்துள்ளது.

பொதுவாக இவ்வாறான அறிவித்தல்கள் வெளிவிவகார அமைச்சகங்கள் மற்றும் தூதுவராலயங்கள் ஊடாகவே மேற்கொள்ளப்படுவது வழமை.

ஜனாதிபதியின் மரண தண்டனை அமுல்ப்படுத்த காட்டிய ஆர்வம், ராஜதந்திர நடவடிக்கைகளில் அனுபவமின்மை போன்ற செயல்களும், ஐரோப்பிய ஒன்றியம் தமக்கு அழுத்தம் கொடுப்பதாக பேசியமையும் இந்த கனேடிய அரசாங்கத்தின் மறுப்பிற்கான காரணமாக கருதப்படுகின்றது.

இதேவேளை மைத்திரிபால சிறிசேனவை கனடா வருமாறும் கனேடிய அரசாங்கம் அழைப்பு விடுக்கவில்லை.

அரசாங்கத்துக்கு எதிரான நம்பிக்கையில்லாப் பிரேரணைக்கு எமது தலைவர்கள் எதிர்த்து வாழ்களித்து அரசுக்கு எதிர்ப்பினை தெரிவிக்க வேண்டும் என விலிந்து காணாமல் ஆக்கப்பட்டவர்களின் உறவுகள் கோரிக்கை விடுத்துள்ளனர்.

கிளிநொச்சியில் இன்று (08) இடம்பெற்ற ஊடக சந்திப்பில் கருத்து தெரிவிக்கும்போதே வடக்கு கிழக்கு வலிந்து காணாமல் ஆக்கப்பட்டவர்களின் உறவுகளின் சங்கத்தின் தலைவி திருமதி யோகராசா கனகரஞ்சினி இந்த கோரிக்கையை விடுத்தார்.

அவர் மேலும் தெரிவிக்கையில் “எமது அரசியல் தலைமைகள் காணாமல் ஆக்கப்பட்டவர்கள் விடயத்தில் இதய சுத்தியுடன் செயற்படவில்லை. வெளிநாடுகளிற்கு செல்கின்றனர், பிரதிநிதிகளாக ஜெனிவாவிற்கு செல்கின்றனர். நாடாளுமன்ற அமர்வுகளில் தவறாது கலந்துகொள்கின்றனர். ஆனால் எமது பிரச்சினைகள் தொடர்பில் அவர்கள் பேசியதாக தெரியவில்லை.

காணாமல் ஆக்கப்பட்ட எமது பிள்ளைகள் தொடர்பில் அக்கறை அற்றவர்களாகவும், மறந்தவர்களாகவும் எமது அரசியல் தலைமைகள் செயற்படுகின்றன.

இந்த நிலையில் தமிழ் மக்களின் நலனிற்காகவும், காணாமல் ஆக்கப்பட்ட எமது பிள்ளைகளிற்காகவும் வாக்கெடுப்பின் போது அரசுக்கு எதிர்ப்பை வெளியிட வேண்டும். நம்பிக்கையில்லா பிரேரணைக்கான வாக்கெடுப்பில் எதிராக வாக்களித்து அரசுக்கு எதிர்ப்பை வெளிப்படுத்த வேண்டும்.

தமிழ் மக்களின் பிரச்சினைகள், காணாமல் ஆக்கப்பட்ட உறவுகளின் விடயங்களை மறந்து இன்று கம்பெரலியவிற்கு்ம, சமுர்த்தி உள்ளிட்ட அபிவிருத்திகளிற்கும் முன்னுரிமை கொடுத்து செயற்படுவதை நாம் காண்கின்றோம்.

எமது பிரச்சினைகள் தொடர்பில் பேசுவார்கள் என எதிர்பார்த்த அவர்கள் இன்று அவற்றை மறந்து செயற்படுகின்றனர்” என குற்றம் சாட்டினார்.

கடந்த ஏப்பிரல் மாதம் கொழும்பிலும், மட்டக்களப்பிலும் இடம்பெற்ற தற்கொலைத் தாக்குதல்களைத் தொடர்ந்து பொதுமக்கள் அதிகம் கூடும் இடங்களை மக்கள் தவிர்த்து வருகின்றனர்.

இந்த நடவடிக்கை யாழ் திரையரங்குகளை அதிகம் பாதித்துள்ளதாக யாழ் தகவல்கள் தெரிவிக்கின்றன. மக்கள் திரையரங்குகளை தவிர்ப்பதால் சில படக் காட்சிகள் நிறுத்தப்படுவதுடன், திரையரங்குகள் தமது கட்டணத்தை 500 ரூபாயில் இருந்து 300 ரூபாய்களாகக் குறைத்துள்ளதாகவும் தெரிவிக்கப்படுகின்றனது.

சிறீலங்காவுக்கும் இந்தியாவுக்கும் இடையில் கடந்த சனிக்கிழமை (06) இடம்பெற்ற உலகக் கோப்பைக்கான துடுப்பாட்ட போட்டியின் போது இந்தியாவுக்கு எதிரான கோசங்களைத் தாங்கிய விமானம் வானில் பறந்தது தொடர்பில் இந்திய துடுப்பாட்ட சபை அனைத்துலக துடுப்பாட்ட சபையிடம் தனது முறைப்பாட்டை தெரிவித்துள்ளது.

பிரித்தானியாவின் லீட்ஸ் பகுதியில் துடுப்பாட்டப் போட்டி இடம்பெற்றவேளையில் வானில் பறந்த விமானம் “காஷ்மீரில் இனப்படுகொலை நிறுத்தப்பட வேண்டும்” “ கஷ்மீரில் இடம்பெற்ற படுகொலைகளுக்கு நீதி வேண்டும்” என்ற வாசகங்களை தாங்கியவாறு பறந்து சென்றிருந்தது.

இந்த நடவடிக்கை தொடர்பில் இந்தியா அதிக சீற்றம் அடைந்துள்ளதுடன், தனது துடுப்பாட்ட அணியினருக்கு பாதுகாப்பு அச்சுறுத்தல் உள்ளதாகவும் தெரிவித்துள்ளது.

இதனிடையே, மூன்று தடவைகள் விமானங்கள் வெவ்வேறு வாசகங்களைத் தாங்கியவாறு பறந்ததாக தெரிவிக்கப்படுகின்றது.