முன்னாள் நீதி அமைச்சர் விஜயதாச ராஜபக்சவின் மகனான சட்டத்தரணி ரகித ராஜபக்ச மற்றும் ஹொரணை ஐக்கிய மக்கள் சக்தியின் தொகுதி அமைப்பாளர் சரித் அபேசிங்க ஆகியோர் இலஞ்ச ஊழல் ஒழிப்பு விசாரணை ஆணைக்குழுவின் அதிகாரிகளால் கைது செய்யப்பட்டுள்ளனர்.

ஒழுங்கமைக்கப்பட்ட குற்றவாளி ஒருவருடன் தொடர்புகளைப் பேணிய குற்றச்சாட்டின் அடிப்படையில் இவர்கள் கைது செய்யப்பட்டுள்ளதாக தெரிவிக்கப்படுகிறது.

நாடாளுமன்றத்தின் செங்கோலை எதிர்க்கட்சிகள் கைப்பற்றினாலும் அல்லது அதை விழுங்கினாலும் கூட, தற்போதைய நீதி அமைப்பில் வழக்குகளை விசாரித்து தீர்ப்புகளை வழங்கும் வேகம் ஒருபோதும் குறையாது என்று நீதி மற்றும் தேசிய ஒருமைப்பாட்டு அமைச்சர் ஹர்ஷன நாணயக்கார நாடாளுமன்றத்தில் திட்டவட்டமாகத் தெரிவித்துள்ளார்.

நாடாளுமன்றத்தில் நேற்று நடைபெற்ற விவாதத்தில் கலந்துகொண்டு உரையாற்றிய அவர், எதிர்க்கட்சிகளின் நாடாளுமன்ற சீர்குலைவு நடவடிக்கைகளுக்குப் பின்னால் சட்டத்தின் ஆட்சியைப் பாதுகாக்கும் நோக்கம் எதுவும் இல்லை என்றும், மாறாக தங்களுக்கு எதிராக நடந்து வரும் ஊழல் மற்றும் குற்றவியல் வழக்குகளின் தீர்ப்புகள் குறித்த பலத்த அச்சமே இதற்குக் காரணம் என்றும் குற்றம் சாட்டினார்.

கடந்த காலங்களுடன் ஒப்பிடுகையில் தற்போதைய அரசாங்கத்தின் கீழ் வழக்கு விசாரணைகள் கணிசமாக வேகப்படுத்தப்பட்டுள்ளதால், வரவிருக்கும் நீதிமன்றத் தீர்ப்புகள் என்ன என்பது எதிர்க்கட்சியினருக்கு நன்றாகவே தெரியும் என்றும் அமைச்சர் சுட்டிக்காட்டினார்.

பல ஆண்டுகளாக மாறாத ஒரு கண்ணியமற்ற அரசியல் கலாச்சாரத்தையே எதிர்க்கட்சிகள் இன்னும் பிரதிநிதித்துவப்படுத்துவதாகவும், தங்களுக்கு எதிரான சட்ட நடவடிக்கைகளைத் தடுத்து நிறுத்தவே நாடாளுமன்றத்தில் செங்கோலைத் தொடுவது போன்ற நாடகங்களை அவர்கள் அரங்கேற்றி வருவதாகவும் அவர் மேலும் தெரிவித்தார்.

அதேநேரம், நீதிபதிகளின் ஓய்வு பெறும் வயதை நீட்டிப்பது தொடர்பாக தற்போது ஆலோசிக்கப்பட்டு வருவதை ஒப்புக்கொண்ட அமைச்சர், இதற்கு எதிராக முன்வைக்கப்படும் மாற்று வாதங்கள் மற்றும் கருத்துக்களையும் அரசாங்கம் கவனத்தில் கொண்டுள்ளது என்றார்.

அனைத்துத் தரப்பினரின் கருத்துக்களையும் கேட்டு, மிகவும் பொருத்தமான ஜனநாயக முடிவை எட்டவே அரசு முறையாகச் செயல்பட்டு வருகிறது என்றும் அவர் உறுதிப்படுத்தினார்.

பொதுமக்கள் வழங்கிய ஆணையைத் தமது அரசாங்கம் எப்போதும் மதிக்கும் எனத் தெரிவித்த நீதியமைச்சர், நீதிமன்றத் தீர்ப்புகளுக்குப் பயந்து கற்பனை உலகில் வாழும் எதிர்க்கட்சியினர், நாடாளுமன்றத்தில் ஆதாரமற்ற மற்றும் அபத்தமான அறிக்கைகளை வெளியிடுவதை நிறுத்த வேண்டும் என்றும் நீதி மற்றும் தேசிய ஒருமைப்பாட்டு அமைச்சர் ஹர்ஷன நாணயக்கார கேட்டுக்கொண்டார்.

இஸ்ரேலில் பணிபுரியும் இலங்கைத் தொழிலாளர்கள் நாட்டுக்கு அனுப்பிய 6.9 மில்லியன் அமெரிக்க டொலர் பணம் இணையவழித் தாக்குதலுக்கு (Cyberattack) உள்ளாகியிருப்பதாக எதிர்க்கட்சிகள் முன்வைக்கும் குற்றச்சாட்டுகள் முற்றிலும் ஆதாரமற்றவை என்று இலங்கை அரசாங்கம் நாடாளுமன்றத்தில் திட்டவட்டமாகத் தெரிவித்துள்ளது.

இலங்கை வங்கியுடன் இணைந்து பணப் பரிமாற்றங்களை மேற்கொள்ளும் ‘குளோபல் ரெமிட்’ (Global Remit) என்ற சர்வதேச நிறுவனத்திற்கு எதிராக இஸ்ரேலிய அரசாங்கம் தற்போது நடத்தி வரும் ஒரு விசாரணையின் காரணமாகவே இந்த நிதி தற்காலிகமாக முடக்கப்பட்டுள்ளதாக வெளியுறவு மற்றும் வெளிநாட்டு வேலைவாய்ப்பு பிரதி அமைச்சர் அருண் ஹேமச்சந்திரா விளக்கியுள்ளார்.

இந்த சட்டப்பூர்வ விசாரணையின் விளைவாக சுமார் 5,100 இலங்கைத் தொழிலாளர்கள் தங்களது பணத்தைப் பெறுவதில் தற்காலிகச் சிரமங்களை எதிர்கொண்டுள்ளனர்.

எனினும், இது இலங்கைக்கு மட்டும் உரிய பிரச்சினை அல்ல என்றும், அங்கு பணிபுரியும் ஏனைய வெளிநாட்டுத் தொழிலாளர்கள் உட்பட மொத்தம் 11,400 பேர் இதனால் பாதிக்கப்பட்டுள்ளனர் என்றும் அவர் சுட்டிக்காட்டியுள்ளார்.

தற்போது இந்த விவகாரம் தொடர்பாக ‘குளோபல் ரெமிட்’ நிறுவனம் இஸ்ரேலிய நீதிமன்றத்தில் தனது தரப்பு விளக்கத்தை முன்வைத்துள்ளதுடன், உரிய தொகையைச் செலுத்துவதற்குத் தாங்களே பொறுப்பு என்றும் அதிகாரப்பூர்வமாக ஒப்புக்கொண்டுள்ளது.

இலங்கை அரசாங்கம் ஏற்கனவே தூதரக மற்றும் நிறுவன ரீதியான மட்டங்களில் தலையிட்டு இதற்கான நடவடிக்கைகளை எடுத்து வருவதால், மிக விரைவில் இந்த பிரச்சினைக்கு நிரந்தரத் தீர்வு கிடைக்கும் என எதிர்பார்க்கப்படுகிறது.

எனவே, அரசியல் லாபங்களுக்காகப் பரப்பப்படும் பொய்ப் பிரசாரங்களை நம்ப வேண்டாம் எனவும், ஊடகங்கள் சரியான தகவல்களை மட்டுமே பொதுமக்களுக்குக் கொண்டு சேர்க்க வேண்டும் எனவும் பிரதி அமைச்சர் அருண் ஹேமசந்திரா கேட்டுக்கொண்டுள்ளார்.

உயிர்த்த ஞாயிறு பயங்கரவாதத் தாக்குதல்கள் தொடர்பான விசாரணைகளில் தன்னைக் கைது செய்வதைத் தடுக்கும் உத்தரவொன்றைப் பிறப்பிக்குமாறு கோரி, முன்னாள் ஜனாதிபதி கோட்டாபய ராஜபக்ச தாக்கல் செய்த ரிட் மனு மீதான மேலதிக சமர்ப்பிப்புகள் ஜூலை மாதம் 6ஆம் திகதி வரை ஒத்திவைக்கப்பட்டுள்ளன.

மேல்முறையீட்டு நீதிமன்றத் தலைவர் நீதிபதி ரோஹந்த அபேசூரிய மற்றும் நீதியரசர் சரத் திசாநாயக்க ஆகியோர் அடங்கிய நீதியரசர்கள் அமர்வு முன்பாக இந்த மனு இன்று (24) இரண்டாவது நாளாக விசாரணைக்கு எடுத்துக்கொள்ளப்பட்ட போதே இந்த உத்தரவு பிறப்பிக்கப்பட்டது.

இன்றைய விசாரணையின் போது கோட்டாபய ராஜபக்ஷ சார்பில் முன்னிலையான ஜனாதிபதி சட்டத்தரணி ரொமேஷ் டி சில்வா, தனது தரப்பு வாதங்களையும் மேலதிக சான்றுகளையும் நீதிமன்றத்தில் சமர்ப்பித்தார்.

இந்த மனுவில் காவல்துறைமா அதிபர், குற்றப் புலனாய்வுத் திணைக்கள பணிப்பாளர் ஷானி அபேசேகர, காவல்துறையின் பரிசோதகர் மாதவ குணவர்தன மற்றும் சட்டமா அதிபர் ஆகியோர் பிரதிவாதிகளாகப் பெயரிடப்பட்டுள்ளதுடன், பிரதிவாதிகள் சார்பில் பிரதி சொலிசிட்டர் ஜெனரல் சுஹர்ஷி ஹேரத் நீதிமன்றத்தில் முன்னிலையாகியிருந்தார்.

உயிர்த்த ஞாயிறு பயங்கரவாதத் தாக்குதல்களுடன் தமக்கு எவ்வித தொடர்பும் இல்லை எனத் தெரிவித்துள்ள முன்னாள் ஜனாதிபதி, இந்த விவகாரம் குறித்து இதுவரையில் எந்தவொரு விசாரணை அமைப்பும் தன்னிடம் விசாரிக்கவோ அல்லது வாக்குமூலம் பெறவோ இல்லை என்றும் குறிப்பிட்டுள்ளார்.

எனினும், எந்தவொரு சந்தர்ப்பத்திலும் வாக்குமூலம் வழங்குவதற்குத் தாம் தயாராக இருப்பதாக அவர் நீதிமன்றத்துக்கு அறிவித்துள்ளார்.

அதேவேளை, எவ்வித நியாயமான அடிப்படையுமின்றி கொழும்பு கோட்டை நீதவான் நீதிமன்றத்தின் ஊடாகத் தமது தரப்பிற்கு வெளிநாட்டுப் பயணத்தடை விதிக்கப்பட்டுள்ளதாகவும், எவ்வித சான்றுகளும் இன்றி விசாரணைகளை முன்னெடுத்துத் தனது சுதந்திரத்தை மட்டுப்படுத்த பிரதிவாதிகள் முயல்வதாகவும் கோட்டாபய ராஜபக்ச தரப்பு சட்டத்தரணி இதன்போது குற்றம் சாட்டினார்.

இரு தரப்பு வாதங்களையும் அவதானித்த மேன்முறையீட்டு நீதியரசர்கள் குழாம் வழக்கை எதிர்வரும் ஜூலை 6 ஆம் திகதிக்கு ஒத்திவைத்தது.

அநுராதபுரம் மாவட்டத்தில் உள்ள விவசாய அமைப்புக்களின் தலைவர்களும் விவசாயிகளும் புதன்கிழமை (24) அநுராதபுரம் தம்புத்தேகம நகரில் அரசாங்கத்துக்கு எதிராக பாரிய எதிர்ப்பு ஆர்ப்பாட்டத்தில் ஈடுபட்டனர்.

அரசாங்கம் விவசாயிகளுக்கு அளித்த வாக்குறுதிகளை நிறைவேற்றுமாறு கோரியும் விவசாயிகள் அறுவடை செய்யும் நெல்லினை விற்பனை செய்வதில் எதிர்நோக்கும் பிரச்சினைகளை கலைந்து, சிறந்த உத்தரவாத விலையினை நிர்ணயம் செய்து கொள்வனவு செய்தல் உள்ளிட்ட விவசாயிகளின் பல்வேறுபட்ட பிரச்சினைகளுக்கு விரைவில் தீர்வினை பெற்றுத் தருமாறு வலியுறுத்தியும் ஆர்ப்பாட்டத்தில் ஈடுபட்டனர்.

முல்லைத்தீவு மாவட்டத்தின் கேப்பாபுலவு பகுதியில் தங்கள் பூர்வீக காணிகளை விடுவிக்க கோரி மக்கள் இராணுவ படைத்தலைமையகத்தின் முன்பாக இன்று (24) புதன்கிழமை காலை 11.30 மணியளவில் கவனயீர்ப்பு போராட்டத்தை முன்னெடுத்திருந்தனர்.

மாற்றுக்காணிகளை தாம் ஏற்றுக் கொண்டதாக ஜனாதிபதி பாராளுமன்ற உறுப்பினர் ரவிகரனிடம் தெரிவித்த கருத்து முற்றிலும் தவறானது எனவும் தாம் அப்படி எந்த மாற்றுக் காணிகளையும் ஏற்கப் போவதில்லை எனவும் மக்கள் தெரிவிக்கின்றனர்.

வட மாகாண ஆளுநர் நேரில் வருகை தந்து மக்களின் உண்மை நிலையை வெளிக்கொண்டு வருவதோடு, வாழ்விடப் பிரச்சினைக்கு உடனடியான சாதகமான தீர்வை வழங்க நடவடிக்கை எடுக்க வேண்டும் கேப்பாபுலவு பூர்வீக மக்கள் வேதனையுடன் கோரிக்கை விடுத்துள்ளனர்.

171 ஏக்கர் காணிகளை தொடர்ந்தும் இராணுவத்தின் 59 ஆவது காலால் படைப்பிரிவினர் தமது கட்டுப்பாட்டில் வைத்துள்ளனர். எனவே எமது காணிகளை விடுவிக்க கோரி இன்றிலிருந்து தொடர் போராட்டமாக இந்தப் போராட்டத்தினை தாம் முன்னெடுக்க போவதாக மக்கள் தெரிவித்ததுடன் கேப்பாப்பிலவு இராணுவ முகாமிற்கு முன்பாக அடையாள உண்ணாவிரதத்தில தொடர்ந்து இன்றுமுதல் ஈடுபட இருப்பதாக தெரிவித்துள்ளனர்.

கடல், கரை மற்றும் விவசாய நிலங்களை வாழ்வாதாரமாக நம்பியிருந்த கேப்பாபுலவு மக்கள், பாதுகாப்புப் படையினரின் நடவடிக்கைகளால் தங்களது வாழ்வாதாரம் கடுமையாக பாதிக்கப்பட்டுள்ளதாகவும், தொழில் துறைகள் முடக்கப்பட்டுள்ளதாகவும் குற்றம் சாட்டுகின்றனர்.

“போர் முடிவடைந்து 17 ஆண்டுகள் ஆகிவிட்டன. இருப்பினும் பாதுகாப்பு செயலகம் என்ற பெயரில் மக்களின் காணிகள் தொடர்ந்தும் அபகரிக்கப்பட்டு வருகின்றன. கடந்த 17 ஆண்டுகளாக தமது சொந்த நிலத்தில் குடியேற முடியாமல் தவித்து வருகிறோம். எமது பூர்வீக நிலத்தில் இராணுவம் எமது வளங்களை பயன்படுத்துகிறது. ஆனால் நாம் வீதியில் நின்று பார்த்துக்கொண்டிருக்கிறோம். இது எந்த வகையிலும் நியாயமல்ல” என மக்கள் வேதனையுடன் தெரிவித்துள்ளனர்.

குறித்த போராட்டத்தின் போது வெளியேறு வெளியேறு இராணுவமே வெளியேறு, எம் மண்ணில் நாம் உழைக்க வேண்டும் எம் உரிமையை நீ தர வேண்டும் இராணுவமே வெளியேறு, முகாம்களை மூடு நிலங்களை விடு, நில ஆக்கிரமிப்பை நிறுத்து, ஜனாநாயக அல்லது இராணுவ ஆட்சியா?, எமது வாழ்விடம் எமக்கு வேண்டும் போன்ற பல்வேறு வாசகங்கள் பொறிக்கப்பட்ட பதாதைகளை தாங்கியவாறு போராட்டத்தில் ஈடுபட்டிருந்தார்கள்.

நீண்டகாலமாக தீர்வு காணப்படாத காணி பிரச்சினைக்கு நிரந்தரத் தீர்வு வழங்கப்பட வேண்டும் என்பதே கேப்பாபுலவு மக்களின் பிரதான கோரிக்கையாகும்.

16 வயதுக்குட்பட்ட சிறுவர்களின் சமூக ஊடகப் பயன்பாட்டைக் கட்டுப்படுத்தும் சட்டமூலம், ஜனாதிபதி சட்டத்தரணி மற்றும் பாராளுமன்ற உறுப்பினர் பைசர் முஸ்தபாவினால் இன்று (24) பாராளுமன்றில் சமர்ப்பிக்கப்பட்டது.

அதன்படி, குறித்த சட்டமூலத்தை பைசர் முஸ்தபா பாராளுமன்ற செயலாளர் நாயகத்திடம் கையளித்துள்ளார்.

சிறுவர்கள் சமூக ஊடகத் தளங்களை அணுகுவதைக் கட்டுப்படுத்துவதும், தீங்கு விளைவிக்கும் இணைய உள்ளடக்கங்களிலிருந்து அவர்களைப் பாதுகாப்பதும் இந்தச் சட்டத்தின் முக்கிய நோக்கமாகும்.

இந்தச் சட்டத்தின் மூலம், 16 வயதுக்குட்பட்ட குழந்தைகள் சமூக ஊடகத் தளங்களை அணுகுவதைத் தடுப்பதற்கு, சம்பந்தப்பட்ட அமைச்சரான சிறுவர் விவகார அமைச்சருக்கு உத்தரவு பிறப்பிக்கும் அதிகாரம் கிடைக்கிறது.

அத்துடன், ஒரு பிள்ளை ஒரு நாளில் சமூக ஊடகங்களைப் பயன்படுத்தக்கூடிய நேரத்தைச் சுருக்குவதற்கோ அல்லது பயன்படுத்துவதற்கான குறிப்பிட்ட நேரத்தை நிர்ணயிப்பதற்கோ இந்தச் சட்டத்தின் மூலம் சந்தர்ப்பம் கிடைக்கிறது.

இந்தச் சட்டத்தைச் செயற்படுத்துவதற்கும் கண்காணிப்பதற்கும் தேசிய சிறுவர் பாதுகாப்பு அதிகார சபையின் கீழ் அங்கீகாரம் பெற்ற ஆணையாளர் ஒருவரை நியமிக்கத் திட்டமிடப்பட்டுள்ளது.

13 ஆவது அரசியலமைப்புத் திருத்தம் நாட்டின் உச்சக்கட்ட சட்டத்தின் ஒரு பகுதியாகும் என்பதால் அது பாதுகாக்கப்பட வேண்டும். எனினும், அதனைப் பாதிக்கும் வகையில், சமகாலப் பட்டியலில் உள்ள சுற்றாடல் துறைக்கு மாகாண சபைக்கு இருக்கும் அதிகாரங்களில் தலையிடுவது பொருத்தமற்றது என எதிர்க்கட்சித் தலைவர் சஜித் பிரேமதாச இன்று (24) புதன்கிழமை பாராளுமன்றத்தில் தெரிவித்தார்.

இதற்குத் தீர்வுகாணக்கூடிய விரைவான வழிமுறை, மாகாண சபைத் தேர்தலை கூடிய விரைவில் நடத்துவதாகும் என்றும், இதன் மூலம் ஓர் அரசியல் அதிகாரம் தெரிவுசெய்யப்பட்டு மாகாண சபைக்குரிய அதிகாரங்கள் பாதுகாக்கப்படும் எனவும் அவர் குறிப்பிட்டார்.

13+ அல்லது 13- அல்லாமல், 13 ஆவது அரசியலமைப்பின் நிலைப்பாட்டில் இருக்கும் ஒரு தரப்பு என்ற ரீதியில், மாகாண சபைகளுக்கு தற்போதுள்ள உரிமைகள் பாதுகாக்கப்பட வேண்டும் என்பதே ஐக்கிய மக்கள் சக்தியின் நிலைப்பாடாகும் எனவும் எதிர்க்கட்சித் தலைவர் சஜித் பிரேமதாச மேலும் தெரிவித்தார்.

பாரம்பரிய கரைவலை மீன்பிடி முறைமைக்குத் தடை விதிக்கப்படவில்லை. இதிலுள்ள பிரச்சினைகளைத் தீர்ப்பதற்கு ஒரு வருட கால அவகாசம் கோரப்பட்டுள்ளது. நாம் கடற்றொழிலாளர்களைக் கைவிடமாட்டோம் என்று கடற்றொழில், நீரியல் மற்றும் கடல்வளங்கள் அமைச்சர் ராமலிங்கம் சந்திரசேகர் தெரிவித்தார்.

பாராளுமன்றத்தில் செவ்வாய்க்கிழமை (23) உரையாற்றுகையிலேயே அவர் இவ்வாறு கூறினார். இது தொடர்பில் அமைச்சர் மேலும் கூறியவை வருமாறு,

கரைவலை மீன்பிடி என்பது ஒரு பாரம்பரிய முறைமையாகும். அந்த முறைமை இலங்கையில் தடை செய்யப்படவில்லை; அது தொடர்ந்து முன்னெடுக்கப்படும். எனினும், உழவு இயந்திரம் உள்ளிட்ட உபகரணங்களைப் பயன்படுத்தி, கடல்வளத்தை அழிக்கும் வகையில் முன்னெடுக்கப்படும் மீன்பிடி நடைமுறைகளே தடை செய்யப்பட்டுள்ளன.

எவ்வித அறிவியல் பூர்வமான ஆய்வுகளும் இன்றி, தமக்குத் தேவையான விதத்தில் கரைவலை மீன்பிடியில் ஈடுபடுவதற்கு கடந்த காலங்களில் துறைசார் அமைச்சர்கள் அனுமதி வழங்கியமையாலேயே கரைவலை மீன்பிடித் தொழிலில் பாரிய பிரச்சினைகள் ஏற்பட்டன.

அப்பிரச்சினையைத் தீர்ப்பதற்காகவே கரைவலை மீன்பிடித் தொழிலாளர்களுடன் பேச்சுவார்த்தை நடத்தி வருகின்றோம். பேச்சுவார்த்தை நடத்தப்பட்டது.

முதலில் நாம் இரு மாதங்கள் அவகாசம் கோரினோம். ஆனால், அந்த கால எல்லை போதாது என்பதால், அறிவியல் பூர்வமான தீர்வை வழங்குவதற்கு ஒரு வருட கால அவகாசம் கோரியிருந்தோம். மீனவர்களும் இதற்குச் சம்மதம் தெரிவித்துள்ளனர்.

கடல் வளங்களை நாசமாக்க இடமளிக்க முடியாது. சட்டவிரோத நடவடிக்கைகளையும் அனுமதிக்க முடியாது. நாம் கடற்றொழிலாளர்களை ஒருபோதும் கைவிடமாட்டோம்.