இஸ்ரேல், ஈரான் மற்றும் அமெரிக்காவின் மோதல்கள், பிராந்திய மோதலை உலகளாவிய ஒன்றாக மாற்றக்கூடும் என்று எச்சரிக்கப்பட்டுள்ளது. அத்துடன், இலங்கையை பொறுத்தவரை, இதன் விளைவு நீண்டகால பொருளாதார மற்றும் அரசியல் விளைவுகளை ஏற்படுத்தக்கூடும் என்று பொருளாதார வல்லுநர்கள் அச்சத்தை வெளியிட்டுள்ளனர்.

பல தசாப்தங்களாக இலங்கை, இஸ்ரேல் மற்றும் ஈரான் ஆகிய இரண்டு நாடுகளுடனும் நட்புறவை கொண்டுள்ளது. இரண்டு நாடுகளும் தமிழீழ விடுதலைப்புலிகளுக்கு எதிரான போரின் போது இலங்கைக்கு உதவியிருந்தன.

இந்தநிலையில் இன்றும் இலங்கை, இரண்டு நாடுகளுடனும் முக்கிய உறவுகளைத் தொடர்ந்து பராமரித்து வருகிறது. 20 ஆயிரத்துக்கும் மேற்பட்ட இலங்கையர்கள் இஸ்ரேலில் பணிபுரிகின்றனர்.
ஈரானுக்கு இலங்கையில் இருந்து தேயிலை ஏற்றுமதி செய்யப்படுகிறது.

எனினும், குறித்த இரண்டு நாடுகளுக்கும் இடையிலான போர் காரணமாக, இலங்கைக்கு பாரிய பொருளாதார தாக்கம் ஏற்படக்கூடும் என்று பொருளாதார வல்லுநர்கள் எச்சரிக்கின்றனர்
உலகளாவிய எண்ணெய் விலை அதிகரிக்கும் போது, அதுவும், இலங்கைக்கு பாரிய பாதிப்பை ஏற்படுத்தக்கூடும்.

இந்தநிலையில், பொருளாதார வீழ்ச்சியில் இருந்து மீண்டு வரும் இலங்கைக்கு ஈரான்- இஸ்ரேல் போர் தாக்கத்தை ஏற்படுத்தும் போராகவே அமைந்துள்ளதாக பொருளாதார வல்லுநர்கள் சுட்டிக்காட்டியுள்ளனர்.

யாழ்ப்பாணம் – செம்மணி – சிந்துபாத்தி மனிதப்புதைகுழி விவகாரம் தொடர்பில் நீதிக்கோரி, ஐக்கிய நாடுகள் மனித உரிமைகள் பேரவையின் உயர்ஸ்தானிகரின் கவனத்தை ஈர்க்கும் ‘அணையா தீபம்’ போராட்டம் தற்சமயம் முன்னெடுக்கப்பட்டு வருகின்றது.

இன்று (23) முற்பகல் 10.10 அளவில் இந்த போராட்டம் ஆரம்பிக்கப்பட்டது. இந்த ‘அணையா தீபம்’ போராட்டம் செம்மணியில் 1996களில் சருகாகிப் போன கிருசாந்தியின் உறவினரால் இன்று சுடரேற்றி ஆரம்பித்து வைக்கப்பட்டது.

இதன்போது சட்டதரணி வைஸ்ணவி சண்முகநாதன் செய்தியாளர்களிடம் போராட்டத்தின் நோக்கம் குறித்த தகவல்களை பகிர்ந்து கொண்டார். இந்த போராட்டத்தில் பங்கேற்றுள்ள சமயத் தலைவர்கள், அரசியல் தலைவர்கள், பொது அமைப்புகளின் பிரதிநிதிகள், பொதுமக்கள் உள்ளிட்ட பலரும் உயிர்நீத்த உறவுகளுக்காக இதன்போது அஞ்சலி செலுத்தியிருந்தனர்.

மக்கள் செயல் என்ற அமைப்பினால் முன்னெக்கப்பட்டுள்ள இந்த போராட்டம் நாளை மறுதினம் (25) வரை முன்னெடுக்கப்படவுள்ளது. இதேவேளை, செம்மணி மனிதப்புதைக்குழிக்கு நீதிக்கோரி இடம்பெறும் போராட்டத்துக்கு வலுசேர்க்கும் வகையில் மட்டக்களப்பில் போராட்டம் ஒன்று முன்னெடுக்கப்பட்டு வருகின்றது. தீப்பந்தம் ஏந்தி இந்தப் போராட்டம் முன்னெடுக்கப்பட்டு வருகின்றது.

இஸ்ரேலில் வசிக்கும் இலங்கையர்கள் உள்ளூர் பாதுகாப்பு வழிமுறைகளை கட்டாயமாக கடைபிடிக்க வேண்டும் என்று இஸ்ரேலில் உள்ள இலங்கை தூதரகம் அறிவுறுத்தியுள்ளது.

ஈரானால் ஞாயிற்றுக்கிழமை (22) காலை மத்திய மற்றும் வடக்கு இஸ்ரேலில் உள்ள நகர்ப்புறங்களை குறிவைத்து பல ஏவுகணைத் தாக்குதல்கள் நடத்தப்பட்டதை தொடர்ந்தே இஸ்ரேலுக்கான இலங்கை தூதுவர் நிமல் பண்டார தெரிவித்தார்.

இதேவேளை இஸ்ரேலிய பாதுகாப்பு அமைச்சின் கூற்றுப்படி, நிலைமை தொடர்ந்து மோசமடையக்கூடும் என்று கூறப்பட்டுள்ளது.

எனவே இஸ்ரேலில் உள்ள அனைத்து இலங்கையர்களும் விழிப்புடன் இருக்கவும், அவர்களின் பாதுகாப்பை உறுதி செய்ய அதிகாரபூர்வ வழிகாட்டுதல்களைப் பின்பற்றவும் தூதுவர் வலியுறுத்தினார்.

ஐக்கிய நாடுகள் மனித உரிமைகள் பேரவையின் உயர்ஸ்தானிகர் வொல்கர் ரெக்,(Volker Türk) இலங்கை வரும்போது, ஏற்கனவே திட்டமிடப்பட்ட சந்திப்புக்களுக்கு மேலதிகமான நிகழ்ச்சித்திட்டங்களும், உள்ளடக்கப்பட்டுள்ளன.

இதன்படி, தமது நான்கு நாள் பயணத்தின் இறுதி நாட்களில் அவர் கொழும்பிலும் சமூக ஆர்வலர்களை சந்திக்கவுள்ளார். அத்துடன் கர்தினால் மெல்கம் ரஞ்சித்தை சந்தித்து, உயிர்த்த ஞாயிறு தாக்குதல்கள் குறித்த விசாரணையின் முன்னேற்றத்தையும் மதிப்பீடு செய்யவுள்ளார்.

இறுதியாக நாட்டில் இருந்து புறப்படும் முன்னர் செய்தியாளர்கள் சந்திப்பையும் அவர் நடத்தவுள்ளார்.
இந்தநிலையில், கடந்த கால மனித உரிமைகள் பிரச்சினைகளைக் கையாள்வதில் அரசாங்கம் தமது நேர்மையையும், நாட்டில் நல்லிணக்கத்திற்கான அதன் உறுதிப்பாட்டையும் நிரூபிக்க விரும்புவதாக வெளிவிவகார அமைச்சர் விஜித ஹேரத் தெரிவித்துள்ளார்.

எனவே, வொல்கர் ரெக்குக்கு செம்மணி புதைகுழியை பார்வையிடுவது உள்ளிட்ட விடயங்களுக்கு இலங்கையில் தடையற்ற அனுமதி வழங்கப்படும் எனவும் அவர் குறிப்பிட்டுள்ளார்.

தகவல் அறியும் உரிமை ஆணைக்குழுவை குறைமதிப்பிற்கு உட்படுத்தும் முக்கியமான பிரச்சினைகளைத் தீர்ப்பதற்கு உடனடியாக நடவடிக்கை எடுக்குமாறு ஜனாதிபதி அனுரகுமார திசாநாயக்கவுக்கு அவசரக் கடிதமொன்று அனுப்பப்பட்டுள்ளது.

இலங்கை பத்திரிகை ஸ்தாபனம் மற்றும் அதனுடன் இணைந்த ஊடக நிறுவனங்களால் இந்த கடிதம் அனுப்பப்பட்டுள்ளது. இலங்கையில் வெளிப்படைத்தன்மை, பொறுப்புக்கூறல் மற்றும் ஜனநாயகத்திற்காக, 2016ஆம் ஆண்டின் தகவலறியும் உரிமைச் சட்டம் அவசியம் என குறித்த தரப்பினர் வலியுறுத்தியுள்ளனர்.
கடந்த மார்ச் மாதம் முதல் தகவலறியும் உரிமைகள் ஆணைக்குழுவுக்கு தலைவர் ஒருவர் இல்லை எனவும் இது அதன் செயல்பாடுகளைத் தடுக்கிறது எனவும் அவர்கள் கவலை வெளியிட்டுள்ளனர்.

அத்துடன், பலமுறை கோரிக்கைகள் இருந்தபோதிலும், ஆணைக்குழுவுக்கு அத்தியாவசிய சட்ட ஊழியர்களை ஆட்சேர்ப்பு செய்வதற்கு ஒப்புதல் அளிப்பதில் அரசாங்கம் தாமதிப்பதாக தெரிவிக்கப்பட்டுள்ளது.
அதேநேரம், அந்த ஆணைக்குழுவின் திறனைக் கட்டுப்படுத்தும் சட்டத்தின் பிரகாரம் அதனால் ஒரு சுயாதீன நிதியை இயக்க முடியாது. எனவே, ஒரு புதிய தலைவரை தகவலறியும் உரிமைகள் ஆணைக்குழுவுக்கு உடனடியாக நியமித்து, அதன் சுதந்திரத்தையும் செயல்திறனையும் மீட்டெடுக்குமாறு ஜனாதிபதியை குறித்த ஊடகக் குழுக்கள் வலியுறுத்தியுள்ளன.

செம்மணியில் முன்னெடுக்கப்படவுள்ள ‘அணையா விளக்கு’ போராட்டத்திற்கு ஆதரவு தெரிவிக்கும் வகையில்  மட்டக்களப்பில் மாபெரும் போராட்டம் ஒன்றினை முன்னெடுக்கவுள்ளதாக பாராளுமன்ற உறுப்பினர் இரா.சாணக்கியன் தெரிவித்துள்ளார்.

மட்டு.ஊடக அமையத்தில் நேற்று (22) நடைபெற்ற ஊடகவியலாளர் சந்திப்பிலேயே  அவர் இதனை தெரிவித்தார். ஐ.நா. மனித உரிமைகள் பேரவையின் உயர்ஸ்தானிகரின் இலங்கை விஜயத்தை முன்னிட்டு செம்மணி புதைகுழி விவகாரம் தொடர்பாகவும் அத்தோடு தமிழர்களுக்கு மறுக்கப்படும் நீதி சம்பந்தமாகவும் அவருடைய கவனத்தை ஈர்க்கும் வகையாக யாழ்ப்பாணம் – செம்மணியில் மாபெரும் அணையா விளக்கு போராட்டம் ஒன்று ஏற்பாடு செய்யப்பட்டுள்ளது.

அந்தப் போராட்டத்திற்கு வலு சேர்க்கும் வகையில் கிழக்கு மாகாணத்திலும் அவ்வாறான ஒரு அடையாள போராட்டத்தினை இன்றைய தினம் (23) ஏற்பாடு செய்துள்ளதாக பாராளுமன்ற உறுப்பினர் இரா.சாணக்கியன் தெரிவித்துள்ளார்.

இந்தப் போராட்டத்தில் கிழக்கு மாகாணத்தில் வாழும் அனைத்து தமிழ் உறவுகளும் அனைத்து உணர்வாளர்களும் கலந்து கொள்ள வேண்டும் என்றும் அவர் அழைப்பு விடுத்துள்ளார். செம்மணியில் மாத்திரம் அல்ல கடந்த காலத்தில் கொக்குத்தொடுவாயிலும் கூட கண்டெடுக்கப்பட்ட மனித எச்சங்கள் தொடர்பில் எந்த வகையான நீதியும் இதுவரைக்கும் கிடைக்கப் பெறவில்லை. இந்த மனித புதைக்குழியை விசாரணை செய்வதற்கு இலங்கை அரசாங்கத்திற்கு போதிய அளவு தேவையான தொழில்நுட்ப அறிவு இல்லாததன் காரணத்தினால் இதற்கு சர்வதேச உதவியை இலங்கை அரசாங்கம் பெற வேண்டும் என்று அவர் குறிப்பிட்டுள்ளார்.

அதிலும் குறிப்பாக மனித புதைகுழிகளில் கண்டெடுக்கப்பட்ட எச்சங்கள் அதிகளவில் தாக்கப்பட்டிருக்கின்றார்கள். ஆடைகள் எதுவும் கண்டுபிடிக்கப்படவில்லை இது ஒரு பாரிய சந்தேகத்தை தரும் ஒரு விடயம்.

இந்த விடயத்தை நேர்மையாக இலங்கை அரசாங்கம் விசாரணை செய்து குற்றவாளிகள் தண்டிக்கப்படுவார்கள் என்று நம்பிக்கை எங்களுக்கு இல்லை என்றும் பாராளுமன்ற உறுப்பினர் இரா.சாணக்கியன் தெரிவித்துள்ளார்.

யாழ்ப்பாணம் வலி. வடக்கில் உயர் பாதுகாப்பு வலயத்திலுள்ள 2400 ஏக்கர் காணிகளை விடுவிக்க கோரிய போராட்டம் நேற்று (22) இரண்டாம் நாளாகவும் அமைதி வழியில்  முன்னெடுக்கப்பட்டது.
காணிகளை விடுவிக்க கோரி  நேற்று முன் தினமும்(21) மயிலிட்டி சந்தியில்  போராட்டம் நடைபெற்றது.

ஞாயிறு விடுமுறை என்பதால் பாடசாலை சிறுவர்கள் தமது நிலங்களிலே மூன்றாம் தலைமுறையாக உரிமை கேட்டு பெற்றாருடன் பதாகைகளைத் தாங்கியவாறு போராட்டத்தில் ஈடுபட்டனர்.
குறித்த போராட்டத்தில் மயிலிட்டி, பலாலி, காங்கேசன்துறை உள்ளிட்ட பகுதிகளில் உள்ள காணிகளின் உரிமையாளர்கள், முதியோர்கள், இளைஞர்கள், சிறுவர்கள், பெண்கள் என பல தரப்பினரும் பங்கு பற்றி இருந்தனர்.

யுத்தம் காரணமாக இடம்பெயர்ந்து போன மக்கள் யுத்தம் நிறைவடைந்து தமது காணிகளுக்கு வந்த பின்னரும் ஆட்சிக்கு வந்த ஒவ்வொரு அரசாங்கமும் காணிகளை விடுவிப்பதாக கூறி சிறு சிறு இடங்களை மாத்திரம் விடுவித்துள்ளன என்று போராட்டத்தில் ஈடுபட்ட தரப்பினர் சுட்டிக்காட்டியுள்ளனர்.
மக்களின் காணிகள் முழுமையாக விடுவிக்கப்படவில்லை.

இதனால் வாடகை வீடுகளிலும் உறவினர் வீடுகளிலும் முகாம்களிலும் இன்று வரையும் காணி சொந்தக்காரர்கள் வாழ்ந்து வருகின்றனர் என்றும் அவர்கள் குறிப்பிட்டுள்ளனர். தற்போது தமிழ் மக்களின் பலத்த ஆதரவை பெற்று அனைத்து காணிகளையும் உடனடியாக விடுவிப்போம் என்ற வாக்குறுதிகளை வழங்கி, ஆட்சிக்கு வந்த புதிய அரசாங்கம் ஆட்சிக்கு வந்து ஆறு மாதங்களை கடந்த பின்னும் பெரிய அளவில் காணி விடுவிப்பில் எவ்வித நடவடிக்கைகளையும் முன்னெடுக்கவில்லை என்றும் போராட்டத்தில் ஈடுபட்டவர்கள் கூறினர்.

பாதுகாப்பு காரணங்களுக்காக காணிகளை வைத்திருப்பதாக கூறுகின்ற இராணுவம் தற்போது மக்கள் நிம்மதியாக வாழக்கூடிய சூழ்நிலை உருவாகிய நிலையிலும் அவர்களின் காணிகளை விடுவிக்காமல் வைத்திருக்கின்றனர் என்று போராட்டத்தில் ஈடுபட்ட மக்கள் தெரிவித்திருந்தனர்.