சீன அதிபர் ஷி ஜின்பிங், 3 நாள் சுற்றுப் பயணமொன்றை மேற்கொண்டு புதன் கிழமை ரஷ்யா சென்றுள்ளார். வணிக உறவுகள் தொடர்பாக விவாதிக்கவே இந்த சுற்றுப் பயணம் மேற்கொள்ளப்பட்டது.
இதற்கிடையில் சீனாவிற்கும் அமெரிக்காவிற்குமிடையே வணிகப் போர் நடக்கும் சூழலிலேயே சீன அதிபரின் இந்தப் பயணம் மேற்கொள்ளப்பட்டுள்ளது என்பது இங்கு குறிப்பிடத்தக்கது.
உக்ரைன் விவகாரத்தில் மேற்குலக நாடுகளுடனான உறவு மோசமடைந்ததையடுத்து, ரஷ்யா கடந்த சில ஆண்டுகளாக கிழக்கு நாடுகளுக்கு முக்கியத்துவம் கொடுத்து வருகின்றது.
இந்தப் பயணத்தின் போது மாஸ்கோ வனவிலங்குப் éங்காவில் இரண்டு பன்டா கரடிகளை காட்சிப்படுத்துவதை தொடக்கி வைத்தார்.
பின்னர் நடந்த பத்திரிகையாளர் சந்திப்பின் போது, தனக்கும் விளாடிமிர் புதினுக்கும் நெருங்கிய நட்பு இருப்பதாக சீன அதிபர் குறிப்பிட்டார். கடந்த ஆறு ஆண்டுகளில் நாங்கள் இருவரும் 30இற்கும் மேற்பட்ட தடவைகள் சந்தித்துள்ளோம் . தான் அதிக தடவைகள் பயணம் செய்த நாடு ரஷ்யா தான் என்றும் தெரிவித்தார்.
இருநாட்டு உறவகளும் எதிர்பாராத அளவுக்கு புதிய பரிமாணத்தை எட்டியுள்ளன. 2018இல் இரு நாடுகளிடையேயான வணிகம் 25 சதவீதம் உயர்ந்துள்ளது. இரு நாட்டு இராணுவ மற்றும் பொருளாதார உறவுகளை எதிர்காலத்தில் இன்னும் நெருக்கமாக்க இரு நாடுகளும் உறுதி éண்டுள்ளன.
ஐந்து ஆண்டுகளுக்கு முன் உக்ரைன் விவகாரத்தினால் மேற்கத்திய நாடுகள் ரஷ்யாவிற்கு எதிராகத் திரும்பின. அதன் மீது பொருளாதார தடைகளையும் விதித்தன. இதனையடுத்தே இரு நாட்டு உறவில் விரிசல் உண்டானது.
2015ஆம் ஆண்டு சிரியாவின் அசாத் அரசை ஆதரித்ததற்காகவும் ரஷ்யா விமர்சனத்திற்குள்ளாகியது. அது போல டிரம்ப் அரசு பொறுப்பேற்றதிலிருந்து சீனா அமெரிக்கா உறவு சுமுகமாக இல்லை. இப்போது இரு நாடுகளிடையே வணிக யுத்தம் நடைபெற்று வருகின்றது. இரு நாடுகளுமே மாறி மாறி வரி விதித்து வருகின்றன.
ஹுவாவே நிறுவனம் ரஷ்யாவின் எம்டிஎஸ் நிறுவனத்திற்கு 5G சேவையை மேம்படுத்தி தரும் ஒப்பந்தம் இந்த சுற்றுப் பயணத்தில் கையெழுத்தாகியது. ஹுவாவே நிறுவனம் தேசிய பாதுகாப்பிற்கு அச்சுறுத்தலாக இருப்பதாகக் கூறி, அமெரிக்கா அதனை தடை செய்தது.
இந்த தடை உத்தரவின் பேரில் ஐரோப்பா, அவுஸ்திரேலியா மற்றும் ஜப்பான் ஆகிய நாடுகளிலும் ஹுவாவே சிக்கலை எதிர்நோக்குகின்றது.
