சூடானின் துணை இராணுவப் படை (RSF), 2024 மற்றும் 2025-க்கு இடைப்பட்ட காலத்தில் எல்-ஃபாஷர் (el-Fasher) நகரத்தின் மீது நடத்திய தாக்குதல்களின்போது மனிதகுலத்திற்கு எதிரான குற்றங்களையும் இனச் சுத்திகரிப்பு நடவடிக்கைகளையும் மேற்கொண்டதாக மனித உரிமை அமைப்பான ‘ஆம்னஸ்டி இன்டர்நேஷனல்’ குற்றம் சுமத்தியுள்ளது.
புதன்கிழமை(01) வெளியிடப்பட்ட அறிக்கையில், மேற்கு சூடானின் வடக்கு டார்ஃபர் மாநிலத் தலைநகரிலும் அதைச் சுற்றியுள்ள பகுதிகளிலும் உள்ள பொதுமக்கள் 2024-ன் தொடக்கத்திலிருந்தும் அக்டோபர் 2025 வரையிலும் எவ்வாறு கொல்லப்பட்டனர், காயமடைந்தனர், தாக்கப்பட்டனர், சித்திரவதை செய்யப்பட்டனர் மற்றும் சிறைபிடிக்கப்பட்டனர் என்பதைத் தாங்கள் ஆவணப்படுத்தியுள்ளதாக அது தெரிவித்துள்ளது.
“கொலை, கட்டாய இடப்பெயர்வு, சிறைவாசம், சித்திரவதை, பாலியல் வன்கொடுமை, பாலியல் அடிமைத்தனம், பிற வகையான பாலியல் வன்முறைகள், அடிமைப்படுத்துதல், இன அழிப்பு மற்றும் துன்புறுத்தல் ஆகியவை RSF-இன் குற்றங்களில் அடங்கும்” என்று அந்த அறிக்கை கூறுகிறது.
“லட்சக்கணக்கான குழந்தைகள் இடம்பெயர்ந்துள்ளனர்; அவர்களில் பலர் தாக்குதல்களின்போதோ அல்லது தப்பிச் செல்லும்போதோ மீண்டும் மீண்டும் உயிரிழப்பு மற்றும் காயத்தின் அபாயத்தை எதிர்கொண்டுள்ளனர். எண்ணற்ற குழந்தைகள் அனாதையாக்கப்பட்டுள்ளனர். மாற்றுத்திறனாளிகள் மற்றும் முதியவர்கள் கடுமையான ஆபத்துகளை எதிர்கொண்டுள்ளனர்; இதில் குறிவைத்து நடத்தப்படும் தாக்குதல்கள், கைவிடப்படுதல் மற்றும் அத்தியாவசிய உதவிகள் மறுக்கப்படுதல் ஆகியவை அடங்கும்” என்றும் அது மேலும் கூறியது.
ஜகாவா (Zaghawa) இன மக்கள் பெரும்பான்மையாக வசிக்கும் எல்-ஃபாஷரைச் சுற்றியுள்ள கிராமங்கள் மற்றும் நகரங்கள் மீது RSF தொடர்ந்து தாக்குதல் நடத்தியதை அந்த அறிக்கை சுட்டிக்காட்டியது. ஐக்கிய நாடுகள் சபையின் தகவலின்படி, ஏப்ரல் 2023 முதல் சூடான் ராணுவத்திற்கும் RSF-க்கும் இடையே நடைபெற்று வரும் கொடூரமான போரில் பல்லாயிரக்கணக்கானோர் கொல் லப்பட்டுள்ளனர் மற்றும் சுமார் 1.4 கோடி (14 மில்லியன்) மக்கள் இடம்பெயர்ந்துள்ளனர்.
இரு தரப்பினர் மீதும் கொடூரமான குற்றச்சாட்டுகள் சுமத்தப்பட்டுள்ளன; பிப்ரவரி மாதம் ஐ.நா-வின் சுயாதீன உண்மை கண்டறியும் குழு, எல்-ஃபாஷர் மீதான 2025-ஆம் ஆண்டு தாக்குதல் “இனப்படுகொலைக்கான அறி குறிகளைக்” கொண்டிருந்ததாகத் தெரிவித்தது.
