இராணுவத்தினரால் யாழ்ப்பாணத்தில் கையகப்படுத்தப்பட்ட  பொது மக்களின் காணிகளை உடனடியாக விடுவிக்க வேண்டுமென கூட்டமைப்பின் பாராளுமன்ற உறுப்பினர் மாவை சேனாதிராசா வேண்டுகோள் விடுத்துள்ளார். பலாலி விமான நிலையத்தை சர்வதேச விமான நிலையமாக மாற்றும் வேலைத்திட்டம் ஆரம்பிக்கப்பட்ட நிகழ்வில் கலந்து கொண்ட போதே அவர் இதனைத் தெரிவித்தார்.

30 ஆண்டுகளுக்குப் பின்னரும் யுத்தம் முடிவடைந்து 10 ஆண்டுகளின் பின்னரும் தமிழரின் நிலத்தை இராணுவம் கையகப்படுத்தியுள்ளது அநீதியான செயலாகும். இது சமாதானத்தை நிலைநாட்டாது.

குறித்த நிலங்களை விடுவிப்பதன் மூலமும், மக்களின் அரசியல் அபிலாசைகளை தீர்ப்பதன் மூலமுமே நாட்டில் அமைதி பாதுகாப்பை உறுதிப்படுத்த முடியும் என்றும் அவர் மேலும் தெரிவித்தார்.

இதனிடையே, சிறீலங்காவில் அரச தலைவர் தேர்தல் நடைபெறுவதற்கு ஏறத்தாள ஐந்து மாதங்களே உள்ள நிலையில் தமிழ் மக்களை ஏமாற்றி அவர்களின் வாக்குகளை தமக்கு விரும்பிய சிங்களத் தலைவருக்கு வழங்கி அதன் மூலம் சுயலாபம் ஈட்டுவதற்காக தமிழத் தேசியக் கூட்டமைப்பினர் தற்போது போராட்டம் மற்றும் தமிழ் மக்களின் உரிமை குறித்து அதிகம் பேசி வருவதாக மக்கள் கருதுகின்றனர்.

இந்தியா முன்னாள் பிரதமர் ராஜீவ் காந்தி கொலை வழக்கில் தண்டனை பெற்று வந்த நளினி, ஒருமாத கால பிணையில் வெளியில் வந்துள்ளார். இந்தக் காலப்பகுதிக்கான பாதுகாப்பு செலவை இந்திய அரசாங்கமே பொறுப்பேற்றுக் கொள்ளும்.

லண்டனில் வசிக்கும் தனது மகள் ஹரிதாவின் திருமண ஏற்பாடுகளை மேற்கொள்வதற்காக, தனக்கு 6 மாதகால பிணை வழங்குமாறு சென்னை உயர்நீதிமன்றில் நளினி மனு தாக்கல் செய்திருந்தார். இந்த மனு மீதான விசாரணைக்கு நளினியை நீதிமன்றில் முன்னிலைப்படுத்துவதில் சிக்கல்கள் உள்ளதென காவல்துறையினர்  தெரிவித்ததிருந்தனர். இருந்தும் இவரை நீதிமன்றில் முன்னிலைப்படுத்துமாறு நீதிபதி குழுவினர் அறிவித்தல் விடுத்திருந்தனர். இதற்கமைவாக இவரின் மனு மீதான விசாரணையின் போது, நளினி நீதிமன்றில் முற்படுத்தப்பட்டார்.

இவர் மீதான விசாரணை இன்று உயர்நீதிமன்றிற்கு எடுத்துக் கொள்ளப்பட்டு, இவரின் பிணை கோரிக்கை ஏற்றுக் கொள்ளப்பட்டதையடுத்து, நளினி ஒரு மாதகால பிணையில் செல்ல அனுமதிக்கப்பட்டுள்ளார்.

ஊடகங்களை சந்திக்கக் கூடாது என்ற நிபந்தனையிலேயே இவர் பிணையில் வந்துள்ளார் என்பது குறிப்பிடத்தக்கது.

வட இந்தியர்களுக்கு ஒரு நீதியும், தென்னிந்திய தமிழ் மக்களுக்கு ஒரு நீதியையும் வழங்கிவரும் இந்திய அரசு தமிழ் இனத்தின் மீது ஒரு மறைமுக இனஅழிப்பு போரை நடத்தி வருவது நாம் அறிந்ததே.

முன்னாள் போராளிகளுக்கு எதிர்வரும் திங்கட்கிழமை (08) அன்று பயங்கரவாத குற்றத் தடுப்புப் பிரிவின் (TID) தலைமைக் காரியாலயத்தின் மூலமாக விசாரணைக்கான அழைப்பாணை விடுக்கப்பட்டுள்ளது.

இந்த அறிவித்தல் விடுக்கப்பட்டதையடுத்து 05ஆம் திகதி காரைதீவில் நடைபெற்ற ஊடகவியலாளர் சந்திப்பின் போது, முன்னாள் போராளிகளின் பாதுகாப்புகள் தொடர்பாக ஐக்கிய நாடுகள் சபை கூடியளவு கவனம் செலுத்த வேண்டும் என முன்னாள் போராளிகள் கட்டமைப்பின் அம்பாறை மாவட்ட இணைப்பாளர் வடிவேல் சசிதரன்  கேட்டுள்ளார்.

சிறீலங்காவின் அரச தலைவர் மைத்திரிபால சிறீசேன, பிரதமர் ரணில் விக்கிரமசிங்கா மற்றும் முன்னாள் பாதுகாப்புத்துறைச் செயலாளர் கோத்தபாய ராஜபக்சா ஆகியோரை நாடாளுமன்ற தெரிவுக்குழு விசாரணை செய்யவேண்டும் என சிறீலங்கா நாடாளுமன்ற உறுப்பினர் சரத் பொன்சேக்கா தெரிவித்துள்ளார்.

நேற்று (05) ஊடகவியலாளர்களுடன் கம்பக பகுதியில் இடம்பெற்ற சந்திப்பின்போதே அவர் இவ்வாறு தெரிவித்துள்ளார்.

சட்ட ஒழுங்கு தொடர்பாக பணியாற்றிய முன்னாள் அமைச்சர்களையும் விசாரணைக்கு அழைக்க வேண்டும் என அவர் மேலும் தெரிவித்துள்ளார்.

சிறீலங்காவின் தென்னிலங்கையில் தொடரும் அரசியல் நெருக்கடியினால் பல வன்முறைகள் ஏற்பட்டுவருவதுடன், கடந்த ஏப்பிரல் மாதம் இடம்பெற்ற தற்கொலைத் தாக்குதலுக்கும் இந்த அரசியல் நெருக்கடிகளே முக்கிய காரணமாக கருதப்படுகின்றது.

இதுவரை விமானப்படையினரின் கட்டுப்பாட்டில் இயங்கி வந்த பலாலி விமானப்படைத் தளம் தற்போது  பொதுமக்கள் போக்குவரத்து செய்யக்கூடிய சிவில் விமானப்படைத் தளமாக இன்றிலிரு்து விளங்கும் என்று அறிவிக்கப்பட்டுள்ளது.  போருக்கு முன்னரும் இந்த விமானப்படைத் தளம் சர்வதேச விமானப்படைத் தளமாக இருந்து வந்தது இங்கு குறிப்பிடத்தக்கது.

இன்றைய நிகழ்வில் கலந்து கொண்டுள்ள சிவில் விமான சேவைகள் ராஜாங்க அமைச்சர் அசோக் அபயசிங்க தெரிவிக்கையில், பலாலி விமான நிலைய மையத்தினுள் வரும் அராலி – தெல்லிப்பளை  வல்லை வீதியின் ஒரு பகுதியை இராணுவத்திலிருந்து மீள பெற்றுத் தந்தால், அதை காப்பற் வீதியாக மாற்றியமைத்து, பொது மக்களின் போக்குவரத்திற்கு நன்மையளிக்கக் கூடியவாறு மாற்றித் தரமுடியும் என்று கூறினார்.

மேலும் அவர் தெரிவிக்கையில், இலங்கையில் இதுவரை இரண்டு சர்வதேச விமான நிலையங்களே இருக்கின்றன. இன்றிலிருந்து மூன்றாவது சர்வதேச விமான நிலையமாக பலாலித் தளமும் விளங்கும் என்று கூறினார்.

தென்னாசிய நாடுகளின் அடிப்படையில் தரமான விமானசேவை ஊடாக வருமானம் பெறுவதில் இலங்கை முன்னணியில் இருக்கின்றது.

நாட்டு மக்களின் போக்குவரத்திற்காக 2000 பேருந்துகளை கொள்வனவு செய்யவிருக்கின்றோம். இவற்றில் யாழ்ப்பாணத்திற்கு நான்கு பேருந்துகள் கொடுக்கப்படவிருக்கின்றன. மேலும் புகையிரத சேவைக்கு 12 இயந்திரங்கள் இந்தியாவிடம் கோரப்பட்டுள்ளன என்றும் அவர் தெரிவித்தார்.

யாழ்ப்பாணம், மண்டைதீவில் ஒரு பகுதி சுற்றுலாப் பயணிகளைக் கவரும் ஒரு வலயமாக்கப்படவுள்ளது. இதன்படி இங்குள்ள கரையோரத்தை அபிவிருத்தி செய்து, படகு சவாரி போன்றவற்றை ஒழுங்குபடுத்த திட்டம் மேற்கொள்ளப்படவுள்ளது.

முதலில் உள்ளுர் சுற்றுலாதாரிகளை அனுமதித்து, எதிர்காலத்தில் வெளிநாட்டு சுற்றுலாதாரிகள் இங்கு அனுமதிக்கப்படுவர். இதனால் ஆழம் குறைந்த யாழ்ப்பாணக் கடலநீரேரியிலுள்ள பவளப் பாறைகள், கடற்தாவரங்கள் மற்றும் மீனினங்கள் போன்றவற்றையும், குடாநாட்டின் இயற்கை வனப்பையும் கண்டு ரசிக்க முடியும் என சுற்றுலாத்துறை அதிகாரி ஒருவர் கூறினார்.

மதிமுக பொதுச் செயலாளர் வைகோவிற்கு சென்னை சிறப்பு நீதிமன்றம் ஓராண்டு சிறைத்தண்டனை விதித்துள்ளது. கடந்த 2009இல் சென்னையில் நடைபெற்ற ஒரு புத்தக வெளியீட்டு விழாவில், விடுதலைப் புலிகளை ஆதரித்துப் பேசியதால், இந்திய இறையாண்மைக்கு எதிராக செயற்பட்டார் என குற்றஞ்சாட்டப்பட்டு சென்னை பொலிஸ் நிலையத்தில் தேசத்துரோக வழக்கு பதிவு செய்யப்பட்டது.

சென்னை அமர்வு நீதிமன்றில் நடைபெற்று வந்த இந்த வழக்கு, பின்னர் சென்னை மாவட்ட ஆட்சியர் அலுவலகத்தில் உள்ள சிறப்பு நீதிமன்றிற்கு மாற்றப்பட்டது. இந்த வழக்கு நீதிபதி ஜெ.சாந்தி முன்பாக விசாரிக்கப்பட்டு, இன்று தீர்ப்பு வழங்கப்பட்டது.

ஒரு வருட சிறைத் தண்டனையையும், 10 ஆயிரம் ரூபா அபராதமும் தீர்ப்பாக வழங்கப்பட்டது. அபராத தொகையை உடனே செலுத்திய வைகோ மேல்முறையீடு செய்வதற்கு 1மாத கால அவகாசம் வழங்கப்பட்டது.

எதிர்வரும் 18ஆம் திகதி நடக்கவிருக்கும் மாநிலங்களவை தேர்தலில் போட்டியிட திமுக தரப்பில் மதிமுகவிற்கு ஒரு இடம் வழங்கப்பட்டுள்ளது. இந்த இடத்தில் வைகோ போட்டியிடுவார் என எதிர்பார்க்கப்பட்டது.

மக்களவை சட்டத்தின்படி ஒரு வழக்கில் தண்டிக்கப்பட்டவர் தண்டனைக்காலம் முடிந்து மேலும் 6ஆண்டுகள் தேர்தலில் போட்டியிட முடியாது. எனவே வைகோ போட்டியிடுவதில் சிக்கல் ஏற்பட்டுள்ளது.