நாட்டுக்குள் திரிபடைந்த வைரஸ் நுழைவதை தடுப்பதில் நாம் வெற்றி பெற்றுள்ளோம். ஆனால், நாட்டுக்குள் ஏற்கனவே பரவியுள்ள வைரஸ்கள் திரிபடைவதை நம்மால் தடுக்க முடியாது.

இப்படித் தெரிவித்திருக்கிறார் அரச மருத்துவ அதிகாரிகள் சங்கத்தின் செயலர் மருத்துவர் ஹரித அலுத்கே. ஊடகங்களுக்கு நேற்று கருத்துத் தெரிவித்த அவர்,

“எந்தவொரு நாட்டிலும் உள்ள வைரஸும் மாற்றம் அடையலாம். இந்தத் திரிபுக்கு வரம்புகள் எதுவும் இல்லை. இது எங்கும் புதிதாக திரிபடையக்கூடும். எனவே, மற்ற நாடுகளில் உருவானமை போன்று நம் நாட்டிலும் வைரஸ்கள் திரிபடைய வாய்ப்ப உண்டு.

உலகில் 20இற்கும் மேற்பட்ட திரிபடைந்த வைரஸ்கள் பரவி வருகின்றன. எந்தவொரு வைரஸும் திரிபடையலாம். நாம் அதைப் பொருட்படுத்தாமல் அடிப்படை சுகாதாரப் பழக்கங்களை பின்பற்ற வேண்டும்” என்றும் அவர் சொன்னார்.

வெளிநாட்டுக் கொள்கைகளிலும் நாடு இதே போன்று முறையற்ற விதத்தில் செல்லுமாயின் எதிர்காலத்தில் ஜி.எஸ்.பி. வரிச்சலுகை இல்லாமல் போகும் அபாயம் ஏற்பட்டுள்ளது என ஐக்கிய மக்கள் சக்தியின் பாராளுமன்ற உறுப்பினர் நளின் பண்டார தெரிவித்துள்ளார்.

கொழும்பில் எதிர்க கட்சித் தலைவர் அலுவலகத்தில் நேற்று இடம்பெற்ற ஊடகவியலாளர் சந்திப்பில் அவர் இவ்வாறு குறிப்பிட்டார். அவர் அங்கு மேலும் தெரிவித்தவை வருமாறு:

2021 சுபீட்சமான ஆண் டாக அமையும் என்று ஜனாதிபதி கூறுகின்றார். ஆனால், மக்களுக்கு 3 வேளை உண்பதற்குக் கூட உணவு கிடைக்குமா என்பது சந்தேகமாகும். கொரோனா தடுப்பூசி கண்டுபிடிக்கப்படாவிட்டாலும் உலக நாடுகள் அவற்றை பெற்றுக்கொள்ள நடவடிக்கை எடுத்துள்ளன.

ஆனால், இலங்கையில் கொரோனா பாணியை வைத்து மக்களை ஏமாற்றிக்கொண்டிருக்கின்றனர். வியத்மக அமைப்பிலுள்ள பலருக்கும் அமைச்சு பதவி வழங்கப்பட்டுள்ளது. இவ்வாறான நிலைமைக்குள் நாட்டை சுபீட்சமுடையதாக்க முடியுமா ? முதலீட்டாளர்கள் எவ்வாறு நாட்டில் நம்பிக்கை வைத்து முதலீடுகளை மேற்கொள்வார்கள் ? இவ்வாறான நெருக்கடிகளுக்கு மத்தியில் பலருக்கும் தொழில் வாய்ப்புக்களும் அற்றுப்போயுள்ளன.

இதே போக்கில் வெளிநாட்டு கொள்கைகளிலும் நாடு முறையற்ற விதத்தில் செல்லுமாயின் எதிர்காலத்தில் ஜி.எஸ்.பி. சலுகையும் அற்றுப்போகும் என்ற சந்தேகம் ஏற்படுகிறது. பொருளாதாரம் இவ்வாறு வீழ்ச்சியடைந்து கொண்டு செல்கின்ற நிலையில் சேனா படைப்புழுவும் விவசாயிகளை நெருக்கடிக்கு உள்ளாக்குகின்றது. இவ்வாறான நிலையில் 2021 ஆம் ஆண்டிலாவது நாட்டை மேம்படுத்த அரசாங்கம் நடவடிக்கை எடுக்க வேண்டும் என்பதே எமது ஒரேயொரு கோரிக்கையாகும்” என்றார்.

சிறைச்சாலை கொரோனா தொற்றாளர்களுடன் நெருங்கிய தொடர்பு கொண்ட மேலும் 54 பேர்  கொரோனா தொற்றாளர்களாக அடையாளம் காணப்பட்டுள்ளனர்.

தற்போது சிறைச்சாலைகளில் நெருங்கிய தொடர்பு கொண்ட கொரோனா தொற்றளர்களின் எண்ணிக்கை 3ஆயிரத்தை 709 ஆக அதிகரித்துள்ளது.

அதே நேரம் இலங்கையில் பல்வேறு இடங்கள் தனிமைபடுத்தலுக்கு உள்ளாக்கப்பட்டுள்ளது.

இதுவரை தொற்று உறுதியானோரின் மொத்த எண்ணிக்கை 41 ஆயிரத்து 420 ஆக அதிகரித்துள்ள நிலையில், இத் தொற்றினால் இதுவரை 191 பேர் உயிரிழந்துள்ளமை குறிப்பிடத்தக்கது.

மட்டக்களப்பு மாநகரசபைக்குட்பட்ட பகுதிகளில் சுகாதார நடைமுறைகளை பின்பற்றாத வர்த்தக நிலையங்கள் மூடப்படும் என்பதுடன் சுகாதார நடைமுறைகளை பின்பற்றாதவர்களுக்கு சட்ட நடவடிக்கையெடுக்கப்படும் எனவும் இந்த நடைமுறை இறுக்கமாக நடைமுறைப்படுத்தவுள்ளதாகவும் மட்டக்களப்பு மாநகரசபை முதல்வர் தி.சரவணபவன் தெரிவித்தார்.

மட்டக்களப்பு மாநகாரசபைக்குட்பட்ட பகுதியில் கொரோனா அச்சுறுத்தலை தவிர்க்கும் வகையிலான நடவடிக்கைகளை முன்னெடுப்பதற்கு தேவையான நடவடிக்கைகளை மேற்கொள்வது குறித்து ஆராயும் கூட்டம் இன்று மட்டக்களப்பு மாநகரசபையில் நடைபெற்றது.

மட்டக்களப்பு மாநகரசபை முதல்வர் தி.சரவணபவன்  தலைமையில் நடைபெற்ற இந்த கலந்துரையாடலில் ,மட்டக்களப்பு மாவட்ட பிராந்திய சுகாதார திணைக்களத்தின் தொற்றியல் வைத்திய பொறுப்பதிகாரி டாக்டர் குணநாயகம் உட்பட பலர் கலந்துகொண்டனர்.

கிழக்கு மாகாணத்தில் கொரோனா தொற்றின் வேகம் அதிகரித்து வருவதன் காரணமாக மட்டக்களப்பு மாநகரசபைக்குட்பட்ட பகுதியில் கொரோனா தொற்றினை தடுப்பது தொடர்பான வழிவகைகள் குறித்து ஆராயப்பட்டது.

கொரோனா தொற்று ஏற்பட்டுள்ள பகுதிகளில் இருந்து வந்து மட்டக்களப்பு மாநகரசபைக்குட்பட்ட பகுதிகளில் வியாபார நடவடிக்கைகளில் ஈடுபடுபவர்களை கட்டுப்படுத்துவது மற்றும் அப்பகுதிகளில் இருந்து வரும் மக்களை கட்டுபடுத்துவது தொடர்பில் இங்கு ஆராயப்பட்டது.

காத்தான்குடி பகுதிகளில் தற்போது கொரோனா தொற்று ஏற்பட்டுள்ளதன் காரணமாக அங்கிருந்து வரும் வர்த்தகர்களை கட்டுப்படுத்தும் வகையில் மட்டக்களப்பு மாநகரசபைக்குட்பட்ட பகுதிகளில் வர்த்தக நிலையங்களை கொண்டவர்கள் அங்கே தங்கியிருந்து வியாபார நடவடிக்கைகளில் ஈடுபட அனுமதிப்பது எனவும் தங்குமிட வசதிகள் இல்லாதவர்களை மாநகரத்திற்குள் வர்த்தக நடவடிக்கைகளில் ஈடுபடுவதை தற்காலிமாக தவிர்த்துக்கொள்வது எனவும் இங்கு தீர்மானிக்கப்பட்டது. வீதியோர வியாபாரங்களை முற்றாக நிறுத்துவது எனவும் இதன்போது தீர்மானிக்கப்பட்டது.

காத்தான் குடியில் இருந்துவரும் வர்த்தகர்கள் தங்கக்கூடிய வர்த்தக நிலையங்களை மட்டும் திறக்க வேண்டும் எனவும் காத்தான்குடிக்குள் இருந்துவரும் ஊழியர்களை இடைநிறுத்திவிட்டு நகருக்கள் இருப்பவர்களைக்கொண்டு வியாபார நடவடிக்கைகளை முன்னெடுக்குமாறு பணிக்கப்பட்டுள்ளதாக இதன்போது மாநகர முதல்வர் தெரிவித்தார்.

வர்த்தக சங்கம் இதற்கான பூரண ஒத்துழைப்பினை வழங்கவேண்டும். இங்கு தங்குபவர்களுக்கு சுகாதார வசதிகளுடன் வசதிகள் ஏற்படுத்தப் பட வேண்டும். அது தொடர்பில் இன்று மாலைக்குள் பொதுச்சுகாதார பரிசோதகர்கள் களவிஜயம் செய்து உறுதிப்படுத்தியதன் பின்னர் அவரது வியாபார செயற்பாடுகளுக்கு மாநகரசபை அனுமதி வழங்கும். இது தொடர்பான அறிவித்தல்கள் இன்று ஒலிபெருக்கி மூலம் செய்யப்படும். சுகாதார நடைமுறைகளை பின்பற்றி நடப்பதன் மூலம் பொதுமக்கள் இந்த தொற்றில் இருந்து பாதுகாத்துக்கொள்ள முடியும்.

சிறைகளில் உள்ள அரசியல் கைதிகளின் பாதுகாப்பை உறுதிப்படுத்தக் கோரியும் அவர்களின் விடுதலைiயை வலியுறுத்தியும் இன்று யாழ். நல்லூர் ஆதீன முன்றலில் கவனயீர்ப்பு போராட்டம் ஒன்று முன்னெடுக்கப்பட்டது.

அரசியல் கைதிகள் பலருக்கு கொரோனா தொற்று ஏற்பட்டுள்ளதையடுத்து அவர்களின் வேண்டுகோளுக்கு இணங்க சிறைகளில் உள்ள அரசியல் கைதிகளின் பாதுகாப்பை உறுதிப்படுத்தக் கோரியும் அவர்களின் விடுதலையை வலியுறுத்தியும் குரலற்றவர்களின் குரல் அமைப்பு இந்த கவனயீர்ப்பு போராட்டத்தை ஏற்பாடு செய்திருந்தது.

இன்று முற்பகல் 10 மணிக்கு நல்லூர் கந்தசுவாமி கோவில் பின்புறமாக உள்ள நல்லை ஆதீன முன்றலில் இந்தப் போராட்டம் முன்னெடுக்கப்பட்டது.

தற்போது நாட்டில் அதிகரித்துள்ள கொரோனா வைரஸ் தொற்றின் அபயாத்தை கருத்தில் கொண்டு, சமூக இடைவெளியை பின்பற்றியும் சுகாதார நிடைமுறைகளை கடைப்பிடித்தும் இடம்பெற்ற இந்த போராட்டத்தில், அரசியல் பிரமுகர்கள், மத தலைவர்கள், அரசியல் கைதிகளின் உறவுகள், சிவில் சமூக அமைப்புக்கள் என அனைத்து தரப்பினரும் கலந்துகொண்டனர்.

இலங்கையில் கடந்த சில தசாப்தங்களாக புற்று நோயாளர்களின் எண்ணிக்கை அதிகரித்து வருகின்றது.

இது குறித்து மருத்துவர் . சி.யமுனாநந்தா விளக்குகையில்,

பெரும்பாலான புற்று நோயாளர்கள் மிகவும் பிந்திய நிலையிலேயே இனம் காணப்பட்டு வருகின்றனர். பிந்திய நிலையில் இனம் காணப்படும் நோயாளர்கள் குணமடையும் வீதம் குறைவாகும்.

மேலும் இது பெரும் பொருளாதார சுமையினை ஏற்படுத்துகின்றது. ஆரம்ப நிலைகளில் புற்று நோயினைக் கண்டறிந்தால் சிகிச்சை வெற்றியளிக்கும் வீதம் அதிகமாகும், எனவே புற்று நோயாளிகளை ஆரம்பத்திலேயே கண்டறிவதற்காக மருத்துவ ஆலோசனை வழங்களில் முறையான நடைமுறை அவசியமாகும். புற்று நோயாளர்கள் பல தடவைகள் படிப்படியான நோய் அறிகுறிகளுடன் வைத்திய சேவையை நாடிய போதிலும் பிந்திய நிலையிலேயே கண்டறியப்படுகின்றனர்.

(விசேட சேவை வழங்கல்) அமைப்பாக புற்று நோயினை ஆரம்ப நிலையில் கண்டறியும் நிலையம் வைத்தியசாலைகளில் இயங்குதல் அவசியமாகும். இதன் மூலம் வெளி நோயாளர் பிரிவில் ஒரே தடவையில் குறுகிய நேரத்தில் மருத்துவப் பரிசோதனையினை மேற்கொள்ளலாம்.

புற்று நோயினை ஆரம்ப நிலையில் இனம் காணும் சிகிச்சை நிலையத்தினால் பொதுவான புற்று நோய்களான

வாய்ப் புற்று நோய்
மார்பகப் புற்று நோய்
கருப்பைப் புற்று நோய் ஆகியவற்றைக் கண்டறிந்து குணப்படுத்த முடியும்.

இலங்கையில் ஆண்டுதோறும் கண்டறியப்படும் புற்று நோய்களில் ஆண்களில் கண்டறியப்படும் புற்று நோய்களில் வாய்ப் புற்று நோய் 16 வீதம் ஆகவும் பெண்களில் கண்டறியப்படும் புற்று நோய்களில் மார்பகப் புற்று நோய் 25 வீதம் ஆகவும் காணப்படுகின்றது. தைரோயிட் புற்று நோய், கருப்பைக் கழுத்துப் புற்று நோய் என்பன சுமார் 10வீதமாகக் காணப்படுகின்றன.

மார்பகப் புற்று நோயினை ஆரம்பத்தில் கண்டறியவும் கருப்பைக் கழுத்துப் புற்று நோயினை ஆரம்பத்தில் கண்டறியவும் வாய்ப் புற்று நோயினை ஆரம்பத்தில் கண்டறியவும் இலங்கை சுகாதார அமைச்சு விசேட கவனம் செலுத்தியுள்ளது. அந்த வகையில் இலங்கையில் ஒன்பது மாவட்டங்களிலும் புற்று நோயினை ஆரம்ப நிலையில் கண்டறியும் நிலையங்கள் தாபிக்கப்பட்டுள்ளது.

வட மாகாணத்திற்கு உரிய புற்று நோய் ஆரம்ப நிலையில் கண்டறியும் மருத்துவ ஆலோசனைப் பிரிவு யாழ் போதனா வைத்தியசாலையிலும் இயங்கவுள்ளது.

புற்று நோயினை கண்டறிதலில் நோய் அறிகுறி அற்றவர்களில் விசேட பரிசோதனைகள் குறிப்பாக கருப்பைக் கழுத்துப் புற்று நோய் , மார்பகப் புற்று நோய் என்பனவற்றுக்கு மேற்கொள்ளப்படுகின்றது. நோய் அறிகுறி உடையவர்களில் விசேடமாக குருதிப் பரிசோதனை, கதிர்ப் படங்கள், மாதிரிக் குழியவியல், இழைவியல் பரிசோதனைகள் மேற்கொள்ளப்படும்.

புற்று நோய் இறப்புக்களில் 30 – 50வீதம் தவிர்க்கக் கூடியவை. மேலும் ஆபத்தான பழக்கவழக்கங்களை விலத்துவதனால் புற்று நோய் ஏற்படும் வாய்ப்புக்கள் குறைவடையும். குறிப்பாக வெற்றிலை, பாக்கு மெல்லுதல், புகைப் பிடித்தல், மதுபானம் பாவித்தல் என்பன புற்று நோய்க்கு இட்டுச் செல்லும். அடுத்து ஆரோக்கியமான உணவுப் பழக்கங்களும், உடற் பயிற்சிகளும் சரியான உடல் நிறையைப் பேணுதலும் புற்று நோய் எம்மை அணுகாது காக்கும்.

உடலில் ஏற்படும் பரம்பரையலகு விவகாரங்கள் சில வேளைகளில் புற்று நோயினை ஏற்படுத்தலாம். மேலும் நமது பாவனையில் உள்ள இரசாயன நச்சுக்களும் புற்று நோயினை ஏற்படுத்தலாம்.

பொதுவான புற்று நோய்களாவன:

1. நுரையீரல் புற்று நோய்
2. மார்பகப் புற்று நோய்
3. உணவுக் கால்வாய்ப் புற்று நோய்
4. ஈரல்ப் புற்று நோய்
5. சுதையி புற்று நோய்
6. சிறு நீரகப் புற்று நோய்
7. கருப்பைப் புற்று நோய்
8. சூலகப் புற்று நோய்
9. மூளைப் புற்று நோய்
10. குருதிப் புற்று நோய்
11. முன்னிற்கும் சுரப்பிப் புற்று நோய்
12. என்புப் புற்று நோய

புற்று நோய்க்கான சிகிச்சையில் புற்று நோய் இழையங்களை அகற்றும் சத்திர சிகிச்சை, புற்று நோய்க் கலங்களை அழிக்கும் மருந்து மாத்திரைகள், ஓமோன் சிகிச்சைகள், கதிரியக்க சிகிச்சைகள் என்பன தற்போது மேற்கொள்ளப்படுகின்றன.

இவற்றுக்கு மேலாக உளவள ஆற்றுப்படுத்தல், வலி நீக்க சிகிச்சைகள், ஆன்மீக ஆற்றுப்படுத்தல் என்பனவும் இன்றியமையாதனவாகின்றன” என்று குறிப்பிட்டுள்ளார்.