வரவு செலவு திட்டத்தில் ஜனாதிபதி தோட்டத் தொழிலாளர்களுக்கு வாக்குறுதியளித்த 1700 ருபா சம்பள அதிகரிப்பு இதுவரை வழங்கப்படவில்லை. அதனால் தோட்டத் தொழிலாளர்களை அரசாங்கம் கைவிட்டுள்ளது என தமிழ் முற்போக்கு கூட்டணியின் தலைவர் மனோகணேசன் தெரிவித்தார்.

பாராளுமன்றத்தில் செவ்வாய்க்கிழமை (22) இடம்பெற்ற வேலையாட்களின் வரவு செலவுத்திட்ட நிவாரணப்படி திருத்த சட்டமூலம் மற்றும் வேலையாட்களின் தேசிய குறைந்தபட்ச வேதன  திருத்த சட்டமூலம் ஆகியவற்றின் மீதான விவாதத்தில் உரையாற்றுகையிலேயே இவ்வாறு தெரிவித்தார்.

அவர் அங்கு  மேலும் உரையாற்றுகையில்,

நாட்டின் பிரதான தொழிலாளர்களான தோட்டத் தொழிலாளர்களை அரசாங்கம் கைவிட்டுள்ளது. அவர்களுக்காக கவலைப்பட்டு கதைக்கின்றார்களே தவிர அவர்களின் தேவைகள் எதுவும் நிறைவேற்றுவதில்லை.  வரவு செலவு திட்டத்தை சமர்ப்பித்து ஜனாதிபதி உரையாற்றுகையில் தோட்ட தொழிலானர்களுக்கு 1700 ருபா வழங்கப்படும் என தெரிவித்தார். ஆனால் அவ்வாறு எதுவும் அதிகரிக்கப்படவில்லை. ஒருசில கம்பனிகள் வழங்குவதாக தெரிவித்தாலும் அது வழங்கப்படவில்லை.  நாட் சம்பளமே அவர்களுக்கு வழங்கப்படுவதால்,  திட்டமிட்டு அந்த மக்கள் ஏமாற்றப்படுகிறார்கள். அதனால் இதுதொடர்பில் அரசாங்கம் கவனம் செலுத்த வேண்டும்.

மேலும் சம்பள சபை தொடர்பில் எங்களுக்கு நம்பிக்கை இல்லை. எமது தமிழ் முற்போக்கு கூட்டணி அந்த சபையை பிரதிநிதித்தும் செய்வதில்லை. அரசாங்கம் அதில் இருக்கிது. அதேபோன்று சி.டபிள்யூ.சீயும் அதில் இருக்கிறது. அதனால் இதன்  மூலம் தோட்ட  தொழிலாளர்களுக்கு சம்பளம் அதிகரிக்க நடவடிக்கை எடுத்தால் அதற்கு நாங்கள் எதிர்ப்பு இல்லை. தோட்த்தில் முறை மாற்றம் ஒன்றை மேற்கொண்டு, தாேட்டத் தொழிலாளர்களையும் பங்காளிகளாக்க வேண்டும். அந்த மக்களின் வருமான்ததை அதிகரித்துக்கொள்ள திட்டம் ஒன்றை தயாரிக்க வேண்டும். அதுதொடர்பில் கலந்துரையாட நாங்கள் தயாராக இருக்கிறோம். சம்பளம் அதிகரித்து மக்களின் வாழ்க்கையை முன்னேற்ற முடியாது.

மக்கள் விடுதலை முன்னணியின் தொழிற்சங்கம் தோட்டத் தொழிலாளர்களுக்கு 2200 ருபா வழங்க வேண்டும் என்றே சம்பள நிர்ணய சபையில் தெரிவித்திருந்தது. அது கிடைக்கிறதா, இருந்த அரசாங்கங்களுக்கும் அதனையே தெரிவித்து வந்தீர்கள். அதனால் நாங்கள் தெரிவிப்பது, தோட்டத் தொழிலாளர்களுக்கு சம்பள அதிகரிப்பு அல்ல. அவர்களை பங்காளிகளாக்க வேண்டும். அதுவே எமது நிலைப்பாடு.அதனால் முறைமாற்றம் ஒன்றை மேற்கொள்தன் மூலமே தோட்டத்துறையை முன்னேற்ற முடியும். அவ்வாறு இல்லாமல் முதலாளிமாருடன் கலந்துரையாடி ஒருபோதும் தோடத்துறையை அபிவிருத்தி செய்ய முடியாது. அவர்கள் நல்லவிடயங்களுக்கு ஒருபோதும் இணங்குவதில்லை என்றார்.

யாழ்ப்பாணம் – வலி வடக்கில் பல காணிகள் மக்களிடம் மீள கையளிக்கப்பட்டு இருந்தாலும் 2013ஆம் ஆண்டு வர்த்தமானி அறிவித்தலுக்கு அமைய அது இராணுவ தேவைக்காக சுவீகரிக்கப்பட வேண்டிய காணியாகவே காணப்படுகிறது என மனிதவுரிமை செயற்பாட்டாளர் ஜட்சன் தெரிவித்துள்ளார்.

வலி. வடக்கில் இராணுவத்தினரின் பிடியில் உள்ள காணிகளின் உரிமையாளர்களின் பிரதிநிதிகள் யாழில் உள்ள தனியார் விருந்தினர் விடுதியில் நேற்று (22) நடத்திய ஊடக சந்திப்பின் போதே அவர் இவ்வாறு குறிப்பிட்டார்.

அவர் மேலும் தெரிவிக்கையில், ”தெல்லிப்பழை பிரதேச செயலக பிரிவில் 2,800 ஏக்கர் காணியே விடுவிக்கப்பட வேண்டியுள்ளதாக மாவட்ட செயலர் கூறுகின்றார். ஆனால் 2808 ஏக்கர் என பிரதேச செயலக தகவல்கள் கூறுகின்றன

ஆனால் 2013ஆம் ஆண்டு வெளியான வர்த்தமானியில் 6,317 ஏக்கர் காணிகள் இராணுவத்தினர் வசமுள்ளதாகவும், அவற்றை இராணுவ தேவைகளுக்காக சுவீகரிக்க உள்ளதாகவும் குறிப்பிடப்பட்டுள்ளது.

அதன் பின்னரான கால பகுதியில் ஆட்சிக்கு வந்த அரசாங்கங்கள் கட்டம் கட்டமாக பல பகுதிகளில் உள்ள காணிகள், வீதிகள், ஆலயங்கள் என்பவற்றை மீள மக்களிடம் கையளித்து வந்துள்ளன.

அந்த காணிகள் மக்களிடம் மீள கையளிக்கப்பட்ட இருந்தாலும் 2013ஆம் ஆண்டு வர்த்தமானி அறிவித்தலுக்கு அமைய அது இராணுவ தேவைக்காக சுவீகரிக்கப்பட வேண்டிய காணியாகவே காணப்படுகிறது.

அத்துடன், மக்களின் காணிகளில் இதுவரை காலமும் இராணுவத்தினர் விவசாய நடவடிக்கைகளில் ஈடுபட்டு பெரும் பணம் ஈட்டியுள்ளனர்.

அவர்கள் தனியார் காணிகளில் விவசாய நடவடிக்கைகளில் ஈடுபட்டமைக்காக காணி உரிமையாளர்களுக்கு இழப்பீடு வழங்க வேண்டும் என்பதுடன், காணிக்கான குத்தகை பணத்தினையும் வழங்க வேண்டும்” என தெரிவித்தார்.

வவுணதீவு வலையிறவு பாலத்துக்கு அருகாமையில் இரு காவல்துறைத் துப்பாக்கியால் சுட்டும் வெட்டியும் கொலை செய்த சம்பவதில் பிழையான தகவலை வழங்கிய பொலிஸ் பரிசோதகர் ஒருவர் கைது செய்யப்பட்டுள்ளார்.

அவரை நேற்றுமுன்தினம் CID யினர் கொழும்பில் வைத்து கைது செய்துள்ளதாக காவல்துறை உயர் அதிகாரி ஒருவர் தெரிவித்தார்.

படுகொலைச் சம்பவத்தின் உண்மை சம்பவத்தை மூடிமறைக்கப்பட்டு விடுதலைப்புலிகளின் முன்னாள் போராளி மீது சுமத்தப்பட்டதை காவல்துறையை கண்டறிந்தனர்.

இதனையடுத்து குறித்த சம்பவம் தொடர்பாக அப்போது மட்டக்களப்பு மாவட்ட புலனாய்வு பிரிவு பொறுப்பதிகாரியாக கடமையாற்றிவரும் தற்போது கந்தளாய் காவல் நிலையத்தில் கடமையாற்றிவரும் காவல் பரிசோதகர் ஒருவரை சி.ஜ.டியினர் கொழும்புக்கு அழைத்து விசாரணையின் பின்னர் கைது செய்துள்ளதாக அவர் தெரிவித்தார்.

1983 ஆம் ஆண்டு இதே மாதம் வெலிக்கடை சிறையில் வைத்து படுகொலை செய்யப்பட்டவர்கள் தொடர்பிலும்  அரசு விசாரணைகளை ஆரம்பிக்க வேண்டும் அவர்கள் புதைக்கப்பட்ட  புதைக்குழி எங்கேயுள்ளதெனவும் அரசு  கண்டுபிடிக்க வேண்டும் என  ஜனநாயகத்தமிழ் தேசிய கூட்டணியின் உறுப்பினர்  செலவம் அடைக்கலநாதன் தெரிவித்தார்.

பாராளுமன்றத்தில் செவ்வாய்க்கிழமை (22) இடம்பெற்ற வேலையாட்களின் வரவு செலவுத்திட்ட நிவாரணப்படி திருத்த சட்டமூலம் மற்றும் வேலையாட்களின் தேசிய குறைந்தபட்ச வேதன  திருத்த சட்டமூலம் ஆகியவற்றின் மீதான விவாதத்தில் உரையாற்றுகையிலேயே இவ்வாறு தெரிவித்தார்.

அவர் அங்கு  மேலும் உரையாற்றுகையில்,

இந்த மாதம் .வெலிக்கடை சிறையில் எம்மவர்கள் படுகொலை செய்யப்பட்ட மாதம். தமிழினத்தின் விடுதலைக்காக ,உரிமைக்காக முதலில் ஆயுதம் எடுத்து போராடிய தலைவர் தங்கதுரை, குட்டிமணி போன்றோர் பருத்தித்துறை மணற்காட்டு கடற்கரையில் 1981 சித்திரை மாதம் 5 ஆம் திகதி  இலங்கை  கடற்படையால் கைது செய்யப்பட்டார்கள்.1983 ஜூலை மாதம்  25,27 ஆம் திகதிகளில்   தமிழ் அரசியல் கைதிகள், பொதுமக்கள் என 53 பேர்  கொடூரமாக சிங்கள காடையர்களினால் படுகொலை செய்யப்பட்டார்கள்.

இந்தப்படுகொலைக்கு பொலிஸ் .சிறை அதிகரிக்க எல்லோரும்  உடந்தையாக இருந்தார்கள். குட்டிமணி உட்பட பலரின் கண்கள் பிடுங்கப்பட்டன.இரண்டு நாட்களாகி இந்த படுகொலைகள் இடம்பெற்ற சூழலில்   தலைவர் தங்கதுரை, தளபதி குட்டிமணி, ஜெகன்,நடேசதாசன், தேவன்,சிவபாதம் ,ஸ்ரீகுமார்,மரியாம்பிள்ளை,குமார்,குமாரகுலசிங்கம் மற்றும் டொக்டர் ராஜசுந்தரம் உட்பட 53 பேர் படுகொலை செய்யப்பட்டனர் .

எனவே 1983 ஆம் ஆண்டு இதே மாதம் வெலிக்கடை சிறையில் வைத்து படுகொலை செய்யப்பட்டவர்கள் தொடர்பிலும்  அரசு விசாரணைகளை ஆரம்பிக்க வேண்டும் அவர்கள் புதைக்கப்பட்ட  புதைக்குழி எங்கேயுள்ளதெனவும் அரசு  கண்டுபிடிக்க வேண்டும் உயிர்த்த ஞாயிறு குண்டுத்தாக்குதலை அரசு விசாரிப்பதுபோன்று இந்த வெலிக்கடை படுகொலைகளையும் விசாரணை செய்ய வேண்டும் என்றார்.

இலங்கை மின்சார சபை மறுசீரமைப்பு திருத்தச் சட்ட மூலத்திற்கு எதிர்ப்பு தெரிவித்து செவ்வாய்க்கிழமை (22) நாடளாவிய ரீதியில் உள்ள மின்சார சபை தொழிற்சங்கங்கள் சுகயீன விடுமுறை தொழிற்சங்க நடவடிக்கையை முன்னெடுத்திருந்தன. இதனால் மின்சார சபை அலுவலகங்களில் சேவையை பெற்றுக்கொள்ள வருகைததத்தந்திருந்த பெருமளவான பொதுமக்கள் அசௌகரியங்களுக்கு முகம் கொடுத்திருந்தனர்.

மேலும் உத்தேசிக்கப்பட்டுள்ள மின்சார சபை மறுசீரமைப்பு திருத்தச் சட்டத்தை மீள பெறுமாறு வலியுறுத்தியும் தமது தொழில் பாதுகாப்பை உறுதிப்படுத்துமாறு  கோரியும் மின்சார சபையின் 28 தொழிற்சங்கங்களை சேர்ந்த ஊழியர்கள் செவ்வாய்க்கிழமை (22)  கொழும்பில் அமைந்துள்ள இலங்கை மின்சார சபைக்கு முன்பாக எதிர்ப்பு ஆர்ப்பாட்டத்திலும் ஈடுபட்டனர்.

இலங்கை மின்சார சபை மறுசீரமைப்பு திருத்தச் சட்டமூலம் தொடர்பான பாராளுமன்ற விவாதம் 24ஆம் திகதி வியாழக்கிழமை இடம்பெற உள்ளது.  இந்நிலையில் மின்சார சபையின் 28 தொழிற்சங்கங்களை சேர்ந்த சுமார் 22 ஆயிரத்துக்கும் அதிகமான ஊழியர்கள் செவ்வாய்க்கிழமை (22) சுகயீன  விடுமுறை தொழிற்சங்க நடவடிக்கையை ஆரம்பித்துள்ளனர்.  மின்சார சபை  சட்ட மூலத்திற்கு  எதிர்ப்புத் தெரிவித்தும் தமது தொழில் பாதுகாப்பு உள்ளிட்ட   நியாயமான கோரிக்கைகளுக்கு விரைவில் தீர்வு வழங்குமாறு  தெரிவித்தும் செவ்வாய்க்கிழமை (22) மின்சார சபை ஊழியர்கள் சுகயீன விடுமுறை தொழிற்சங்க நடவடிக்கையினை முன்னெடுத்திருந்தனர்.

பொதுச் சேவைகள் ஆணைக்குழுவின் கீழ்  உள்ள மின் சக்தி துறையில் மறுசீரமைப்பைக் கொண்டுவரும் நோக்கில்  கொண்டுவரப்பட்ட 2024 ஆம் ஆண்டின் 36 ஆம் இலக்க  இலங்கை மின்சார சபை மறுசீரமைப்பு சட்ட மூலத்தை திருத்தங்களுடன் மீள நிறைவேற்றுவதற்கு தற்போதைய அரசாங்கம் தயாராகி வருவதாக மின்சார சபை தொழிற்சங்கங்கள் சுட்டிக்காட்டுகின்றன. இதனால் மின்சார சபை ஊழியர்களின் தொழிலுக்கு ஆபத்து ஏற்படுவதுடன், தமக்கான சலுகைகள் கொடுப்பணவுகள் தொடர்பிலும் பிரச்சினைகள் எழுவதாகவும் அவர்கள் குறிப்பிடுகின்றனர்.

செவ்வாய்க்கிழமை (22) பிற்பகல் கொழும்பில் அமைந்துள்ள இலங்கை மின்சார சபைக்கு முன்பாக ஒன்றுக்கூடிய நூற்றுக்கணக்கான மின்சார சபை ஊழியர்கள் மின்சார சபை மறுசீரமைப்பு திருத்தச் சட்டத்தை மீளப்பெறுமாறு வலியுறுத்தியும், தமது தொழில் பாதுகாப்பு உள்ளிட்ட ஒரு சில கோரிக்கைகளை முன்னிறுத்தியும் ஆர்ப்பாட்டத்தில் ஈடுபட்டனர்.  இதன்போது அப்பகுதியில் பாதுகாப்பைக் கருத்தில் கொண்டு பொலிஸாரும் இராணுவத்தினரும் கடமையில் ஈடுபடுத்தப்பட்டனர்.

இதேவேளை மின்சார சபை ஊழியர்களின் தொழிற்சங்க நடவடிக்கையால்  மின்சார சபை  அலுவலக நடவடிக்கைகள் ஸ்தம்பித்திருந்தன. சேவையைப் பெற்றுக்கொள்ள வருகைத்தந்திருந்த பொதுமக்களும் பெரும் அசௌகரியங்களுக்கு உள்ளாகியிருந்ததுடன் பலர் ஏமாற்றத்துடன் அங்கிருந்து வெளியேறியிருந்தனர். மேலும் குறிப்பிட்ட சில அலுவலகங்களில் மட்டுப்படுத்தப்பட்ட அளவில் மாத்திரம் சேவைகள் வழங்கப்பட்டதுடன், ஆனால் சேவையை பெற்றுக் கொள்ள மக்கள் நீண்ட நேரம் வரிசையில் காத்திருக்க வேண்டியிருந்தது.

மேற்படி தொழிற்சங்க நடவடிக்கைத் தொடர்பில் இலங்கை மின்சார சபையின்  தொழில்நுட்ப பொறியியலாளர்கள் சங்கத்தின்  பிரதித்தலைவர்  நந்தன உதயகுமார குறிப்பிடுகையில்,

இந்த விடயம் தொடர்பில் கலந்துரையாடுவதற்காக  இத்துறைக்குப் பொறுப்பான அமைச்சரை தொடர்பு கொள்ள நாம் முற்பட்ட போதிலும்  அதனால் எவ்வித பயனுமில்லை. நாடு முழுவதும் உள்ள மின்சார சபையின் 28 தொழிற்சங்கங்களை சேர்ந்த ஊழியர்கள் சுகயீன விடுமுறை தொழிற்சங்க நடவடிக்கையில் ஈடுபட்டுள்ளனர். அரசாங்கம் மற்றும் அமைச்சருடன் மாத்திரமே எமக்கு பிரச்சினை உள்ளது. பொதுமக்களுடன் அல்ல.

உத்தேசிக்கப்பட்டுள்ள இலங்கை மின்சார சபை மறுசீரமைப்பு திருத்தச் சட்டத்தால் மின்சார ஊழியர்களின் தொழிலுக்கு பாதுகாப்பு இன்றிய நிலை உருவாகியுள்ளது. ஆகையால் எமது நியாயமான கோரிக்கைகளுக்கு அரசாங்கத்தினர் செவிசாய்க்க வேண்டும் இல்லையேல் எதிர்வரும் நாட்களில் கடுமையான தொழிற்சங்க நடவடிக்கையில் ஈடுபடவும் தயாராக உள்ளோம் என்றார்.

யாழ்ப்பாணம் – வட்டுக்கோட்டை காவல்துறையினரின் செயற்பாடுகளுக்கு எதிர்ப்பு தெரிவித்தும் தங்களுக்கு இழைக்கப்பட்ட அநீதிக்கு நீதிக் கோரியும் மூளாய் பகுதி மக்கள் கவனயீர்ப்பு போராட்டத்தில் ஈடுபட்டனர்.
யாழ்ப்பாண மாவட்ட பிரதி பொலிஸ்மா அதிபரின் அலுவலகத்துக்கு முன்பாக இந்த போராட்டம் முன்னெடுக்கப்பட்டது.

அண்மையில் வட்டுக்கோட்டை மூளாய் பகுதியில் இடம்பெற்ற மோதலில் இருவர் காயமடைந்ததுடன் அங்கு பதற்ற நிலைமை ஏற்பட்டிருந்தது. இதனையடுத்து முன்னெடுக்கப்பட்ட விசாரணைகளுக்கு அமைய சம்பவம் தொடர்பில் மூவர் கைது செய்யப்பட்டதுடன் அவர்களை எதிர்வரும் ஓகஸ்ட் மாதம் 5ஆம் திகதி வரையில் விளக்கமறியலில் வைக்குமாறு உத்தரவிடப்பட்டுள்ளது.

அத்துடன் மூளாய் பகுதியில் இடம்பெற்ற மோதல் தொடர்பான விசாரணைகளுக்கு இரண்டு விசேட குழுக்கள் நியமிக்கப்பட்டுள்ளதாக காவல்துறையினர் தெரிவித்தனர். அத்துடன், மோதலுடன், தொடர்புடைய பலர் தலைமறைவாகியுள்ள நிலையில், அவர்களை தேடும் நடவடிக்கைகள் முன்னெடுக்கப்பட்டுள்ளதாகவும் தெரிவிக்கப்படுகிறது.

இந்தநிலையில், மதுபானசாலையில் ஏற்பட்ட தகராறு காரணமாக தங்களது பகுதியைச் சேர்ந்த இருவர் காயமடைந்துள்ளதாக போராட்டத்தில் ஈடுபட்ட மூளாய் பகுதி மக்கள் குற்றஞ்சாட்டியுள்ளனர்.
இந்த விடயத்தில் பொலிஸார் உரிய முறையில் செயற்படவில்லை என்றும் இதனையடுத்து பதற்றமான சூழல் ஏற்பட்டதாகவும் அவர்கள் குறிப்பிட்டுள்ளனர்.

மாகாண சபை தேர்தலை அடுத்த வருடம் நடத்துவதுவதற்கு உத்தேசிக்கப்பட்டுள்ளதாக தேர்தல்கள் ஆணைக்குழு தரப்பு தெரிவித்துள்ளது.

எதிர்வரும் மூன்று அல்லது நான்கு வருடங்களுக்கு தேர்தலை நடத்துவதற்கான வாய்ப்பில்லை என்று தேர்தல்கள் ஆணையாளர் சமன் ஸ்ரீ ரத்நாயக்க தெரிவித்ததாக கூறி, ஊடகங்களில் தகவல்கள் பகிரப்பட்டு வருகின்றன. ஏற்கனவே, ஜனாதிபதித்தேர்தல், பொதுத்தேர்தல், உள்ளூராட்சி சபை தேர்தல் நடத்தப்பட்டுள்ள நிலையில், மாகாணசபை தேர்தலும் நடத்தப்படும் என்ற எதிர்பார்ப்பு நிலவுகிறது.

இந்தநிலையில், சமன் ஸ்ரீ ரத்நாயக்கவின் கருத்து அரசியல் தரப்பில் கேள்விகளை எழுப்பியிருக்கிறது.
எனினும் இந்த விடயம் தொடர்பில் விளக்கமளித்துள்ள, தேர்தல்கள் ஆணைக்குழுவின் உயரதிகாரி ஒருவர், தேர்தல்கள் ஆணைக்குழு மாகாணசபை தேர்தலை நடத்துவதற்கு தயாராகவே இருப்பதாக குறிப்பிட்டார்
எனினும், சட்ட சிக்கல்கள் தடையாக உள்ள நிலையில் அதனை பாராளுமன்றத்தின் ஊடாக நிவர்த்திப்பதாக அரசாங்கமும் உறுதியளித்துள்ளது

இந்த சூழ்நிலையில், தேர்தல்கள் ஆணைக்குழுவின் தலைவர் குறித்த கருத்தை வெளியிட்டிருப்பார் என்று, தாம் நம்பவில்லை என அந்த உயரதிகாரி குறிப்பிட்டார். தேர்தல்கள் ஆணைக்குழு என்ற வகையில் தாம் தேர்தலை நடத்துவதற்கான அழுத்தத்தை தொடர்ந்தும் அரசாங்கத்துக்கு வழங்கி வருவதாகவும் அவர் தெரிவித்தார்.