உத்தியோகப்பூர்வ விஜயம் மேற்கொண்டு இத்தாலியின் வெளிவிவகார மற்றும் சர்வதேச ஒத்துழைப்புக்கான பிரதி அமைச்சர் மரியா திரிபோடி (Maria Tripodi),இன்று  இலங்கைக்கு பயணம் செய்துள்ளார்.

இத்தாலியில் இருந்து இலங்கைக்கு மேற்கொள்ளப்படும் அதி உயர்மட்ட விஜயமாக இது கருதப்படுகின்றது.

பிரதி அமைச்சர் மரியா திரிபோடி (Maria Tripodi) எதிர்வரும் 5ஆம் திகதி வரை நாட்டில் தங்கியிருந்து இலங்கையின் பல உயர் மட்ட பிரதிநிதிகளை சந்தித்து கலந்துரையாடவுள்ளார்.

செம்மணி – சித்துபாத்தி மனிதப் புதைகுழியில் புதன்கிழமை (3) மேலும் 9 மனித எலும்புக்கூடுகள் அடையாளம் காணப்பட்டுள்ளது.

இதன் அடிப்படையில் இதுவரை 231 மனித எலும்புக்கூடுகள் அடையாளம் காணப்பட்டுள்ளதுடன் இதில் 213 மனித எலும்புக்கூடுகள் முழுமையாக அகழ்ந்தெடுக்கப்பட்டுள்ளது.

யாழ்ப்பாணம் – செம்மணி – அரியாலை சித்துபாத்தி இந்து மயான மனிதப் புதைகுழியின் இரண்டாம் கட்ட அகழ்வு பணிகள் 42 வது நாளாக இன்று யாழ்ப்பாண மாவட்ட மேலதிக நீதவான் செல்வநாயகம் லெனின்குமார் முன்னிலையில் முன்னெடுக்கப்பட்டமை குறிப்பிடத்தக்கது.

திருகோணமலை சம்பூர் மனித புதைகுழி அகழ்வுப் பணி தொடர்பான வழக்கு ஒத்திவைக்கப்பட்டுள்ளது.
மனித புதைகுழி அகழ்வுக்கான பாதீட்டுக்குரிய அனுமதி கிடைக்கப்பெறாத நிலையில், குறித்த வழக்கை எதிர்வரும் 16ஆம் திகதிக்கு எடுத்துக் கொள்ள உத்தரவிடப்பட்டுள்ளது.

மூதூர் நீதிவான் முன்னிலையில் குறித்த வழக்கு விசாரணைக்கு கொள்ளப்பட்டபோதே இந்த உத்தரவு பிறப்பிக்கப்பட்டது. சம்பூரில் மனித புதைகுழி காணப்படுவதாக கூறப்படும் பகுதியில் அகழ்வுப் பணிகளை ஆரம்பிப்பதற்கான பாதீடு, பொலிஸாரினால் நீதிமன்றத்திற்கு சமர்பிக்கப்பட்டுள்ளது.

சட்ட வைத்திய அதிகாரி, தொல் பொருள் திணைக்களத்தின் பிரதிநிதி, காணாமல் ஆக்கப்பட்டோர் அலுவலக பிரதிநிதி ஆகியோரின் கையொப்பத்துடன் குறித்த பாதீடு தயார் செய்யப்பட்டுள்ளதாக சட்டத்தரணி தெரிவித்தார். சம்பூர் சிறுவர் பூங்காவை அண்மித்துள்ள கரையோர பகுதியில் கடந்த ஜுலை மாதம் 20ஆம் திகதி மனித எச்சங்கள் அடையாளம் காணப்பட்டமை குறிப்பிடத்தக்கது.

யாழ்ப்பாணம் செம்மணி மனித புதைகுழி வளாகத்தில் நடைபெற்று வரும் விசாரணை தொடர்பான விரிவான அறிக்கையை இலங்கை மனித உரிமைகள் ஆணைக்குழு வெளியிட்டுள்ளது. விசாரணைகளின் முன்னேற்றம் மற்றும் குறிப்பிடத்தக்க சவால்கள் தொடர்பில் குறித்த அறிக்கையில் சுட்டிக்காட்டப்பட்டுள்ளது.

அத்துடன், நீதி அமைச்சர், பொலிஸ் மா அதிபர், பாதுகாப்பு அமைச்சர், இராணுவத் தளபதி, உயர்கல்வி அமைச்சர், நிதி அமைச்சர் ஆகியோருக்கு 16 அம்ச பரிந்துரைகளையும் இலங்கை மனித உரிமைகள் ஆணைக்குழு தனது அறிக்கையில் முன்வைத்துள்ளது.

கடந்த ஆகஸ்ட் 3 மற்றும் 4 ஆம் திகதிகளில் நடத்தப்பட்ட உண்மை கண்டறியும் பணியின் போது, புதைகுழி தளம், யாழ்ப்பாண பல்கலைக்கழகத்தின் தடயவியல் மருத்துவத் துறை மற்றும் காணாமல் போனோர் அலுவலகம், நீதிபதி, தடயவியல் நிபுணர்கள், சிவில் சமூக பிரதிநிதிகள் மற்றும் காணாமல் ஆக்கப்பட்டவர்களின் குடும்ப உறுப்பினர்களுடன் சந்திப்புகள் இடம்பெற்றமை தொடர்பில் அந்த அறிக்கையில் குறிப்பிடப்பட்டுள்ளது.

அறிக்கையிடும் காலப்பகுதியில், 200க்கும் மேற்பட்ட மனித எச்சங்கள் மீட்கப்பட்டதுடன், முதற்கட்ட விசாரணைகளில் 90 வீதத்திற்கும் மேற்பட்ட சடலங்கள் நீதிக்கு புறம்பான கொலைகளைக் குறிக்கும் வகையில் புதைக்கப்பட்டிருந்தன என்பதைக் எடுத்துக்காட்டுவதாகவே அமைந்துள்ளதென அந்த அறிக்கையில் தெரிவிக்கப்பட்டுள்ளது.

போதுமான தடயவியல், மானுடவியல் மற்றும் தொல்பொருள் நிபுணர்கள் இல்லாமை, மேம்படுத்தப்பட்ட கார்பன்-டேட்டிங் முறைகளுக்கான வரையறுக்கப்பட்ட அணுகல் மற்றும் மரபணு பகுப்பாய்வில் உள்ள சவால்கள் உள்ளிட்ட நிபுணத்துவம் மற்றும் தொழில்நுட்பத்தில் முக்கிய இடைவெளிகளை இலங்கை மனித உரிமைகள் ஆணைக்குழு அடையாளம் கண்டுள்ளதாகவும், தனது அறிக்கையில் கூறியுள்ளது.

நிதியுதவியில் தாமதங்கள் மற்றும் சட்ட அமுலாக்க அதிகாரிகளால் ஏற்படும் மிரட்டல்கள், பொறுப்புக்கூறல் மற்றும் ஊடக சுதந்திரம் குறித்தும் மனித உரிமைகள் ஆணைக்குழு கவலை வெளியிட்டுள்ளது.
இதனிடையே, குறித்த அறிக்கையில் இலங்கை மனித உரிமைகள் ஆணைக்குழு முக்கிய பரிந்துரைகள் சிலவற்றை முன்வைத்துள்ளது.

அதன்படி, மனித புதைகுழி விசாரணைகளுக்கான நிலையான செயல்பாட்டு நடைமுறையை உருவாக்குதல், மேம்பட்ட தடயவியல் தொழில்நுட்பம் மற்றும் வெளிநாட்டு நிபுணத்துவத்தைப் பெறுதல், காணாமல் ஆக்கப்பட்டவர்களின் குடும்பங்களுக்கு மரபணு வங்கியை நிறுவுதல், அரச அதிகாரிகளால் இழைக்கப்பட்ட கடுமையான குற்றங்களை விசாரித்து வழக்குத் தொடுப்பதற்கான ஒரு சுயாதீன அலுவலகத்தை உருவாக்குதல் போன்ற பரிந்துரைகள் முன்வைக்கப்பட்டுள்ளன.

அத்துடன், சாட்சிகள் அல்லது ஊடகப் பணியாளர்களை அச்சுறுத்தப்படுவது தவிர்க்கப்படுவதை உறுதி செய்ய வேண்டும் என்றும் மனித உரிமைகள் ஆணைக்குழு சுட்டிக்காட்டியுள்ளது.
விசாரணையை திறம்பட நிறைவு செய்யவும், புதைக்கப்பட்டு என்புக்கூடுகளாக மீட்கப்பட்டவர்களில் குடும்பங்களுக்கு நீதியை உறுதி செய்யவும் ஒருங்கிணைந்த நடவடிக்கையின் அவசரத் தேவையையும் இலங்கை மனித உரிமைகள் ஆணைக்குழு வலியுறுத்தியுள்ளது.

எதிர்வரும் 08ஆம் திகதி ஜெனீவாவில் ஆரம்பமாகவுள்ள ஐக்கிய நாடுகள் மனித உரிமைகள் பேரவையின் அமர்வில் சமர்பிக்கப்படவுள்ள இலங்கையின் மனித உரிமைகளின் நிலைமை தொடர்பான அறிக்கை தற்போது வெளியாகியுள்ளது.

பல ஆண்டுகளாக இராணுவம் மற்றும் ஏனைய பாதுகாப்புப் படையினரால் மேற்கொள்ளப்பட்ட கடுமையான மனித உரிமை மீறல்களை ஒப்புக்கொள்ள, இலங்கை அரசாங்கம் தவறிவிட்டதாக குறித்த அறிக்கையில் சுட்டிக்காட்டப்பட்டுள்ளது.

அதற்கமைய, உண்மை மற்றும் நீதியை எடுத்துக்காட்டுவதற்கு புதிய அரசாங்கத்திற்கு சிறந்த வாய்ப்பொன்று கிட்டியுள்ளதாகவும் குறித்த அறிக்கையில் தெரிவிக்கப்பட்டுள்ளது. கிடைத்துள்ள மக்கள் ஆணையின் பிரகாரம், புதிய அரசாங்கத்திற்கு இது வரலாற்று சந்தர்ப்பமாக அமையும் என்றும் குறிப்பிடப்பட்டுள்ளது.

யுத்தக் காலப்பகுதியில் இடம்பெற்றதாக கூறப்படும் மனித உரிமை மீறல்கள் தொடர்பில் பொறுப்புக்கூறல் அவசியம் என்றும் அதில் சுட்டிக்காடப்பட்டுள்ளது. இந்தநிலையில், மனித உரிமை மீறல்களை தடுப்பதற்கு தேவையான இறுக்கமான பொறிமுறைகள் அவசியம் என்றும் அதில் வலியுறுத்தப்பட்டுள்ளது.
அத்துடன், மனித உரிமைகளை பாதுகாக்கும் பொறிமுறைகளை உறுதிப்படுத்துவதுடன், நீதிமன்ற கட்டமைப்பினூடாக பாதுகாப்பு துறைக்கான மறுசீரமைப்புகளை மேற்கொள்ள வேண்டும் என்றும் குறித்த அறிக்கையில் வலியுறுத்தப்பட்டுள்ளது.

காணாமல் ஆக்கப்பட்டோருக்கான அலுவலகம் நாட்டில் ஸ்தாபிக்கப்பட்டுள்ளமையை குறித்த அறிக்கையூடாக வரவேற்கப்பட்டுள்ளதுடன், அந்த நிறுவனத்தின் செயற்பாடுகளை சர்வதேச கண்காணிப்பின் கீழ் மேற்பார்வை செய்ய வேண்டும் என்றும் ஐ.நா அறிக்கையில் வலியுறுத்தப்பட்டுள்ளது.

அத்துடன், பொறுப்புக்கூறல் விடயத்தில் இலங்கை அரசாங்கம் தொடர்ந்தும் தனது ஒத்துழைப்புகளை வழங்க வேண்டும் என்று அதில் தெரிவிக்கப்பட்டுள்ளது. அதேபோல, ரோம் உடன்படிக்கையில் இலங்கை அரசாங்கம் கைச்சாத்திட வேண்டும் என்றும் குறித்த அறிக்கையில் பரிந்துரைக்கப்பட்டுள்ளது.

அமெரிக்காவிற்கும் இலங்கைக்குமிடையில் காணப்படும் இன்றைய பங்காண்மையானது கடல்சார் மரபினைத் தொடர்கிறது. எமது நாடுகளின் எதிர்காலத்தைப் பாதுகாப்பதற்காகவும் ஒன்றிணைந்து பணியாற்றும் நாம் இந்தோ-பசிபிக் பங்காளர்களாவோம் என அமெரிக்கத் தூதர் ஜூலி சங் தெரிவித்தார்.

மத்திய கலாச்சார நிதியத்தின் கடல்சார் தொல்பொருள் பிரிவுடன் இணைந்து (MAU), அமெரிக்கத் தூதுவர் ஜூலி சங் மற்றும் புத்தசாசன, மத மற்றும் கலாச்சார அலுவல்கள் அமைச்சர் கலாநிதி ஹினிதும சுனில் செனவி ஆகியோர் கொடவாய கப்பற் சிதைவு தொடர்பான கண்காட்சியினை கொழும்பிலுள்ள பண்டாரநாயக்க மாநாட்டு மண்டபத்தில்(  BMICH ) ஆரம்பித்து  வைத்தனர்.

இந்நிகழ்வில் உரையாற்றும் போதே அமெரிக்கத் தூதுவர் ஜூலி சங் மேற்கண்டவாறு தெரிவித்தார். இங்கு அவர் மேலும் உரையாற்றுகையில்,

“கடல்சார் மரபுரிமையென்பது தொடர்புகள் பற்றிய ஒரு கதையாகும். அமெரிக்காவிற்கும் இலங்கைக்குமிடையில் காணப்படும் இன்றைய பங்காண்மையானது அந்த மரபினைத் தொடர்கிறது.

துறைமுகங்கள் முதல் மக்கள் வரை, பாதுகாப்பினைப் பேணுவதற்காகவும், திறந்த வர்த்தகத்தை உறுதிப்படுத்துவதற்காகவும், எமது நாடுகளின் எதிர்காலத்தைப் பாதுகாப்பதற்காகவும் ஒன்றிணைந்து பணியாற்றும் நாம் இந்தோ-பசிபிக் பங்காளர்களாவோம். பல நூற்றாண்டுகளாக பாதுகாப்பான கடற் பாதைகள் செழிப்பின் உந்துசக்தியாக இருந்துள்ளன என்பதையும், அவை அமெரிக்காவினதும் இலங்கையினதும் நலன்களுக்கு இன்றியமையாதவையாக விளங்குகின்றன என்பதையும் கொடவாய கப்பற் சிதைவு நினைவூட்டுகிறது.” எனக் குறிப்பிட்டார்.

கச்சத்தீவு இலங்கைக்குரியது, அதனை நாம் யாருக்கும் விட்டுக் கொடுக்க மாட்டோம் என்றும் அமைச்சர் லால் காந்த தெரிவித்துள்ளார்.

கண்டியில் இடம்பெற்ற நிகழ்வொன்றின்  பின்னர் கருத்துத் தெரிவிக்கும் போதே அவர் மேற்கண்டவாறு குறிப்பிட்டுள்ளார்.

தொடர்ந்தும் தெரிவிக்கையில்,

தென்னிந்திய அரசியல்வாதிகள் அரசியல் இலாபத்திற்காக ஒரு சில கருத்துக்களை வெளியிடமுடியும். அதில் ஒன்றுதான் கச்சத்தீவு தொடர்பான கருத்துக்கள்.

கச்சத்தீவு இலங்கைக்குரியது. அதனை நாம் யாருக்கும் விட்டுக் கொடுக்க மாட்டோம். தமிழ்நாட்டு வாக்காளர்களை உற்சாகப்படுத்த  அவர்கள் கூறும் கதைகளுக்கு நாம் குழம்பிக்கொள்ளத் தேவையில்லை என குறிப்பிட்டுள்ளார்.

ஜெனிவா மனித உரிமை சபை எதிரவரும் 8 ஆம் திகதி கூடவுள்ள நிலையில், கொழும்பில் உள்ள உறுப்பு நாடுகளின் தூதுவர்களை வெளியுறவு அமைச்சின் உயர் அதிகாரிகள் விளக்கமளித்து வருகிறார். மனித உரிமைகள் பாதுகாப்பு மற்றும் தமிழர்கள் விவகாரம் தொடர்பான ஜனாதிபதி அநுரகுமார திஸாநாயக்காவின் நிலைப்பாட்டை எடுத்துக் கூறப்பட்டுள்ளது.

நேற்று செவ்வாய்க்கிமை சில உரையாடல்கள் இடம்பெற்றதாக இலங்கை வெளியுறவு அமைச்சின் தகவல்கள் தெரிவிக்கின்றன. தொடர்ச்சியாக இந்த உரையாடல்கள் இடம்பெறும் எனவும் தெரிவிக்கப்பட்டுள்ளது.

தேசிய மக்கள் சக்தி அரசாங்கம் பதவியேற்று ஒரு வருடம் நிறைவடைவதற்கு முன்னர் பல அபிவிருத்தித் திட்டங்களை முன்னெடுத்து வருவதாகவும், வடக்குக் கிழக்கு மாகாணங்களில் தமிழ் மக்கள் அதிகளவு மக்கள் பிரதநிதிகளை தமது அரசாங்கத்துக்காக தெரிவு செய்துள்ளதாகவும் உயர் அதிகாரிகள் சுட்டிக்காட்டியதாக கூறப்படுகின்றது.

ஆணையாளர் அனுப்பிய முன்னோடி கடிதம் குறித்து அரசாங்கம் பரிசீலித்து வருவதாகவும் கடிதத்தில் முன்வைக்கப்பட்டுள்ளன மனித உரிமை மீறல் குற்றச்சாட்டுக்களை  ஏற்க முடியாது எனவும் தூவர்களிடம் சுட்டிக்காட்டியதாக அறிய முடிகிறது.

வெளியுறவு அமைச்சர் விஜித ஹேரத்தின் உத்தரவுக்கு அமைவாக, ஆணையாளரின் கடிதம் குறித்து துறைசார்ந்த சட்ட வல்லுநர்கள் ஆராய்ந்து வருவதாகவும, புதிய அரசாங்கத்துக்கு ஜெனீவா மனித உரிமைச் சபை சந்தர்ப்பம் வழங்க வேண்டுமென கேட்டுக்கொண்டதாகவும் உள்ளகத் தகவல்கள் கூறுகின்றன.

இதேவேளை வெளியுறவு அமைச்சர் விஜத ஹேரத்தும் உறுப்பு நாடுகளின் தூதுவர்களை சந்திக்கவுள்ளார்.

ஜேவிபியை மையப்படுததிய தேசிய மக்கள் சக்தி அரசாங்கம் பதவிக்கு வந்த பின்னர், இலங்கைத்தீவில் மீள் நல்லிணக்கம் ஏற்பட்டுள்ளது என்ற நிலைப்பாடு அரசாங்கத்திடம் உண்டு. இதனை ஜெனிவாவுக்கு அதிகாரபூர்வமாக அறிவிக்க ஏற்பாடுகள் மேற்கொள்ளப்பட்டு வருகின்றன.

விஜித ஹேரத் தலைமையில் குழு ஒன்றும் ஜெனிவாவுக்கு பயணம் செய்யவுள்ளது. 2020 ஆம் ஆண்டு கோட்டாபய ராஜபக்ச அரசாங்கம் தீர்மானத்தை நிராகரித்தது.

இலங்கை முப்படைகள் மற்றும் பாதுகாப்பு உயர் அதிகாரிகள் எவரையும் காட்டிக் கொடுக்கும் நோக்கம் இல்லை என ஜேவிபி ஏற்கனவே கூறியிருந்தமை குறிப்பிடத்தக்கது.