சிறீலங்காவின் ஏழாவது நிறைவேற்று அதிகாரம் கொண்ட அரச அதிபராக கோத்தபாய ராஜபக்ச அநுராதபுரத்தில் பதவியேற்ற நிலையில் சிறீலங்காவின் 72ஆவது சுதந்திர தினம் இன்னும் சில தினங்களில் சிங்களப் பேரினவாதம் தேசிய கீதத்தை சிங்கள மொழியில் மட்டுமே இசைத்துக் கொண்டாடத் தயாராகின்றது. ஈழத்தமிழ் மக்கள் இதுபற்றி அலட்டிக்கொள்ளப் போவதில்லை, ஏனெனில் இந்நாள் வடக்குக் கிழக்கு வாழ் ஈழத்தமிழருக்கு உரிய நாள் அல்ல.

ஏற்கனவே 146679 உறவுகளைத் தொலைத்துவிட்டு ஆறாத்துயரில் இருக்கும் தமிழருக்கு சிங்களத்தின் சனாதிபதி தன் வாயாலேயே 20000 காணாமல் ஆக்கப்பட்டோரை தாம் கொன்றுவிட்டோம் என்று மறைமுகமாகக் கூறியுள்ளார். 20000ற்கு மேற்பட்ட உறவுகளை நேரடியாகவே இராணுவத்திடம் ஒப்படைத்ததற்கான சாட்சியங்கள் உள்ள நிலையில் சர்வதேசமும் மனித உரிமை அமைப்புக்களும் ஏன் கைகட்டி வாய் பொத்தி மௌனமாக உள்ளன?

சிறிலங்கா அரச அதிபரால் 17.01.2020 அன்று வெளியிடப்பட்ட ஊடக அறிக்கையில் காணாமல் ஆக்கப்பட்டோர் அனைவரும் இறந்துவிட்டனர், காணாமல் ஆக்கப்பட்டோரில் பெரும்பாலானோர் விடுதலைப் புலிகளால் வலுக்கட்டாயமாக இயக்கத்தில் சேர்க்கப்பட்டோர், முறையான விசாரணைகளின் பின்னர் அவர்களுக்கான மரணச் சான்றிதழ் வழங்கப்படும், அவர்களுக்கான உதவி வழங்க ஏற்பாடு செய்யப்படும் என்று கூறப்பட்ட விடயங்கள் ஈழத்தமிழ் மக்களைக் கொதிப்படைய வைத்தள்ளது. இந்தச் சந்தர்ப்பத்தில் வலிந்து காணாமல் ஆக்கப்பட்டோரின் உறவுகளின் போராட்டங்களை மேலும் வலுப்படுத்த வேண்டும் என வேண்டுகின்றோம்.

தமிழர்கள் ஒற்றையாட்சிக்குள் சிங்களவர்களோடு சேர்ந்து வாழ முடியாது என்பதைக் காலத்துக்குக் காலம் சிங்கள அரசியல்வாதிகள் தங்கள் செயல்களின் மூலம் புலப்படுத்தி வருகின்றனர். தமிழ்த் தேசமாக சுயநிர்ணய உரிமையோடு பிரிந்து செல்வது தான் தமிழ் பேசும் மக்களுக்கு நிரந்தர பாதுகாப்பையும், இனப்பிரச்சினைக்கு உயரிய தீர்வையும் தரும் என்பதை சர்வதேசத்திற்கு தமிழர் தொடர்ச்சியாக இடித்துரைக்க வேண்டும்.

தமிழர்கள் தங்களுக்கே உரித்தானதும் தனித்துவமானதும் ஆன மொழி, கலை கலாசாரங்கள், பாரம்பரிய உணவுமுறை, உடைப் பாரம்பரியம், வழிபாட்டு முறைகள், பண்பான பழக்க வழக்கங்கள், அன்பான வாழ்க்கை முறைகள், பூர்வீக நிலங்கள், வர்த்தகங்கள், மரபுரிமைகள் என்று பலவற்றையும் கொண்ட இனமாகையால் அவர்கள் இலங்கைத்தீவின் 2500 வருடங்களுக்கு மேலான பழங்குடி மக்கள் ஆவர். எமது உரிமைகளை என்றுமே விட்டுக்கொடுக்க முடியாது. பாலஸ்தீனிய மண் யூதர்களிடம் கரைந்து போனதுபோல எமது மண்ணை சிங்களத்தின் ஆக்கிரமிப்பிற்கு உட்படுத்த விடாமல் எதிர் நின்று பாதுகாக்க வேண்டும்.

இன்றை சூழலில் இந்தோ – பசுவிக் பிராந்தியம் வல்லரசுகளின் புவியியல் மற்றும் பொருளாதாரப் போட்டிக்குள் அகப்பட்டு அல்லாடிக்கொண்டிருக்கின்றது. இவர்களின் ஆதிக்க அதிகாரப் போட்டிக்குள் பழத்தமிழராகிய எமது விடுதலையும் பகடைக்காயக்கப்பட்டும் சூழல் அதிகரித்துக்கொண்டே போகின்றது. நாம் பட்ட வலிகள் இலகுவில் மறந்து போவதற்கு ஒன்றும் கற்பனைகள் அல்ல. அன்னியனின் முதலீட்டுக்கு நிலம் கொடுக்கும் சிங்களம் பூர்வீகக் குடிகளான எம்மை ஆயுதமுனையில் அடக்கியொடுக்குகிறது. ஆகவே ஒவ்வொரு உலகத்தமிழரும் எமது சுயநிர்ணய உரிமைக்காக உரத்துக்குரல் கொடுக்க வேண்டும் என அனைத்துலக ஈழத்தமிழர் மக்களவை அழைப்பு விடுக்கின்றது. சிறிலங்காவின் 72வது சுதந்திர தினத்தை உலகெங்கும் வாழும் தமிழர்கள் புறக்கணிக்க வேண்டும் என வேண்டுகோள் விடுக்கின்றோம்.

ஈழத்தமிழ் மக்கள் தங்கள் நிரந்தர அரசியல் எதிர்காலத்தை நிர்ணயித்துக்கொள்ள ஐக்கிய நாடுகள் சபையின் உதவியுடன் பொதுசன வாக்கெடுப்பு ஒன்றை நடத்துவதற்கு பெருமெடுப்பில் தயாராக வேண்டும் என புலத்திலும் தாயகத்திலும் உள்ள தமிழ் அமைப்புக்களுக்கு அறைகூவல் விடுக்கின்றோம்.

”தமிழரின் தாகம் தமிழீழத் தாயகம்”
-அனைத்துலக ஈழத்தமிழர் மக்களவை-

மக்களின் விடிவுக்காக உள்ளத்தூய்மையுடன் செயற்படும் கட்சிகள் அனைத்தும் ஒன்றிணையவேண்டும் என தமிழீழ விடுதலை இயக்கத்தின் தலைவரும் பாராளுமன்ற உறுப்பினருமான செல்வம் அடைக்கலநாதன் வேண்டுகோள்விடுத்துள்ளார்.வெறுமனே ஆசனத்திற்காக செயற்படமுடியாது என தெரிவித்துள்ள அவர்,தாங்கள் விட்டுக்கொடுப்புக்கு தயாராகயிருப்பதாகவும் தெரிவித்தார்.

இன்று மட்டு ஊடக அமையத்தில் நடைபெற்ற ஊடகவியலாளர் சந்திப்பில் கலந்துகொண்டு கருத்து தெரிவிக்கும்போதே அவர் இதனை தெரிவித்தார்.

எமது கட்சியின் மட்க்களப்பு பாராளுமன்றத் தேர்தலுக்கான வேட்பாளர்களாக முன்னாள் பாராளுமன்ற உறுப்பினரும்,மாகாணசபை உறுப்பினருமான கோவிந்தம் கருணாகரம் மற்றும் எமது கட்சியின் மட்டக்களப்பு இளைஞர் குழுவின் தலைவர் சட்டத்தரணி நவரெட்ணராஜா கமல்தாஸ் ஆகியோரை நியமிப்பதென மாவட்டப் பொதுச்சபை கூடி ஏகமனதாக தீர்மானித்துள்ளோம்.

தமிழீழ விடுதலை இயக்கம் என்பது இன்றைக்கும் அரசியற் களத்தில் இருந்து கொண்டிருக்கின்றது.நாங்கள் விடுதலைப் புலிகளுடன் இணைந்து அரசியல் ரீதியில் எமது கடமைகளை மேற்கொண்டோம். ஒற்றுமையின் நிமித்தமும்,ஆயுதப் போராட்டத்தில் ஈடுபட்டிருக்கும் எந்தவொரு அமைப்பாக இருந்தாலும் அதனைப் பலவீனப்படுத்தக் கூடாது என்ற இரு காரணங்களுக்காகவுமே எமது செயற்பாடு அவ்வாறு இருந்தது.

எனவே ஒற்றுமை தொடர்பில் தமிழீழ விடுதலை இயக்கம் பெரும் வரலாற்றைக் கொண்டது. இதில் யார் இருக்கின்றார்களோ இல்லையோ தமிழீழ விடுதலை இயக்கம் அதன் பயணத்தைத் தொடரும். எம்மில் இருந்து விலகிச் சென்றவர்களால் நாம் பலவீனமாகிவிட்டோம் என்ற எண்ணம் எங்களைப் பொருத்தமட்டில் இல்லை.

தமிழ்த் தேசியக் கூட்மைப்பின் தலைமை பற்றி அண்மையில் பலரும் பலவாறு சொல்லிக் கொண்டு வருகின்றார்கள். அது அவரவர்களின் தனிப்பட்ட கருத்துக்களேயன்றி தமிழ்த் தேசியக் கூட்டமைப்பின் கருத்து அல்ல. தமிழ்த் தேசியக் கூட்டமைப்பில் மூன்று கட்சிகள் இருக்கின்றன. தமிழ்த் தேசியக் கூட்டமைப்பின் தலைமையைத் தெரிவு செய்வதில் மூன்று கட்சிகளுக்கும் பங்கு இருக்கின்றது. எனவே எமது மூன்று கட்சிகளும் இணைந்தே தமிழ்த் தேசியக் கூட்டமைப்பின் தலைவரைத் தெரிவு செய்கின்ற பொறுப்புடன் இருக்கின்றோம்.

தற்போதைய ஜனாதிபதி ஒரு இனவாத அடிப்படையில் சிங்கள மக்களின் அனுமதியுடன் தான் எந்த முடிவுகளையும் எடுக்க முடியும் என்பதைத் தெளிவாக நாடாளுமன்றில் கூறியிருக்கின்றார். இந்த அரசாங்கமும் பெரும்பான்மை மக்களின் வாக்குகளைப் பெற வேண்டும் என்ற ரீதியில் தமிழ், முஸ்லீம்,மலையக மக்களின் சிந்தனைகளை அல்லது அவர்கள் சிங்கள மக்களைப் போன்று அத்தனை உரித்துக்களும் கொண்ட இனம் என்பதை கருத்திற்கொள்ளாத வகையில் செயற்படுகின்றது.

தற்போது கூடுதலாக சோதனைச் சாவடிகள் முளைத்திருக்கின்றது. அரச பணிகளில் கூடுதலாக ஓய்வு பெற்ற இராணுவ அதிகாரிகள் அமர்த்தப்பட்டுள்ளனர். இவ்வாறான செயற்பாடுகளை ஜனாதிபதியும் இந்த அரசாங்கமும் செய்து வருகின்றது.

கடந்த ஜனாதிபதித் தேர்தலில் ஒரு பெரும்பான்மை இன வேட்பாளருக்கு வாக்களித்து எமது மக்கள் தாம் இனவாதிகள் இல்லை என்பதை நிரூபித்திருக்கின்றார்கள்.

இதன்போது எமது வடக்கு கிழக்கு மக்கள் ஓரணியில் நின்று காட்டியிருக்கின்றார்கள். இதனை ஜனாதிபதி அவர்களும் விளங்கிக் கொளள வேண்டும். இந்த நாட்டில் சகல உரித்துக்களும் கொண்ட தமிழ் பேசும் மக்களுடைய பிரச்சினைகளை அவர் கையாள வேண்டும். வெறுமனே சிங்கள மக்களின் வாக்குகளை மாத்திரம் மையமாக வைத்து அவர்கள் எதனையும் சாதித்துவிட முடியாது. தமிழ் மக்கள் ஐக்கியமான இந்த நாட்டுக்குள்ளே எமது பிரச்சினைகள் தீர்க்கப்பட வேண்டும் என்று விரும்புகின்றார்கள்.

தமிழிலே தேசிய கீதம் பாடப்படக் கூடாது என்கின்ற விடயம் இந்த நாட்டில் வாழும் தமிழ் பேசும் மக்களை வேறு நாட்டுப் பிரஜைகள் போல் கருதுவதாகவே தெரிகின்றது. எங்களுக்கும் தமிழிலே தேசிய கீதம் இருக்கின்றது. அதனைப் பாடுவதற்கு தூண்டுவதாகவே இது அமைகின்றது. தேசிய கீதம் தமிழில் பாடப்பட வேண்டும். சிங்கள மொழிக்கு இருக்கின்ற அத்தனை உரித்துக்களும் தமிழ் மொழிக்கும் இருக்கின்றது. அந்தவகையில் தேசிய கீதத்தைச் சிங்களத்தில் மாத்திரம் பாட வேண்டும் என்று திணிப்பது மனித உரிமை மீறலாகும். இதன்மூலம் மீண்டும் ஒரு சர்ச்சையை உண்டாக்குவதற்கான உருவாக்கத்தை ஏற்படுத்திவிட வேண்டாம்.

முன்னாள் முதல்வர் விக்னேஸ்வரன் அவர்கள் தமிழ்த் தேசியக் கூட்டமைப்பில் இணைவதென்பது வரவேற்கக்கூடிய விடயம் அவ்வாறு இணையும் போது தமிழ்த் தேசியக் கூட்டமைப்பினால் 22 ஆசனங்களை சுலபமாகப் பெற முடியும். ஏனெனில் மக்கள் ஒற்றுமையை மிகவும் விரும்புகின்றார்கள். உள்ளே வந்து நாட்டாமைத் தனம் அல்லது மற்றவர்களை அனுசரிக்காத தன்மையை உண்டுபண்ணிவிடக் கூடாது. அந்த வகையிலே எல்லாரையும் அனுசரித்தச் செல்லக் கூடிய ஒரு நிலையினை மனதில் மக்களின் விடிவு என்ற ஒன்றை எண்ணி இருப்பவர்கள் ஏற்படுத்த வேண்டும். வெறுமனே ஆசனத்திற்காக நாங்கள் செயற்பட முடியாது என்று தெரிவித்தார்.

தமிழர் தாயகப்பகுதி ஒன்றில் துப்பாக்கிச் சூட்டு காயத்துடன் தமிழர் ஒருவர் மீட்கப்பட்டுள்ளதாக பொலிஸார் தெரிவித்தனர்.

மட்டக்களப்பு ஒமனியாமடு பகுதியைச் சேர்ந்த மயில்வாகனம் பிரசாந்தன் ( வயது 38 ) என்பரே சடலமாக மீட்கப்பட்டவராவார்.

மட்டக்களப்பு புனானை ஒமனியாமடு காட்டுப்பகுதியிலிருந்தே இவர் கடந்த வெள்ளிக்கிழமை சடலமாக மீட்கப்பட்டதாக வாழைச்சேனை பொலிஸார் தெரிவித்தனர்.

குறித்த நபர் கடந்த 25 ம் திகதி வீட்டை விட்டு வெளியேறிய நிலையில் ஒமனியாமடு காட்டுப்பகுதியில் தன்னைத்தானே சொட்கண் துப்பாக்கியால் சுட்டு தற்கொலை செய்துகொண்ட நிலையில் சடலமாக மீட்கப்பட்டதுடன் சொட்கண் துப்பாக்கி ஒன்றையும் சடலத்துக்கு அருகில் இருந்து மீட்டுள்ளதாக பொலிசார் தெரிவித்தனர் .

மீட்கப்பட்ட சடலம் பிரேத பரிசோதனைக்காக மட்டக்களப்பு போதனா வைத்தியசாலையில் ஒப்படைக்கப்பட்டுள்ளது.

இது தொடர்பான மேலதிக விசாரணைகளை வாழசை்சேனை பொலிசார் மேற்கொண்டு வருகின்றனர்.

நேற்று (01.02) காலை 08.30 மணியளவில் யாழ்ப்பாணம் பேரூந்து நிலையத்தில் இருந்து ஆரம்பித்த சற்கர நாற்காலி பயணமானது இன்றையதினம் (02.02) வவுனியாவை வந்தடைந்தது.

முள்ளந்தண்டுவடம் பாதிக்கப்பட்ட ம.மொகமட் அலி அவர்களுடன் இணைந்து ஜெகதீஸ்வரன், சகோதர மொழிபேசும் பிறேமசந்ர ஆகியோர் மாற்றுத்திறனாளிகளுக்கான தேவைகள் பூத்தி செய்யப்பட வேண்டும் என்பதற்காகவும், மும்மதங்களுக்கிடையிலான சமூக நல்லிணக்கத்தினை ஏற்படுத்துவதற்காகவும் ஆரம்பிக்கப்பட்ட இலங்கை முழுதுமான சுற்றுபயணம் சுதந்திரதினம் அன்று கொழும்பை சென்றடையவுள்ளது.

வவுனியாவை வந்தடைந்த மூவரையும் புதிய பேருந்து நிலையத்தில் வைத்து வவுனியா மாவட்ட சமூக சேவை உத்தியோகத்தர் எஸ்.எஸ்.வாசன், தமிழ் விருட்சம் அமைப்பின் தலைவர் சந்திரகுமார் கண்ணன் , வர்த்தக பிரதிநிதிகள் , பொதுமக்கள் , பொது அமைப்புக்களின் பிரதிநிதிகள், சமூக ஆர்வலர்கள் என பலரும் கலந்து கொண்டு வாழ்த்தியிருந்தார்கள். அவர்களின் செலவுக்காக தமிழ் விருட்சம் அமைப்பினர் 10,000 ரூபாவையும், வவுனியா வர்த்தக சங்கத்தினர் ரூபா 10,000 வழங்கி இருந்தனர்.

இவர்கள் பின்வரும் கோரிக்கைகளை முன்வைத்து தமது பயணத்தை ஆரம்பித்துள்ளனர் மாற்றுத்திறனாளிகளான நாம் சமூக நல்லிணக்கம் வேண்டியும் எம்மைப்போன்ற நாடு முழுவதிலுமுள்ள மாற்றுத்திறனுடையோரின் சிறப்பான எதிர்கால வாழ்வு கருதியும் சக்கர நாற்காலியில் இலங்கையைச்சுற்றி வலம் வருகிறோம். இந்த சுற்றுப்பயணத்தின் மூலம் பின்வரும் கோரிக்கைகளை நாம் இந்த சமூகத்திற்கு முன் வைக்கிறோம்.

இன ரீதியான நல்லிணக்கத்தை இந்த நாட்டில் அனைவரும் பின்பற்ற வேண்டும். மாற்றுத்திறனாளிகள் சமூகத்தில் ஏனையோர் அனுபவிக்கும் சகல உரிமைகள் சலுகைகளையும் அனுபவிக்க வழிசமைக்க வேண்டும். நாட்டிலுள்ள சகல மாற்றுத்திறனாளிகளுக்கும் மாதாந்த கொடுப்பனவு 5000 ரூபாவை வழங்கி வைக்க ஏற்பாடு செய்ய வேண்டும். மாற்றுத்திறனாளிகளுக்கு சமூக சமய கலாச்சார விளையாட்டு கல்வி பொருளாதார விடயங்களில் சமவாய்ப்பு சம அந்தஸ்து வழங்கப்படவேண்டும். அனைவருக்கும் அணுகு வசதிகளை பொது நிறுவனங்கள், அரங்கு மேடைகள், பொதுமலசலகூடங்கள், பொதுப்போக்குவரத்துகள், பொதுக்கட்டிடங்கள், அலுவலகங்கள், வைத்தியசாலைகள், சேவை மையங்கள், போக்குவரத்து தரிப்பிடங்கள் என சகலதுறைகளிலும் அணுகுவசதி ஏற்படுத்தப்பட வேண்டும். வங்கிகள் வைத்தியசாலைகள் போன்ற சேவை பெறும் மையங்களில் எமக்கு முன்னுரிமை வழங்க மாற்றுத்திறனாளிகளுக்கான விசேட அடையாள அட்டை வழங்கப்பட வேண்டும்.

மேற்குறித்த எமது உரிமைகள் சலுகைகள் என்பவற்றைப்பெற்றுத்தரும் நல்ல நோக்கம் கொண்ட எமது நாட்டு அதி உத்தம ஜனாதிபதியாகிய தாங்கள் பல வகைககளில் எமக்கு பக்கப்பலமாக உறுதுணையாக இருக்கிறீர்கள். உங்கள் சிந்தனையில் இவற்றையும் கருத்தில் கொண்டு செயற்படுத்த வேண்டுமென அந்த மரதனோடத்தில் பங்குபற்றும் மூவராலும் ஜனாதிபதிக்கு வழங்கப்பட உள்ள மகஜரில் தெரிவிக்கப்பட்டுள்ளது.

வவுனியா மாவட்டத்தை சேர்ந்த முள்ளந்தண்டுவடம் பாதிக்கப்பட்ட ம.மொகமட் அலி மாற்றுத்திறனாளிகள் குறித்தான விழிப்புணர்வை ஏற்படுத்தவும், சமூகங்களிடையிலான நல்லிணக்கத்தை ஏற்படுத்தவும் நாடளாவிய ரீதியில் சக்கரநாற்காலி பயணத்தை கடந்த வருடம் பெப்ரவரி 1ம் திகதி ஆரம்பித்து முடித்திருந்தார் என்பது குறிப்பிடத்தக்கது.

கிளிநொச்சி மாவட்டத்தில், சட்டவிரோத மணல் அகழ்வு, மதுபான உற்பத்தி, மரம் கடத்தல், போதைப்பொருள் கடத்தல் என்பவற்றைத் தடுத்தும் நிறுத்தும் முகமாக, கிளிநொச்சி மாவட்டச் செயலகத்தில், கூட்டமொன்று ஏற்பாடு செய்யப்பட்டுள்ளது.

அக்கூட்டம், நாளை (03) முற்பகல் 10 மணிக்கு, முன்னாள் நாடாளுமன்ற உறுப்பினரும் கிளிநொச்சி மாவட்ட ஒருங்கிணைப்புக் குழுத் தலைவருமான மு.சந்திரகுமார் தலைமையில் நடைபெறவுள்ளது.

இக்கூட்டத்தில், கிளிநொச்சி மாவட்டச் செயலாளர், பூநகரி, பச்சிலைப்பள்ளி, கண்டாவளை, கரைச்சி பிரதேச செயலாளர்கள், பொலிஸ், இராணுவம், விசேட அதிரடிப் படை உயரதிகாரிகள் உள்ளிட்ட முக்கிய திணைக்களங்களின் உயரதிகாரிகள் கலந்துகொள்ளவுள்ளனர்.

சிறிலங்காவின் சுதந்திர தினம் அது தமிழர்களின் கரி நாளாக பிரகடனப்படுத்தி வலிந்து,காணாமல் ஆக்கப்பட்டோர் உறவுகள் அமைப்பின் ஏற்பாட்டில்
வடக்கிலும்,கிழக்கிலும் மாபெரும் சிறிலங்கா சுதந்திரதின எதிர்ப்புப் பேரணிகள் நடத்தப்படவுள்ளன. இப் பேரணிகளில் அனைவரையும் கலந்து கொள்ளுமாறு அழைப்பு விடுக்கப்பட்டுள்ளது.

பேரணிக்கான பேருந்து போக்கு வரத்து சேவைகளும் அதற்கான ஒழுங்கமைப்பாளர்கள் விபரங்களும் கீழ்தரப்பட்டுள்ளது.

வடக்கு மாகாணம்

கிளிநொச்சி கந்தசுவாமி ஆலய முன்றலில் இருந்து காலை 10.00 மணிக்கு மாபெரும் பேரணி ஆரம்பமாகி பழைய பேருந்து வீதியை சென்றடையும்.
யாழ்மாவட்ட போக்குவரத்து சேவைக்கான தொடர்பாளர் திருமதி.சுகந்தினி தொ.இ. 077821 8775

வடமராட்சி கிழக்கிற்கான தொடர்பாளர் திருமதி.அருள்மதி தொ இ 076652 4715.
பூநகரி, வலைப்பாடு ,கிராஞ்சி ,நாச்சிக்குடா போக்கு வரத்து ஒழுக்கமைப்பாளர் திருமதி.கமலா -தொ.இ. 0760436388.

கிளிநொச்சி மாவட்டம்
மாவட்ட ஒழுங்கமைப்பாளர் திருமதி.கருணாவதி -தொ.இ.0774279987.

கிளிநொச்சி மாவட்ட போக்கு வரத்து சேவைகள் .கிருஸ்ணபுரம் ,உதயநகர்மேற்கு,உதயநகர்கிழக்கு,செல்வாநகர் ஊடாக கனகபுரம் தெரு வழியாக டிப்போ சந்தி போய் பழைய கச்சேரியடி வழியாக கந்தசாமி கோவிலைச் சென்றடையும்ஒருங்கினைப்பாளர் R,இராமசாமி தொ இ 0773749618.

ஜெயந்தி நகர் கனகபுரம் ,கணேசபுரம்,திருநகர் ஊடாக புதிய கச்சேரியடி வழியாக ஏ 9வீதி ஊடாக கந்தசுவாமி கோயில் வரையான பேருந்து சேவை ஒழுங்கமைப்பாளர் திருமதிஅ,நாகேஸ்வரி -தொ.இ 0762189192 .

வவுனியா மாவட்டம்
வவுனியா மாவட்ட ஒழுங்கமைப்பாளர் திருமதி அமுதா தொ இ 076 807 8615.

மன்னார் மாவட்டம்
மன்னார் மாவட்ட ஒழுங்கமைப்பாளர் திருமதி .றஞ்சினி தொ இ 0772638399.

முல்லைத்தீவு மாவட்டம்

புதுக்குடியிருப்பு சிவன் கோவிலில் இருந்து புறப்படும் பேருந்து சேவைக்கான தொடர்பாளர் திருமதி.மதி -தொ.இ. 077212 3604.

வள்ளிபுனம் ,கைவேலி ,தேவிபுரம் பகுதி ஒழுங்கமைப்பாளர் திருமதி.பிருந்தா-தொ.இ. 0767355206.

கொக்குளாய் ,வலைஞர்மடம் ,மாத்தளன்,மையில் குஞ்சன் குடியிருப்பு பேருந்து சேவைக்கான ஒழுங்கமைப்பாளர் திருமதி.உதயராணி -தொ.இ 077860 4511.

புதிய குடியிருப்பு முல்லைத்தீவு ,முள்ளிவாக்கால் பேருந்து சேவைக்கான தொடர்பாளர் தயாழினி -தொ இ 077921 9368

கிழக்குமாகாணம்

மட்டக்களப்பு மாவட்ட மக்கள் எழுச்சி பேரணி காலை 10.00 மணிக்கு மட்டகளப்பு கல்லடி பாலத்தில் ஆரம்பமாகி காந்தி பூக்காவை சென்றடையும் .
இவ் மாபெரும் மக்கள் எழுச்சி பேரணிக்கான போக்கு வரத்து சேவைகள் பின்வருமாறு ஒழுங்குபடுத்தப்பட்டுள்ளது.இப் பேரணியை மாவட்ட மேலாளர் திருமதி. மதனா தலமையில் ஏற்பாடாகியுள்ளது.

மட்டக்களப்பு மாவட்டம்

வாழைச்சேனை ,கல்லடி ,திருகோணமலை வீதி ஒழுங்கமைப்பாளர் திருமதி.தமையந்தி தொ.இ.0774647296.

மாவடி வேம்பு ,கல்லடி திருகோணமலை வீதி பேருந்து ஒழுங்கமைப்பாளர் திருமதி.லோஜினி-தொ.இ.0766048447

நாவல்க்குடா ,கல்முனை வீதி. பேருந்து சேவை ஒழுங்கமைப்பளர் திருமதி. வேவி தொ.இ.0774132484.

அம்பாறை மாவட்டம்
அக்கரைப்பற்று ஒழுங்கமைப்பாளர் திருமதி.தங்கநேசம்-தொ. இல 077703 2267.

கோலாவில் ஒழுங்கமைப்பாளர் திருமதி.ராஜ்குமாரி -தொ.இ. 0754144408.

பாண்டிருப்பு ,கல்முனை ஒழுங்கமைப்பாளர் திருமதி.இந்திரா – தொ.இ.0779906344.

திருகோணமலை மாவட்டம்

சாம்பல்தீவு,அலஸ்தோட்டம், சோலையடி, செல்வநாயகபுரம் லிங்கநகர் ஊடாக
கப்பல்துரை,கிண்ணியா ஊடாக சென்று மூதூர் பகுதி ஊடா மட்டக்களப்பிற்கான பேருந்து சேவை திருமதி.கைரலி -தொ.இ 0774146861.

வடக்கு கிழக்கு வலிந்து காணாமல் ஆக்கப்பட்டோர் உறவுகள் அமைப்பின் ஏற்பாட்டில் நடைபெறும் இப் பேரணிகளில் அனைத்து உறவுகளையும் கலந்து கொள்ளுமாறு கேட்டுக்கொள்வதோடு ,மேற்படி இலவச பேருந்து சேவைகள் ஒழுங்கமைப்பாளர்களுடன் தொடர்புகொண்டு வருகை தருமாறு வேண்டி நிற்கின்றோம் என ஏற்பாட்டாளர்கள் தெரிவிக்கின்றனர்.

தமிழீழ விடுதலைப் புலிகளின் இருபத்தொன்பது ஆவணங்கள், சட்டவிரோதமாகத் தயாரிக்கப்பட்ட ஐந்து ரப்பர் முத்திரைகள் , ஒரு மெமரிக் காட், ஒரு பென் ரைவ் ஆகியவற்றுடன் சந்தேக நபர் ஒருவர் இன்று கைதுசெய்யப்பட்டுள்ளார்.

கிளிநொச்சி விவேகானந்த நகர் கிழக்கில் உள்ள வீடொன்றில் இருந்தே, மேற்கண்ட சான்றுப் பொருள்களுடன் அதே பகுதியை சேர்ந்த 37 வயதான சந்தேக நபரும் கைது செய்யப்பட்டுள்ளார்.

இன்று (02) காலை யாழ் மாவட்டத்தின் புங்குடுதீவு பகுதியில் 300 கிலோ கஞ்சா கைப்பற்றப்பட்டுள்ளதாக சிறீலங்கா கடற்படை வட்டாரங்கள் தெரிவித்துள்ளன.

இந்தியாவில் இருந்து மீன்பிடிப் படகு ஒன்றில் மறைத்து வைத்து கடத்தப்பட்ட போதே இது கண்டறியப்பட்டுள்ளது. இந்த சம்பவம் தொடர்பில் படகில் வந்த இருவர் கைது செய்யப்பட்டுள்ளதுடன்இ மேலும் இருவர் சங்குப்பிட்டி பகுதியில் வைத்து கைது செய்யப்பட்டுள்ளனர்.