இலங்கையில் நடைபெற்ற ஆட்சி மாற்றம் மீண்டும் ஊடகவியலாளர்களையும் மனித உரிமைகள் செயற்பாட்டாளர்களையும் இலக்கு வைத்து செயற்படும் களத்தை உருவாக்கி கொடுத்துள்ளது. கோட்டபாய ராஜபக்ச அரசாங்கத்தின் பௌத்த பேரினவாத சிந்தனைகளுக்கு வடிவம் கொடுக்கும் செயற்பாடுகள் மிகத் தீவிரமாக நடைபெற்று வருகிறது.

கோட்டபாய ராஜபக்ச அரசாங்கம் ஐ.நா. மனித உரிமைகள் பேரவையின் தீர்மானங்களில் இருந்து வெளியேறியுள்ளது.இதைவிட இலங்கையின் சிவில் நிர்வாக செயற்பாடுகளில் இராணுவம் நேரடியாக களம் இறக்கப்பட்டுள்ளது. அதற்கான அதிகாரத்தை கோட்டபாய அரசாங்கம் இராணுவத்திற்கு சட்ட ரீதியாக வழங்கியுள்ளது. இதன் அடிப்படையில் போக்குவரத்து பொலீஸார் முதல் வேலைவாய்ப்புக்கான நேர்காணல் வரை அனைத்து நடவடிக்கைகளிலும் இராணுவத்தினர் ஈடுபட்டு வருகின்றனர்.

இந்நிலையில் கிழக்கு மாகாணத்தில் மகிந்த ராஜபக்ச ஆட்சியில் செயற்பட்ட ஆயுதக் குழுக்கள், அதாவது இன்று வரை இராணுவ ஒட்டுக் குழுக்களாக செயற்பட்டு வந்து, இலங்கை அரசிடம் சம்பளம் பெற்று வந்த குழுக்கள் மீண்டும் செயற்படத் தொடங்கியுள்ளன. அவர்களது முதலாவது இலக்கு ஊடகவியலாளர்களே.
அதுவும் தமிழர்களின் உரிமைப் போராட்டம், அவர்களுக்கு எதிராக நடத்தப்படும் அடக்குமுறைகள், மண்பறிப்பு, அதிகார துஸ்ப்பிரயோகம், ஊழல் நடவடிக்கைகள், ஆயுதக் குழுக்களின் செயற்பாடுகள் என்பன தொடர்பில் செய்திகளையும் கட்டுரைகளையும் எழுதி வந்த மட்டக்களப்பு ஊடகவியலாளர்கள் இன்று அரச மற்றும் ஆயுதக் குழுக்களினால் இலக்கு வைக்கப்பட்டுள்ளனர் .

அத்துடன் இவ்வூடகவியலாளர்கள், ஊடக சுதந்திரம் மற்றும் இலங்கையில் படுகொலை செய்யப்பட்ட ஊடகவியலாளர்கள், காணாமல் போன ஊடகவியலாளர்களுக்காக ஆர்ப்பாட்டங்கள், போராட்டங்களை நடத்துவது தொடர்பிலும் அவர்கள் அச்சுறுத்தல்களை எதிர் நோக்க வேண்டியவர்களாக உள்ளனர். கடந்த காலங்களில் மறைமுகமாக செயற்பட்டு வந்த இந்த குழுக்கள் தற்போது நேரடியாக களத்தில் இறங்கி செயற்பட ஆரம்பித்துள்ளன.

சில ஊடகவியலாளர்கள் மீது தொடர்ச்சியாக பொலீஸ் விசாரணை மற்றும் புலனாய்வுத் துறையின் விசாரணைகள் நடத்தப்பட்டன. அவர்களுக்கு எதிராக பயங்கரவாத பிரிவு மற்றும் சில புலனாய்வு அதிகாரிகள் ஊடாக பல பொய்யான தகவல்களை உள்ளடக்கிய கோவைகள் பல தடவைகள் அனுப்பப்பட்டுள்ளன.
இதன் காரணமாக சிலர் கொழும்பில் உள்ள பயங்கரவாத விசாரணை பிரிவினரால் விசாரணைகளுக்கு உட்படுத்தப்பட்டிருந்தனர்.

அதுமட்டுமின்றி அதனை தொடர்ந்து ஊடகவியலாளர்கள் புலனாய்வுத்துறை அதிகாரிகளால் பின்தொடரப்பட்டதுடன், ஊடகவியலாளர்களின் விபரங்களை சில புலனாய்வு அதிகாரிகள் மறைமுகமாகவும் சில அரச அதிகாரிகள் ஊடாகவும் திரட்டி வருகின்றனர் .

அத்துடன் சில ஊடகவியலாளர்கள் புலிகளுடன் தொடர்பை வைத்துள்ளார்கள் என்று கூறி அவர்களது வங்கி கணக்கு உட்பட வாழ்வாதாரம் வரை அலசி ஆராய்ந்து கொழும்பிற்கு தகவல்களை அனுப்பி இருந்தனர்.இதன் தொடர்ச்சியாகவே அண்மையில் மட்டு ஊடக அமையத்திற்குள் சில ஊடகவியலாளர்களுக்கு எதிராக மரண அச்சுறுத்தல் விடுக்கப்பட்ட துண்டு பிரசுரங்கள் போடப்பட்டிருந்தன.

ஆனால் இது குறித்து பெரிதும் அலட்டிக் கொள்ளாத பாதுகாப்பு தரப்பு இதனை எடுத்த எடுப்பிலேயே வெளிநாடு செல்வதற்கு திட்டமிட்டு செய்யப்பட்ட செயல் என்று சிலரூடாக பொய்ப் பரப்புரைகளை பரப்பி வந்துடன், அச்சுறுத்தல்களுக்கு உள்ளான ஊடகவியலாளர்களின் பாதுகாப்பு குறித்து கவனம் செலுத்தவே இல்லை.
சம்பவத்தை நீர்த்துப்போகச் செய்தல் அல்லது திசை திருப்ப செய்தல் இதை தற்போது இலங்கையில் ஒரு உத்தியாகவே சில குழுக்களை வைத்து அரசாங்கம் கையாண்டு வருகின்றது.

பயங்கரவாத விசாரணைக்கு சென்று வந்தால் கூட அதனை வெளிநாடு போவதற்கு பயங்கரவாத விசாரணைக்கு சென்று வந்துள்ளார்கள் என்று கூறும் அளவுக்கு நிலமை மோசமாக உள்ளது. அதனை நம்பும் ஒரு கூட்டமும் உண்டு.இதைவிட இது போன்ற சம்பவங்களினால் இலங்கை அரசுக்கு சர்வதேச ரீதியில் அபகீர்த்தி ஏற்படும் என்பதற்காகவும் அவ்வாறு ஏற்படாது இருப்பதற்காக இது போன்ற சம்பவங்களை மூடி மறைத்து பூசி மெழுகும் தரப்புக்களும் உண்டு.

இதனால் உண்மையாக பாதிக்கப்படும், உயிர் அச்சுறுத்தலை எதிர் கொள்ளும் ஊடகவியலாளர்கள், மனித உரிமை செயற்பாட்டாளர்கள் மிகுந்த மன அழுத்தத்திற்கும், மன உளைச்சலுக்கும் ஆளாகின்றனர்.மட்டக்களப்பு மாவட்டத்தில் தங்களது ஊழல் செயற்பாடுகளுக்கு எதிராக செய்திகளை வெளியிடும் ஊடகவியலாளர்களை முடக்க வேண்டிய தேவை சில குழுக்களுக்கு ஏற்பட்டுள்ளது.

இந்தக் குழுக்களில் ஊழல் செய்த உயர் அரச அதிகாரிகள் முதல் காணி மோசடி செய்பவர்கள், முன்னாள் ஆயுத குழுக்கள், சில அரசியல்வாதிகள் மற்றும் ஊடகவியலாளர்கள் என்ற போர்வையில் இயங்கும் சில அரச புலனாய்வாளர்கள், சில வெளிநாட்டு உளவு முகவர்கள் என பலரும் உள்ளனர்.

இவர்கள் தற்போதைய அரசாங்கத்தில் உள்ள செல்வாக்கை பயன்படுத்தி உண்மைகளை வெளிப்படுத்தும் ஊடகவியலாளர்களை அச்சுறுத்தி முடக்கி அவர்களை ஊடக செயற்பாடுகளில் இருந்து இல்லாமல் செய்ய வேண்டும் என்ற நோக்கத்துடன் செயற்பட்டு வருகின்றனர்.

அதற்காக பல்வேறு வழிகளில் முயன்று வருகின்றனர். கடந்த காலங்களில் மறைமுகமாக செயற்பட்டு வந்த இந்த நபர்கள் தற்போது நேரடியாக செயற்பட ஆரம்பித்துள்ளனர்.

சில ஊடகவியலாளர்கள் மீது பல விசாரணைகள் மற்றும் நீதிமன்ற வழக்குகள் ஊடாக அச்சுறுத்தியும் அதனால் குறித்த ஊடகவியலாளர்களின் செயற்பாடுகளை முடக்க முடியவில்லை என்பதற்காக தற்போது மரண அச்சுறுத்தல் விடுக்கப்பட்ட துண்டுப் பிரசுரங்களை வீசி குடும்ப அங்கத்தவர்களை உளவியல் ரீதியாக அச்சுறுத்தி குடும்ப உறுப்பினர்கள் ஊடாக குறித்த ஊடகவியலாளர்களை முடக்கும் வகையில் திட்டமிட்டு செயற்பட்டு வருவதாக பாதிக்கப்பட்ட ஊடகவியலாளர்கள் தெரிவித்துள்ளனர்.

சென்ற வாரம் கூட ஊடகவியலாளர் ஒருவரின் வீட்டிற்கு சென்ற புலனாய்வுத்துறை அதிகாரிகள் அவரை விசாரணை செய்ய வேண்டும் என்று தேடியுள்ளனர். இவ்வாறு புலனாய்வுத்துறை அதிகாரிகளை பல தடவைகள் ஏவிவிட்டும் ஊடகவியலாளர்களை அச்சுறுத்துகின்றனர்.

ஏற்கனவே ஊடகவியலாளர் நடேசன், ஊடகப் பணியாளர்கள் கண்ணமுத்து அரசகுமார் மற்றும் கிருஷ்ணபிள்ளை யோகாகுமார் இங்கு படுகொலை செய்யப்பட்டனர். அதேவகையில் எதிர்வரும் காலத்தில் இந்த கொலைக் குழுக்களால் இங்கு ஊடகவியலாளர்கள் கொல்லப்பட்டாலும் ஆச்சரியப்படுவதற்கில்லை.

ஐ.நா தீர்மானத்தில் இருந்து தாம் விலகுவதாக சிறீலங்கா அரசு தெரிவித்துள்ளது. ஜெனீவாவில் இடம்பெறும் ஐ.நா மனித உரிமைகள் ஆணைக்குழுவின் கூட்டத்தொடரிலேயே சிறீலங்கா தனது முடிவை தெரிவித்துள்ளது.

சிறீலங்காவில் தற்போது ஆட்சியில் உள்ள அரசின் தலைவர் கோத்தபாயா ராஜபக்சா உட்பட பெருமளவான படைத் தளபதிகளும், படையினரும் போரின் போது தமிழ் மக்களுக்கு எதிரான போர்க்குற்றங்களை மேற்கொண்டவர்களே.

எனவே ஐக்கிய நாடுகள் சபை ஊடாக அமெரிக்கா கொண்டுவந்த தீர்மானம் தொடருமாக இருந்தால் சிறீலங்கா அரசு மேற்குலகத்தின் நிகழ்ச்சி நிரலுக்குள் செல்ல வேண்டும் அல்லது போர்க்குற்ற விசாரணைகளை சந்திக்க வேண்டும்.

ரணில் விக்கிரமசிங்கா தலைமையிலான முன்னைய அரசு மேற்குலகம் சார்பான போக்கை கொண்டிருந்தாலும், சிறீலங்காவில் ஏற்படும் அரசியல் மாற்றம் தமது வியூகங்களில் பின்னடைவை ஏற்படுத்தலாம் எனக் கணித்த அமெரிக்க அவர்களின் ஊடாக மனித உரிமைகள் ஆணைக்குழுவில் தீர்மானம் 30/1 ஜ கொண்டு வந்திருந்தது. அதன் பின்னர் தனது நடவடிக்கையை முன்னெடுப்பதில் அமெரிக்கா பின்வாங்கியது போல நடித்தாலும், தனக்கு சார்பான நாடுகளான பிரித்தானியா, மசடோனியா, மொன்ரோநிக்ரோ, ஜெர்மனி மற்றும் கனடா ஊடாக இந்த தீர்மானத்தை பலப்படுத்தியிருந்தது.

ஒருபுறம் தீமானம் கொண்டுவரப்பட்டபோதும், மறுபுறம் மிலேனியம் சலஞ் என்ற படைத்துறை உடன்பாட்டை சிறீலங்கா அரசின் முன்வைத்திருந்தது. இந்த உடன்பாடு தொடர்பில் ரணில் அரசு மென்போக்கையே கடைப்பிடித்திருந்தது. ஆனால் உடன்பாட்டின் மூலம் திருமலை தொடக்கம் கொழும்பு வரையிலான 7 மாவட்டங்கள் அமெரிக்கா படையினர் வசம் செல்லும் என்பதை அறிந்த இந்தியா விழித்துக் கொண்டது.

சிறீலங்காவில் ஒரு ஆட்சிமாற்றத்தை இந்தியா கொண்டுவந்து. அமெரிக்காவின் உடன்பாட்டை முறியடிக்க இந்திய வகுத்த வியூகம் தான் கோத்தபாயாவின் அரசியல் வெற்றி.தேர்தலுக்கு முன்னர் தனது உடன்பாட்டை நிறைவு செய்ய அமெரிக்கா முனைந்தபோதும், பௌத்த துறவிகளை ஏவிவிட்ட எதிர்த்தரப்பு அதனை முறியடித்திருந்தது

தனது திட்டம் தோல்வியடையும் எனக் கணிப்பிட்ட அமெரிக்கா தனது இரண்டாவது திட்டத்தை கையில் எடுத்துள்ளது. அதுவே மனித உரிமைகள் அமைப்பில் தற்போது எதிரொலிக்கின்றது.

சிறீலங்கா அரசு தீhமானத்தில் இருந்து வெளியேறியதை ஐ.நா மனித உரிமைகள் அமைப்பின் ஆணையாளர் நேரிடையாக விமர்சித்துள்ளார், இணை அனுசரணை நாடுகள் அதற்கு எதிராக கொதித்து எழுந்துள்ளன. சிறீலங்கா வெளியேறினாலும் தாம் அதில் இருந்து வெளியேறப்போவதில்லை என மிரட்டியுள்ளன.

அனைத்துலக மனித உரிமை அமைப்புக்களும் தற்போது தீவிரமாக செயற்படுகின்றன. சிறீலங்கா அரசு மேற்கொண்ட போர்க்குற்றங்கள் தொடர்பில் அனைத்துலக விசாரணைகள் மேற்கொள்ளப்பட வேண்டும் என கோரிக்கை விடுத்துள்ளது அனைத்துலக மன்னிப்புச் சபை.

படையினருக்கு வழங்கப்படும் இராஜதந்திர பதவிகள் மூலம் அவர்களுக்கு போர்க்குற்ற விசாரணைகளில் இருந்து விதிவிலக்கு பெறமுடியும் என நம்கின்றது சிறீலங்கா அரசு எனவே தான் பல படையினருக்கு பொது அதிகாரம் வழங்கப்படுகின்றது. ஆனால் சிறீலங்கா இராணுவத்தளபதி லெப். ஜெனரல் சவீந்திர சில்வா மீது அமெரிக்கா கொண்டுவந்த பயணத்தடை, சிறீலங்கா படை அதிகாரிகளின் உளவியலை சிதைத்துள்ளதாக தெரிவிக்கின்றார் கொழும்பைத் தளமாகக் கொண்ட இராஜதந்திரி ஒருவர்.

சிறீலங்கா மீது பொருளாதாரத் தடை கொண்டுவரப்படலாம் என சிறீலங்கா அரசு அச்சம் அடைகின்றது. அதன் வெளிப்பாடே தம்மீது கொண்டுவரப்படும் பொருளாதாரத் தடைக்கு எதிராக தமது நட்பு நாடுகளான சீனா மற்றும், ரஸ்யா வீட்டோ அதிகாரத்தை பயன்படுத்தும் என சிறீலங்காவின் அமைச்சர் கேகலியா ரம்புக்வெல தெரிவித்துள்ளார்.

அது மட்டுமல்லாது, ஐ.நா பொதுச்சபையில் தீர்மானம் கொண்டுவரப்பட்டால் சீனா தலைமையில் ஆபிரிக்க, ஆசிய நாடுகளையும், இந்தியா தலைமையில் ஆசிய நாடுகளையும் மற்றும் அரபு நாடுகளையும் ஒருங்கிணைத்து அதனை முறியடிக்கலாம் என நம்புகின்றது சிறீலங்கா அரசு.

அதேசமயம் இந்த வாரம் அமெரிக்காவின் மிலேனியம் சலஞ் உடன்பாட்டை சிறீலங்கா அமைச்சரவை நிராகரித்துள்ளது. இது அமெரிக்காவின் திட்டத்திற்கு விழுந்த பலத்த அடியாகும். ஆனால் தாம் சிறீலங்கா அரசின் முடிவுக்கு காத்திருப்பதாக அமெரிக்கா தூதரகம் தெரிவித்துள்ளது.

தமது உடன்பாடு 480 மில்லியன் டொலர்களை கொண்டது எனவும், அதனால் 11 மில்லியன் சிறீலங்கா மக்கள் பயனடைவார்கள் எனவும், சிறீலங்கா மக்களின் காணிகள் அவர்களுக்கு சொந்தமாக வழங்கப்படும் எனவும் அமெரிக்கா தெரிவித்துள்ளது.

இந்த நிலையில் சிறீலங்காவின் பொருளாதாரமும், பாரிய பின்னடைவைச் சந்தித்துள்ளது. சிறீலங்காவுக்கு வழங்கப்படும் நிதி தொடர்பில் பொதுத்தேர்தல் நிறைவடைந்த பின்னரே முடிவெடுக்கப்படும் என அனைத்துலக நாணய நிதியத்தின் தொடர்பாளர் ஜெரி ரைஸ் தெரிவித்துள்ளார். அவர்கள் தமது நிதி வழங்கல் தொடர்பில் புதிய நிபந்தனைகளை விதிப்பதற்கே காத்திருப்பதாக அவதானிகள் தெரிவித்துள்ளனர்.

இதனிடையே, தாம் மிகப்பெரும் பொருளாதார நெருக்கடியை எதிர்கொண்டுள்ளதாக சிறீலங்காவின் நிதி அமைச்சர் தெரிவித்துள்ளார். 2015 ஆம் பெறப்பட்ட கடன்களின் விதிவிலக்கு காலம் 2025 ஆம் ஆண்டு நிறைவடைவதால் சிறீலங்கா மிகப்பெரும் பொருளாதார நெருக்கடிகளை எதிர்நோக்கியுள்ளதாக அவர் தெரிவித்துள்ளார்.

2005 ஆம் ஆண்டு 2 றில்லியன் ரூபாய்களாக இருந்த கடன் தொகை 2005 -2010 களில் ஏற்பட்ட போர் மற்றும் பொருளாதார நெருக்கடியால் அது 7 றில்லியனாக உயர்ந்துள்ளது. அதாவது மகிந்தா அரசு 5 றில்லியன்களை கடனாக பெற்றுள்ளது.

எனினும் அதன் பின்னர் வந்த அரசு எந்த அபிவிருத்தியும் செய்யாத போதும், கடன்சுமை அதிகரித்து 13 றில்லியன்களாக தற்போது உயர்ந்துள்ளது. இந்த நிலையில் கடந்த வருடம் ஏப்பிரலில் இடம்பெற்ற தாக்குதல் சிறீலங்காவின் பொருளதாரத்தை மேலும் சிதைத்துள்ளது, அதாவது இந்த தாக்குதலின் பின்னர் ஏற்பட்ட பொருளாதார இழப்பு இரண்டு மிலேனியம் சலஞ் உடன்பாட்டு நிதிக்கு இணையானது.

ஒருபுறம் பொருளாதார அழுத்தம், மறுபுறம் மேற்குலகத்தின் அரசியல் அழுத்தம் சிறீலங்கா இதனை எவ்வாறு எதிர்கொள்ளப்போகின்றது என்பது ஒருபுறம் இருக்க இந்த நெருக்கடிகளை ஏனைய இனங்கள் தமக்கு சாதகமாக பயன்படுத்த என்ன நகர்வுகளை மேற்கொள்ளப்போகின்றன என்பது தான் தற்போது பலரதும் எதிர்பார்ப்பாக உள்ளது.