தியாகி திலீபனின் நினைவேந்தலை அனுஷ்டிக்கும் முகமாக தமிழ்த் தேசிய மக்கள் முன்னணியினால் நடத்தப்பட்டு வரும் தியாகி திலீபன் நினைவு ஊர்திப் பயணமானது இன்றைய தினம் (15) திருக்கோவில் பிரதேசத்தில் ஆரம்பமாகியுள்ளது.

தமிழ்த் தேசிய மக்கள் முன்னணியின் அம்பாறை மாவட்ட அமைப்பாளர் துசானந்தன் தலைமையில் இடம்பெற்ற குறித்த ஊர்திப் பயண ஆரம்ப நிகழ்வில் தமிழ்த் தேசிய மக்கள் முன்னணியின் செயலாளரும் முன்னாள் பாராளுமன்ற உறுப்பினருமான செல்வராஜா கஜேந்திரன் உள்ளிட்ட கட்சியின் பிரதிநிதிகள்,மக்கள் கலந்து கொண்டனர்.

திலீபனின் திருவுருவப்படத்திற்கும் மலர்மாலை அணிவிக்கப்பட்டு அஞ்சலி செலுத்தப்பட்ட பின்னர் திலீபனின் திருவுருவப் படம் தாங்கிய வாகனம் தன் பயணத்தை ஆரம்பித்துள்ளது.

இந்த ஊர்தியானது மட்டக்களப்பு மாவட்டத்தை நோக்கி நகரவுள்ளதுடன் வடக்கு, கிழக்கில் உள்ள அனைத்து மாவட்டங்களிலும் பயணம் மேற்கொண்டு இறுதியாக திலீபனின் நினைவேந்தல் தினத்தன்று யாழ். நல்லூரில் அமைந்துள்ள திலீபனின் நினைவிடத்தில் பயணத்தை நிறைவு செய்யவுள்ளமை குறிப்பிடத்தக்கது.

இலங்கை அடுத்த இரண்டு ஆண்டுகளுக்கு ஐக்கியநாடுகள் மனித உரிமைகள் ஆணையாளர் அலுவலகத்தின் மேற்பார்வையின் கீழ் இருக்கும் வகையில் வரைவுத்தீர்மானம் சமர்ப்பிக்கப்படவுள்ளது.

மாகாணசபைத் தேர்தல் முறைமையை மாற்றும் சட்டம் நிறைவேற்றப்பட்டிருந்தா லும், எல்லை நிர்ணய அறிக்கை நாடா ளுமன்றத்தால் நிராகரிக்கப்பட்டுள்ளது. அதனால் பழைய முறைமையின் கீழ் மாகாணசபைத் தேர்தலை நடத்துவதற்கும், அதற்குரிய சட்டத்திருத்தங்களை மேற்கொள்வதற்கும் அரசாங்கம் நடவடிக்கை எடுக்கவுள்ளது என்றும் தெரியவருகின்றது.

2026 ஆம் ஆண்டுக்கான வரவு செலவுத்திட்ட கூட்டத்தொடர் எதிர்வரும் நவம்பர் மாதம் 7 ஆம் திகதி ஆரம்பமாகின்றது. டிசெம்பர் மாத இறுதியில் பாதீட்டு கூட்டத்தொடர் முடிவடையும். அதன்பின்னர் மாகாணசபைத் தேர்தல் தொடர்பான சட்டத்திருத்தம் நிறைவேற்றப்படலாம் என எதிர்பார்க்கப்படுகின்றது.

சிலவேளை மார்ச் மாதத்துக்குள் தேர்தலை நடத்துவதற்கு ஏதேனும் சிக்கல்கள் இருப்பினர் தமிழ்- சிங்கள புத்தாண்டு முடிவடைந்த பின்னர் ஜூன் மாதம் தேர்தல் நடத்தப்படலாம் எனவும் தகவல் வெளியாகியுள்ளது. இதேவேளை, மாகாணசபைத் தேர்தலை இலங்கை விரைவில் நடத்தவேண்டும் என இந்தியா வலியுறுத்தியுள்ளது. ஐ.நா.மனித உரிமைகள் பேரவைக் கூட்டத்தொடரிலும் இது தொடர்பான வலியுறுத்தல் விடுக்கப்பட்டுள்ளது.

விளையாட்டு அமைச்சுக்காக வரியின்றி இறக்குமதி செய்யப்பட்ட பேருந்து, ஷிரந்தி ராஜபக்ஷவுக்கு சொந்தமான கார்ல்டன் பாலர் பாடசாலைக்கு வழங்கப்பட்டதாக எழுந்த குற்றச்சாட்டுகள் தொடர்பாக விசாரணை நடத்தப்படவுள்ளது.

இந்த பரிவர்த்தனையால் அரசாங்கத்திற்கு நிதி இழப்பு ஏற்பட்டுள்ளதற்கான கிடைத்த ஆதாரங்களின் அடிப்படையில், குற்றப் புலனாய்வு திணைக்களத்தின் நிதிக் குற்றப் புலனாய்வுப் பிரிவு, சம்பவம் தொடர்பான விசாரணைகளை மீண்டும் தொடங்கியுள்ளது.

இது தொடர்பாக ஜனாதிபதி செயலகத்தின் முன்னாள் செயலாளர் ஒருவரிடமும் விசாரணை நடத்த திட்டமிடப்பட்டுள்ளதாக தெரிவிக்கப்படுகிறது.

ஷிரந்தி ராஜபக்ஷவின் தலைமையில் செயல்படுத்தப்பட்ட சிரிலிய திட்டம் தொடர்பான விசாரணைகள் முன்னர் கவனத்தை ஈர்த்திருந்தது. குறித்த பேருந்து பற்றிய புதிய தகவல்கள் வெளிவந்த நிலையில், புலனாய்வாளர்கள் மீண்டும் நீதிமன்றத்தில் தகவல்களை முன்வைத்துள்ளனர்.

அதற்கமைய, இது தொடர்பாக வாக்குமூலங்களை பதிவு செய்வதற்காக லலித் வீரதுங்கவையும் முன்னாள் கூடுதல் செயலாளரையும் வரவழைக்க குற்றப் புலனாய்வு திணைக்களத்திற்கு இப்போது உத்தரவுகள் கிடைத்துள்ளதாக கூறப்படுகிறது.

செம்மணி உட்பட வடக்கு, கிழக்கில் காணப்படும் மனித புதைகுழிகள் மற்றும் இடம்பெற்ற இனப்படுகொலைகளுக்கு சர்வதேச நீதி கோரி யாழ்ப்பாணத்தில் திங்கட்கிழமை (15) கையெழுத்துப் போராட்டம் முன்னெடுக்கப்பட்டது.

இந்த கையெழுத்துப் போராட்டம் மாற்றத்துக்கான இளையோர் குரல் அமைப்பினால் யாழ்ப்பாணம் மருதனார் மடம் பகுதியில் நடத்தப்பட்டது.

இதில் மாற்றத்திற்கான இளையோர் அமைப்பின் பிரதிநிதிகள், உறுப்பினர்கள், யாழ் மருதனார்மடம் வர்த்தகர்கள், சந்தை வியாபாரிகள், பொதுமக்கள் எனப் பலரும் கலந்துகொண்டனர்.

ஐந்து அம்சக் கோரிக்கைகளை முன்வைத்து நீராகாரமின்றி உண்ணாவிரதம் இருந்து உயிர்நீத்த “தியாக தீபம்” திலீபன் அவர்களின் 38வது நினைவு தின நிகழ்வுகள் இன்றைய தினம் திங்கட்கிழமை (15) யாழ்ப்பாணத்தில் ஆரம்பமானது.

யாழ்ப்பாணம், நல்லூர் பின்வீதியில் அமைந்துள்ள திலீபனின் நினைவிடத்தில், அவர் உண்ணாவிரதத்தை ஆரம்பித்த நேரமான காலை 9.45 மணியளவில் அஞ்சலி நிகழ்வுகள் ஆரம்பமாயின.

இந்த நினைவேந்தலின்போது பொதுச் சுடர் ஏற்றப்பட்டதைத் தொடர்ந்து, திலீபனின் திருவுருவப் படத்துக்கு மலர்மாலை அணிவித்து, மலர் தூவி அஞ்சலி செலுத்தப்பட்டது.

திலீபன் முன்வைத்த கோரிக்கைகளான

1) மீளக்குடியமர்தல் என்ற பெயரில் இலங்கைத் தீவின் வடக்கு, கிழக்கு மாகாணங்களில் புதிதாக திட்டமிடப்படும் குடியேற்றங்களைத் தடுத்து நிறுத்தவேண்டும்.

2) சிறைக்கூடங்களிலும் இராணுவ பொலிஸ் தடுப்பு முகாம்களிலும் தடுத்துவைக்கப்பட்டுள்ள தமிழ் அரசியல் கைதிகள் யாவரும் விடுதலை செய்யப்படவேண்டும்.

3) அவசரகாலச் சட்டம் முழுமையாக நீக்கப்பட வேண்டும்.

4) ஊர்காவல் படையினருக்கு வழங்கப்பட்ட ஆயுதங்கள் முற்றாகக் களையப்படவேண்டும்.

5) தமிழர் பிரதேசங்களில் புதிதாக பொலிஸ் நிலையங்களைத் திறப்பதற்கு மேற்கொள்ளப்படும் நடவடிக்கைகள் முற்றாக நிறுத்தப்பட வேண்டும் ஆகிய ஐந்து கோரிக்கைகளை முன்வைத்து நீராகாரமின்றி 12 நாட்கள் உண்ணாவிரதம் இருந்து திலீபன் உயிர்நீத்தமை குறிப்பிடத்தக்கது.

பெருந்தோட்ட மக்களின் காணி உரிமை உட்பட  அடிப்படை உரிமைகளை பாதுகாக்க  தேசிய மக்கள் சக்தி அரசு நடவடிக்கை எடுக்கும் என தான் நம்புவதாக தேசிய மக்கள் சக்தியின் தேசிய செயற்பாட்டு குழு உறுப்பினரும்,  பெருந்தோட்ட சமூக உட்கட்டமைப்பு பிரதி அமைச்சரின் பிரத்தியேக செயலாளரும், ஆலோசகருமான கலாநிதி பி.பி. சிவப்பிரகாசம் தெரிவித்தார்.

கண்டி, ஹந்தான தோட்டத்திற்கு ஞாயிற்றுக்கிழமை (14) விஜயம் செய்த அவர், அங்கு கூடியிருந்த இளைஞர்களுக்கு மத்தியில் உரையாற்றும் போதே அவர் இதனைத் தெரவித்தார்.

அப்பகுதியில் உள்ள  விளையாட்டு மைதானம், மற்றும் மயானம் போன்றவற்றுக்கு பிரச்சினைகள் ஏட்பட்டு வருவதாக,  ஹந்தான தோட்டம் மூன்றாம் கட்டை தொழிற்சாலை பிரிவில் உள்ள இளைஞர்கள்  சிவப்பிரகாசம் அவர்களிடம் குறிப்பிட்ட  போதே அவர் இவ்வாறு தெரிவித்தார்.

மேற்படி இளைஞர்கள் அங்கு மேலும் தெரவிக்கையில்,

மலையக தோட்டப் பிரதேசங்களில் பல்வேறு தோட்டங்களிலும் குறிப்பாக அரச நிர்வகங்களால்  நிறுவகிக்கப்படுகின்ற பல தோட்டங்களில் இன்று காணி அபகரிப்பு   என்பது ஒரு மாபெரும் பிரச்சினையாக இருந்து வருகின்றது.

குறிப்பாக மக்கள் தோட்ட அபிவிருத்தி சபை அரச பெருந்தோட்ட யாக்கம் போன்ற தோட்டங்களிலே இந்த காணிய அபகரிப்பு அல்லது கையகப்படுத்தல் அரசியல் பின்புலத்தோடு கடந்த காலங்களில் நடைபெற்று வந்திருக்கின்றமை தெரிய வருகின்றது. இந்த நிலைமையே கண்டி மாவட்டத்தில் உள்ள பல தோட்டங்களில் காணப்படுகின்றது என்றனர்.

இதனை அடுத்து கலாநிதி பி.பி. சிவப்பிரகாசம் மேலும் தெரிவிக்கையில்,

இவ்வாறான கானிகள் வாங்குதல், அல்லது கையகப்படுத்தல் விடயத்தை கவனிக்கும்போது, தோட்டங்களில் வாழும் மக்கள் சிறுசிறு காணிகளை விவசாயம்,  வீடுகளை விரிவாக்க அல்லது வாழ்வாதார வசதிக்காக பயன்படுத்துவதில்  இடர் படுகின்றனர்.

ஆனால் அதே நேரம்  தோட்ட அபிவிருத்தி சபை தோட்டங்கள் மற்றும் அரசு பெருந்தோட்ட யாக்கத்திற்கு சொந்தமான தோட்டங்களில் காணிகள் வெளியார்களுக்கு பல ஏக்கர்கள் வழங்கப்பட்டுள்ளன.

இது எவ்வாறு எப்படி நடைபெற்றது என்பது கேள்விக்குறியாக இருக்கின்றது. இவ்வாறான அபிவிருத்தி திட்டங்களுக்கு வழங்கப்பட்டதாக குறிப்பிடப்பட்ட போதும், தேயிலை காணிகள் அழிக்கப்பட்டுள்ளன.

அதேபோல் மக்களுடைய பொதுத் தேவைகள், மயான வசதி, பாதைகள்,  விளையாட்டு மைதானம் என்பவற்றுக்கான உரிமைகள்  மறுக்கப்பட்டு வருகின்ற நிலைமையை அவதானிக்க கூடியதாக இருக்கின்றது.

இவ்வாறு வழங்கப்பட்ட அல்லது கையகப்படுத்தப்பட்ட காணிகளில் பல்வேறு அபிவிருத்தி திட்டங்கள், சுற்றுலா அபிவிருத்தி, விவசாயம் என்பவை நடைபெற்றாலும் கூட பல பெருந்தோட்டங்களில் வழங்கப்பட்ட, அல்லது கையகப்படுத்தப்பட்ட காணிகளில் எந்தவித அபிவிருத்தி செயல்பாடுகளும் செய்யப்படாமல் காணப்படுகின்றமை அவதானிக்க தக்கதாகும்.

இதேவேளை கடந்த அரசாங்க காலங்களில் அரசியல் செல்வாக்கை பயன்படுத்தி, மக்களை பயமுறுத்தி காணிகள் கையகப்படுத்தப்பட்டுள்ள நிலைமையையும் மக்கள் விஷனத்தோடு தெரிவிக்கின்றனர்.

இளைஞர்கள் விளையாட்டில் ஈடுபடுவதற்கான வாய்ப்புகளும் மட்டுப்படுத்தப்பட்டுள்ளன.  குறிப்பாக அரசுக்கு சொந்தமான பெருந்தோட்டங்களில் காணி சம்பந்தமான பல்வேறு குளறுபடிகளும் காணப்படுகின்றன.

இது பற்றி முறை பாடுகள் கிடைக்கின்றன. இவற்றை சீர்திருத்தி நாட்டின் பொருளாதாரத்தை விருத்தி செய்யவும், பெருந்தோட்டத்துறை உற்பத்தியை விருத்தி செய்யவும், பெருந்தோட்டத்திலே வாழுகின்ற மக்களுடைய உரிமைகளை நிலைநாட்டவும், அதேவேளை அரசியல் ரீதியாக காணிகள் சட்டத்துக்கு முரணாக வழங்கப்பட்டிருந்தால் அவை குறித்தும் தேசிய மக்கள் சக்தி அரசாங்கம் நடவடிக்கை எடுக்கும் என தான் பெரிதும்  நம்புவதாக கலாநிதி சிவப்பிரகாசம் குறிப்பிட்டார்.

ஐக்கிய நாடுகள் மனித உரிமைகள் பேரவையின் மீளாய்வு கூட்டத்தொடர் ஆரம்பிக்கப்பட்டுள்ள நிலையில், அதில் பங்கேற்பதற்காக நீதி அமைச்சின் சிறப்பு குழு ஜெனிவாவுக்கு செல்லவுள்ளது.

இந்த குழுவில் நீதி அமைச்சர் ஹர்ஷண நாணயக்கார மற்றும் பிரதி அமைச்சர் உட்பட நீதி அமைச்சின் அதிகாரிகள் சிலர் உள்ளடங்குவதாக வெளிவிவகார அமைச்சின் தகவல்களை மேற்கோள்காட்டி ஊடகம் ஒன்று செய்தி வெளியிட்டுள்ளது.

வெளிவிவகார அமைச்சர் விஜித ஹேரத் தலைமையிலான குழு ஜெனிவா சென்று, இலங்கையின் நிலைப்பாட்டை அறிவித்ததன் பின்னர் நாடு திரும்பியுள்ளது. ஐ.நா. உயர்ஸ்தானிகர் ஒரு உறுதியான சர்வதேச அழுத்தத்தை உருவாக்கும் அதே வேளையில், இலங்கை அரசு உள்நாட்டு நடவடிக்கைகளைச் சுட்டிக்காட்டி சர்வதேச சமூகத்தின் தலையீட்டைத் தவிர்க்க முயல்கிறது.

இந்த முயற்சிகளுக்கு மேலும் வலுசேர்க்கும் வகையிலேயே நீதி அமைச்சின் சிறப்பு குழு ஜெனிவா செல்கிறது.

பொது மக்கள் பாதுகாப்பு பிரதி அமைச்சர் அருண ஜயசேகர யுத்த குற்றங்களில் ஈடுபட்டாரா? என்பதை அறிவதற்கு அவரிடம் விசாரணைகளை முன்னெடுத்தாலே உண்மைகள் வெளிவரும் என்று ஈழமக்கள் புரட்சிகர விடுதலை முன்னணியின் தலைவர் சுரேஸ் பிரமச்சந்திரன் தெரிவித்துள்ளார்.

“இலங்கையில் எந்தவிதமான போர்க்குற்றங்களும் இடம்பெறவில்லை. போரின் போது நிகழக்கூடாத சில விடயங்கள் நடந்திருக்கலாம்” என பிரதி அமைச்சர் அருண ஜயசேகர ஊடகம் ஒன்றுக்கு வழங்கிய செவ்வியில் தெரிவித்திருந்தார்.

அதற்கு பதிலளிக்கும் போதே சுரேஷ் பிரேமச்சந்திரன் இவ்வாறு தெரிவித்துள்ளார். யுத்தக் குற்றங்கள் இலங்கையில் நடக்கவில்லை என கூறுவது ஒரு அப்பட்டமான பொய். செம்மணிப் புதைகுழி விவகாரம் என்பதுவே ஒரு யுத்தக் குற்றமாகும்.

அங்கு குழந்தைகள் முதல் பெரியவர்கள் வரை கொலை செய்யப்பட்டு புதைக்கப்பட்டிருக்கின்றார்கள் என்பதுவே ஒரு யுத்த குற்றம் என்றும் சுரேஷ் பிரேமச்சந்திரன் தெரிவித்துள்ளார். அதுபோல வடக்கிலும் கிழக்கிலும் பொதுமக்கள் பல நூற்றுக்கணக்கானோர் கொலை செய்யப்பட்டு புதைக்கப்பட்டிருக்கின்றார்கள்.

யுத்தத்தினுடைய இறுதி நாட்களில் பாதுகாப்பு வலயம் எனக் கூறிவிட்டு மக்களை அந்த பாதுகாப்பு இடத்திற்கு செல்லுங்கள் என கூறிவிட்டு அங்கு மோட்டார் குண்டு மூலம் தாக்கியும், வேறு பல்வேறு விதமான முறைகளில் தாக்கியும் அந்த மக்கள் கொல்லப்பட்டிருக்கின்றார்கள்.

இது சர்வதேச ரீதியாக எல்லோரும் ஏற்றுக் கொண்ட விடயம். அதுவே மிகவும் பாரதூரமான ஒரு யுத்த குற்றம் என்று அவர் தெரிவித்துள்ளார். பிரதி அமைச்சர் அருண ஜயசேகர முதலில் இராணுவத்தில் இருந்ததனால் அவர் யுத்த குற்றம் இடம்பெறவில்லை என்றுதான் கூறுவார். அவரைப் பொறுத்தவரை அவர் இராணுவத்தை பாதுகாக்க வேண்டும், முப்படையை பாதுகாக்க வேண்டும் என்ற நோக்கிலேயே உள்ளார்.

அவர் ஏற்கனவே இராணுவத்தில் இருந்ததனால் அவருக்கும் இப்படியான தொடர்புகள் இருக்குமோ இல்லையோ எமக்கு தெரியாது. ஆகவே அது குறித்து அவரிடம் முழுமையான விசாரணை செய்தால்தான் உண்மை வெளிப்படும் என்றும் சுரேஷ் பிரேமச்சந்திரன் தெரிவித்துள்ளார்

யுத்தக்குற்றம் புரிந்தவர்களே அந்த விசாரணையை செய்யக்கூடாது. அப்படி அவர்களே அந்த விசாரணையை செய்தால் நிச்சயமாக மக்களுக்கு நீதி கிட்டாது என்றும் ஈழ மக்கள் புரட்சிகர விடுதலை முன்னணியின் தலைவர் சுரேஷ் பிரேமச்சந்திரன் தெரிவித்துள்ளார்.