சர்வதேச நாணய நிதியத்துடன் இலங்கையின் பிணைப்பு அதிகரித்துவரும் பின்னணியில், பல சர்வதேச நாடுகளின் கவனம் இலங்கையின் பக்கம் திரும்பியுள்ளது. அதற்கமைய, அரசியல் மற்றும் பொருளாதார ரீதியிலான பல தொடர்புகளை மேம்படுத்துவதில், பல நட்பு நாடுகள் இலங்கையுடன் அண்மைய காலமாக, முனைப்புடன் செயற்பட்டு வருவதை அவதானிக்க முடிகிறது.

அந்த வகையில், கடந்த மாத இறுதியில் போலந்தின் வெளிவிவகார அமைச்சர், மூன்று நாள் விஜயம் மேற்கொண்டு இலங்கைக்கு வருகைத்தந்ததுடன், அவுஸ்திரேலியாவின் துணை பிரதமரும் விஜயம் மேற்கொண்டிருந்தார்.

இதனிடையே, கடந்த 11 ஆம் திகதி முதல் 13 ஆம் திகதி வரை ஜேர்மனிக்கான உத்தியோகபூர்வ விஜயத்தை மேற்கொண்டிருந்த ஜனாதிபதி அனுரகுமார திசாநாயக்க தலைமையிலான குழுவினர்   (15) காலை நாடு திரும்பினர்.

கடந்த 11 ஆம் திகதி ஜேர்மனிக்கான தமது முதலாவது உத்தியோகபூர்வ விஜயத்தை தொடங்கிய ஜனாதிபதி, இருதரப்பு அரசியல் சந்திப்புகள், வணிக வட்டமேசை மாநாடு மற்றும் ஜேர்மன் சுற்றுலாத் துறையுடனான சந்திப்புடன் வெற்றிகரமாக தமது விஜயத்தை நிறைவு செய்துள்ளதாக, வெளிவிவகார அமைச்சு தெரிவித்துள்ளது.

இந்தநிலையில், ஜனாதிபதி அனுரகுமார திசாநாயக்க நாடு திரும்பிய இன்றைய தினத்தில், சர்வதேச நாணய நிதியத்தின் முதன்மை பிரதி முகாமைத்துவ பணிப்பாளர் கீதா கோபிநாத் 2 நாள் உத்தியோகபூர்வ விஜயமாக இலங்கைக்கு வருகைத்தந்துள்ளார்.

இந்த விஜயத்தின் போது, நிதி அமைச்சும், இலங்கை மத்திய வங்கி மற்றும் சர்வதேச நாணய நிதியமும் இணைந்து நடத்தும் ‘இலங்கையின் மீட்புக்கான பாதை – கடன் மற்றும் நிர்வாகம்’ என்ற தலைப்பில் நாளை (16) இடம்பெறவுள்ள மாநாட்டில் கீதா கோபிநாத் விசேட அதிதியாக கலந்துக்கொள்ளவுள்ளார்.
இதேவேளை, இலங்கையின் அபிவிருத்தி குறித்து கவனம் செலுத்தும் சர்வதேசம் பொறுப்புகூறல் மற்றும் மனித உரிமை மீறல் விடயத்திலும் கவனம் செலுத்தி வருகிறது.

அதனடிப்படையில், எதிர்வரும் 23 ஆம் திகதி ஐக்கிய நாடுகள் மனித உரிமைகள் உயர்ஸ்தானிகர் வொல்கர் ரேக் இலங்கைக்கு வருகைத் தரவுள்ளதாக தகவல்கள் தெரிவிக்கின்றன. எதிர்வரும் 26 ஆம் திகதி வரை இலங்கையில் தங்கியிருக்கும் அவர் யாழ்ப்பாணம், திருகோணமலை மற்றும் கண்டிக்கு விஜயம் மேற்கொள்ளவுள்ளதாகவும் தெரிவிக்கப்பட்டுள்ளது.

கொழும்பில், அவர் ஜனாதிபதி அனுரகுமார திசாநாயக்க, பிரதமர் ஹரிணி அமரசூரிய, சில அமைச்சரவை அமைச்சர்கள் மற்றும் சிவில் சமூக குழுக்களை சந்திப்பார் எனவும் எதிர்பார்க்கப்படுகிறது. எதிர்வரும் செப்டம்பர் மாதம் நடைபெறவிருக்கும், ஐக்கிய நாடுகள் மனித உரிமைகள் பேரவை அமர்வுகளுக்கு முன்னர் அவரது இந்த விஜயம் அமைகின்றமை குறிப்பிடத்தக்கது.

ஜனநாயக தமிழ் தேசியக் கூட்டணியுடன் திருகோணமலை உள்ளூராட்சி சபைகளில் இணைந்து ஆட்சி அமைப்பது தொடர்பில் பேச்சுவார்த்தை நடத்தி வருவதாக இலங்கை தமிழரசுக் கட்சியின் பாராளுமன்ற உறுப்பினர் சண்முகம் குகதாசன் தெரிவித்துள்ளார்.

எனினும் இந்த விடயத்தில் இதுவரை இறுதி முடிவு எதுவும் எட்டப்படவில்லை என்று அவர் குறிப்பிட்டுள்ளார்.
ஜனநாயக தமிழ்த் தேசியக் கூட்டணியினர் திருகோணமலை மாநகர சபையில் தமக்கு துணை மாநகர முதல்வர் பதவி தரவேண்டும் எனக் கேட்டிருந்தார்கள்.

பட்டணமும் சூழலும் பிரதேச சபையில் இரண்டு ஆண்டுக்கு தவிசாளர் பதவி தரவேண்டும் எனக் கேட்டிருந்தார்கள்.அத்துடன், மூதூர் பிரதேச சபையில் இரண்டு ஆண்டுக்கு உப தவிசாளர் பதவி தரவேண்டும் எனவும் கோரியிருந்தனர்.

இவை அனைத்துக்கும் நாம் சம்மதம் தெரிவித்திருந்தோம் என்று பாராளுமன்ற உறுப்பினர் சண்முகம் குகதாசன் தெரிவித்துள்ளார்.இந்த விடயங்களை இறுதியாக கடந்த 5 ஆம் திகதி பாராளுமன்றத்தில் வைத்து செல்வம் அடைக்கலநாதனிடம் கூறியிருந்தேன்.அவர் என்னை 8 ஆம் திகதி திருகோணமலையில் சந்திப்பதாக கூறியிருந்தார்.

எனினும் அவர் சந்திக்கவில்லை.பலமுறை நான் அவரை தொலைபேசியில் தொடர்பு கொண்டேன் என்றும் பாராளுமன்ற உறுப்பினர் சண்முகம் குகதாசன் தெரிவித்துள்ளார். எனினும், விரைவில் அவர் என்னுடன் தொடர்பு கொள்வார் என்று நம்புகின்றேன் என இலங்கை தமிழரசுக் கட்சியின் பாராளுமன்ற உறுப்பினர் சண்முகம் குகதாசன் தெரிவித்துள்ளார்.

“மானம் ஒன்றே வாழ்வெனக் கூறி வழியில் நடந்தான் மாவீரன் அவன் போன வழியில் புயலேன எழுந்து போரில் வந்தார் புலி வீரர்…” என்ற புகழ்பெற்ற ஈழப் புரட்சிப்பாடலை எழுதிய கவிஞர் தமிழ் அறிஞர் பண்டிதர் வீ. பரந்தாமன் அவர்கள் காலமானார்.

கெரில்லாப் போர் விரகுகள் என்ற விடுதலைப் போராட்டம் சார்ந்த முக்கிய நூலையும் இவர் எழுதியுள்ளார். அத்துடன் மனிதரும் கடவுளும் மற்றும் வேர் – அடி வழித் தமிழ்ச் சொற்பிறப்பியற் சிற்றகரமுதலி முதலிய நூல்களையும் இவர் எழுதியுள்ளார்.

கடந்த காலங்களில் தமிழீழம் கோரிய முதல் இடமாக திகழ்ந்த வட்டுக்கோட்டையை திட்டமிட்டு அழிக்கும் செயற்பாடுகள் மேற்கொள்ளப்படுவதாக கலாநிதி சிதம்பரமோகன் ஆதங்கம் வெளியிட்டுள்ளார்.
வலிகாமம் மேற்கு பிரதேச செயலகத்தின் அபிவிருத்தி ஒருங்கிணைப்புக் குழு கூட்டத்தில் அவர் தமது விசனத்தை வெளிப்படுத்தியுள்ளார்.

அங்கு தொடர்ந்தும் கருத்துவெளியிட்ட அவர், சங்கானையை நகரசபையாக தரம் உயர்த்துமாறும், வட்டுக்கோட்டையை பிரதேச சபையாக மாற்றுமாறும் கோரிக்கை விடுத்துள்ளார்.
‘தமிழீழம் கேட்ட வட்டுக்கோட்டையில், தந்தை செல்வா காலம் தொடக்கம் இன்று வரை பொது மலசலம்கூட இல்லை’. ‘ஒரு காவல்நிலையம் மட்டும் உள்ளது’.எனவே, திட்டமிட்டு வட்டுக்கோட்டை அழிக்கப்படுகின்றதா? என்றும் கலாநிதி சிதம்பரமோகன் கேள்வி எழுப்பியிருந்தார். இந்த விடயம் தொடர்பில் அவதானம் செலுத்தப்படும் என அரச அதிகாரிகள் இதன்போது பதிலளித்திருந்தனர்.

யாழ்ப்பாணம் – காங்கேசன்துறை பொலிஸ் நிலையத்துக்கு கிடைத்த அநாமதேய தொலைபேசி அழைப்பு குறித்து விசாரணைகள் முன்னெடுக்கப்பட்டுள்ளதாக பொலிஸ் ஊடகப்பிரிவு தெரிவித்துள்ளது.

வட மாகாணத்திலுள்ள சுமார் 10 பொலிஸ் நிலையங்களை இலக்கு வைத்து தாக்குதல் நடத்தப்படவுள்ளதாக இந்த தொலைபேசி அழைப்பின் போது எச்சரிக்கப்பட்டதாக பொலிஸ் தெரிவித்துள்ளது.
கடந்த 11 ஆம் திகதி பிற்பகல் இந்த தொலைபேசி அழைப்பு கிடைத்துள்ளதாக பொலிஸ் ஊடகப்பிரிவு தெரிவித்துள்ளது.

இந்த அநாமதேய தொலைபேசி அழைப்பு குறித்து பொலிஸ் விசாரணைகள் மேற்கொள்ளப்படுகின்றன.
அத்துடன், நீதிமன்றத்துக்கும் சமர்ப்பணங்களை முன்வைத்துள்ளதாக பொலிஸ் தெரிவித்துள்ளது.
இதனிடையே வட மாகாணம் முழுவதும் உள்ள பொலிஸ் நிலையங்களின் பாதுகாப்பை உறுதிசெய்வதற்கு நடவடிக்கை எடுக்கப்பட்டுள்ளதாகவும் பொலிஸ் ஊடகப் பிரிவு தெரிவித்துள்ளது.

தமிழ்த் தேசியப் பரப்பில் இருந்து ஓரங்கப்பட்ட – துரோகியென முத்திரைக்குத்தப்பட்ட தரப்புடன், அதிகாரத்துக்காக கூட்டு சேர்வது சாக்கடை அரசியலாகும் என்று கடற்றொழில் அமைச்சர் இராமலிங்கம் சந்திரசேகர் தெரிவித்துள்ளார்.

அப்படியான அரசியலை முன்னெடுக்கும் தரப்பின் முகத்திரை தற்போது கிழிந்துவிட்டது என்றும் அவர் குறிப்பிட்டுள்ளார். யாழ். சாவக்கச்சேரியில் இன்று (14) நடைபெற்ற ஊடக சந்திப்பின்போதே அவர் இவ்வாறு கூறினார்.

நாடு தழுவிய ரீதியில் உள்ளூராட்சி சபைகளில் அமைக்கப்பட்டு வருகின்றது. வடக்கிலும் இதற்குரிய நடவடிக்கை இடம்பெறுகின்றது. தெற்கில் கடைபிடித்த அணுகுமுறையை நாம் வடகிழக்கில் கடைபிடிக்கவில்லை. இங்கு நடுநிலை வகித்தோம் என்று கடற்றொழில் அமைச்சர் இராமலிங்கம் சந்திரசேகர் தெரிவித்துள்ளார்.

‘நாம் வாக்கெடுப்பில் பங்கேற்றிருந்தால் இங்குள்ள தமிழ்க் கட்சிகளின் கனவு சிதைக்கப்படும். மனக்கோட்டை,  மண்கோட்டையாக மாறிவிடும் என்பதை சொல்லி வைக்க விரும்புகின்றோம்’.
‘இங்கு யார் ஆட்சி செய்தாலும் அந்த ஆட்சிக்கு நாம் உதவியாக இருப்போம்’.

உள்ளூராட்சி சபைகள் ஊடாக மக்களுக்கு கிடைக்கப்பெறும் சேவைகள் சரியாக சென்றடைய வேண்டும். அதற்காக எமது உறுப்பினர்கள் தீவிரமாக செயற்படுவார்கள் என்றும் அவர் கூறியுள்ளார். ‘மக்களை ஏமாற்றும் அரசியலை நாம் முன்னெடுக்கவில்லை. சாக்கடை அரசியல் செய்யவும் தயாரில்லை. அவ்வாறு செய்ய நினைத்திருந்தால் யாழ். மாநகரில் இன்று வேறொரு நபரே மேயராக வந்திருக்கக்கூடும்’
‘கடந்த காலங்கள் முழுவதும் தமிழ்த் தேசியப் பரப்பில் இருந்து ஓரங்கட்டப்பட்ட – துரோகிகள் என முத்திரை குத்தப்பட்ட – ராஜபக்சக்களின் அடிவருடி எனக் கூறப்பட்டவர்களுடன் கூட்டு சேரும் நிலைமை காணப்படுகின்றது.

இதனை மக்களும் இன்று புரிந்துகொண்டுள்ளனர்’ என்று கடற்றொழில் அமைச்சர் இராமலிங்கம் சந்திரசேகர் தெரிவித்துள்ளார்.மக்கள் தேவைகளைப் பூர்த்தி செய்துகொள்வதற்காக அல்ல, தமது காவாலித்தனமான அரசியலை தக்கவைத்துக்கொள்வதற்காகவே இவர்கள் இவ்வாறு ஆட்சியமைக்கின்றனர்.
கடந்த காலங்களில் ஒருவரையொருவர் எப்படி விமர்சித்துக்கொண்டனர். ஆனால் வெட்கம் இல்லாமல் – அதிகாரத்துக்காக – கொள்கை துறந்து கூட்டு சேர்கின்றனர் என்றும் கடற்றொழில் அமைச்சர் இராமலிங்கம் சந்திரசேகர் விமர்சித்துள்ளார்.

மத்திய மருந்து சேமிப்பு மையங்களில், சுமார் 180 அத்தியாவசிய மருந்துகளுக்குப் பற்றாக்குறை ஏற்பட்டுள்ளதாக அரச மருத்துவ அதிகாரிகள் சங்கத்தின் சமில் விஜேசிங்க தெரிவித்துள்ளார்.

அதேநேரம், மருத்துவமனைகளுக்குள், சுமார் 50 வகையான அத்தியாவசிய மருந்துகள் பற்றாக்குறையாக உள்ளன என்றும் அவர் குறிப்பிட்டுள்ளார்.

வலி நிவாரணிகள், நுண்ணுயிர் எதிர்ப்பிகள், உயர் இரத்த அழுத்தம், நீரிழிவு நோய் மற்றும் சிறுநீரக நோய்களுக்கான மருந்துகள் உள்ளிட்ட பல அத்தியாவசிய மருந்துகளுக்கு தட்டுப்பாடு ஏற்பட்டுள்ளதாக அரச மருத்துவ அதிகாரிகள் சங்கம் (GMOA) தெரிவித்துள்ளது.

கடந்த பல மாதங்களாக புற்றுநோய் நோயாளிகளுக்கான மருந்துக்கு பெரும் தட்டுப்பாடு நிலவுவதாகவும், இதன் விளைவாக புற்றுநோய் நோயாளிகளுக்கு சிகிச்சையளிப்பதில் சில வரையறைகள் ஏற்பட்டுள்ளதாகவும் அவர் சுட்டிக்காட்டினார்.