மருந்து தட்டுப்பாடு காரணமாக நாட்டில் பல பிரச்சினைகள் – GMOA மீண்டும் எச்சரிக்கை

124 Views

அத்தியாவசிய மருந்துப் பொருட்களின் தட்டுப்பாடு காரணமாக நாட்டில் பல பிரச்சினைகள் ஏற்பட்டுள்ளதாக அரச மருத்துவ அதிகாரிகள் சங்கம் (GMOA ) தெரிவித்துள்ளது.

மருந்துகள் தட்டுப்பாடு/ மருந்துகளின் விலை அதிகரிப்பு மற்றும் போக்குவரத்து தொடர்பான தடைகள் போன்ற பல பிரச்சினைகள் சுகாதாரத் துறையிலிருந்து பதிவாகியுள்ளதாக GMOA குழுவின் உறுப்பினரான மருத்துவர் பிரசாத் கொலம்பகே தெரிவித்தார்.

கையிருப்பு குறைவாக உள்ளதால், அரசு மருத்துவமனைகளில் பொதுமக்களுக்கு மருந்து வழங்க முடியாது என்றும் அவர் குறிப்பிட்டார். மருந்து தட்டுப்பாடு காரணமாக தனியார் மருந்தகங்களில் மருந்துகளை கொள்வனவு செய்யும் நிலைக்கு மருத்துவர்கள் தள்ளப்பட்டுள்ளனர்.

டொலர் தட்டுப்பாட்டினால் ஏற்பட்ட போக்குவரத்துப் பிரச்சினைகள், நிதிப் பிரச்சினைகள் மற்றும் கொள்வனவுப் பிரச்சினைகள் காரணமாக மருந்து விநியோகஸ்தர்கள் இவ்வாறான வியாபாரத்திலிருந்து விலகிச் சென்றுள்ளதாக அவர் சுட்டிக்காட்டினார்.

மருந்து தட்டுப்பாடு உண்மையான மற்றும் பரவலாக உள்ள பிரச்சினை என்றும் அவர் வலியுறுத்தினார். கடந்த சில மாதங்களில் மருந்துகளின் விலைகளும் மூன்று அல்லது நான்கு மடங்குக்கு மேல் அதிகரித்துள்ளது.

மருந்து விநியோகத்தை பிரச்சினையின்றி மேற்கொள்ள முடியும் என சுகாதார அமைச்சர் கெஹலிய ரம்புக்வெல்ல கூறியதை நினைவு கூர்ந்த அவர், உண்மையில் அது அவ்வாறு இல்லை எனவும் தெரிவித்தார்.

சுகாதார அமைச்சரின் அறிக்கை முற்றிலும் தவறானது.

அரச வைத்தியசாலைகளுக்கு வெளியில் அதிக விலை காரணமாக மக்கள் தமக்குத் தேவையான மருந்துகளை பெற்றுக்கொள்ள முடியாதுள்ளதாகவும் அவர் குறிப்பிட்டுள்ளார்.

பொருளாதார முறைகேடுகள் காரணமாக இலங்கையின் சுகாதாரத் துறை வீழ்ச்சியடைந்து வருவதாக அவர் எச்சரித்தார்.

வைத்தியர்கள் மற்றும் சுகாதாரத் துறை ஊழியர்களுக்கு எரிபொருளை விநியோகிப்பதற்கான வினைத்திறன்மிக்க வேலைத்திட்டம் ஒன்றை முன்னெடுக்க வேண்டுமெனவும் அவர் கேட்டுக் கொண்டார்.

Leave a Reply