அரசியல் பிரசாரங்களுக்காக மில்லியன் கணக்கான அமெரிக்கர்களிடமிருந்து தனிப்பட்ட தகவல்கள் சேகரிக்கப்பட்டதை அம்பலப்படுத்திய கேம்பிரிட்ஜ் அனலிடிகா ஊழலைத் தொடர்ந்து, ஃபேஸ்புக் பயனர்களின் தனிப்பட்ட தரவுகளின் தனியுரிமை குறித்து அவர்களை ஏமாற்றியதற்காக, மெட்டா நிறுவனம் 25 பில்லியன் டொலர் சிவில் அபராதம் செலுத்த வேண்டும் என்று ஒரு அமெரிக்க நீதிபதி உத்தரவிட்டுள்ளார்.
செப்டம்பரில் வழங்கப்பட்ட ஒரு ஜூரி தீர்ப்பைத் தொடர்ந்து, நியூ மெக்சிகோ மாவட்ட நீதிபதி பிரான்சிஸ் மேத்யூ புதன்கிழமை(21) இந்தத் தீர்ப்பை வழங்கினார். அந்தத் தீர்ப்பில், மாநிலத்தின் நுகர்வோர் பாதுகாப்புச் சட்டங்களை ஏறக்குறைய 44 மில்லியன் முறை மீறியதற்கு ஃபேஸ்புக்கின் தாய் நிறுவனமே பொறுப்பு என்று கண்டறியப்பட்டது.
மாநிலச் சட்டத்தின் கீழ் மெட்டாவின் முறைகேடுகளுக்கு 219 பில்லியன் டொலருக்கும் அதிகமான அபராதம் விதிக்கப்பட வேண்டும் என்று நீதிபதி முடிவு செய்தார், ஆனால் அந்தத் தொகையை 25 பில்லியன் டொலராகக் குறைத்தார். இது ஒரு அமெரிக்க நிறுவனத்தின் மீது இதுவரை விதிக்கப்பட்ட மிகப்பெரிய நிதி அபராதங்களில் ஒன்றாக அமைகிறது.
“பல ஆண்டுகளாகத் திட்டமிட்டுப் பொதுமக்களுக்கு ஒளிபரப்பப்பட்ட ஃபேஸ்புக்கின் முறைகேடுகள், அதன் முக்கிய வணிக நடைமுறைகளின் மையத்தையே பாதிக்கின்றன,” என்று மேத்யூ தனது உத்தரவில் எழுதியுள்ளார். 2018 ஆம் ஆண்டு கேம்பிரிட்ஜ் அனலிடிகா ஊழலில் இருந்து இந்த வழக்கு உருவானது. அப்போது, பிரிட்டிஷ் அரசியல் ஆலோசனை நிறுவனமான கேம்பிரிட்ஜ் அனலிடிகா, சுமார் 87 மில்லியன் ஃபேஸ்புக் பயனர்களிடமிருந்து அவர்களின் அனுமதியின்றி தனிப்பட்ட தகவல்களைப் பெற்றது அம்பலமானது.
பயனர்களின் நண்பர்களின் தரவுகளை அணு குவதற்கான ஃபேஸ்புக்கின் அமைப்பைத் தவறாகப் பயன்படுத்திய ஒரு மூன்றாம் தரப்பு ஆளுமை வினாடி வினா செயலி மூலம் இந்தத் தகவல்கள் சேகரிக்கப்பட்டன. கேம்பிரிட்ஜ் அனலிடிகா இந்தத் தகவல்களைப் பயன்படுத்தி, வாக்காளர்களின் உளவியல் சுயவிவரங்களை உருவாக்கி, 2016 அமெரிக்க ஜனாதிபதித் தேர்தல் உட்பட, இலக்கு வைக்கப்பட்ட அரசியல் விளம் பரங்களை வழங்கியது.
