இலங்கை முழுவதும் 25,000-க்கும் மேற்பட்ட நோயாளிகள் தற்போது இதய அறுவை சிகிச்சைகள், ஏனைய முக்கிய அறுவை சிகிச்சைகள் மற்றும் அத்தியாவசிய மருத்துவப் பரிசோதனைகளுக்காகக் காத்திருப்பதாகத் தெரிவிக்கப்பட்டுள்ளது.
சில இதய அறுவை சிகிச்சைகளுக்கான காத்திருப்புப் பட்டியல் 2029ஆம் ஆண்டு வரையிலும் நீடித்துள்ளதாகக் கூறப்படும் நிலையில், நாட்டின் பொது சுகாதாரத் துறை எதிர்கொள்ளும் நெருக்கடியைத் தீர்ப்பதற்காக அரசாங்கம் மேற்கொள்ளும் நடவடிக்கைகள் தொடர்பில் புதிய கேள்விகள் எழுந்துள்ளன.
காத்திருப்புப் பட்டியலைக் குறைப்பதற்காக ஜனாதிபதி நிதியிலிருந்து நிதி ஒதுக்கப்படும் என அரசாங்கம் அறிவித்திருந்தபோதிலும், அந்தத் திட்டம் இதுவரை போதிய அளவில் நடைமுறைப்படுத்தப்படவில்லை என மருத்துவ மற்றும் குடிமை உரிமைகளுக்கான மருத்துவர்கள் தொழிற்சங்கக் கூட்டணியின் தலைவர் நிபுணர் மருத்துவர் சமல் சஞ்சீவ தெரிவித்துள்ளார்.
தனியார் மருத்துவமனைகளில் சிகிச்சை பெறுவதற்கான வசதியில்லாத ஏழை மற்றும் குறைந்த வருமானம் கொண்ட நோயாளிகள், அரசு மருத்துவமனைகளில் நீண்ட காத்திருப்புப் பட்டியல்களில் சிக்கித் தவிப்பதே தமக்கு மிகுந்த கவலையளிப்பதாக மருத்துவர் சஞ்சீவ தெரிவித்துள்ளார்.
அரசு மருத்துவமனைகளில் அறுவை சிகிச்சைக்காகக் காத்திருக்கும் நோயாளிகள், தனியார் மருத்துவமனைகளில் நிர்ணயிக்கப்பட்ட கட்டணத்தில் சிகிச்சை பெறுவதற்கு உதவும் வகையில், ஜனாதிபதி நிதியிலிருந்து ஒதுக்கப்படும் நிதியை அதிகரிக்க வேண்டும் எனவும் அவர் பரிந்துரைத்துள்ளார்.
