06. சிறையில் அடைக்கப்பட்டுள்ள ஞானசார தேரரை விடுதலை செய்யக் கோரி விகாரமகாதேவி பூங்காவில் நடைபெற்ற சத்தியாக்கிரகத்தின் போது, பலாங்கொட கஸ்ஸப்ப தேரர் ஊடகங்களுக்குப் பொய்யான அறிக்கைகளை வெளியிட்டதாக பெலவத்தை தேசிய மக்கள் சக்தி கட்சியின் அலுவலகத்திலிருந்து காவல்துறையினரிடம் முறைப்பாடு அளிக்கப்பட்டுள்ளது.
இந்த முறைப்பாட்டுக்கு அமைய விசாரணைகள் முன்னெடுக்கப்படுவதாக கொழும்பு பிரதான நீதவான் நீதிமன்றில் காவல்துறையினர் அறிவித்துள்ளனர்.
பெலவத்தை தேசிய மக்கள் சக்தி அலுவலகத்தின் அமைப்பாளரான ஜகத் பஸ்நாயக்க, குருந்துவத்தை காவல் நிலையத்தில் அளித்த முறைப்பாட்டை தொடர்ந்து இந்த விசாரணை தொடங்கப்பட்டதாக அதிகாரிகள் நீதிமன்றத்தில் தெரிவித்தனர்.
விகாரமகாதேவி பூங்காவிற்கு கத்திகளுடன் வந்ததாக கூறப்படும் இரண்டு நபர்கள் குறித்து கடந்த 22ஆம் திகதி கஸ்ஸப்ப தேரர் ஊடகங்களுக்கு வெளியிட்ட அறிக்கை முற்றிலும் பொய்யானது மற்றும் தவறாக வழிநடத்துவது என்று காவல்துறை, நீதிமன்றத்தில் தெரிவித்துள்ளது.
இந்த விடயத்தில் கஸ்ஸப்ப தேரர் கூறியது பொய்யானது என்றும், அது பொதுமக்களின் நம்பிக்கையைச் சிதைப்பதாகவும் பெலவத்தை தேசிய மக்கள் சக்தி அலுவலகத்தினர் முறைப்பாட்டில் தெரிவித்துள்ளனர்.
பொய்யான அறிக்கைகளை வெளியிடுவது காவல்துறை கட்டளைச் சட்டத்தின் 98-வது பிரிவின் மீறலாகும் என்பதால், அந்த அறிக்கைகள் குறித்து விசாரணை தொடங்கப்பட்டுள்ளது.
மேலும், சம்பந்தப்பட்ட அறிக்கையின் திருத்தப்படாத காணொளியை காவல்துறைக்கு வழங்குமாறு தனியார் ஊடக நிறுவனத்திற்கு உத்தரவிடவும் கோரப்பட்டது.
காவல்துறையினரின் சமர்ப்பணங்களை கருத்திற் கொண்ட நீதவான், சம்பந்தப்பட்ட அறிக்கையின் திருத்தப்படாத காணொளியை காவல்துறைக்கு வழங்குமாறு ஊடக நிறுவனத்திற்கு உத்தரவிட்டார்.
மேலும், விசாரணையின் முன்னேற்றத்தை உடனடியாக நீதிமன்றத்தில் சமர்ப்பிக்குமாறு காவல்துறைக்கு நீதவான் உத்தரவிட்டார்.
