நாட்டில் தற்போது தீவிரமடைந்துவரும் பாதாள உலகக் குற்றங்கள் மற்றும் போதைப்பொருள் கடத்தல்களைக் கட்டுப்படுத்துவதற்காக அறிமுகப்படுத்தப்பட்டுள்ள புதிய ஒழுங்கமைக்கப்பட்ட குற்றங்களைத் தடுக்கும் சட்டமூலம் தொடர்பில் சமூக வலைத்தளங்களில் பரப்பப்பட்டுவரும் வதந்திகளுக்கு நீதியமைச்சர் ஹர்ஷன நாணயக்கார பாராளுமன்றத்தில் கடுமையான கண்டனங்களைத் தெரிவித்தார்.
குறித்த சட்டமூலம் தொடர்பில் மக்கள் மத்தியில் நிலவும் தவறான புரிதல்களைத் தெளிவுபடுத்தும் நோக்கில் அவர் இந்த விசேட விளக்கத்தை அளித்துள்ளார்.
பாராளுமன்றத்தில் இன்றைய தினம் சமர்ப்பிக்கப்பட்ட இந்தச் சட்டமூலத்தின் ஊடாக, நாட்டில் புற்றுநோயைப் போலப் பரவியுள்ள ஐஸ் மற்றும் இதர போதைப்பொருள் கடத்தல்கள், ஆட்கடத்தல்கள், கொலைகள் மற்றும் சொத்துச் சேதங்களை முழுமையாக ஒழிப்பதற்குத் தேவையான சட்ட வலுவை அரசாங்கம் பெற்றுக்கொண்டுள்ளதாக அமைச்சர் சுட்டிக்காட்டினார்.
எனினும், இத்தகைய கடுமையான சட்டங்கள் குறித்து சமூக வலைத்தளங்களில் முற்றிலும் திரிபுபடுத்தப்பட்ட மற்றும் பொய்யான அர்த்தங்கள் கற்பிக்கப்பட்டு வருவதாகவும் அவர் தெரிவித்தார்.
குறிப்பாக, புதிய உத்தேச சட்டத்தின் கீழ் தலைமுடி நீளமாக வளர்த்திருந்தாலோ அல்லது உடலில் பச்சைக்குத்திக் (Tattoos) கொண்டிருந்தாலோ அவர்கள் உடனடியாகக் குற்றவாளிகளாகக் கருதப்பட்டு சிறையில் அடைக்கப்படுவார்கள் என்ற ரீதியில் திட்டமிட்ட முறையில் வதந்திகள் பரப்பப்பட்டு வருவதாக அமைச்சர் குறிப்பிட்டார்.
இத்தகைய ஆபத்தான மற்றும் அடிப்படையற்ற தகவல்களுக்கும் தாங்கள் கொண்டுவந்த சட்டத்துக்கும் எந்தவிதத் தொடர்பும் இல்லை என்பதை அவர் திட்டவட்டமாக விளக்கினார்.
சட்டமூலத்தின் 4(2) ஆவது பிரிவின் கீழ், சர்வதேச ரீதியில் குற்றவியல் புலனாய்வாளர்களால் பயன்படுத்தப்படும் சில பொதுவான அளவுகோல்கள் (Rebuttable Presumptions) குறிப்பிடப்பட்டுள்ளதாக அமைச்சர் தெளிவுபடுத்தினார்.
சர்வதேச அளவில் இயங்கும் பாரிய குற்றக் குழுக்களின் உறுப்பினர்கள் தமக்கென பிரத்தியேகமான ஆடைகள், சைகைகள் அல்லது குறியீடுகளைப் பயன்படுத்துவது வழக்கம் எனவும், இலங்கையிலும் எதிர்காலத்தில் அத்தகைய சூழ்நிலைகள் உருவாகும் பட்சத்தில் அது நீதிமன்றத்தில் ஒரு காரணியாக மட்டுமே பரிசீலிக்கப்படுமே தவிர, அதுவே இறுதிச் சாட்சியமாகாது எனவும் அவர் சுட்டிக்காட்டினார்.
இத்தகைய நடைமுறைகள் சிங்கப்பூர், அமெரிக்கா மற்றும் அவுஸ்திரேலியா போன்ற நாடுகளிலும் நடைமுறையில் உள்ள சர்வதேசத் தரத்திலான வரையறைகள் எனவும் அவர் சுட்டிக் காட்டினார்.
மக்கள் மத்தியில் தேவையற்ற பீதியையும் அச்சத்தையும் ஏற்படுத்தும் நோக்கோடு சில அரசியல் கட்சிகளும் சமூக வலைத்தள செயற்பாட்டாளர்களும் இந்தத் தவறான தகவல்களை முன்னெடுத்துச் செல்வதாகக் குறிப்பிட்ட அமைச்சர், குடிமக்களுக்குரிய அடிப்படை உரிமைகளான தாங்கள் விரும்பும் ஆடையை அணிவது, முடி அலங்காரங்களைச் செய்வது அல்லது பச்சைக்குத்திக் கொள்வது போன்ற தனிப்பட்ட சுதந்திரங்களுக்கு இந்தச் சட்டம் எவ்விதத்திலும் தடையாக இருக்காது எனத் தெரிவித்தார்.
மேலும், ஜனநாயக நாட்டில் எந்தவொரு சட்டத்தையும் விமர்சிப்பதற்கோ அல்லது உயர் நீதிமன்றத்தில் அதனைச் சவால் செய்வதற்கோ எவருக்கும் முழுமையான உரிமை உள்ளதாகவும், மாற்று அரசியல் இலாபங்களுக்காகவும் குறுகிய நோக்கங்களுக்காகவும் பொய்களைப் பரப்பி மக்களைக் குழப்புவதை விடுத்து, பொருத்தமான ஜனநாயக வழிகளில் முறையிடுமாறு நீதியமைச்சர் அழைப்பு விடுத்தார்.
