ஈரான் மீது மீண்டும் தாக்குதல் நடத்தினால் அமெரிக்காவுக்கு பேரழிவு ஏற்படும் என்று ஈரான் இராணுவம் எச்சரிக்கை விடுத்துள்ளது.
கடந்த பிப்ரவரி 28-ம் திகதி முதல் அமெரிக்கா, ஈரான் இடையே போர் நீடித்து வருகிறது. தற்போது இரு நாடுகளும் தற்காலிகமாக தாக்குதலை நிறுத்தி உள்ளன.
இந்த சூழலில் 7 நாட்கள் போர் நிறுத்த திட்டத்தை ஈரான் நேற்று முன்தினம் முன்மொழிந்தது. இதை அமெரிக்க அதிபர் டொனால்டு ட்ரம்ப் நிராகரித்து விட்டார். வரும் நவம்பரில் ஈரான் மீது மீண்டும் மிகப்பெரிய தாக்குதல் நடத்த அமெரிக்க இராணுவம் திட்டமிட்டு இருப்பதாக தகவல்கள் வெளியாகி உள்ளன.
இந்த சூழலில் ஈரான் இராணுவ செய்தித் தொடர்பாளர் முகமது அக்ரமினியா நேற்று கூறியதாவது: மேற்காசிய பிராந்தியத்தில் இக்கட்டான சூழல் நிலவுகிறது. இந்த பிராந்தியத்தில் மீண்டும் மிகப்பெரிய போர் மூளும் அபாயம் எழுந்திருக்கிறது. எதிரியின் (அமெரிக்கா) தாக்குதல்களை எதிர்கொள்ள ஈரான் இராணுவம் முழு அளவில் தயாராக உள்ளது.
ஈரான் மீது மீண்டும் தாக்குதல் நடத்தினால் எதிரிக்கு (அமெரிக்கா) பேரழிவு ஏற்படும். இஸ்ரேலை பாதுகாக்க வேண்டும் என்பதே அமெரிக்காவின் பிரதான குறிக்கோள். இதற்காகவே வளைகுடா நாடுகளில் அமெரிக்க இராணுவ தளங்கள் அமைக்கப்பட்டு உள்ளன. இந்த தளங்கள் முஸ்லிம் நாடுகளின் பாதுகாப்புக்கு ஒருபோதும் உத்தரவாதம் அளிக்காது.
வளைகுடா பகுதியில் உள்ள அனைத்து அமெரிக்க இராணுவ தளங்களையும் மூட வேண்டும். அப்போதுதான் இந்த பிராந்தியத்தில் நிரந்தர அமைதி திரும்பும். ஈரான் மீது இதுவரை 25,000-க்கும் மேற்பட்ட வான்வழித் தாக்குதல்கள் நடத்தப்பட்டு உள்ளன. இந்த தாக்குதல்களை வெற்றிகரமாக முறியடித்து உள்ளோம். இவ்வாறு முகமது அக்ரமினியா தெரிவித்தார் என்றார்.
