பயங்கரவாதத்திலிருந்து அரசை பாதுகாக்கும் சட்டமூலத்திற்கு எதிராக நீதிமன்றத்தை நாடிய ஊடக ஒன்றியம்!

பயங்கரவாதத்திலிருந்து அரசைப் பாதுகாக்கும் சட்டமூலத்தின் சில ஏற்பாடுகள் ஊடகச் சுதந்திரம், ஜனநாயகப் பொறுப்புக்கூறல் மற்றும் அடிப்படை உரிமைகளைப் பாதிப்பதுடன், அரசியலமைப்பினால் உறுதிப்படுத்தப்பட்டுள்ள மக்களின் இறைமையையும் மீறக்கூடும் என்று தெரிவித்து உத்தரவிடுமாறு கோரி, சுதந்திர ஊடக இயக்கம் உயர்நீதிமன்றத்தில் அடிப்படை உரிமைகள் மனுவொன்றைத் தாக்கல் செய்துள்ளது.

சுதந்திர ஊடக இயக்கத்தினால் வெளியிடப்பட்டுள்ள விசேட அறிக்கையிலேயே இந்த விடயம் தெரிவிக்கப்பட்டுள்ளது.

“உத்தேச பயங்கரவாதத்திலிருந்து அரசைப் பாதுகாக்கும் சட்டமூலத்தின் அரசியலமைப்புச் சட்ட ஏற்புடைமையைச் சவாலுக்கு உட்படுத்தி, சுதந்திர ஊடக இயக்கம் உயர் நீதிமன்றத்தில் அடிப்படை உரிமை மனுவொன்றைத் தாக்கல் செய்துள்ளது.

சுதந்திர ஊடக இயக்கத்தின் நிறைவேற்றுக் குழு உறுப்பினர்களான இருவரின் சார்பில் இந்த மனு தாக்கல் செய்யப்பட்டுள்ளதாக” குறித்த அறிக்கையில் தெரிவிக்கப்பட்டுள்ளது

சட்டமா அதிபர், நீதி மற்றும் தேசிய ஒருமைப்பாட்டு அமைச்சர் ஹர்ஷன நாணயக்கார, பொதுமக்கள் பாதுகாப்பு மற்றும் பாராளுமன்ற விவகார அமைச்சர் ஆனந்த விஜேபால ஆகியோர் மனுவில் பிரதிவாதிகளாகப் பெயரிடப்பட்டுள்ளனர்.

சட்டமூலத்தின் 3(1), 3(2) மற்றும் 9ஆம் உறுப்புரைகளின் கீழ் பயங்கரவாதம் மற்றும் பயங்கரவாதம் சார்ந்த வெளிப்பாடுகள் தெளிவற்ற வகையில் வரையறுக்கப்பட்டுள்ளமை ஊடகவியலாளர்களுக்குப் பாரிய ஆபத்தை ஏற்படுத்தக்கூடும் என்று மனுதாரர்கள் சுட்டிக்காட்டியுள்ளனர்.

நியாயமான பொதுநலன் கருதி புலனாய்வுச் செய்தி அறிக்கையிடலில் ஈடுபடும் ஊடகவியலாளர்கள், இந்த ஏற்பாடுகளின் காரணமாக ஆயுள் தண்டனை மற்றும் 2 கோடி ரூபா அபராதம் உள்ளிட்ட பாரிய குற்றவியல் தண்டனைகளுக்கு முகங்கொடுக்க நேரிடலாம் என்றும் அவர்கள் தெரிவித்துள்ளனர்.

ஊடகத் தகவல் மூலங்களின் இரகசியத்தன்மையைப் பாதுகாப்பதில் காணப்படும் குறைபாடுகளும் மனுவில் சுட்டிக்காட்டப்பட்டுள்ளன.

சட்டமூலத்தின் 15ஆம் உறுப்புரையின் கீழ் தகவல்களை அறிவிக்கத் தவறுவது குற்றமாக்கப்பட்டுள்ளது.

எனினும், நம்பகமான ஊடகத் தகவல் மூலங்களையும் முறைகேடுகள் மற்றும் சட்டவிரோதச் செயற்பாடுகள் தொடர்பான தகவல்களை வெளிப்படுத்துவோரையும் பாதுகாப்பதற்கான ஏற்பாடுகள் சட்டமூலத்தில் உள்ளடக்கப்படவில்லை என்று சுதந்திர ஊடக இயக்கம் தெரிவித்துள்ளது.

இதனால், பொதுமக்களின் நலன் கருதி உண்மைகளை வெளிக்கொணரும் புலனாய்வு ஊடகவியலாளர்கள் தமது தகவல் மூலங்களைப் பாதுகாப்பதில் சிக்கல்களை எதிர்கொள்ள நேரிடுவதுடன், புலனாய்வு ஊடகவியல்துறையின் செயற்பாடுகளும் கடுமையாகப் பாதிக்கப்படக்கூடும்.

அத்துடன், சட்டமூலத்தின் 19, 20, 24 மற்றும் 61ஆம் உறுப்புரைகள் தொடர்பிலும் மனுதாரர்கள் தமது எதிர்ப்புகளை முன்வைத்துள்ளனர்.

இந்த உறுப்புரைகளின் ஊடாக முப்படையினருக்கு சோதனையிடுதல் மற்றும் கைது செய்தல் தொடர்பில் விரிவான அதிகாரங்கள் வழங்கப்படுவதுடன், பாதுகாப்புச் செயலாளருக்குத் தடைசெய்யப்பட்ட பகுதிகளைப் பிரகடனப்படுத்துவதற்கும் அனுமதி வழங்கப்படுவதாக அவர்கள் குறிப்பிட்டுள்ளனர்.

இந்த ஏற்பாடுகள் நடைமுறைப்படுத்தப்பட்டால், பொதுமக்களின் எதிர்ப்புப் போராட்டங்கள் மற்றும் மனித உரிமை மீறல்கள் தொடர்பான சம்பவங்களை ஊடகங்கள் செய்தியாக வெளியிடுவதற்கான வாய்ப்புகள் கட்டுப்படுத்தப்படக்கூடும் என மனுதாரர்கள் வாதிட்டுள்ளனர்.

இதன் மூலம் பொதுமக்கள் அறிந்துகொள்ள வேண்டிய தகவல்களைச் சேகரித்தல், அவற்றைச் சரிபார்த்தல் மற்றும் மக்களுக்கு வழங்குதல் ஆகிய ஊடகப் பணிகள் பாதிக்கப்படும் அபாயம் காணப்படுவதாகவும் அவர்கள் சுட்டிக்காட்டியுள்ளனர்.

மேலும், உத்தேச சட்டமூலத்தின் ஏற்பாடுகள் அரசியலமைப்பினால் உறுதிப்படுத்தப்பட்டுள்ள சமத்துவத்திற்கான உரிமை, கருத்துச் சுதந்திரம் மற்றும் மக்களின் இறைமை ஆகியவற்றைப் பாரதூரமாக மீறக்கூடும் என மனுதாரர்கள் தெரிவித்துள்ளனர்.

இந்தக் காரணங்களை அடிப்படையாகக் கொண்டு, உத்தேச சட்டமூலம் நிறைவேற்றப்பட வேண்டுமானால் பாராளுமன்றத்தில் மூன்றில் இரண்டு பெரும்பான்மை ஆதரவைப் பெறுவதுடன், சர்வஜன வாக்கெடுப்பின் மூலம் மக்களின் அங்கீகாரத்தையும் பெற்றுக்கொள்வது கட்டாயமாக்கப்பட வேண்டும் என்று உயர் நீதிமன்றத்திடம் கோரிக்கை விடுக்கப்பட்டுள்ளது