மன்னார் மக்களுக்கு பாதிப்பை ஏற்படுத்தும் காற்றாலைத் திட்டத்தை அமுல்படுத்துவதற்கு ஒருபோதும் அனுமதியோமென வன்னிமாவட்ட நாடாளுமன்ற உறுப்பினர் துரைராசா ரவிகரன் தெரிவித்துள்ளார்.

அதேவேளை மக்களின் அனுமதியின்றி, மக்களின் விருப்பிற்கெதிராக மன்னாரில் அமுல்படுத்தப்படுவதற்கு முயற்சிக்கப்படுகின்ற காற்றாலைத் திட்டத்திற்கெதிராக மக்களோடு இணைந்து செயற்படவுள்ளதாகவும் நாடாளுமன்ற உறுப்பினர் மேலும் தெரிவித்துள்ளார்.

மன்னார் நகரில் 04.08.2025இன்று இடம்பெற்ற காற்றாலைத் திட்டத்திற்கெதிரான எதிர்ப்பு நடவடிக்கையில் பங்கேற்றுக் கருத்துத் தெரிவிக்கும்போதே நாடாளுமன்ற உறுப்பினர் ரவிகரன் மேற்கண்டவாறு தெரிவித்துள்ளார்.

இதுதொடர்பில் அவர் மேலும் கருத்துத் தெரிவிக்கையில்,

இந்தக் காற்றாலைத்திட்டம், கனியமணல் திட்டமென எமது மக்களுக்கு மிகமோசமான செயற்பாடுகளை முன்னைய அரசாங்கங்கள் மேற்கொண்டுவந்தன.

இந்நிலையில் தற்போதைய அரசாங்கமானது மக்களின் நன்மைகருதி இத்தகைய காற்றாலை மற்றும் கனியமணல் திட்டங்களுக்கு எதிராக செயற்படுவார்களென்று மக்கள் எதிர்பாத்திருக்கையில், இந்த அரசாங்கமும் இத்தகைய மக்களுக்கு பாதிப்பு ஏற்படக்கூடிய திட்டங்களுக்கு ஆதரவாகச் செயற்படுவதை அவதானிக்கமுடிகின்றது.

குறிப்பாக மக்களின் அனுமதியின்றி, விருப்பின்றி இத்தகைய காற்றாலைத் திட்டங்கள் அமுல்படுத்தப்படாதென மாவட்ட மற்றும் பிரதேச அபிவிருத்தி ஒருங்கிணைப்புக் குழுக்கூட்டங்கள் உட்பட பலசந்தர்ப்பங்களில் தெரிவித்திருக்கின்றனர். ஆனால் தற்போது மக்கள் அனுமதிக்காத, மங்கள் விரும்பாத இந்தக் காற்றாலைத் திட்டத்தை இங்கு மன்னாரில் அமுல்படுத்துவதற்கு முனைகின்றனர்.

இத்தகைய அத்துமீறிய செயற்பாடுகளுக்கு எதிராக மிகக் கடுமையான கண்டனங்களைத் தெரிவித்துக்கொள்ள விரும்புகின்றேன்.

அதேவேளை இவ்வாறு மக்களின் அனுமதியின்றி அத்துமீறி மன்னாரில் காற்றாலைத் திட்டத்தை அமுல்படுத்த முயற்சிப்பதற்கு எதிராக பாராளுமன்றில் எனது கருத்துக்களைப் பதிவுசெய்வேன்.

குறிப்பாக இத்தகைய திட்டங்களின்மூலம் எமது வளங்கள் சூறையாடப்படுவதுடன், எமது இடங்களை அழிக்கின்ற செயற்பாடாகவும் இது அமைகின்றது.

இதேபோலதான் மக்களின் எதிர்ப்பையும்மீறி முல்லைத்தீவு – கொக்கிளாய் பகுதியில் கனியமணல் அகழ்வுச் செயற்பாடு முன்னெடுக்கப்பட்டது. அவ்வாறு கனியமணல் அகழ்வு மேற்கொள்ளப்பட்டதன் விளைவாக கடலரிப்பு ஏற்பட்டு கடல்நீர் குடியிருப்புப் பகுதிகளை நோக்கி வந்த அவலநிலையே ஏற்பட்டிருந்து.

அத்தோடு கூட்டங்களிலே மக்கள் அனுமதிக்காத திட்டங்களை அமுல்படுத்தமாட்டோம் எனக் கூறிவிட்டு எந்த அடிப்படையில் இவ்வாறான திட்டங்களை இங்கு அமுல்படுத்த முனைகின்றனர்.

விடுதலைப்புலிகளின் காலத்தில் மக்கள் அனுமதிக்காத, விரும்பாத திட்டங்கள் எவையும் அனுமதிக்கப்படுவதில்லை. மக்களின் அனுமதி மற்றும் விருப்பிற்கு மாறான திட்டங்களை அமுல்படுத்துவதற்கு அனைவரும் பயப்படுவார்கள். விடுதலைப்புலிகளின் மேல் அனைவரும் மிகுந்தபயம் இருந்தது.

ஆனால் தற்போது மக்கள் அனுமதிக்காத திட்டங்கள் அமுல்படுத்தப்பட்டு எமது இடங்களிலுள்ள வளங்களைச் சூறையாடுவதற்கான முயற்சிகள் மேற்கொள்ளப்படுகின்றன.

மக்களுக்குப் பாதிப்பை ஏற்படுத்தக்கூடிய இத்தகைய காற்றாலைத் திட்டங்களை எமது பகுதிகளில் ஏற்படுத்துவதை ஒருபோதும் அனுமதிக்கமுடியாது. எனவே இத்தகைய திட்டங்களுக்கெதிராக நாம் மக்களோடு இணைந்து செயற்படுவோம். இவ்வாறான அத்துமீறிய அராஜகவேலைகளுக்கு நாம் ஒருபோதும் இடமளிக்கமாட்டோமென மிகத் தெளிவாகச் சொல்லிவைக்கவிரும்புகின்றோம் – என்றார்.

யாழ். அரியாலை செம்மணியில் கண்டறியப்பட்ட மனிதப் புதைகுழி பகுதியில் இன்று  ஸ்கான் பரிசோதனை மேற்கொள்ளப்பட்டு வருகின்றது.

செம்மணி புதைகுழிகளில் நேற்று வரை 130 மனித எலும்புக்கூடுகள் கண்டுபிடிக்கப்பட்டுள்ளன. 120 எலும்புக்கூடுகள் புதைகுழிகளிலிருந்து அகழ்ந்து எடுக்கப்பட்டுள்ளன.

இந்தப் புதைகுழிகளின் அருகே வேறு மனித புதைகுழிகள் இருக்கின்றனவா? என்று ஆராய ஸ்கான் பரிசோதனை தற்போது மேற்கொள்ளப்பட்டு வருகின்றது.

2006 ஆம் ஆண்டு திருகோணமயை மாத்திரமல்ல முழு உலகையும் உலுக்கிய படுகொலை.

மூதூர் பொது வைத்­தி­ய­சா­லைக்கு அருகில் இயங்­கி­வந்த பிரான்ஸ் தொண்டு நிறுவனமான (ஏ.சி.எப்.)   அக்ஷன் பாம் எனும் சர்­வ­தேச தொண்டர் நிறு­வ­னத்தில் கட­மை­யாற்றிக்கொண்­டி­ருந்த 17 பணி­யா­ளர்­க­ளையும் ஆயுதம் தரித்த சீரு­டைக்காரர்கள் நிறு­வன வளா­கத்­துக்குள் நுழைந்து,  2006 ஆகஸ்ட் 4ம் திகதி சுட்டு படுகொலை செய்தனர்.

இந்த சம்பவத்தில் 4 பெண்கள் உட்பட 17 உள்ளூர் பணியாளர்கள் படுகொலை செய்யப்பட்டதாக தெரிவிக்கப்படுகிறது.

இந்நிலையில், தங்களுடைய உறவுகள் படுகொலை செய்யப்பட்டு, 19 வருடங்களாகியும் இதுவரை நீதி கிடைக்கவில்லை என உயிரிழந்தவர்களின் உறவினர்கள் தெரிவித்து வருகின்றார்கள்.

உயிரிழந்தவர்களின் பெயர் விபரங்கள் பின்வருமாறு:

1. ரிச்சட் அருள்ராஜ் (வயது – 24) 2. முத்துலிங்கம் நர்மதன் (வயது – 23) 3. சக்திவேல் கோணேஸ்வரன் (வயது – 24) 4. துரைராஜா பிரதீபன் (வயது – 27) 5. சிவப்பிரகாசம் ரொமிலா (வயது – 25) 6. கணேஷ் கவிதா (வயது – 27) 7. எம். ரிஷிகேசன் (வயது – 24) 8. அம்பிகாவதி ஜெசீலன் (வயது – 27) 9. கனகரத்தினம் கோவர்த்தனி (வயது – 27) 10. வயிரமுத்து கோகிலவதனி (வயது – 29) 11. ஏ.எல்.மொகமட் ஜௌபர் (வயது – 31) 12. யோகராஜா கோடீஸ்வரன் (வயது – 30) 13. சிங்கராஜா பிறீமஸ் ஆனந்தராஜா (வயது – 32) 14. ஐ. முரளிதரன் (வயது – 33) 15. கணேஷ் ஸ்ரீதரன் (வயது – 36) 16. முத்துவிங்கம் கேதீஸ்வரன் (வயது – 36) 17. செல்லையா கணேஷ் (வயது – 54)

இதே ஆண்டு ஜனவரியில் 5 மாணவர்கள் படுகொலை செய்யப்பட்டிருந்தார்கள்

ஊடகவியலாளர் கல்முனை சுகிர்தராஜனும் உட்துறைமுக வீதி எனும் பாதுகாப்பு வலயத்தில் வைத்து இதே ஆண்டில் சுட்டுக் கொல்லப்பட்டிருந்தார்.

இவ்வாறு இதே ஆண்டில் இலங்கை அரசால் திட்டமிட்ட பல படுகொலைகள் திருகோணமலையில் நடந்தன. ஆனால் அவற்றிற்கு அல்லது வடக்கு கிழக்கில் நடந்த எந்தவொரு படுகொலைகளுக்கும் இதுவரை நீதி கிடைக்கவில்லை.

செம்மணி மனித புதைகுழிகள் அகழ்வு பணிகளை மனித உரிமை ஆணைக்குழு ஆணையாளர்கள் நேரில் பார்வையிட்டனர் மற்றும் மனித புதைகுழிகள் தொடர்பிலான  சாட்சிகளுக்கு பாதுகாப்பு வழங்க நடவடிக்கை எடுப்பதற்கு ஆணைக்குழு தயார் என்று தெரிவித்துள்ளனர்.

மனித உரிமை ஆணைக்குழுவின் கலாநிதி ஜகன் குணத்திலாக, பேராசிரியர் தை. தனராஜ் மற்றும் பேராசியர் பாத்திமா பர்ஷான ஹனீபா ஆகியோர் யாழ்ப்பாண பிராந்திய இணைப்பாளர் கனகராஜ் உட்பட குழுவினர் சமீபத்தில் செம்மணி பகுதியில் அகழ்வு பணிகளை ஆய்வு செய்தனர்.

புதைகுழிகளை நேரில் பார்வையிட்டு ஊடகவியலர்களிடம் கருத்து தெரிவித்த ஆணையாளர்கள், அகழ்வு பணிகள் தொடர்பிலும் விசாரணைகள் தொடர்பிலும் தகவல் பெற்றுள்ளோம் என்று கூறினர்.

கிருஷாந்தி கொலை வழக்கில் சிறையில் உள்ள ராஜபக்சே செம்மணி புதைகுழிகள் தொடர்பான சாட்சியங்களை வழங்க தயாராக இருப்பதாக கூறியுள்ளார் என்ற கேள்விக்கு, சிறையில் அவனுக்கு அச்சுறுத்தல் ஏற்பட்டால் மனித உரிமை ஆணைக்குழு உடனடியாக நடவடிக்கை எடுக்கும் என உறுதி தெரிவித்தனர்.

மேலும், 1996-97 ஆம் ஆண்டுகளில் யாழ்ப்பாணத்தில் காணாமல் ஆக்கப்பட்டோரின் விசாரணைகள் குறித்து 2003 ஆம் ஆண்டு வெளியிடப்பட்ட அறிக்கை மனித உரிமை ஆணைக்குழு அதிகாரப்பூர்வ இணையதளத்தில் பதிவேற்றம் செய்யப்பட்டுள்ளதாக தெரிவித்தனர்.

இலங்கைக்கு டிஜிட்டல் அடையாள அட்டையை விநியோகிக்கும் கருத்திட்டத்துக்கு தரவு பாதுகாப்பு சட்டம் தடையாக இருப்பதாக இந்திய நிறுவனம் குறிப்பிட்டதை தொடர்ந்து அந்த சட்டத்தை திருத்தம் செய்யும் யோசனையை இன்றும் ஒருமாத காலத்துக்கு கொண்டு வருவதாக டிஜிட்டல் பொருளாதார அமைச்சு இந்திய நிறுவனத்துக்கு வாக்குறுதியளித்துள்ளது.

இந்தியாவின் தேவைக்கமைய நாட்டின் சட்டத்தை எவ்வாறு திருத்தம் செய்ய முடியும். இந்த திருத்த யோசனைக்கு எத்தனை பேர் ஆதரவளிப்பார்கள் என்பதை பார்த்துக் கொண்டிருக்கிறோம் என தேசிய சுதந்திர முன்னணியின் தலைவரும், முன்னாள் பாராளுமன்ற உறுப்பினருமான விமல் வீரவன்ச தெரிவித்தார்.

கொழும்பில் உள்ள தேசிய சுதந்திர முன்னணியின் காரியாலயத்தில் ஞாயிற்றுக்கிழமை (3) நடைபெற்ற ஊடகவியலாளர் சந்திப்பின் போது மேற்கண்டவாறு குறிப்பிட்டார்.

அங்கு அவர் மேலும் தெரிவித்ததாவது,

இலங்கையின் டிஜிட்டல் ஆளடையாள அட்டை விநியோகிக்கும் கருத்திட்டத்தை அரசாங்கம் இந்திய நிறுவனத்துக்கு வழங்கியுள்ளது. டிஜிட்டல் அடையாள அட்டை கருத்திட்டத்துக்கான சகல பணிகளையும் தேசிய ஆளடையாள அட்டை திணைக்களம் முன்னெடுத்து அப்பணிகள் நிறைவுறும் தருவாயில் உள்ள நிலையில் தான் அரசாங்கம் இந்தியாவுக்கு இத்திட்டத்தை வழங்கியுள்ளது.

இந்த கருத்திட்டத்துக்கான விலைமனுகோரலை இந்தியாவின் என்.ஐ.எஸ்.ஜி நிறுவனம் மேற்கொண்டுள்ளது.இந்த கருத்திட்டத்துக்கு இந்திய நிறுவனம் மாத்திரமே விலைமனுகோரல் செய்ய முடியும்.இந்தியாவின் தரவு கட்டமைப்பின் வன்பொருள் மற்றும் மென்பொருள் கட்டமைப்பை மாத்திரம் பயன்படுத்த வேண்டும் என்று நிபந்தனை விதிக்கப்பட்டுள்ளன.

இந்தியாவுக்கு வழங்கப்பட்டுள்ள இந்த கருத்திட்டம் தொடர்பில் இலங்கை தரப்பினருக்கும்,இந்திய நிறுவன தரப்பினருக்கும் இடையிலான நிகழ்நிலை முறைமை ஊடாக சந்திப்பு கடந்த மாதம் 25 ஆம் திகதியன்று இடம்பெற்றுள்ளது.இலங்கை சார்பில் பொருளாதார அமைச்சின் செயலாளர் வருண தனபால, தனியார் நிறுவனம் ஒன்றின் தலைமை நிர்வாக அதிகாரியான சஞ்சன கருணாரத்ன,டிஜிட்டல் பொருளாதாரம் தொடர்பில் ஜனாதிபதியின் ஆலோசகரான ஹான்ஸ் விஜேசூரிய ஆகியோர் கலந்துக் கொண்டுள்ளனர்.

பொருளாதார அமைச்சின் செயலாளர் வருண தனபால அமைச்சின் செயலாளர் காரியாலயத்தில் இருந்து நிகழ்நிலை முறைமை ஊடாக சந்திப்பில் கலந்துக் கொள்ளாமல் கொழும்பில் உள்ள இந்திய உயர்ஸ்தானிகர் காரியாலயத்துக்கு சென்று அங்கிருந்தவாறு குறித்த சந்திப்பில் கலந்துக்கொண்டுள்ளார்.

இந்த சந்திப்பின் போது டிஜிட்டல் அடையாள அட்டையை உருவாக்குவதில் உள்ள பிரச்சினைகள் பற்றி விரிவாக கலந்துரையாடப்பட்டுள்ளது.இலங்கையில் தற்போது அமுல்படுத்தப்பட்டுள்ள தரவு பாதுகாப்பு சட்டத்தின் பிரகாரம் டிஜிட்டல் ஆளடையாள அட்டை உருவாக்கத்துக்கான பணிகளை முன்னெடுப்பதில் சிக்கல்நிலை காணப்படுவதாக இந்திய நிறுவன பிரதிநிதிகள் குறிப்பிட்டுள்ளனர்.

இதற்கு டிஜிட்டல் பொருளாதார அமைச்சின் செயலாளர் வருண தனபால இன்றும் ஒன்றரை மாத காலத்துக்குள் தரவு பாதுகாப்பு சட்டத்தை திருத்தம் செய்யும் யோசனை முன்வைக்கப்படும் என்று குறிப்பிட்டுள்ளார். .இந்தியாவின் தேவைக்கமைய நாட்டின் சட்டத்தை எவ்வாறு திருத்தம் செய்ய முடியும்.இந்த திருத்த யோசனைக்கு எத்தனை பேர் ஆதரவளிப்பார்கள் என்பதை பார்த்துக் கொண்டிருக்கிறோம்.நாட்டு மக்கள் இவ்விடயத்தில் விசேட கவனம் செலுத்த வேண்டும் என்றார்.

யாழ்ப்பாணம், செம்மணி – சித்துப்பாத்தி மனித புதைகுழிகளில் இருந்து இன்று மேலும் 4 மனித என்புக்கூடுகள் வெளிப்பட்டுள்ளன.

சித்துப்பாத்தி மனித புதைகுழி அகழ்வின் இரண்டாம் கட்டத்தின் இரண்டாவது அமர்வின் 14ஆவது நாள் அகழ்வு பணிகள் நேற்று (03) முன்னெடுக்கப்பட்டன. இதன்போது, முன்னதாக வெளிப்பட்ட 3 என்புக்கூட்டுத் தொகுதிகளும் அகழ்ந்தெடுக்கப்பட்டுள்ளன.

அதற்கமைய, இதுவரை மொத்தமாக 130 என்புக்கூட்டுத் தொகுதிகள் வெளிப்பட்டுள்ளதுடன், அவற்றில் 120 என்புக்கூட்டுத் தொகுதிகள் முழுமையாக அகழ்ந்தெடுக்கப்பட்டுள்ளன. அத்துடன், செம்மணி, சித்துப்பாத்தி பகுதியில் தற்போதுள்ள 2 மனித புதைகுழிகளை விட அருகில் மேலும் மனித புதைகுழிகள் உள்ளனவா? என்பதனை ஆராயும் நோக்கில்,  இன்று தினம் (04) ஸ்கேன் சோதனை நடவடிக்கைகள் முன்னெடுக்கப்படவுள்ளன.

இதேவேளை, நாளை  (05) மனித புதைகுழிகளில் இருந்து மீட்கப்பட்ட சான்று பொருட்களை அடையாளம் காணும் வகையில் அவற்றை மக்களுக்கு காட்சிப்படுத்த நடவடிக்கை எடுக்கப்பட்டுள்ளது.