அரச மொழிக் கொள்கைகளை வெளிக்கொணர்வதன் ஊடாக அரச நிறுவனங்களில் மக்களுக்கு சிறந்த மொழி சேவை வழங்க வேண்டும். மொழி தொடர்பான அனைத்து பிரச்சினைகளையும் நிவர்த்தி செய்து மொழி ரீதியான கொள்கையினை ஏற்படுத்துவோம். மொழிகள் ரீதியான உரிமை மீறல்கள் தொடர்பில் முறைப்பாடுகளை தெரிவிக்க 1956 என்ற துரித தொலைபேசி இலக்கத்தையும் 071-19521436 என்ற வாட்சப் இலக்கத்தையும் அறிமுகம் செய்துள்ளோம் என நீதி மற்றும் தேசிய ஒருமைப்பாட்டு அமைச்சின் மேலதிக செயலாளர் மகேசன் தெரிவித்தார்.

அரச கரும மொழிகள் தினம் மற்றும் அரச கரும மொழிகள் வாரத்தை நடைமுறைபடுத்துவது தொடர்பான விசேட ஊடகவியலாளர் சந்திப்பு திங்கட்கிழமை (30) அரசாங்க தகவல் திணைக்களத்தில் இடம்பெற்றது.

இதன் போதே நீதி மற்றும் தேசிய ஒருமைப்பாட்டு அமைச்சின் மேலதிக செயலாளர் மகேசன் இவ்வாறு  தெரிவித்தார்.

மேலும் நீதி மற்றும் தேசிய ஒருமைப்பாட்டு அமைச்சின் மேலதிக செயலாளர் மகேசன்  தெரிவிக்கையில்,

எமது தேசிய ஒருமைப்பாட்டு பிரிவானது இவ்வருடமும் அரசகரும மொழிகள் வாரத்தை நடைமுறைபடுத்த ஏற்பாடு செய்துள்ளது. எமது அரசின் கீழ் இயங்கும் தேசிய மொழி கல்வி நிறுவனம் மற்றும் அரச கரும மொழிகள் திணைக்களம் மற்றும் தேசிய அரச கரும மொழிகள் ஆணைக்குழு என்பவற்றின் ஒத்துழைப்போடு கலாசார அலுவல்கள் திணைக்களமும் இந்த திட்டத்திற்கு  முக்கியமான பங்காற்றி ஒத்துழைப்பு வழங்கியுள்ளன.

தேசிய ஒருமைப்பாட்டை மேம்படுத்தவும் வலுப்படுத்தவும், எமது அமைச்சு பலதரப்பட்ட செயற்பாடுகளை முன்னெடுத்து வருகிறது.மொழிகளின் முக்கியத்துவத்தை உணர்ந்தவாறே, தெளிவான மொழிக் கொள்கைகளை உருவாக்கி அவற்றை நடைமுறைப்படுத்தும் பணிகளும் மேற்கொள்ளப்பட்டுள்ளன.

மொழிக் கொள்கையை நடைமுறைபடுத்துவதன் முக்கிய பொறுப்புக்களை உரிய உத்தியோகத்தர்களிடம் கையளிக்க நடவடிக்கை எடுத்துள்ளளோம். அரச நிறுவனங்களில் மொழிக் கொள்கையை பிரயோகிப்பதற்குரிய முறைமையினை நடைமுறைப்படுத்துவதற்காகவே இந்த திட்டத்தை நடைமுறைபடுத்தியுள்ளோம். அரச மொழி கொள்கையை நடைமுறைபடுத்துவதில் வளங்கள் ஒரு பிரச்சினையாகவுள்ளது. மொழி தொடர்பான அனைத்து பிரச்சினைகளையும் நிவர்த்தி செய்து மொழி ரீதியான கொள்கையினை ஏற்படுத்துவோம்.

இதற்கான நடைமுறையாக மொழிகள் ரீதியான உரிமை மீறல்கள் தொடர்பான முறைப்பாடுகளுக்கு 1956 என்ற துரித தொலைபேசி அழைப்பு இலக்கத்தையும் 071-19521436 என்ற வாட்சப் இலக்கத்தையும் அறிமுகம் செய்துள்ளோம்.

செவ்வாய்க்கிழமை (01) அரச மொழி வாரம் ஆரம்பமாகின்ற நிலையில், பாடசாலை தினம், பொது மக்கள் தினம், இளைஞர்கள் தினம் போன்ற முறைகளில் அரச கரும மொழிகள் தினமும் அனுஷ்டிக்கப்டவுள்ளது. அரச மொழிக் கொள்கைகளை வெளிக்கொணர்வதன் ஊடாக அரச நிறுவனங்களில் மக்களுக்கு சிறந்த மொழி சேவை வழங்கவேண்டும் என அவர் மேலும் தெரிவித்தார்.

இந்நிகழ்வில் தேசிய ஒருமைப்பாடு பிரதி அமைச்சர் முனீர் முளப்பர், அரசாங்க தகவல் பணிப்பாளர் நாயகம் எச்.எஸ்.கே.ஜே.பண்டார , அரச மொழிகள் ஆணையாளர் நாயகம் திலக் நந்தன ஹெட்டியாராச்சி ,அரச கரும மொழிகள் ஆணைக்குழுவின் தலைவர்  நிமல் ஆர். ரணவக்க , அரசகரும மொழிகள் திணைக்களத்தின் ஆணையாளர் சமிந்த மஹலேகம் , தேசிய ஒருமைப்பாட்டு அமைச்சின் மேலதிக செயலாளர் மகேசன்  மற்றும் அரசாங்க தகவல் பணிப்பாளர் நாயகம் எச்.எஸ்.கே.ஜே.பண்டார ஆகியோர் கலந்துக்கொண்டமை குறிப்பிடத்தக்கது.

ஐ.நா. மனித உரிமைகள் பேரவையின் 60 ஆவது கூட்டத்தொடர் எதிர்வரும் செப்டம்பர் 03 ஆம் திகதி ஜெனிவாவில் ஆரம்பமாகவுள்ளது.

ஒக்டோபர் 03 ஆம் திகதிவரை இம்மாநாட்டில் இலங்கை தொடர்பில் புதிய தீர்மானமொன்று வரவுள்ளது. அத்துடன், ஐ.நா. மனித உரிமைகள் ஆணையாளரின் மீளாய்வு அறிக்கையும் முன்வைக்கப்படவுள்ளது.

எனவே, இலங்கை அரசின் சார்பில் வெளிவிவகார அமைச்சர் தலைமையிலான உயர்மட்டக்குழுவொன்று பங்கேற்கவுள்ளது என தெரியவருகின்றது.

அதேபோல ஜெனிவா தொடருக்கு முன்னதாக பயங்கரவாத தடைச்சட்டம் நீக்கப்படவுள்ளது எனவும், நிகழ்நிலை சட்டம்கூட மீளாய்வுக்குட்படுத்தப்படவுள்ளதெனவும் அறியமுடிகின்றது.

செம்மணி மனித புதைகுழியில் ஏற்கனவே அடையாளம் காணப்பட்ட எலும்பு கூட்டு தொகுதியில், இரு சிறுவர்களின் எலும்பு கூடுகள் நேற்று திங்கட்கிழமை அகழ்ந்து எடுக்கப்பட்டுள்ளது.

செம்மணி மனித புதைகுழியில் இரண்டாம் கட்ட அகழ்வு பணியின் ஐந்தாம் நாள் பணிகள் நேற்று முன்னெடுக்கப்பட்டது.

செம்மணி அகழ்வு பணிகள் ஆரம்பிக்கப்பட்ட மே மாதம் முதல் நேற்று முன்தினம் ஞாயிற்றுக்கிழமை வரையில் 33 மனித எலும்பு கூட்டு எச்சங்கள் அடையாளம் காணப்பட்டிருந்தன.

அவற்றில் ஏற்கனவே 22 எலும்பு கூட்டு எச்சங்கள் அகழ்ந்து எடுக்கப்பட்டுள்ள நிலையில் நேற்றைய தினம் மேலும் இரண்டு எலும்புக்கூடுகள் அகழ்ந்து எடுக்கப்பட்டுள்ளன.

இறுதியாக அடையாளம் காணப்பட்ட எலும்பு கூட்டு தொகுதிகள் ஒன்றுடன் ஒன்றின் பின்னி பிணைந்து குழப்பமான முறையில் காணப்படுவதால் அதனை அகழ்ந்து எடுப்பதில் அகழ்வில் ஈடுபட்டுள்ளவர்கள் சவால்களை எதிர்கொண்டு உள்ளதாக தெரிவிக்கபப்டுகிறது.

ஏற்கனவே அடையாளம் காணப்பட்ட 33 எலும்பு கூடுகளில் நேற்றைய தினம் திங்கட்கிழமை வரையில் 24 எலும்புக்கூடுகள் முற்றாக அகழ்ந்து எடுக்கப்பட்டுள்ள நிலையில், ஏனையவற்றையும் அகழ்ந்து எடுக்கும் பணிகள் முன்னெடுக்கப்பட்டமையால் புதிதாக எவையும் அடையாளம் காணப்படவில்லை என தெரிவிக்கப்பட்டது.

அதேவேளை நேற்று முன்தினம் ஞாயிற்றுக்கிழமை புதைகுழி ஒன்றினுள் அடையாளம் காணப்பட்ட நீல நிற பை முற்றாக அகழ்ந்து எடுக்கப்படவில்லை. அதனை அகழ்ந்து எடுக்கும் பணிகள் நடைபெற்று வருகின்றன.

செம்மணி புதைகுழிகளில் மீட்கப்படும் எலும்புக் கூடுகளை Ai தொழில்நுட்பத்தின் ஊடாக மாற்றி அமைப்போருக்கும், அதனை சமூக ஊடகங்களில் பகிர்வோருக்கும் எதிராக சட்ட நடவடிக்கை எடுக்கப்படும் என செம்மணி புதைகுழி வழக்கில் காணாமல் ஆக்கப்பட்டவர்களின் உறவினர்கள் சார்பாக முன்னிலையாகும் சட்டத்தரணி ரனித்தா ஞானராஜா எச்சரித்துள்ளார்.

இது தொடர்பாக அவர் மேலும் தெரிவிக்கையில்,

செம்மணி புதைகுழியில் காணப்படும் எலும்புக் கூடுகளை வைத்து, Ai தொழில்நுட்ப உதவியுடன் படங்கள் உருவாக்கப்பட்டு, அவை சமூக வலைத்தளங்களில் பரப்பப்பட்டு வருகிறது.

குற்றவியல் நடவடிக்கையாக நீதிமன்ற நடவடிக்கை ஊடாக விசாரணையில் இருப்பதனால் போலியாக உருவாக்கப்பட்ட படங்கள் சமூக வலைத்தளங்களில் பகிரப்படுவதனால், அவை குற்றவியல் விசாரணைக்கு தடையை ஏற்படுத்துகின்றன.

அதேவேளை பாதிக்கப்பட்டவர்களின் உருவ அடையாளங்கள் மாற்றப்பட்டு, வழக்கினை பிழையாக திசைதிருப்பிக் கொண்டுசெல்வதற்கான உத்தியாக இதனை கையாள்கின்றனரா என்ற சந்தேகமும் ஏற்பட்டுள்ளது.

எனவே, இவ்வாறான படங்களை உருவாக்குபவர்கள் மற்றும் அதனை சமூக ஊடகங்களில் பகிர்வோருக்கு எதிராக நீதிமன்றில் வழக்குத் தாக்கல் செய்வது தொடர்பாக ஆலோசனை நடத்தி வருகின்றோம்.

இனி வரும் காலங்களிலும் அவ்வாறான படங்கள் உருவாக்கப்பட்டு, அதனை சமூக வலைத்தளங்களில் பகிர்வோருக்கு எதிராக, குற்றவியல் விசாரணைக்கு இடையூறு ஏற்படுத்தினார்கள் எனவும், நீதிமன்றில் நிலுவையில் உள்ள வழக்கு நடவடிக்கைகளில் தலையீடு செய்தல் போன்ற குற்றங்களுக்கு எதிராக முறைப்பாடு செய்யப்பட்டு அவர்களுக்கு எதிராக சட்ட நடவடிக்கை எடுக்கப்படும்.

எனவே, இந்த வழக்கு விசாரணைகள் சரியான முறையில் முன்னெடுத்துச் செல்லப்படுவதற்கு அனைத்து தரப்பினரும் ஒத்துழைக்க வேண்டும் என கேட்டுக்கொண்டுள்ளனர் எனத் தெரிவித்தார்.

“பாலஸ்தீனத்துக்கு சுதந்திரம் : யுத்தத்தை நிறுத்து” என்ற கருப்பொருளை வலியுறுத்தி, சிவில் சமூக அமைப்புக்கள் மற்றும் பாலஸ்தீன ஐக்கிய மக்கள் இயக்கம் ஆகியன இணைந்து கொழும்பில் இன்று (30) ஆர்ப்பாட்டப் பேரணியொன்றை முன்னெடுத்தன.

பெருந்திரளான மக்களின் பங்கேற்பில் கொழும்பு கொம்பனித் தெருவில் ஆரம்பிக்கப்பட்ட இந்த பேரணி இஸ்ரேல், அமெரிக்காவுக்கு எதிரான ஆர்ப்பாட்டப் பேரணியாக அமைந்தது.

கொழும்பு 3, கொள்ளுப்பிட்டியில் அமைந்துள்ள அமெரிக்க தூதரகத்தை நோக்கிச் சென்ற இப்பேரணியினர் “கொல்லாதே கொல்லாதே குழந்தைகளை கொல்லாதே”, “இனப்படுகொலையை நிறுத்து” என கோஷமிட்டும் பதாதைகளை ஏந்தியும் ஆர்ப்பாட்டம் செய்தனர்.

வடக்கு கிழக்கில் கடைசியாக இரு உள்ளூராட்சி சபைகளில் இன்று (30) ஆட்சி அமைக்கப்பட்டுள்ளன.
இதன்படி நெடுந்தீவு மற்றும் ஆலையடிவேம்பு ஆகிய இரண்டிலும்இ. இலங்கைத் தமிழரசுக் கட்சி நிர்வாகத்தை அமைத்திருக்கிறது.

அதற்கமைய, நெடுந்தீவு பிரதேச சபையின் தவிசாளராக தமிழரசுக் கட்சியின் சங்கரப்பிள்ளை சத்தியவர்தன் ஏகமனதாக தெரிவு செய்யப்பட்டார். உபதவிசாளராக தமிழரசுக்கட்சியின் உறுப்பினர் செபஸ்ரியன் விமலதாஸ் தெரிவாகியுள்ளார்.

‘இலங்கை தமிழரசுக் கட்சி 58 சபைகளில் போட்டியிட்டாலும், 12 சபைகளில் தமிழ் மக்கள் எண்ணிக்கையில் மிகவும் குறைவாகவே இருக்கிறார்கள்’.  ‘ஒன்று அல்லது இரண்டு பிரதிநிதிகளைப் பெறுவதற்காகவே அவற்றில் நாம் போட்டியிட்டோம், அப்படி பிரதிநிதித்துவத்தைப் பெற்றும் கொண்டோம்’ என்று கட்சியின் பொதுச் செயலாளர் எம்.ஏ.சுமந்திரன் தெரிவித்துள்ளார்.

மிகுதி 46 சபைகளில் 34 சபைகளில் இலங்கைத் தமிழரசுக் கட்சி நிர்வாகங்களை அமைத்துள்ளது.
இதன்படி ’58 சபைகளில், 46 இல் எமது இலக்கை அடைந்துள்ளோம் என்றும் மிகுதி சபைகளிலும் இரண்டாவது இடத்தை வகிக்கிறோம் என்றும் அவர் குறிப்பிட்டுள்ளார்.

‘இது இலங்கைத் தமிழ் அரசுக் கட்சிக்குக் கிடைத்த பெரு வெற்றி என்பதற்கு அப்பால், மக்கள் கொடுத்திருக்கும் ஆணையாக நாம் ஏற்றுக் கொண்டு உள்ளூராட்சி சபைகளின் முழு அதிகாரங்களையும் உபயோகித்து மக்களுக்கு சேவையாற்றுவோம்’ என்று கட்சியின் பொதுச்செயலாளர் எம்.ஏ.சுமந்திரன் தெரிவித்துள்ளார்.

நகர அபிவிருத்தி, நிர்மாண மற்றும் வீடமைப்பு அமைச்சின் அண்மைய விசாரணையில் யாழ்ப்பாணத்தில் உள்ள ஜனாதிபதி மாளிகையானது உள்ளூர் மக்களிடமிருந்து சட்டவிரோதமாக சுவீகரிக்கப்பட்ட காணியில் நிர்மாணிக்கப்பட்டுள்ளமை தெரியவந்துள்ளது.

குறித்த மாளிகை கட்டப்பட்ட நிலத்தின் சட்டப்பூர்வ உரிமையைக் கோரி எட்டு நபர்கள் முன்வந்துள்ளனர்.
இது சாத்தியமான முதலீட்டாளர்களுக்கு அங்கு முதலீடுகளை செய்வதில் சிக்கல்களை உருவாக்குகிறது என்று தகவல்கள் தெரிவிக்கின்றன

இவ்விடயம் தொடர்பில் கருத்துத் தெரிவித்த நகர அபிவிருத்தி, நிர்மாண மற்றும் வீடமைப்பு அமைச்சர் அனுர கருணாதிலக்க, எந்தவொரு முதலீட்டாளருக்கும் சொத்தை வழங்குவதற்கு முன்னர் அனைத்து உரிமைப் பிரச்சினைகளும் முழுமையாக தீர்க்கப்பட வேண்டும் என்று குறிப்பிட்டுள்ளார். இந்தநிலையில் அங்குள்ள சட்ட தடைகளை நீக்குவதற்கான நடவடிக்கைகள் தற்போது மேற்கொள்ளப்பட்டு வருவதாகவும் அவர் குறிப்பிட்டுள்ளார்.

யாழ்ப்பாணம் ஜனாதிபதி மாளிகையை பல்வேறு முதலீட்டு நோக்கங்களுக்காக பெறுவதற்கு கனடாவை சேர்ந்த முதலீட்டாளர் உட்பட பல தரப்பினர் ஏற்கனவே விருப்பம் தெரிவித்திருந்தனர். 2010 மற்றும் 2015 ஆண்டுகளுக்கு இடையில் நிர்மாணிக்கப்பட்ட குறித்த ஜனாதிபதி மாளிகை காங்கேசன்துறையில் சுமார் 30 ஏக்கர் நிலப்பரப்பில் அமைந்துள்ளது.  அதில் சுமார் 15 ஏக்கரில் கட்டடங்கள் கட்டப்பட்டுள்ளன.
இந்தக் கட்டுமானங்களுக்காக சுமார் 3.5 பில்லியன் ரூபாய் செலவிடப்பட்டுள்ளதாகத் தெரிவிக்கப்படுகிறது.