மத ஆடைக்குப் பின்னால் ஒளிந்திருக்கும் போலித் துறவிகளை நாட்டு மக்கள் விரட்டியடிக்க வேண்டும் என்று இராஜாங்கணை சத்தாரதன தேரர் தெரிவித்துள்ளார்.
இலங்கை மக்கள் ஜனநாயக ரீதியாகத் தேர்ந்தெடுத்த புதிய அரசாங்கத்தின் பணிகளுக்கு முட்டுக்கட்டை போடும் வகையிலும், சட்டத்திலிருந்து தப்பித்துக் கொள்வதற்காகவும் பௌத்த மத ஆடையை தவறாகப் பயன்படுத்தும் போலித் துறவிகளுக்கு எதிராக நாடளாவிய ரீதியில் மக்கள் ஒன்றிணைய வேண்டும் என்றும் அவர் கோரிக்கை விடுத்துள்ளார்.
பலாங்கொட கஸ்ஸப தேரர் உள்ளிட்ட சில தரப்பினர் தங்களின் தனிப்பட்ட மற்றும் அரசியல் தேவைகளுக்காகப் பௌத்த சாசனத்தைக் கொச்சைப்படுத்தி வருவதாக அவர் கடுமையாக சாடியுள்ளார்.
இது குறித்து மேலும் கருத்து வெளியிட்ட அவர், “நாட்டின் வளங்களைச் சூறையாடி, ஊழல் மற்றும் மோசடிகளில் ஈடுபட்டு மக்களால் நிராகரிக்கப்பட்ட பழைய அரசியல்வாதிகளுக்கு மீண்டும் அதிகாரத்தைப் பெற்றுக்கொடுக்கும் நோக்குடனேயே இவர்கள் தற்சமயம் பௌத்த மதத்தை ஒரு கேடயமாகப் பயன்படுத்தி மக்களைக் தூண்டிவிட முயற்சிக்கின்றனர்.
நாட்டில் நிலவிவந்த ஊழல், மோசடி மற்றும் அநீதிகளுக்கு எதிராக மக்கள் தங்களின் பேராதரவை வழங்கி புதிய அரசாங்கத்தைப் பலமான பெரும்பான்மையுடன் ஆட்சியில் அமர்த்தியுள்ளனர்.
தற்சமயம் அரசாங்கம் நாட்டின் பொருளாதாரத்தை மீட்டெடுக்கவும், கடந்த காலங்களில் இடம்பெற்ற திருட்டுகளைக் கண்டுபிடித்து சட்டத்தின் முன் நிறுத்தவும் தீவிரமான நடவடிக்கைகளை எடுத்து வருகின்றது.
இந்த நிலையில், மதத்தின் பெயரால் இனவாதத்தையோ அல்லது தேவையற்ற மதக் கலவரங்களையோ தூண்டிவிட்டு அரசாங்கத்தின் செயல்பாடுகளை முடக்க நினைக்கும் இத்தகைய சக்திகளுக்கு எதிராகப் காவல்துறையும், சட்டதுறையினரும் எந்தவித அச்சமுமின்றிச் சட்டத்தை நிலைநாட்ட வேண்டும்” என்று அவர் தெரிவித்துள்ளார்.
“கடந்த கண்டி இராச்சியக் காலத்தில் ஒழுக்கக்கேடான முறையில் நடந்துகொண்ட போலித் துறவிகள் எவ்வாறு சாசனத்திலிருந்து விரட்டியடிக்கப்பட்டார்களோ, அதேபோல தற்போதும் மத ஆடைக்குப் பின்னால் ஒளிந்திருக்கும் இத்தகைய நபர்களைப் பௌத்த சாசன தூய்மைக்காகவும் நாட்டின் அமைதிக்காகவும் மக்கள் புறக்கணிக்க வேண்டும்” என்றும் அவர் கூறியுள்ளார்.
