யாழ். மாநகர சபைக்குச் சொந்தமான 25 கோடி ரூபாய் பெறுமதியான காணி ஒன்று மோசடியாக அபகரிக்கப்பட்டுள்ளமை தொடர்பில் மாநகர சபை நிர்வாகம் காட்டியுள்ள அலட்சியப் போக்கு கண்டிக்கத்தக்கது என இலங்கை தமிழ் அரசுக் கட்சியின் தலைவர் சி.வீ.கே.சிவஞானம் தெரிவித்துள்ளார்.
மாநகர சபைக் காணிகள் தொடர்பாக பொதுச்சபைக் கூட்டத்தில் புதிய குழு ஒன்று நியமிக்கப்பட்டுள்ளதாகத் தெரியவருவதாகவும், இவ்வளவு பெறுமதியான சொத்து அபகரிப்பு விவகாரத்தை மிக முக்கியப் பிரச்சினையாகக் கருதி இக்குழு உடனடியாக நடவடிக்கை எடுக்கவேண்டும் எனவும் அவர் வலியுறுத்தியுள்ளார்.
இக்கடிதம் அனுப்பப்பட்ட நாளிலிருந்து அடுத்த நான்கு வாரங்களுக்குள் எடுக்கப்பட்ட நடவடிக்கைகள் மற்றும் அவற்றின் முன்னேற்றம் குறித்து தனக்கு அறிவிக்குமாறும் அவர் கேட்டுக்கொண்டுள்ளார்.
இந்த விடயம் தொடர்பாக ஏற்கனவே மக்கள் அறிதலுக்காக ஊடகங்களுக்குக் கருத்து தெரிவிக்கப்பட்டிருந்தமை குறிப்பிடத்தக்கது எனத் தெரிவித்த சி.வீ.கே.சிவஞானம், குறித்த கடிதத்தையும் ஊடகங்களுக்கு வெளியிட்டுள்ளார்.
