மத்திய கிழக்கு முழுவதும் உள்ள தளங்களில் இருந்து அமெரிக்க இராணுவம் அமைதியாக துருப்புக்களைத் திரும்பப் பெறத் தொடங்கியுள்ளது, அதே நேரத்தில் வொஷிங்டன் அப்பகுதியில் உள்ள பல தூதரகங்களில் இருந்து தூதரகப் பணியாளர்களை வெளியேறுமாறு உத்தரவிட்டுள்ளது என்று என்பிசி நியூஸ் செய்தி வெளியிட்டுள்ளது.
ஈரான் மீது ஒரு புதிய அலைத் தாக்குதல்களைத் தொடங்குவது குறித்து அதிபர் டொனால்ட் ட்ரம்ப் பரிசீலித்து வரும் வேளையில் இந்த நடவடிக்கைகள் எடுக்கப்பட்டுள்ளன. மேலும், இந்தத் திரும்பப் பெறுதல்கள், பெப்ரவரியில் நடந்த ஆரம்பகட்ட அமெரிக்க-இஸ்ரேலியத் தாக்குதல்களுக்கு முன்னதாக பென்டகன் மற்றும் வெளியுறவுத் துறையால் செய்யப்பட்ட தயாரிப்புகளை ஒத்திருப்பதாக, இரண்டு அமெரிக்க அதிகாரிகள் மற்றும் இவ்விஷயம் குறித்து அறிந்த இருவரை மேற்கோள் காட்டி என்பிசி புதன்கிழமை(21) செய்தி வெளியிட்டது.
ஜோர்டான், கத்தார் மற்றும் குவைத்தில் நிலைநிறுத்தப்பட்டுள்ள அமெரிக்கத் துருப்புக்களும் இடமாற்றம் செய்யப்படுபவர்களில் அடங்குவர் என்று அந்த அறிக்கை கூறுகிறது. வான் பாதுகாப்பு மற்றும் பாதுகாப்புக்குப் பொறுப்பான பணியாளர்கள் உட்பட, தனது பிராந்தியத் தளங்களில் வரையறுக்கப்பட்ட அளவிலான இருப்பைப் பராமரிக்க வொஷிங்டன் திட்டமிட்டுள்ளதாகக் கூறப்படுகிறது. பெப்ரவரி 28 தாக்குதலுக்கு முன்னதாக, எதிர்பார்க்கப்பட்ட ஈரானியப் பதிலடியிலிருந்து அவர்களைப் பாதுகாப்பதற்காக, பென்டகன் பாதிக்கப்படக்கூடிய தளங்களில் இருந்து பெருமளவிலான துருப்புக்களைத் திரும்பப் பெற்றது.
ஆயிரக்கணக்கான அமெரிக்கப் படை வீரர்கள் பொதுமக்கள் தங்கும் விடுதிகள் மற்றும் அலுவலகக் கட்டிடங்களில் தஞ்சம் புகுந்ததைத் தொடர்ந்து, வளைகுடாப் பகுதி மக்களை “மனிதக் கேடயங்களாக” வொஷிங்டன் பயன்படுத்துவதாக தெஹ்ரான் குற்றம் சாட்டியது.
அமெரிக்க மத்திய கட்டளைப் பிரிவின் செய்தித் தொடர்பாளர் டிமோதி ஹாக்கின்ஸ், படைகளின் நகர்வுகள் குறித்த செய்திகள் பற்றி விவாதிக்க மறுத்துவிட்டார். மேலும், “பணித் தயார்நிலையை மேம்படுத்துவதற்காக” அமெரிக்கப் படைகள் தொடர்ந்து இடமாற்றம் செய்யப்படுவதாகவும், அமெரிக்கப் பணியாளர்கள் மற்றும் நலன்களைப் பாதுகாக்கத் தயாராக இருப்பதாகவும் அவர் கூறினார்.
ஏமனின் ஹூதி இயக்கம், பொதுமக்கள் விமான நிலையங்கள் மற்றும் பிற முக்கிய உள்கட்டமைப்புகள் மீது அதிகரித்து வரும் தாக்குதல்களைக் காரணம் காட்டி, அத்தியாவசியமற்ற பணியாளர்கள் மற்றும் அவர்களது குடும்பத்தினர் சவூதி அரேபியாவை விட்டு வெளியேறுமாறு அமெரிக்க வெளியுறவுத் துறை உத்தரவிட்டுள்ளது.
வளைகுடா முழுவதும் கூடுதல் தூதரகப் படைக ளைத் திரும்பப் பெறுவதற்கு வொஷிங்டன் தயாராகி வருவதாக அமெரிக்க அதிகாரிகளை மேற்கோள் காட்டி ரொய்ட்டர்ஸ் செய்தி வெளியிட்டது. ஆனால், மேலும் படைகள் திரும்பப் பெறப்படுவது குறித்த செய்திகள் “தவறானவை” என்று வெளியுறவுத் துறை செய்தித் தொடர்பாளர் டாமி பிக்காட் விவரித்தார்.
ஈரானுக்கு எதிரான தாக்குதல்களை மீண்டும் தொடங்குவதற்கான வழிகளை மூத்த அமெரிக்க இராணுவ அதிகாரிகள் ட்ரம்பிடம் முன்வைத்துள்ளதாக வரும் செய்திகளுக்கு மத்தியில் இந்த நிகழ்வுகள் நடந்துள்ளன. என்பிசி-யின்படி, இந்தத் திட்டங்களில் ஈரானிய அணுசக்தி நிலையங்கள், நிலத்தடி அமைப்புகள் மற்றும் முக்கிய எண்ணெய் ஏற்றுமதி மையமான கார்க் தீவு, ஹோர்முஸ் ஜலசந்தியில் உள்ள கெஷ்ம் உள்ளிட்ட மூலோபாய முக்கியத்துவம் வாய்ந்த தீவுகள் மீதான தாக்குதல்கள் அடங்கும்.
