இலங்கையின் பசுமை உட்கட்டமைப்பு மற்றும் முதலீட்டில் சீனா – இலங்கை புதிய கூட்டாண்மை

இலங்கையின் நீர், புதுப்பிக்கத்தக்க வலுசக்தி மற்றும் சுற்றுச்சூழல் பாதுகாப்பு திட்டங்களில் சீன தொழில்நுட்பம், பொறியியல் நிபுணத்துவம் மற்றும் முதலீட்டு வளங்களை இணைப்பதற்கான மூலோபாய புரிந்துணர்வு ஒப்பந்தம் கைச்சாத்திடப்பட்டுள்ளது.

இலங்கையின் தகவல் தொடர்பாடல் தொழில்நுட்ப விநியோகம் மற்றும் பல்துறை வணிகத் துறையில் செயற்பட்டு வரும் ABC Trade & Investments (Pvt) Ltd மற்றும் All-China Environment Federation (ACEF) ஆகியவற்றுக்கு இடையே இந்த புரிந்துணர்வு ஒப்பந்தம் கைச்சாத்திடப்பட்டது.
ஒப்பந்தத்தின் மூலம் தொழில்துறை உட்கட்டமைப்பு முதலீடுகளை விரிவுபடுத்துதல், வெளிநாட்டு தொழில்நுட்ப அணுகலை அதிகரித்தல், தொழில்துறைக்கான சுற்றுச்சூழல் தரநிலைகள் மற்றும் தொழில்நுட்பத் திறன்களை மேம்படுத்துதல், அத்துடன் நீண்டகால வளப் பாதுகாப்பு மற்றும் வலுசக்தி தேவைகளுக்கு தீர்வு காணுதல் ஆகியவற்றுக்கு முன்னுரிமை வழங்கப்படவுள்ளது.

ABC Trade & Investments நிறுவனத்தின் பணிப்பாளரும் பிரதம நிறைவேற்று அதிகாரியுமான அமல்ராஜா ஜயசீலன் மற்றும் ACEF இன் Belt & Road Eco-Industry Cooperation சூழல்–தொழில்துறை இடையிலான ஒத்துழைப்பு பணிக்குழுவின் பொதுச்செயலாளர் ஷி ஜியாங் ஆகியோர் ஒப்பந்தத்தில் கைச்சாத்திட்டனர்.

கொழும்பு Nondescripts Cricket Club (NCC) மைதானத்தில் நடைபெற்ற சீனா–இலங்கை சுற்றுச்சூழல் மற்றும் வலுசக்தி பரிமாற்றம் மற்றும் ஒத்துழைப்பு தொடர்பான கூட்டத்தின்போது இந்த ஒப்பந்தம் கைச்சாத்திடப்பட்டது.

ஒத்துழைப்பின் கீழ் நகர்ப்புற மற்றும் கிராமிய நீர் விநியோகம் மற்றும் வடிகாலமைப்பு, கழிவுநீர் சுத்திகரிப்பு, தொழில்துறை பூங்கா கழிவுநீர் முகாமைத்துவம், கிராமிய குடிநீர் சுத்திகரிப்பு, புதுப்பிக்கத்தக்க வலுசக்தி நிறுவல்கள் மற்றும் நீர் உட்கட்டமைப்புடன் இணைந்த பசுமை வலுசக்தி திட்டங்கள் முன்னுரிமைப் பகுதிகளாக அடையாளம் காணப்பட்டுள்ளன.
தொழில்நுட்ப பரிமாற்றம், உள்ளூர்மயமாக்கல் மற்றும் திறன் மேம்பாட்டுக்கும் முக்கியத்துவம் வழங்கப்படவுள்ளது. தொழில்நுட்ப கருத்தரங்குகள், வர்த்தக சந்திப்புகள், வணிகப் பரிமாற்றங்கள் மற்றும் சீனாவில் உள்ள மாதிரி மையங்களுக்கான களப்பயணங்கள் மூலம் ஒத்துழைப்பு மேலும் விரிவுபடுத்தப்படவுள்ளது.

ACEF தனது சீன சுற்றுச்சூழல், நீர் பொறியியல், புதுப்பிக்கத்தக்க வலுசக்தி மற்றும் EPC முதலீட்டு வலையமைப்பை வழங்கும் நிலையில், ABC Trade & Investments நிறுவனம் தனது நீர் விஞ்ஞானப் பிரிவு ஊடாக ஆலோசனை, வடிவமைப்பு, உபகரண விநியோகம், நிறுவல், பரிசோதனை மற்றும் நீண்டகால இயக்கம் மற்றும் பராமரிப்பு உள்ளிட்ட சேவைகளை வழங்கவுள்ளது.

இந்த புரிந்துணர்வு ஒப்பந்தத்தின் கீழ் தனித்தனி தொழில்நுட்ப மற்றும் வர்த்தகத் திட்டங்கள் அடையாளம் காணப்பட்டு, மதிப்பீடு செய்யப்பட்டு, தனித்தனியாக ஒப்பந்தம் செய்யப்படவுள்ளன. இதன் மூலம் இலங்கையின் நீண்டகால சுற்றுச்சூழல் மற்றும் சிவில் உட்கட்டமைப்பு தேவைகளுக்கு நடைமுறை மற்றும் அளவிடக்கூடிய தீர்வுகளை உருவாக்குவதே இரு தரப்பினரின் நோக்கமாகும்.

 

RELATED ARTICLESMORE FROM AUTHOR