இலங்கைக்கு சலுகை அடிப்படையில் எரிபொருளை வழங்குவதற்கு ஈரான் முன்வந்த போதிலும், அதனைப் பெற்றுக்கொள்வதற்கான கப்பல் வசதிகள் இலங்கையிடம் இல்லாத காரணத்தினால் அந்த வாய்ப்பைப் பயன்படுத்த முடியாத சூழல் ஏற்பட்டுள்ளதாக அரசாங்கம் உத்தியோகபூர்வமாக அறிவித்துள்ளது.
நேற்று நடைபெற்ற அமைச்சரவை முடிவுகளை அறிவிக்கும் ஊடகவியலாளர் சந்திப்பின் போது பேசிய அமைச்சர் நளிந்த ஜயதிஸ்ஸ, ஈரானிய தூதுவரின், உதவி தொடர்பான முன்மொழிவை இலங்கை அரசாங்கம் மனதார வரவேற்பதாகக் குறிப்பிட்டார்.
எனினும், ஒரு நாடு மற்றொரு நாட்டிலிருந்து நேரடியாக எரிபொருளை இறக்குமதி செய்ய வேண்டுமானால், அதற்குரிய பிரம்மாண்டமான எண்ணெய் தாங்கிக் கப்பல்கள் அந்த நாட்டிடம் இருக்க வேண்டும் அல்லது அத்தகைய வசதிகளைக் கொண்டிருக்க வேண்டும்.
துரதிர்ஷ்டவசமாக இலங்கையிடம் அத்தகைய சொந்தக் கப்பல் கட்டமைப்பு இல்லாத காரணத்தினால், ஈரானிடமிருந்து எரிபொருளைத் தடையின்றி கொண்டு வருவதில் பெரும் நடைமுறைச் சிக்கல்கள் இருப்பதாக அவர் விளக்கமளித்தார்.
மத்திய கிழக்கில், குறிப்பாக ஹோர்முஸ் நீரிணைப் பகுதியில் நிலவி வரும் போர் மேகங்கள் மற்றும் சர்வதேச அரசியல் பதற்றங்களுக்கு மத்தியிலும், ஒரு நட்பு நாடு என்ற ரீதியில் இலங்கைக்குத் தேவையான அத்தியாவசியப் பொருட்களை வழங்க ஈரான் தனது உறுதிப்பாட்டை அண்மையில் வெளிப்படுத்தியிருந்தது.
குறிப்பாக, இலங்கை தரப்பிலிருந்து முறையான கோரிக்கை விடுக்கப்பட்டால், தற்போதைய பொருளாதார நெருக்கடிக்குத் தீர்வாக எரிபொருள் உள்ளிட்ட உதவிகளை வழங்கத் தயார் என இலங்கைக்கான ஈரான் தூதுவர் உறுதியளித்திருந்தார்.
இவ்வாறானதொரு சூழலில், ஈரானின் இந்த வாய்ப்பைப் பயன்படுத்திக் கொள்வது இலங்கையின் எரிசக்தித் துறைக்கு பெரும் நிம்மதியை அளித்திருக்கும்.
ஆனால், போக்குவரத்து மற்றும் விநியோகச் சங்கிலியில் உள்ள இத்தகைய பலவீனங்கள் காரணமாக, ஒரு சர்வதேச உதவியைப் பெறுவதில் இலங்கை மீண்டும் பின்னடைவைச் சந்தித்துள்ளது.
இந்த விவகாரம் தற்போது அரசியல் மற்றும் பொருளாதார மட்டத்தில் பெரும் விவாதத்தை ஏற்படுத்தியுள்ளதுடன், இலங்கையின் எதிர்கால எரிசக்திப் பாதுகாப்பை உறுதி செய்ய சொந்தக் கப்பல் கட்டமைப்பின் அவசியம் குறித்தும் கேள்விகளை எழுப்பியுள்ளதாக விமர்சனங்கள் எழுந்துள்ளன.
