நாடாளுமன்றத்தில் நடைபெற்ற அந்நியச் செலாவணிச் சட்டத்தின் கீழான ஒழுங்கு விதிகள் மீதான விவாதத்தில் நாடாளுமன்ற உறுப்பினர் சிவஞானம் சிறீதரன் ஆற்றிய உரை தொடர்பில் சபையில் சர்ச்சை எழுந்துள்ளது.
நாடாளுமன்ற உறுப்பினர் சிறீதரனின் உரையில் உள்ள விடுதலைப்புலிகள் தொடர்பான விடயங்களை ஹன்சாட்டில் இருந்து நீக்குமாறு யாழ்ப்பாணம் மாவட்ட நாடாளுமன்ற உறுப்பினர் அர்ச்சுனா இராமநாதன் வலியுறுத்தியுள்ளார்.
இதையடுத்து சபாபீடத்துக்குத் தலைமை தாங்கிய சிறிலங்கா பொதுஜன பெரமுனவின் நாடாளுமன்ற உறுப்பினர் சானக மாதுகொடவிடம் அந்தக் கோரிக்கையை விடுத்துள்ளார்.
விவாதத்தின் போது உரையாற்றிய சிறீதரன், தியாக தீபம் திலீபனின் சிலை அகற்றப்பட்டமை, அதனால் தமிழ் மக்கள் மத்தியில் எழுந்துள்ள எதிர்ப்பு மற்றும் கவலைகள், அரசின் தமிழர் விரோத நடவடிக்கைகள், விடுதலைப் புலிகள் அமைப்பு மீதான தடை நீக்கத்தின் அவசியம் மற்றும் நாட்டில் நல்லிணக்கம் மலர அரசு செய்ய வேண்டியவை குறித்து மிகவும் உணர்வுபூர்வமாகக் கருத்துக்களை முன்வைத்தார்.
நாடாளுமன்ற உறுப்பினர் சிறீதரனின் உரைக்குப் பிறகு ஒழுங்குப் பிரச்சினையை எழுப்பிய அர்ச்சுனா, நாடாளுமன்றத்தில் இனங்களுக்கிடையே பிரச்சினைகளையும் பிளவுகளையும் ஏற்படுத்தும் வகையில் கருத்துக் கூறுவது அரசமைப்பை மீறும் செயல் என்று குறிப்பிட்டு அவரது உரையை ஹன்சாட்டில் இருந்து நீக்குமாறு கோரினார்.
இதனையடுத்து, சபாபீடத்துக்குத் தலைமை தாங்கிய சானக மாதுகொட கருத்துத் தெரிவிக்கையில், சிறீதரனின் உரையில் விடுதலைப் புலிகளை ஊக்குவிக்கும் வகையில் விடயங்கள் உள்ளடக்கப்பட்டிருந்தால் அவற்றை ஹன்சாட்டில் இருந்து நீக்குமாறு செயலாளர் குழுவைக் கேட்டுக்கொள்வதாகத் தெரிவித்தமை குறிப்பிடத்தக்கது.
