ஐக்கிய அரபு அமீரகத்தின் (UAE) மிகப்பெரிய நிலப்பரப்பு சார்ந்த (onshore) எண்ணெய் மற்றும் எரிவாயு வயல்களில் ஒன்றான ‘பு ஹசா’ (Bu Hasa) எண்ணெய் வளாகத்தில் தீ விபத்து ஏற்பட்டுள்ளதாகத் தெரிவிக்கப்படுகின்றது. அபுதாபிக்கு தென்மேற்கே அமைந்துள்ள இந்த வளாகத்தை ADNOC நிறுவனம் இயக்கி வருகிறது.
கடந்த வியாழக்கிழமை (1) ‘சென்டினல்-3’ (Sentinel-3) செயற்கைக்கோள் எடுத்த படங்களில், இந்த வளாகத்திற்கு மேலே சுமார் 50 கிலோமீட்டர் தூரத்திற்குக் கரும்புகை படர்ந்திருப்பது தெரிகிறது. நாசாவின் (NASA) FIRMS அமைப்பு இந்தத் தீ விபத்தின் வெப்ப ஆற்றலை 143 மெகாவாட் என்று பதிவு செய்தது. அதேவேளையில், VIIRS-இன் ‘மிட்-இன்ஃப்ராரெட்’ (mid-infrared) அலைவரிசை 367 கெல்வின் வெப்பநிலையைக் காட்டியது; இது அந்த உணரி (sensor) பதிவு செய்யக்கூடிய அதிகபட்ச அளவாகும். எனவே, தரவுகள் காட்டுவதைவிடத் தீயின் வெப்பம் அதிகமாக இருக்கக்கூடும் என்று இது உணர்த்துகிறது. இன்று அதிகாலையில், அபுதாபி பகுதியில் விமானப் போக்குவரத்து பாதிக்கப்பட்டது.
பு ஹசா வயலில் உற்பத்தி செய்யப்படும் எண்ணெய் ‘ஹப்ஷான்-புஜைரா’ (Habshan-Fujairah) எண்ணெய்க் குழாய் வழியாகக் கொண்டு செல்லப்படுகிறது; ஹார்முஸ் நீரிணையைத் (Strait of Hormuz) தவிர்த்துச் செல்லும் ஐக்கிய அரபு அமீரகத்தின் ஒரே ஏற்றுமதிப் பாதை இதுவாகும். இதேபோன்று, ஹார்முஸ் நீரிணையைத் தவிர்த்துச் செல்லும் சவுதி அரேபியாவின் ‘கிழக்கு-மேற்கு’ எண்ணெய்க் குழாய் மீது மூன்று வாரங்களுக்கு முன்பு தாக்குதல் நடத்தப்பட்டது.
ஐக்கிய அரபு அமீரக அதிபருக்கும் இஸ்ரேலியப் பிரதமருக்கும் இடையே நடைபெற்ற சந்திப்பிற்குப் பதிலடியாக, ஈரான் இந்த வளாகத்தின் மீது தாக்குதல் நடத்தியிருக்கலாம் என்று பல தரப்புகள் தெரிவிக்கின்றன.
