யாழ்ப்பாணம் – நல்லூரில் வைக்கப்பட்ட திலீபனின் சிலை அகற்றப்பட்டமை தொடர்பான முறைப்பாடு மற்றும் விசாரணைக்கான கோரிக்கை கடிதம் ஒன்று சட்டத்தரணி தனுக ரனஞ்சக கஹந்தகமகேவினால் இலங்கை மனித உரிமை ஆணைக்குழுவின் தலைவருக்கு அனுப்பி வைக்கப்பட்டுள்ளது.
குறித்த நடவடிக்கைகள் சட்டத்திற்கு இணங்கவும், இலங்கை அரசியலமைப்பின் கீழ் உத்தரவாதம் அளிக்கப்பட்டுள்ள அடிப்படை உரிமைகளுக்கு உரிய மதிப்பளித்தும் மேற்கொள்ளப்பட்டனவா? என்பதை ஆராயுமாறும் அவர் வலியுறுத்தியுள்ளார்.
மேலும் அந்தக் கடிதத்தில், “சட்டத்தரணியான நான், தனுக ரனஞ்சக கஹந்தகமகே, 2026 செப்டெம்பர் 27 ஞாயிற்றுக்கிழமையன்று யாழ்ப்பாணத்தில் காவல்துறையினரால் திலீபனின் சிலை அகற்றப்பட்டதாகக் கூறப்படும் சம்பவம் குறித்து, இலங்கை மனித உரிமைகள் ஆணைக்குழுவின் தலையீட்டை வேண்டி இம்முறைப்பாட்டை மரியாதையுடன் சமர்ப்பிக்கிறேன்.
பொதுவெளியில் கிடைக்கப்பெற்ற தகவல்கள் மற்றும் அறிக்கைகளின்படி, குறித்த சிலை காவல்துறையினரால் அகற்றப்பட்டுள்ளது.
இச்சம்பவம், கருத்துச் சுதந்திரம், அமைதியான முறையில் நினைவுகூருதல், சமத்துவம் மற்றும் சமூகங்களுக்கு முக்கியத்துவம் வாய்ந்த நபர்கள் மற்றும் நிகழ்வுகளை நினைவுகூரும் உரிமை தொடர்பான விடயங்களில் பொதுமக்களிடையே கவலைகளை எழுப்பியுள்ளது” என்றும் குறித்த கடிதத்தில் சுட்டிக்காட்டப்பட்டுள்ளது.
அதிகாரிகளால் மேற்கொள்ளப்பட்ட நடவடிக்கைகள் சட்டத்திற்கு இணங்கவும், இலங்கை அரசியலமைப்பின் கீழ் உத்தரவாதம் அளிக்கப்பட்டுள்ள அடிப்படை உரிமைகளுக்கு உரிய மதிப்பளித்தும் மேற்கொள்ளப்பட்டனவா என்பதை ஆராயுமாறு ஆணைக்குழுவை கோருவதாகவும் அவர் தமது கடிதத்தில் தெரிவித்துள்ளார்.
இதுதவிர சிலையை அகற்றும் நடவடிக்கை சட்டபூர்வமான அதிகாரத்தின் கீழும் உரிய நடைமுறைகளைப் பின்பற்றியும் மேற்கொள்ளப்பட்டதா?.
அனைத்து சமூகங்களின் நினைவுகூரும் நிகழ்வுகள் தொடர்பாகவும் இதேபோன்ற நடைமுறைகள் சமமாகப் பின்பற்றப்படுகின்றனவா?.
அதிகாரிகளின் நடவடிக்கைகளால் எவரேனும் ஒருவரின் அடிப்படை உரிமைகள் பாதிக்கப்பட்டுள்ளனவா? போன்ற கேள்விகளையும் சட்டத்தரணி தனுக ரனஞ்சக கஹந்தகமகே இலங்கை மனித உரிமை ஆணைக்குழுவிடம் முன்வைத்துள்ளார்.
எனவே, சிலை அகற்றப்பட்டதைச் சூழவுள்ள சூழ்நிலைகள் குறித்து சுயாதீனமான விசாரணையை மேற்கொள்ளுமாறு அவர் இலங்கை மனித உரிமைகள் ஆணைக்குழுவிடம் கோரியுள்ளார்.
இந்த நடவடிக்கைக்கான சட்ட அடிப்படை மற்றும் காரணங்கள் குறித்து சம்பந்தப்பட்ட காவல்துறை அதிகாரிகளிடமிருந்து அறிக்கையைப் பெற வேண்டும் என்றும் அவர் வலியுறுத்தினார்.
