கிழக்கு மாகாணத்தில் சூறாவளியால் பாதிக்கப்பட்ட மீன்பிடி சமூகங்களின் வாழ்வாதாரத்தை மீட்டெடுப்பதற்கும், அவர்களின் மீள்திறனை வலுப்படுத்துவதற்கும், ஜப்பானிய அரசாங்கமும் ஐக்கிய நாடுகளின் உணவு மற்றும் விவசாய அமைப்பும் இலங்கை அரசாங்கத்துடன் இணைந்து ஒரு கூட்டிணைந்த திட்டத்தை ஆரம்பித்துள்ளன.
இத்திட்டமானது, ஜப்பானிய தூதுவர் அகியோ இசோமடா மற்றும் இலங்கை மற்றும் மாலைதீவுகளுக்கான FAO பிரதிநிதி விம்லேந்திர ஷரண் ஆகியோரால் கைச்சாத்திடப்பட்டது. இந்நிகழ்வு வெள்ளிக்கிழமை (29) கொழும்பிலுள்ள ஜப்பானிய தூதரகத்தில், கடற்றொழில், நீரியல் வளங்கள் மற்றும் கடல்வளங்கள் அமைச்சர் இராமலிங்கம் சந்திரசேகர் முன்னிலையில் இடம்பெற்றது.
ஜப்பானிய அரசாங்கத்தின் நிதியுதவியுடன் மொத்தம் 1.33 மில்லியன் அமெரிக்க டொலர் செலவில் நடைமுறைப்படுத்தப்படும் இத்திட்டம், 2026 ஜூன் முதல் 2027 நவம்பர் வரை அம்பாறை, மட்டக்களப்பு மற்றும் திருகோணமலை மாவட்டங்களில் செயற்படுத்தப்படும். இத்திட்டம் டிட்வா சூறாவளியால் பாதிக்கப்பட்ட மீனவர்கள் மற்றும் கலாச்சாரம் சார்ந்த மீன்பிடி அமைப்புகளுக்கு உதவும். இத்திட்டத்தின் மூலம், உள்நாட்டு மீன்பிடி உற்பத்தி மற்றும் வாழ்வாதாரங்களை விரைவாக மீட்டெடுக்க திட்டமிடப்பட்டுள்ளது.
