இலங்கை எந்தவொரு வல்லரசு நாடுகளின் முகாமுக்கும் ஆதரவான நாடு அல்ல!

மேலும் யூரேசியப் பிராந்தியத்துடனான கடல் மற்றும் வான்வழிப் போக்குவரத்து இணைப்புகளை வலுப்படுத்த இலங்கை அரசு தயாராக இருப்பதாகவும், இரு நாடுகளுக்கும் இடையிலான வான்வழிப் போக்குவரத்துச் சேவைகளை ரஷ்யா ஆண்டு முழுவதும் தடையின்றித் தொடர வேண்டுமெனவும் அவர் கேட்டுக் கொண்டுள்ளார்.

இலங்கை எந்தவொரு வல்லரசு நாடுகளின் முகாமுக்கும் ஆதரவான நாடு அல்ல. புவிசார் அரசியலின் போர்க்களமாக மாற இலங்கை ஒருபோதும் விரும்பவில்லை. மாறாக, அனைத்து நாடுகளும் இணையும் ஒரு சங்கமப் புள்ளியாகவே இலங்கை இருக்க விரும்புகிறது. உலக நாடுகளின் இறையாண்மையை மதிக்கும் அனைத்து நட்பு நாடுகளுடனும் இணைந்து பணியாற்ற இலங்கை தயாராக உள்ளது’ என அமைச்சர் மேலும் திட்டவட்டமாகத் தெரிவித்தார்.

இலங்கைக்கும் ரஷ்யாவுக்கும் இடையிலான நிலப்பரப்பு தூரம் அதிகமாக இருந்தாலும், விமானப் போக்குவரத்துத் துறையில் இரு நாடுகளும் மிக நெருக்கமாகச் செயல்பட்டு வருவதாகக் குறிப்பிட்ட அமைச்சர், இலங்கை சுற்றுலாவுக்கு ரஷ்யாவில் பெரும் சாத்தியக்கூறுகள் இருப்பதால், ரஷ்யப் போக்குவரத்து அமைச்சு தனது விமானச் சேவைகளை ஆண்டு முழுவதும் தொடர்ந்து இயக்க வேண்டும் என்றும் கேட்டுக்கொண்டார்.

யூரேசியக் கட்டமைப்பில் இலங்கையும் இணைந்து பயன்பெற ஆர்வமாக உள்ளதாகத் தெரிவித்த அமைச்சர், இலங்கையின் அடுத்தகட்டப் பெரும் திட்டங்களையும் இதன் போது அறிவித்தார். அதற்கமைய நாட்டின் போக்குவரத்து உள்கட்டமைப்பை மேம்படுத்த அடுத்த 3 ஆண்டுகளில் 8 முதல் 10 பில்லியன் டொலர்கள் முதலீடு செய்யப்படவுள்ளது. இலங்கையில் இரண்டு புதிய துறைமுகங்கள் ஆரம்பிக்கப்படவுள்ளன.

இலங்கையின் பிரதான சர்வதேச விமான நிலையங்களில் ஒன்றின் செயல்பாடுகளை நிர்வகிக்க சர்வதேசத் தனியார் நிறுவனங்களுக்கு அழைப்பு விடுக்கப்பட்டுள்ளது. இந்த யூரேசிய போக்குவரத்து கட்டமைப்பின் மூலம் ரஷ்யா போன்ற பெரிய நாடுகள் மட்டுமன்றி, இலங்கை போன்ற வளரும் தீவு நாடுகளும் பெரும் நன்மையடையும் என நம்புவதாக அமைச்சர் மேலும் தெரிவித்தார்.