இலங்கைக்கான பிரித்தானிய உயர்ஸ்தானிகர் அண்ட்ரூ பற்றிக் (Andrew Patrick), சிவில் சமூக அமைப்புகளின் பிரதிநிதிகளை சந்தித்து, நாட்டின் தற்போதைய மனிதாபிமான மற்றும் மனித உரிமைச் சூழல் தொடர்பான முக்கிய விடயங்களைப் பற்றி விரிவான கலந்துரையாடல்களை மேற்கொண்டார்.
இந்த சந்திப்பின்போது, டித்வா சூறாவளிக்குப் பிந்தைய மனிதாபிமான முன்னுரிமைகள், பாதிக்கப்பட்ட மக்களுக்கான உதவித் திட்டங்கள் மற்றும் மறுசீரமைப்பு நடவடிக்கைகள் குறித்து கவனம் செலுத்தப்பட்டது.
மேலும், பயங்கரவாதத் தடுப்புச் சட்டம் (PTA) உட்பட சட்ட சீர்திருத்த செயல்முறைகள் தொடர்பான முன்னேற்றங்கள் குறித்தும் கலந்துரையாடப்பட்டன.
அதேபோல், நிலைமாறு கால நீதி (Transitional Justice) சார்ந்த முயற்சிகள், நல்லிணக்கத்தை உறுதிப்படுத்தும் நடவடிக்கைகள் மற்றும் இலங்கை முழுவதும் நிலவும் பரந்த மனித உரிமைச் சூழல் பற்றியும் கருத்துக்கள் பரிமாறப்பட்டன.
சிவில் சமூகத்தின் பங்களிப்பு ஜனநாயகம், சட்டத்தின் ஆட்சி மற்றும் மனித உரிமைகள் பாதுகாப்பில் மிக முக்கியமானது என்பதை உயர்ஸ்தானிகர் அண்ட்ரூ பற்றிக் இந்த சந்திப்பில் வலியுறுத்தியதாகத் தெரிவிக்கப்படுகிறது.
இந்த சந்திப்பு, மனிதாபிமான உதவி, சட்ட சீர்திருத்தம் மற்றும் மனித உரிமைகள் தொடர்பான ஒத்துழைப்பை மேலும் வலுப்படுத்தும் ஒரு முக்கிய முன்னேற்றமாகக் கருதப்படுகிறது.
