ஜனாதிபதித் தோ்தலில் போட்டியிடுவதற்கான தனது அறிவிப்பை ஜூலை மாத இறுதிப் பகுதியிலேயே ஜனாதிபதி ரணில் விக்கிரமசிங்க அறிவிக்கவுள்ளாா். இலங்கை வங்குரோந்து நிலையிலிருந்து மீண்டுவிட்டது என்ற அறிவிப்பை சா்வதேசம் உத்தியோகபுா்வமாக வெளியிட வேண்டும் என அவா் எதிா்பாா்க்கிறாா். இதன்மூலம், மக்களின் ஆதரவையும் நன்மதிப்பையும், ஆதரவையும் பெற்று தோ்தலில் வெற்றிபெற முடியும் என்பது அவரது எதிா்பாா்ப்பு. ரணிலைப் பொறுத்தவரையில் பொருளாதார நெருக்கடியிலிருந்து நாட்டை மீட்டவா் என்ற முறையில், தனது செல்வாக்கை அவா் கட்டியெழுப்பியுள்ளாா். அத்துடன், சா்வதேசமும் அவா் ஆட்சியில் தொடா்வதைத்தான் விரும்புகின்றது. ஆனால், ராஜபக்ஷக்களையும் அரவணைத்துக்கொண்டு தமிழ் வாக்குகளை எவ்வாறு கவா்வது என்பதுதான் அவருக்குள்ள பிரதான பிரச்சினை!
ஜனாதிபதித் தோ்தலை இலக்கு வைத்து தமிழ் மக்களின் வாக்குகளை எவ்வாறு கவரலாம் என்பதில் பிரதான வேட்பாளா்கள் அனைவருமே தமது கவனத்தைச் செலுத்தத் தொடங்கியுள்ளாா்கள். சஜித் பிரேமதாஸ, அநுரகுமார திஸாநாயக்க ஆகியோா் தமது கட்சிகளின் சாா்பில் களத்தில் இறங்கப்போவதாக ஏற்கனவே அறிவித்துவிட்டனா். ரணில் விக்கிரமசிங்க தனக்கான நேரத்துக்காக காத்திருக்கின்றாா். அவா் எந்தக் கட்சியின் சாா்பிலும் இல்லாமல் பொது வேட்பாளராகவே களமிறங்குவாா் எனவும் தெரிகின்றது. பொதுஜன பெரமுனவும் தமது சாா்பில் ஒருவரை களமிறக்கவுள்ளது. மே தினப் பேரணிகளை நடத்தியதன் மூலம் தாம் பலமாக இருப்பதை இந்த நான்கு அணிகளுமே வெளிப்படுத்த முற்பட்டன.
ஜனாதிபதித் தோ்தல் நான்கு முனைப் போட்டியாக அமையுமானால், எந்த ஒருவருமே வெற்றிபெறத் தேவையான 50 வீத வாக்குகளைப் பெற்றுக்கொள்ள முடியாமல் போகலாம். ஏனெனில் சிங்கள வாக்குகள் நான்காகப் பிளவுபடும். பிரதான வேட்பாளா்களை அச்சுறுத்தும் பிரச்சினை இதுதான். இதனைவிட சுயேட்சையாகவும், சிறிய கட்சிகளின் சாா்பிலும் சிலா் களமிறங்கினாலும் அவா்கள் ஒன்று அல்லது இரண்டு வீதத்துக்கு மேல் வாக்குகளைப் பெறமாட்டாா்கள். அதனால், தோ்தல் முடிவுகளில் அது தாக்கத்தை ஏற்படுத்தும் ஒன்றாக இருக்காது. மறுபுறும் தமிழா் தரப்பில் பேசப்படுவதுபோது தமிழ்ப் பொது வேட்பாளா் ஒருவா் களமிறக்கப்பட்டு, அவா் கணிசமான வாக்குகளைப் பெற்றால், அது தாக்கத்தை ஏற்படுத்தும். அவ்வாறான நிலையில், தமிழா் தரப்புடன் ஏதோ ஒரு டீலுக்கு வரவேண்டிய நிா்ப்பந்தம் பிரதான வேட்பாளா்களுக்கு ஏற்படலாம். தமிழ் வாக்குகள் இந்தத் தோ்தலில் நிா்ணயிக்கும் வாக்குகளாக அமையும் என்பது சஜித், அநுர மற்றும் ரணிலுக்குத் தெரிந்தே இருக்கின்றது.
ராஜபக்ஷக்களைப் பொறுத்தவரையில் தமிழ் வாக்குகள் தொடா்பில் அவா்களுக்கு அக்கறையில்லை. அதற்கு இரண்டு காரணங்கள் உள்ளன. முதலாவது – எந்தவொரு சந்தா்ப்பத்திலும் தமிழ் மக்கள் தமக்கு வாக்களிக்கமாட்டாா்கள் என்பது அவா்களுக்குத் தெரியும். சிங்களக் கடும் போக்காளா்களின் வாக்குகளைத்தான் அவா்கள் நம்பியுள்ளாா்கள். இரண்டாவது, வரப்போகும் ஜனாதிபதித் தோ்தலில் அவா்கள் போட்டியிட முற்படுவது வெற்றிபெறுவதற்காக அல்ல. தமது கட்சியை உயிா்ப்புடன் வைத்திருப்பதற்காகவும், பேரம் பேசலுக்கான வாய்ப்பாகவும்தான் அவா்கள் ஒருவரை களமிறக்க சிந்திக்கிறாா்கள்.
பெரமுனவின் மே தின பேரணியில் மகிந்த, பஸிலுக்கு நிகராக முன்வரிசையில் அமா்ந்திருந்த கோடீஸ்வர வா்த்தகரான தம்மிக பெரேரா பெரமுனவின் ஜனாதிபதி வேட்பாளராக களமிறங்கலாம் என அரசியல் வட்டாரங்களில் கூறப்படுகின்றது. அதனால்தான் அவருக்கு முன்னணியில் ஆசனம் ஒதுக்கப்பட்டு முன்னிலைப்படுத்தப்பட்டதாகவும் ஊகிக்கப்படுகின்றது.
தம்மிக பெரேரா பெரமுனவில் தமது தலைமைக்கு அவா் ஒருபோதும் சவாலாக வரமாட்டா் என ராஜபக்ஷக்கள் கருதுகின்றாா்கள். 2029 இல் வரப்போகும் அடுத்த ஜனாதிபதித் தோ்தலுக்கு நாமலைத் தயாா்படுத்துவதுதான் மஹிந்தவின் திட்டம். ஆனால், கடந்த தோ்தல்களில் ஆட்சி அமைத்த கட்சி என்ற முறையில், இந்தத் தோ்தலில் ஒதுங்கியிருக்கூடாது என்ற கட்சி ஆதரவாளா்களின் கருத்தை மஹிந்த ஏற்றுக்கொண்டிருக்கின்றாா். ரணில் தனது முடிவை அறிவித்த பின்னா்தான் ராஜபக்ஷக்கள் தமது வேட்பாளா் யாா் என்பதை அறிவிப்பாா்கள் என எதிா்பாா்க்கப்படுகின்றது.
ஏனைய பிரதான வேட்பாளா்களைப் பொறுத்தவரையில், தமிழ் வாக்குகளின் முக்கியத்துவத்தை அவா்கள் உணா்கின்ற போதிலும், அதற்காக வழங்கக்கூடிய வாக்குறுதிகள் சிங்கள மக்களுடைய ஆதரவுத் தளத்தைப் பாதித்துவிடக்கூடாது என்பதில் நிதானமாக இருக்கின்றாா்கள்.
ஜனாதிபதி ரணில் விக்கிரமசிங்கவைப் பொறுத்தவரையில் 13 என்பதுதான் அவரது தீா்வு. கடந்த வருடமே இதனை அவா் தெரிவித்திருந்தாா். ஆனால், 13 முழுமையாக – அதாவது காணி, பொலிஸ் அதிகாரங்களுடன் நடைமுறைப்படுத்தப்படும் என்று கூற அவா் தயாராகவில்லை. இந்த நிலையில் 13 பிளஸ் என்பது எதிா்பாா்க்கக்கூடியதல்ல. ஆனால், தமிழ் மக்களுடைய வாக்குகள் தமக்குத்தான் கிடைக்கும் என்ற நம்பிக்கையுடன் ரணில் இருக்கின்றாா். 2005 இலும் அவா் அப்படித்தான் இருந்தாா்.
சஜித் பிரேமதாஸவைப் பொறுத்தவரையிலும் அதேநிலைப்பாட்டில்தான் இருக்கின்றாா். ஆனால், 13 ஆவது திருத்தம் நடைமுறைப்படுத்தப்படும் என்பதை தமது தோ்தல் விஞ்ஞாபனத்தில் இணைத்துக்கொள்வதாக அண்மையில் அவரைச் சந்தித்த வடக்கு கிழக்கு சிவில் அமைப்பு ஒன்றுக்கு அவா் வாக்குறுதியளித்திருக்கிறாா். ஆனால், “முழுமையாக” என்ற சொல்லை அவரும் பயன்படுத்தவில்லை. ஏற்கனவே அரசியலமைப்பில் உள்ள ஒரு விடயத்தை நடைமுறைப்படுத்த வேண்டியதுதான் பதவியிலிருக்கும் அரசாங்கத்தின் பொறுப்பு. அதனை தோ்தல் விஞ்ஞாபனத்தில் சோ்ப்பதும், அதனை வாக்குறுதியாக வழங்குவதும் இலங்கையில் மட்டும்தான் நடைபெறுகிறது.
“முழுமையாக” என்றால் அதற்குள் பொலிஸ், காணி அதிகாரங்களும் வந்துவிடும். அது சிங்கள வாக்காளா்களைத் துாண்டிவிடுவதற்குப் பயன்படுத்தப்படலாம் என்பதால் மிகவும் நிதானமாகத்தான் சஜித்தும் கருத்துக்களை முன்வைக்கின்றாா். 2019 இல் நடைபெற்ற ஜனாதிபதித் தோ்தலில் வடக்கு, கிழக்கு மாகாணங்களில் சஜித் பிரேமதாஸ பெற்ற மொத்த வாக்குகள் சுமாா் 11 இலட்சத்து 50 ஆயிரம். இது வடக்கு – கிழக்கின் மொத்த வாக்குகளில் 75 வீதத்துக்கும் அதிகமானது. யாழ்ப்பாணத்தில் அவா் சுமாா் 84 வீதமான மக்கள் (312,722) சஜித்துக்கு வாக்களித்திருந்தாா்கள். வடக்கு, கிழக்கில் தனக்கு இந்தளவு அபரிமிதமான வாக்குகள் இருக்கின்றன என சஜித் நம்பிக்கொண்டிருக்கின்றாா் போலத் தெரிவிக்கின்றது. ஆனால், 2010, 2015 ஜனாதிபதித் தோ்தல்களைப் போல ராஜபக்ஷக்களைத் தோற்கடிக்க வேண்டும் என்பதற்காகத்தான் 2019 இலும் தமிழா்கள் வாக்களித்திருந்தனா் என்பதே உண்மை. அதனால், இம்முறை தமிழ் வாக்குகளை அவ்வளவு இலகுவாக சஜித்தினால் பெற்றுவிட முடியாது.
அநுரகுமார திஸாநாயக்க, “மாகாண சபைகளைத் தமிழா்கள் விரும்புகின்றாா்கள். அதனால், இருந்திட்டுப் போட்டும்” என்ற வகையில் பட்டும் படாமலும் யாழ்ப்பாணம் சென்றிருந்த போது கருத்து வெளியிட்டிருந்தாா். ஆனால், இனநெருக்கடிக்கான தீா்வாக அவா்கள் மாகாண சபைகளை ஏற்றுக்கொள்ளத் தயாராக இல்லை. வடக்கிலோ கிழக்கிலோ தமிழா்களுக்கு தான் கொடுக்கக்கூடிய எந்தவொரு வாக்குறுதியும் தமது சிங்கள வாக்குகளைப் பாதித்துவிடக் கூடாது என்பதில் அவரும் நிதானமாகவே இருக்கின்றாா்.
இந்த நிலையில் தமிழ்ப் பொது வேட்பாளா் என்ற எண்ணக் கரு தமிழா்கள் மத்தியில் வலுப்பெறுமா? அது வலுப்பெற்றால், திரிசங்கு நிலையில் – அதாவது 50 வீதத்தை யாரும் பெற முடியாத நிலையில் தோ்தலின் முடிவுகள் வெளிவருமா? தமிழா்களைப் பொறுத்தவரையில் இந்தத் தோ்தலை ஒரு தீா்க்கமானதாக அவா்கள் பயன்படுத்த முடியும். தமிழ்த் தேசியக் கட்சிகள் தமக்கிடையிலான முரண்பாடுகளை ஓரங்கட்டிவைத்துவிட்டு, நன்கு திட்டமிட்டு காய்களை நகா்த்தினால், ஜனாதிபதித் தோ்தலில் பலமான ஒரு செய்தியைக் கூறக்கூடியதாக இருக்கும்!
