அருளுடைய விழிகளொடு கனிவுதரு மொழிகளொடு
நெகிழ்கின்ற இதயத்தின் ஆழத்தின் கருணையொடு
பெருந்துயரம் களைகின்ற பேராண்மைத் திறத்தினொடு
பேரிடரு ளாழ்ந்துவிட்ட தமிழினத்தின் காவலனாய்
மருவிவரு மெதிரிபடை அதிரடியிற் சரிந்தழிய
மண்டியிட்டு உரிமை கேட்ட காலத்தையே மாற்றிவிட்டு
குருதியிடை நடைபயின்று ஆயுதங்கள் பறித்தெடுத்து
உலகினையே மயக்கிநிற்கும் காலத்தின் பெருந்தலைவன்
பெற்றவரை வளர்த்தவரைக் கைநெகிழ்ந்த குழந்தைகளின்
அன்னையாகி அரவணைத்து முத்தமிட்டு மகிழவைத்து
நற்றவத்தின் முத்துக்களாய் உதித்துவிட்ட மழலைகளை
வளர்த்தெடுக்கும் பெரும்பணியைச் செயலாக்கும் மதிவளத்தான்
விற்பன்னராய்த் தொழில்நுட்பக் கலைஞர்களாய் மண்காக்கும்
சாதனைகள் படைக்கின்ற சந்ததியை வளர்த்தெடுக்கும்
அற்புதங்கள் படைத்துயர்ந்து அவனியையே திகைக்க வைக்கும்
சற்குணனாம் பிரபாவெம் காலத்தின் பெருந்தலைவன்
பள்ளிசெல்லும் பிள்ளைகளின் கல்வியிலே கண்ணுறுத்தி
பகலிரவாய்ப் பாடநெறி கற்பதற்கு வசதிசெய்து
துள்ளியெழும் துடிப்புடனே தடைகள் தாண்டி விரைந்து கற்கும்
நுட்பமுள்ள பிள்ளைகளின் திறமைக்குப் பரிசளித்து
வள்ளலெனச் சிறந்துநின்று பாரிஎன்னும் நாமம் சூடி
களத்தினிடை தளபதியாய் மக்களிடை அன்னையுமாய்
உள்ளமெல்லாம் ஒளியேற்றும் ஆசானாய் எழுந்துநின்று
உலகினையே மயக்குகின்ற காலத்தின் பெருந்தலைவன்
