யாழில் இந்தியத் தூதுவராலயத்தை முற்றுகையிட்டு மீனவர்கள் போராட்டம் – பொலிஸார் இடைமறித்தமையால் பதற்றநிலை

இலங்கைக் கடற்பரப்புக்குள் அத்துமீறி அடாவடியில் ஈடுபடும் இந்திய மீனவர்களைத் தடுத்து நிறுத்துமாறு வலியுறுத்தி யாழ்ப்பாணத்தில் உள்ள இந்தியத் தூதுவராலயம் முன்பாக மீனவர்கள் இன்று போராட்டத்தில் ஈடுபட்டனர்.

யாழ்ப்பாணத்திலுள்ள பல்வேறு மீனவர் சங்கங்கள் இணைந்து இந்தியத் தூதரகத்தை முற்றுகையிடப் போவதாக அறிவித்திருந்ததால் தூதுவராலயம் முன்பாக பெரிமளவிலான பொலிஸார் குவிக்கப்பட்டிருந்ததால் அங்கு பெரும் பரபரப்பு ஏற்பட்டிருந்தது.

முற்பகல் 11 மணியளவில் மீனவர்கள் ஒன்றுதிரண்டு ஆர்ப்பாட்டப் பேரணியாகத் தூதுவராலயத்தை நோக்கி முற்றுகையிடச் சென்றபோது தூதுவராலயத்துக்கு அருகாமையில் போராட்டக்காரர்கள் பொலிஸாரால் இடைமறிக்கப்படனர்.

இதனைத் தொடர்ந்து மீனவர் சங்கப் பிரதிநிதிகள் 7 பேர் மட்டும் தூதுவராலயத்துக்குச் சென்று தூதுவரைச் சந்தித்து மகஜர் கொடுப்பதற்கு அனுமதிக்கப்பட்னர். இதன்போது போராட்டக்காரர்கள் இந்திய, இலங்கை அரசுகளுக்கு எதிராகப் பல்வேறு கோஷங்களை எழுப்பியவாறு தொடர்ந்தும் போராட்டத்தில் ஈடுபட்டனர்.

அவர்கள், இந்திய இழுவைப் படகு உரிமையாளர்களே எங்களையும் வாழவிடு, கடற்றொழிலாளர்களைப் பிரித்தாளும் தந்திரத்தைச் செய்யாதே, தொப்புள் கொடி உறவுகளைப் பிரிக்காதே, இந்திய அரசே இலங்கையின் வடபகுதி மீனவர்களைத் திரும்பிப் பார், அத்துமீறும் இந்திய மீனவர்களின் அராஜகம் அடியோடு ஒழிய வேண்டும், சட்டவிரோத அத்துமீறலைத் தடுத்து நிறுத்து, வடக்கு மீனவர்களின் வளங்களைச் சூறையாடாதே உள்ளிட்ட பல்வேறு வாசகங்கள் எழுதப்பட்ட பதாகைகளைத் தாங்கியவாறு போராட்டத்தில் ஈடுபட்டனர்.

இவ்வேளையில், போராட்டக்காரர்களைப் பொலிஸார் இடைமறித்தபோது அவர்கள், பொலிஸாருடன் வாக்குவாதத்தில் ஈடுபட்டனர். இதனால் அந்தப் பகுதியில் பெரும் பரபரப்பு ஏற்பட்டது. மேற்படி போராட்டத்தில் யாழ். மாவட்டத்தின் பல்வேறு இடங்களில் இருந்தும் வருகை தந்த மீனவர்கள் பலரும் கலந்து கொண்டிருந்தனர். அதேநேரத்தில் பெருமளவிலான பொலிஸாரும் புலனாய்வுப் பிரிவினரும் போராட்டக் களத்தில் குவிக்கப்பட்டிருந்தமையும் குறிப்பிடத்தக்கது.