நாடாளுமன்றத்தின் நாளைய கூட்டத்தில் தமிழர்களின் பிரச்சினை தொடர்பில் விரிவாக கலந்துரையாட முடியும் என பிரதமர் தம்மிடம் தெரிவித்ததாக மாவை சேனாதிராஜா தெரிவித்தார்.

தமிழ் பத்திரிகை ஒன்றுக்கு வழங்கிய விசேட செவ்வியில் இதை குறிப்பிட்டுள்ளார். தொடர்ந்தும் தெரிவிக்கையில்,

வடக்கு கிழக்கில் கடந்த அரசாங்கத்தினால் மேற்கொள்ளப்பட்ட அபிவிருத்தித் திட்டங்கள் மற்றும் யுத்தத்தினால் பாதிக்கப்பட்ட மக்களின் தீர்க்கப்படாத பிரச்சினைகள் தொடர்பில் மஹிந்த ராஜபக்ஷவுடன் கலந்துரையாடியதாக கூறினார்.

இது தொடர்பாக தாம் கவனம் செலுத்தியுள்ளதாகவும் நாளை நாடாளுமன்றம் கூடவுள்ள நிலையில் மேற்படி விடயம் தொடர்பில் விரிவாகக் கலந்துரையாட முடியுமென தம்மிடம் பிரதமர் தெரிவித்ததாகவும் குறிப்பிட்டுள்ளார்.

நாடாளுமன்றத்தில் ஜனாதிபதி கோட்டாபய ராஜபக்ஷவின் சிம்மாசன உரையையடுத்து இடம்பெற்ற தேநீர் விருந்துபசாரத்தின் போதே மேற்படி கலந்துரையாடல் இடம் பெற்றுள்ளது.

கடந்த அரசாங்கத்தின் காலத்தில் வடக்கு கிழக்கில் மீள்குடியேற்றம் மற்றும் வீடமைப்பு உள்ளிட்ட பல்வேறு அபிவிருத்தித் திட்டங்கள் முன்னெடுக்கப்பட்டுள்ளன. எனினும் அதற்கான நிதி விடுவிக்கப்படவில்லை.

நாடாளுமன்ற உறுப்பினர்கள் என்ற வகையில் நாம் அது தொடர்பில் எமது முழுமையான கவனத்தை செலுத்தியுள்ளோம்.

மேலும் பலாலி விமான நிலையத்திற்கு கிழக்குப் பிரதேசம் மற்றும் மயிலிட்டி பகுதிகளில் இன்னும் 2500 குடும்பங்களை மீள் குடியேற்ற வேண்டியுள்ளது.

அத்துடன் ஏனைய பகுதிகளில் மீள்குடியேற்றம் மேற்கொள்ளப்பட்டுள்ள நிலையில் அம் மக்கள் வீடில்லாமலும் பல்வேறு அடிப்படை வசதிகளுக்காகவும் எதிர்பார்ப்புடன் உள்ளனர்.

இத்தகைய பிரச்சினைகள் தொடர்பில் தாம் பிரதமருடன் கலந்துரையாடியதாகவும் அதனையடுத்து நேற்று முன்தினம் தமிழ்த் தேசியக் கூட்டமைப்பில் அங்கம் வகிக்கும் கட்சிகளின் தலைவர்களுக்கும் அது தொடர்பில் விளக்கியதாகவும் மாவை சேனாதிராஜா எம். பி. மேலும் தெரிவித்தார்.

ஜனாதிபதியின் கொள்கை விளக்க உரை மீதான விவாதம் நாளையும் நாளை மறுதினமும் நடைபெற உள்ள நிலையில் தமிழ் தேசிய கூட்டமைப்பு பிரதிநிதிகளுக்கும் பிரதமருக்கும் இடையில் சந்திப்பு நடைபெற இருப்பதாக அறிய வருகிறது.

முல்லைதீவு – மாங்குளம் பொலிஸ் பிரிவிற்கு உட்பட்ட முறிகண்டியில் இடம்பெற்ற மோட்டார் சைக்கிள் விபத்தில் ஒருவர் பலியாகியுள்ளார்.

இந்த விபத்து முறிகண்டி பிள்ளையார் ஆலயத்திற்கு அருகில் நேற்று இரவு 8.45 மணியளவில் இடம்பெற்றுள்ளது.

ஏ9 வீதியில் வேகமாக பயணித்த மோட்டார்சைக்கிள் வேகக்கட்டுப்பாட்டை இழந்து விபத்துக்குள்ளாகியது.

விபத்தில் சாந்தபுரம் பகுதியை சேர்ந்த 20 வயதுடைய சுப்பையா தர்ஷன் என்ற இளைஞரே உயிரிழந்துள்ளதாக பொலிஸார் தெரிவித்துள்ளனர்.

சம்பவம் தொடர்பான விசாரணைகளை மாங்குளம் பொலிஸார் மேற்கொண்டு வருகின்றனர்.

அரசால் கைது செய்யப்படுபவர்களின் வாக்கு வங்கி அதிகரிப்பதால், தன்னையும் அரசு கைது செய்யவேண்டும் என நாடாளுமன்ற உறுப்பினர் மனோ கணேசன் கோரிக்கை விடுத்துள்ளார்.

கொழும்பில் நேற்று ஞாயிற்றுக்கிழமை ஊடகவியலாளர்களின் கேள்விகளுக்கு பதிலளிக்கும்போதே அவர் இவ்வாறு குறிப்பிட்டார். அத்துடன் எதிரணியினரை வேட்டையாடும் நடவடிக்கையைக் கைவிட்டு மக்களுக்கு வழங்கப்பட்ட வாக்குறுதிகளை நிறை வேற்றுமாறு அவர் அரசைக் கேட்டுள்ளார்.

மத்திய வங்கி பிணைமுறி தொடர்பாக விசாரணையை நடத்துமாறும் அர்ஜூன மகேந்திரனைச் சிங்கப்பூரிலிருந்து இலங்கைக்குக் கொண்டு வருமாறும் தெரிவித்த அவர், அவ்வாறு விசாரணை செய்யுமிடத்தில் நல்லாட்சி அரசில் இருந்த அழுக்கை விட அதற்கு முன்னைய அரசில் இருந்த பெருமளவான அழுக்குகளும் வெளிவரும் எனவும் குறிப்பிட்டார்.

இதேவேளை, ஜனாதிபதித் தேர்தலில் வழக்கப்பட்ட வாக்குறுதிக்கு அமைய தோட்டத் தொழிலாளர்களுக்கு வழக்கப்படுவதாகத் தெரிவித்த ஆயிரம் ரூபா சம்பள உயர்வை வழங்க உடனடியாக நடவடிக்கை எடுக்குமாறும் அவர் அரசைக் கோரியுள்ளார்.

தற்போது சம்பந்தன் தேர்தலில் போட்டியிடமாட்டேன் எனக் கூறியுள்ள நிலையில், மாவை சேனாதிராசா கையறு நிலையில் உள்ளபோது, தமிழ் மக்களுக்குத் தலைமை தாங்கப்போவது சுமந்திரனா என்பதை மக்கள் தீர்மானிக்கவேண்டும் என ஈ.பி.ஆர்.எல் எவ். கட்சியின் தலைவர் சுரேஷ் பிறேமச்சந்திரன் தெரிவித்தார்.

வட மாகாண முன்னாள் முதலமைச்சர் விக்னேஸ்வரனின் தமிழ் மக்கள் கூட்டணி, ஈ.பி.ஆர்.எல்.எவ், தமிழ்த் தேசியக் கூட்டமைப்பிலிருந்து வெளியேறிய இன்னும் பலர் இணைந்து தமிழர் ஐக்கிய முன்னணி என்ற அமைப்பை உருவாக்கியுள்ளதாகவும் அவர் கூறியுள்ளார்.

முல்லைத்தீவு -தண்ணீரூற்று பகுதியில் நேற்று கட்சி அலுவலகத்தைத் திறந்து வைத்து கருத்து தெரிவிக்கும் போதே அவர் இந்த விடயத்தை குறிப்பிட்டார்.

அவர் மேலும் கூறுகையில்-

“இப்போது தெரிவு செய்யப்பட்டுள்ள ஜனாதிபதி, தான் சிங்களமக்களால் தெரிவு செய்யப்பட்டார் என்றும், எனவே அதற்குத்தான் கடமைப்பட்டுள்ளார் என்றும் , ஆகையால் பெரும்பான்மை இனத்தவர்களின் ஆணைகளை அனைவரும் மதிக்க வேண்டும் என்றும் கூறுகின்றார்.

சில வேளைகளில் பெரும்பான்மை இனத்தவர்கள் அவருக்கொரு ஆணையை வழங்கியிருக்கலாம். ஆனால் அதே சமயம் வடக்கு- கிழக்கிலுள்ள மற்றொரு தேசிய இனமான, தமிழ்த் தேசிய இனம் என்பது இன்னுமொரு ஆணையைக் கொடுத்திருக்கின்றது.

எமது இனம், மொழி, நிலம் என்பன காப்பாற்றப்பட வேண்டும், எமக்கான உரிமைகள் கிடைக்கப் பெற வேண்டும், அதிகாரங்கள் பிரித்துக் கொடுக்கப்பட வேண்டும், நாம் எதிர்நோக்கும் பிரச்சினைகள் தீர்க்கப்பட வேண்டும் என்பதற்காகவே தமிழ் மக்கள் வாக்களித்துள்ளனர்.

ஆகவே ஒட்டுமொத்தமாக நாட்டின் ஜனாதிபதி எனச் சொல்லக்கூடிய ஒருவர், வெறுமனே சிங்கள மக்கள் கொடுத்த ஆணையை மாத்திரமல்ல, அவருக்கு எதிராகவே இருந் தாலும் தமிழ் மக்கள் வழங்கிய ஆணையையும் பரிசீலிக்க வேண்டும்.

இந்த நாட்டில் வாழ்கின்ற ஒட்டுமொத்த மக்களுக்குமான ஜனாதிபதியாக அவர் இருந்தால், அவர் இவ்வாறான விடயங்களை நிராகரிக்க முடியாது. ஒவ்வொரு காலகட்டங்களிலும் வருகின்ற அரசுகள், இந்த நாட்டில் இனங்களுக்கிடையில் பிரச்சினை இருக்கின்றது என்பதை ஏற்றுக்கொள்கின்றன.

பிரச்சினைகளுக்கான தீர்வுகளுக்காகக் குழுக்களும் உருவாக்கப்பட்டிருக்கின்றன. அவ்வாறு உருவாக்கப்பட்ட குழுக்களால் ஆவணங்கள் தயாரிக்கப்பட்டாலும், எந்தச் சிங்களத் தலைமைக்கும் அதனை நடைமுறைப்படுத்துவதற்கான திராணியோ, பக்குவமோ கிடையாது. அதனைப் போட்டு மிதித்து இல்லாமல் செய்கின்ற போக்கைத்தான் நாம் தொடர்ச்சியாகப் பார்க்கக்கூடியதாகவுள்ளது.

தற்போது வந்திருக்கக்கூடிய கோட்டாபயவின் தலைமை என்பது எல்லாவற்றையும் நிராகரித்ததுடன், தற்போது பிரச்சினை என்று எதுவும் கிடையாது எனவும் அபிவிருத்தி செய்தால் போதுமானது என்றும் கூறுகிற” என்றார்.

ஹப்புத்தளைப் பிரதேசத்தில் இலங்கை விமானப்படைக்குச் சொந்தமான வை – 12 ரக விமானம் விபத்துக்குள்ளாகியமை குறித்து ஆராய்வதற்காக சீனாவிலிருந்து விசேட குழுவினர் இலங்கைக்கு வரவுள்ளனர்.

இந்த விமானமானது சீனாவின் யஹபின் நிறுவனத்தால் தயாரிக் கப்பட்டது. சுமார் 30 லட்சம் டொலர்கள் பெறுமதியானது. விபத்து தொடர்பில் ஆராய்வதற்காக இந்த விமானத்தைத் தயாரித்த சீனாவின் யஹபின் நிறுவனத்தின் தொழில்நுட்பக் குழுவினர் உள்ளிட்ட விசாரணை அதிகாரிகள் விரைவில் இலங்கைக்குப் பயணம் செய்யவுள்ளனர் .

இதேவேளை, சீனாவால் தயாரிக்கப்பட்டு இலங்கை விமானப் படையால் கொள்வனவு செய்யப்பட்ட வை-08 ரக விமானம் கடந்த 2002ஆம் ஆண்டில் விபத்துக்குள்ளானதில் 5 படையினர் உயிரிழந்திருந்தமையும் குறிப்பிடத்தக்கது.

மிகவும் ஆபத்தான வைரஸ் கிருமிகள் சீனாவில் பரவி வருவதுடன், அதனால் பெருமளவான மக்கள் பாதிக்கப்பட்டுள்ளனர். சீனாவின் குபே மாநிலத்தில் உள்ள வூகான் பகுதியில் பெருமளவான மக்கள் பாதிக்கப்பட்டுள்ளதாக தெரிவிக்கப்படுகின்றது.

இந்த வைரஸ் கிருமிகள் வேறு நாடுகளுக்கும் பரவும் ஆபத்துக்கள் உள்ளபோதும், சிறீலங்கா மக்களை பெருமளவில் தாக்கலாம் என தெரிவிக்கப்படுகின்றது.

ஒவ்வொரு வருடமும் நூறு ஆயிரத்திற்கும் மேற்பட்ட சீனா மக்கள் சிறீலங்காவுக்கு வருகை தருவதால் இந்த ஆபத்துக்கள் அதிகம் என நம்பப்படுகின்றது.

இந்த வைரஸ் கிருமிகள் மனிதர்களிடம் இருந்து மனிதர்களுக்கு தொற்றாது என சீன அதிகாரிகள் தெரிவித்துள்ளபோதும் அது மனிதர்களிடம் இருந்து மனிதர்களுக்கு பரவும் என கொங் கொங் நாட்டின் நுண்ணுயிர் ஆராட்சியாளர்கள்

தெரிவித்துள்ளனர். இதுவரையில் 44 பேர் பாதிக்கப்பட்டுள்ளதாகவும், அதில் 11 பேர் ஆபத்தான நிலையில் உள்ளதாகவும் சீனா அதிகாரிகள் தெரிவித்துள்ளனர்.

காச்சல் மற்றும் மூச்சுத்திணறல் போன்றவையே இதன் அறிகுறிகளாகும். 2003 ஆம் ஆண்டு சீனாவில் பரவிய சார்ஸ் வைரஸ் 37 நாடுகளுக்கு பரவியதுடன், 774 பேர் பலியாகியிருந்தனர், 8000 பேர் பதிக்கப்பட்டிருந்தனர். கொங்கொங் நாட்டில் மட்டும் 299 பேர் பலியாகியும், 1755 பேர் பாதிக்கப்பட்டும் இருந்தனர்.

அதனைப் போலவே இந்த வைரஸ் கிருமியும் மக்களைத் தாக்கலாம் என்ற அச்சம் தோன்றியுள்ளது.

கடந்த வெள்ளிக்கிழமை (03) சிறீலங்காவின் கப்புத்தளை பகுதியில் சிறீலங்கான வான்படையின் வை-12 விமானம் வீழ்ந்து நொருங்கிய சம்பவமானது சிறீலங்கா வான்படை மற்றும் தனியார் வானூர்தி சேவைகளைப் பயன்படுத்தும் மக்களுக்கு விடுக்கப்பட்டுள்ள எச்சரிக்கையாகும் என கொழும்புத் தகவல்கள் தெரிவித்துள்ளன.

சீனாவில் தயாரிக்கப்பட்ட கெர்பியன் வை-12 மற்றும் சியான் எம்.ஏ-60 ரக விமானங்களை சிறீலங்கா வான்படையினர் பயன்படுத்தும் போதும், அவற்றை பாதுகாப்பு நடைமுறைகள் மற்றும் பாதுகாப்பு பரிசோதனைகள் மேற்கொள்ளாது பொதுமக்களுக்கான சேவைகளுக்கும் பயன்படுத்திவருவதாக தெரிவிக்கப்படுகின்றது.

கடந்த வெள்ளிக்கிழமை வீழ்ந்து நெருங்கிய விமானம் தொழில்நுட்பக் கோளாறு காரணமாக வீழ்ந்துள்ளதாக சிறீலங்கா வான்படை தெரிவித்தாலும், அது பறப்பதற்கு தகுதியற்ற விமானம் என்ற தகவல்கள் தற்போது வெளிவந்துள்ளன.

2015 ஆம் ஆண்டே இந்த விமானங்களின் பாதுகாப்பு சான்றிதழ்கள் குறித்து கொழும்பு ஊடகங்கள் கேள்விகளை எழுப்பிய போதும் சிறீலங்கா அரசும் அதன் வான்படையும் பொதுமக்களின் பாதுகாப்பு தொடர்பில் அக்கறை காண்பிக்கவில்லை என தெரிவிக்கப்படுகின்றது.

சிறீலங்கா வான்படையினரிடம் தற்போது இரண்டு வை-12 விமானங்கள் உள்ளன. எனினும் அவர்கள் பொதுமக்களுக்கான சேவைகளை வழங்குவதன் மூலம் வருமானத்தை பெறுவதற்காக Helitours என்ற நிறுவனத்தின் இணையத்தளத்தின் மூலம் தற்போதும் விளம்பரங்களை மேற்கொண்டு வருகின்றனர்.

பலாலி, திருமலை மற்றும் மட்டக்களப்பு பகுதிகளுக்கு சேவைகளை மேற்கொள்ளும் இந்த நிறுவனத்தில் மக்கள் தற்போதும் ஆசனங்களைப் பதிவுசெய்து வருவது மிகவும் கவலை தருவதாக தெரிவிக்கப்படுகின்றது.

சீனா தயாரிப்பான கெர்பியன் வை-12 விமானம் மற்றும் சியான் எம்.ஏ-60 ஆகிய விமானங்களுக்கு Certificates of Airworthiness (COA) என்னும் பாதுகாப்புச் சான்றிதழ் இல்லை என தெரிவிக்கப்படுகின்றது.

காணாமல் ஆக்கப்பட்ட தனது மகனைத் தேடி இன்று வரை போராடி வந்த ஒரு தந்தை மன்னாரில் உயிரிழந்துள்ளார்.

மன்னார் ஓலைத்தொடுவாய் பகுதியைச் சேர்ந்த சூசைப்பிள்ளை இராசேந்திரம் என்னும் 73 வயதுடையவரே இவ்வாறு மரணத்தைத் தழுவியவராவார்.

இவரது மகன் இராசேந்திரம் அன்ரனி ரஞ்சன் என்பவர் 2008ஆம் ஆண்டு மன்னார் ஓலைத்தொடுவாய் பகுதியில் விசாரணைக்கு அழைத்துச் செல்லப்பட்ட சமயத்தில் காணாமல் போயிருந்தார். இவர் திருமணமானவர் என்பது குறிப்பிடத்தக்கது.

அன்று முதல் இன்று வரை தனது மருமகளுடன் தனது மகனைத் தேடி தொடர்ந்து நீதிகோரி போராட்டங்களில் ஈடுபட்டு வந்தார்.

காணாமல் ஆக்கப்பட்டோர் சங்கத்தின் வவுனியா மாவட்ட செயலாளராக செயற்பட்டு வரும் ஜெயக்குமாரி என்பவரின் கணவனே காணாமல் ஆக்கப்பட்டவர் என்பதுடன், அவரின் தந்தையாரே மரணத்தை தழுவியுள்ளார்.